Ore i mexü̃ ga Márcu ümatüxü̃ 5

Yatü ga Gadáracüã̱x ga ngo̱xo nawa yexmagüxü̃

(Mt. 8.28-34; Lc. 8.26-39)

1Rü naxtaxaarü tocutüwa nangugü ga Gadáraanewa.

2-3Rü yexguma marü nguewa ínaxüegu, rü yéma Ngechuchuca̱x nixũ ga wüxi ga yatü ga ngo̱xo nawa yexmaxü̃. Rü yema yatü rü duü̃xẽgüchíque̱xewa ne naxũ, yerü yexma nixĩ ga yanaxauchigünexü̃xü̃. Rü taxúexü̃ma nanguxü̃ nax tayanáixü̃, woo cadénamaxã.

4Rü woo muẽ̱xpü̱xcüna cadénamaxã nayana̱i̱xparagü rü nayana̱i̱xchacüügü, natürü nüma rü guxü̃guma íraxü̃gu inanacauü̃güama, rü yemaacü taxúexü̃ma nanguxü̃.

5Rü ngunecü rü chütacü rü yuetachique̱xetanügu rü ma̱xpǘnegügu narüxũũxü̃. Rü yexma nanacaeane, rü nutamaxã nügügu napogü.

6Natürü yexguma yáxü̃gutama Ngechuchuxü̃ nada̱u̱xgu, rü naxca̱x inañaãchi, rü nape̱xegu nayacaxã́pü̱xü.

7Rü aita naxüãcüma ñanagürü nüxü̃: —¿Tü̱xcüü̃ nua choxü̃ cuyachixewe, Pa Ngechuchux ya Tupana ya Guxãétüwa Ngẽxmacü Nanex? Rü Tupanaégagu cuxü̃ chaca̱a̱xü̃ nax tama ngúxü̃ choxü̃ quingexẽẽxü̃ —ñanagürü.

8Rü yemaacü nidexa ga yema ngo̱xo yerü Ngechuchu rü marü ñanagürü nüxü̃: —Pa Ngo̱xox, ¡ínaxũxü̃ nawa ya yimá yatü! —ñanagürü.

9Rü yexguma ga Ngechuchu rü nüxna naca, rü: —¿Ta̱xacü nixĩ i cuéga? —ñanagürü. Rü nüma ga ngo̱xo nanangãxü̃, rü ñanagürü: —Muxũchixü̃ nixĩ i chauéga, erü tamu i tomax —ñanagürü.

10Rü poraãcü Ngechuchuxü̃ naca̱a̱xü̃gü nax tama ínawoxü̃ãxü̃ca̱x ga yema naanewa.

11Rü yema nachicaarü ngaicamana ga ma̱xpǘnepechinüwa rü nayexmagü ga muxü̃ma ga cuchigü ga yéma chibüexü̃.

12Rü yemaca̱x ga yema ngo̱xogü rü Ngechuchuxü̃ naca̱a̱xü̃gü, rü ñanagürügü: —¡Ngéma cuchitanüwa toxü̃ namugü nax nagu tachocuxü̃ca̱x! —ñanagürügü.

13Rü Ngechuchu rü: —Ngü̃ —ñanagürü. Rü yexguma ga yema ngo̱xogü rü gumá yatüwa ínachoxü̃, rü yema cuchigügu nayachocu. Rü yema cuchigü ga 2,000 ixĩgüxü̃ rü inaxü̃ãchi, rü naxtaxacutüarü ma̱xpǘxü̃wa nayarüyuxgü. Rü yexma nayi.

14Rü yema cuchigüarü dauruü̃gü rü ĩanewa nabuxmü. Rü ĩanewa rü yema ĩanearü ngaicamana ipeagüxü̃ ga duü̃xü̃gütanüwa nüxü̃ nayarüxugügü ga yema üpetüxü̃. Rü ga duü̃xü̃gü rü ínayadaugü ga yema ngupetüxü̃.

15Rü yexguma Ngechuchu íyexmaxü̃wa nangugügu, rü yéma nüxü̃ nadaugü ga gumá yatü ga ngo̱xo nawa yexmagüchirécü. Rü yéma narüto, rü naxãxchiru, rü meama naãxẽxü̃ nacua̱x. Rü poraãcü naba̱i̱xãchiãẽgü ga duü̃xü̃gü.

