Ore i mexü̃ ga Márcu ümatüxü̃ 6

Nacharétuwa nayexma ga Ngechuchu

(Mt. 13.53-58; Lc. 4.16-30)

1Rü yéma inaxũãchi ga Ngechuchu, rü norü ĩane ga Nacharétuwa naxũ. Rü norü ngúexü̃gü rü nawe narüxĩ.

2Rü yexguma ngü̃xchigaarü ngunexü̃wa nanguxgu rü inanaxügü nax nangúexẽẽtaexü̃ ga ngutaque̱xepataü̃wa. Rü yema muxü̃ma ga duü̃xü̃gü ga yéma irüxĩnüexü̃, rü naba̱i̱xãchiãẽgü. Rü nügüna nacagüe rü ñanagürügü: —¿Ngextá naxca̱x nangu̱x i guxü̃ma i ngẽma ngu̱xẽẽtae? ¿Rü ngextá nanayaxu i ngẽma cua̱x? ¿Rü ñuxãcü nanaxü i ngẽma mexü̃gü i taxü̃gü i naxüxü̃?

3¿Taux ẽ̱xna ñaa yixĩxü̃ i corapina i Ngechuchu i María ngĩne, i Chantiágu rü Yúche rü Chimóü̃ rü Yúdaenexẽ ixĩxü̃? ¿Rü taux ẽ̱xna i naeya̱xgü i nuxma tatanügu naxãchiü̃güxü̃? —ñanagürügü. Rü yemaca̱x ga yema duü̃xü̃gü rü tama nüxü̃́ nayaxõgü.

4Natürü ga Ngechuchu rü ñanagürü nüxü̃: —Wüxi i Tupanaarü orearü uruxü̃ rü guxü̃wama i duü̃xü̃gü rü nüxü̃ nicua̱xüü̃gü. Natürü norü ĩanewatama rü natanüxü̃tanüwatama rü napatawatama rü tama aixcüma namaxã nataãẽgü —ñanagürü.

5Rü yemaca̱x taxuacüma yéma nanaxü ga muxü̃ma ga mexü̃gü ga Tupanaarü poramaxã naxüxü̃. Rü noxretama ga duü̃xü̃gü ga ida̱xaweexü̃xü̃xicatama ningõgü nax naxca̱x yataanegüxü̃ca̱x.

6Rü naba̱i̱xãchiãxẽ ga Ngechuchu, yerü yema duü̃xü̃gü rü tama nüxü̃́ nayaxõgü.

Ngechuchu rü norü ngúexü̃güxü̃ nimugü

(Mt. 10.5-15; Lc. 9.1-6)

Rü Ngechuchu rü guma ngaicamagüne ga ĩanexacügügu nixũgüchigü, rü nayangúexẽẽtanü ga duü̃xü̃gü.

7Rü namaxã nangutaque̱xe ga yema 12 ga norü ngúexü̃gü, rü inanaxügü nax taxrechigü inamuãchitanüãxü̃. Rü nüxna nanaxã ga pora nax ínawoxü̃ãxü̃ca̱x ga ngo̱xogü.

8Rü nüxna naxãga nax taxuxü̃ma íyangegüxü̃ca̱x ga norü namawaxü̃, rü bai ga choca rü bai ga paũ rü bai ga norü diẽru. Rü nanaxwa̱xe nax norü naixmena̱xãxicatama íyangegüxü̃.

9Rü namaxã nüxü̃ nixu nax nacuaixcuxü̃ ga norü chapatu. Natürü tama nanaxwa̱xe ga taxre ga naxchiru nax íyangegüxü̃.

10Rü ñanagürü nüxü̃: —Rü ngẽxguma wüxi ya ĩxgu pechocuxgu, ¡rü ngẽxma pepegü ñu̱xmata ipexĩãchi̱x nawa ya yima ĩane!

11Rü ngẽxguma wüxi ya ĩanewa tama mea pexü̃ nayauxgüchaü̃gu rü tama pexü̃́ inaxĩnüẽchaü̃gu, ¡rü ípechoxü̃ i ngéma! Rü ngẽxguma ipexĩãchigu, ¡rü ipenapagü i perü üxaxü̃cutü nax ngẽmawa nüxü̃ nacua̱xgüxü̃ca̱x nax nataxü̃ tá i norü poxcu i ngẽxguma nagu̱xgu i naane! —ñanagürü.

12Rü yexguma inaxĩãchi ga norü ngúexü̃gü. Rü duü̃xü̃gümaxã nüxü̃ nixugüe nax nüxü̃ naxoexü̃ca̱x ga nacüma ga chixexü̃ rü Tupanaca̱x nadaugüxü̃.

13Rü ínanawoxü̃ ga muxü̃ma ga ngo̱xogü. Rü chíxü̃maxã yachagüãcüma nanameexẽxẽ ga muxü̃ma ga ida̱xaweexü̃.