16Rü yema cuchigüarü dauruü̃gü ga nüxü̃ daugüxü̃ ga yema ngupetüxü̃ rü yema duü̃xü̃gümaxã nüxü̃ nixugüe ga guxü̃ma ga yema ngupetüxü̃ namaxã ga gumá yatü ga ngo̱xo nawa yexmagüchirécü, rü yema ngupetüxü̃ namaxã ga yema cuchigü.

17Rü yexguma yemaxü̃ naxĩnüegu ga duü̃xü̃gü, rü inanaxügüe ga Ngechuchuxü̃ nax naca̱a̱xü̃güxü̃ nax ínaxũxũxü̃ca̱x ga yema naanewa.

18Rü yexguma wenaxarü nguegu yaxüegu ga Ngechuchu, rü gumá yatü ga ngo̱xoã̱xchirécü, rü nüxü̃ naca̱a̱xü̃ nax Ngechuchuwe naxũxü̃ca̱x.

19Natürü ga Ngechuchu rü tama nanaxwa̱xe, rü ñanagürü nüxü̃: —¡Cuchiü̃wa naxũ rü cutanüxü̃maxã nüxü̃ yarüxu i guxü̃ma i ngẽma cuxca̱x naxüxü̃ ya Cori ya Tupana, rü ñuxãcü nüxü̃́ nax cungechaü̃tümüxü̃! —ñanagürü.

20Rü nüma ga gumá yatü rü ínixũ. Rü inanaxügü ga guxü̃ma ga Decaporíchiuanewa yexmagüne ga ĩanegüwa nüxü̃ nax yaxuxü̃ ga yema Ngechuchu naxca̱x üxü̃. Rü guxü̃ma ga duü̃xü̃gü rü naba̱i̱xãchiãẽgü.

Yáiruxacüchiga rü yema nge ga Ngechuchuchirugu ingógücüchiga

(Mt. 9.18-26; Lc. 8.40-56)

21Rü yexguma nguegu naxtaxaarü tocutüwa nataeguxgu ga Ngechuchu, rü muxü̃ma ga duü̃xü̃gü rü naxca̱x yexma nangutaque̱xegü. Rü nüma rü naxtaxapechinüwa nayexma.

22Rü yexguma yéma nayexmayane, rü yéma naxü̃tawa nangu ga wüxi ga norü ngutaque̱xepataü̃arü ãẽ̱xgacü ga Yáirugu ãégacü. Rü yexguma Ngechuchuxü̃ nada̱u̱xgu, rü nape̱xegu nanangücuchi.

23Rü poraãcü nüxü̃ naca̱a̱xü̃, rü ñanagürü nüxü̃: —Chauxacü rü ituraxüchi. Rü chanaxwa̱xe i ngéma cuxũ nax ngĩxü̃ cuyarüngõgüxü̃ca̱x nax ngĩxca̱x yataanexü̃ca̱x rü namaxü̃xü̃ca̱x —ñanagürü.

24Rü yexguma ga Ngechuchu rü nawe narüxũ. Rü muxü̃ma ga duü̃xü̃gü ínayaxümücügü. Rü yéma nayaxũxtügü.

25Rü yema muxü̃ ga duü̃xü̃gütanüwa iyexma ga wüxi ga nge ga 12 ga taunecü ãgüechacü.

26Rü muxü̃ma ga dutúrugü ngĩxü̃ naxüxü̃gü rü poraãcü ngúxü̃ ngĩxü̃ ningexẽẽgü. Rü yemaacü natüca̱xma ngĩxü̃ igu̱xẽxẽ ga guxcü ga ngĩrü diẽru. Natürü tama ngĩxca̱x nitaane, rü niyexeraguchigü ga ngĩrü da̱xawe.

27Rü ü̃pa rü marü Ngechuchuxü̃ ixĩnüchiga rü yemaca̱x yema muxü̃ma ga duü̃xü̃gütanüwa naweama ne ixũ rü Ngechuchuchirugu iyangõgü.

28Yerü ñaxü̃gu irüxĩnü: —Ngẽxguma chi naxchiruxü̃mare chingõgügu, rü chi cha̱u̱xca̱x nitaane —ñaxü̃gu irüxĩnü.

29Rü yexgumatama ínayachaxãchi ga ngĩgü, rü nüxü̃ iyacua̱xãchi ga ngĩxĩnewa nax marü ngĩxca̱x yataanexü̃.

30Natürü ga Ngechuchu rü nüxü̃ nicua̱xãchi nax nawa ínaxũxũxü̃ ga pora. Rü naxca̱x nadauegu ga yema muxü̃ma ga duü̃xü̃gü, rü nüxna naca, rü ñanagürü: —¿Texé tixĩ ya chauxchirugu ingõgüxe? —ñanagürü.

31Rü norü ngúexü̃gü nanangãxü̃gü, rü ñanagürügü: —Cuma nüxü̃ cudau nax muxü̃ i duü̃xü̃gü ngéma cuxü̃ yaxũxtügüxü̃ rü ngẽxguma rü ta: “¿Texé ya choxü̃ ingõgüxe?” ñacuxü̃ —ñanagürügü.

32Natürü ga Ngechuchu rü nüxü̃ nidaugüãchi nax tüxü̃ nadauxü̃ca̱x nax texé tixĩxü̃ ya yíxema nüxü̃ ingõgüxe.

33Rü yexguma ga yema nge rü ngĩrü muü̃maxã iyadu̱rux rü naxü̃tawa ixũ, yerü nüxü̃ icua̱x ga yema ngĩxü̃ ngupetüxü̃. Rü nape̱xegu iyacaxã́pü̱xü, rü aixcüma namaxã nüxü̃ iyaxu nax ngĩma yixĩxü̃ nax naxchirupechinügu yangõxü̃.

34Rü nüma ga Ngechuchu rü ñanagürü ngĩxü̃: —Pa Chauxacüx, curüme erü cuyaxõ. ¡Rü taãẽãcü íixũ, erü marü curü da̱xawewa cuxca̱x nitaane! —ñanagürü.

35Rü yexguma íyadexayane, yéma nangugü ga ñuxre ga natanüxü̃ ga guma ngutaque̱xepataü̃arü ãẽ̱xgacü rü ñanagürügü nüxü̃: —Cuxacü rü marü iyu. ¿Tü̱xcüü̃ nüxü̃ cuchixeweecha ya Ngúexẽẽruxü̃? —ñanagürügü.

36Natürü ga Ngechuchu rü tama naga naxĩnü ga yema duü̃xü̃güarü dexa. Rü yemaca̱x guma ngutaque̱xepataü̃arü ãẽ̱xgacüxü̃ ñanagürü: —¡Taxṹ i cumuü̃xü̃! ¡Rü yaxõmare! —ñanagürü.

37Rü yexguma ga Ngechuchu rü ínayagagü ga Pedru rü Chantiágu rü Cuáü̃ ga Chantiáguenexẽ. Natürü tama nanaxwa̱xe nax texé ga togue nawe rüxĩxü̃.

38Rü yexguma guma ngutaque̱xepataü̃arü ãẽ̱xgacüpatawa nangugügu, rü Ngechuchu nüxü̃ nadau nax íyacuxcuxü̃ rü poraãcü aita naxüeãcüma naxauxexü̃ ga duü̃xü̃gü.

39Rü gumá ĩpatagu naxücu ga Ngechuchu, rü ñanagürü: —¿Tü̱xcüü̃ ípicuxcu rü ngẽmaãcü pexauxe? Ngẽma bucü rü tama iyu. Rü ipemare —ñanagürü.

40Rü nüxü̃ nacugüeama ga duü̃xü̃gü. Natürü nüma ga Ngechuchu rü ĩã̱xtüwa nanamugü ga guxü̃ma. Rü ngĩnatümaxã rü ngĩémaxã, rü yema íyaxümücügüxü̃maxã nixücu ga ínayexmaxü̃wa ga yema bucü.

41Rü ngĩxme̱xgu nayayauxãchi, rü ñanagürü ngĩxü̃: —Tarita cumi —ñanagürü. Rü ngẽma ore rü ñaxü̃chiga nixĩ: “¡Írüda, Pa Bucü, ñacharügü cuxü̃!” ñaxü̃chiga nixĩ.

42Rü yexgumatama ga yema bucü ga 12 ga taunecü ngĩxü̃́ yexmacü, rü íirüda rü iyaxũ. Rü poraãcü naba̱i̱xãchiãẽgü ga duü̃xü̃gü.

43Natürü ga Ngechuchu rü poraãcü nüxna nanachu̱xu nax nüxü̃ yaxugüexü̃ca̱x ga yema ngupetüxü̃. Rü ñu̱xũchi nanamu nax ngĩxü̃ naxüwemügüxü̃ca̱x ga yema bucü.

Markert nå:

Ore i mexü̃ ga Márcu ümatüxü̃ 5: tcaP

Marker

Kopier

Sammenlign

Del