Nayu ga Cuáü̃ ga báiü̃xẽxẽruxü̃

(Mt. 14.1-12; Lc. 9.7-9)

14Rü Ngechuchuchigaxü̃ naxĩnü ga ãẽ̱xgacü ga Eróde, yerü guxü̃wama duü̃xü̃gü poraãcü nachiga nidexagü. Rü yexguma ga Eróde rü ñanagürü: —Rü ngẽma Ngechuchu nixĩ i Cuáü̃ i báiü̃xẽẽruxü̃ ixĩxü̃ rü wena namaxü̃, rü ngẽmaca̱x nixĩ i nüxü̃́ nangẽxmaxü̃ i pora nax naxüaxü̃ca̱x i ngẽma taxü̃ i mexü̃gü i Tupanaarü poramaxã naxüxü̃ —ñanagürü.

15Natürü ga togü rü ñanagürügü: —Orearü uruxü̃ ga Ería nixĩ —ñanagürügü. Rü togü rü ñanagürügü: —Wüxi i Tupanaarü orearü uruxü̃ i nũxcümaü̃güxü̃ i orearü uruü̃gürüxü̃ ixĩxü̃ nixĩ —ñanagürügü.

16Natürü yexguma yemaxü̃ naxĩnügu ga Eróde, rü ñanagürü: —Rü ngẽma nixĩ i Cuáü̃ ga chorü churaragüxü̃ chidaeruxẽẽxü̃, rü ñu̱xma rü wenaxarü namaxü̃ —ñanagürü.

17Rü yema ñanagürü ga Eróde yerü ü̃pa Cuáü̃xü̃ niyaxu rü poxcupataü̃gu cadénamaxã nayachota. Rü yemaacü nanaxü ngĩgagu ga Erodía ga naenexẽ ga Ferípema̱xchire̱x ixĩcü. Natürü ga Eróde rü ngĩmaxã naxãxma̱x.

18Rü ü̃paacü ga Cuáü̃ rü Eródemaxã ñanagürü: —Tama name i cuxma̱xü̃ ngĩxü̃ quixĩxẽxẽ i cuenexẽma̱x —ñanagürü.

19Rü yemaca̱x ga Erodía rü poraãcü Cuáü̃chi ixai, rü inaxwa̱xe nax yamáaxü̃, natürü taxucürüwa íiyama̱x.

20Yerü ngĩte ga Eróde rü Cuáü̃xü̃ namuü̃, yerü nüxü̃ nacua̱xchire̱x nax wüxi ga yatü ga mecü rü üünecü nax yixĩxü̃, rü yemaca̱x nixĩ ga naétüwa nachogüxü̃. Rü yexguma Cuáü̃arü orexü̃ naxĩnügu ga Eróde, rü naxoegaãxẽ, natürü mea nüxü̃́ inarüxĩnü.

21Natürü wüxi ga ngunexü̃ nawa nangu nax ngĩxü̃́ natauxchaxü̃ nax yamáaxü̃ca̱x ga Cuáü̃, ga yexguma Eródearü taunecüarü ngunexü̃wa nanguxgu rü wüxi ga peta ga taxü̃ naxü̱xgu naxca̱x ga norü ñatügumaegüxü̃ ga ãẽ̱xgacügü, rü norü churaragüarü ãẽ̱xgacügü rü yema Gariréaanecüã̱x ga tachigagüxü̃.

22Rü yema petawa íyaxücü ga Erodíaxacü, rü yema petatanüxü̃pe̱xewa íyañaãchixü̃chigü. Rü poraãcü norü me iyixĩ ga Eróde rü norü petatanüxü̃. Rü yemaca̱x ga nüma ga ãẽ̱xgacü ga Eróde rü ñanagürü ngĩxü̃ ga yema pacü: —¡Choxna naxca̱x naca i ta̱xacü i cunaxwa̱xexü̃, rü tá cuxna chanaxã! —ñanagürü.

23Rü aixcümaxü̃chi ngĩmaxã inaxuneta, rü ñanagürü: —Ngexü̃rüüxü̃ i ta̱xacü i choxna naxca̱x cucaxü̃ rü tá cuxna chanaxã, woo ngãxü̃gu i chorü naane yixĩxgu —ñanagürü.

24Rü nüxna iyaxũgachi, rü ngĩéna iyaca, rü ngĩgürügü: —¿Ta̱xacü i cunaxwa̱xexü̃ nax naxca̱x íchaca̱xaxü̃? —ngĩgürügü. Rü ngĩé ngĩxü̃ ingãxü̃, rü ngĩgürügü: —¡Naxca̱x ínaca i Cuáü̃ ya báiü̃xẽẽruü̃eru! —ngĩgürügü.

25Rü yexgumatama ga yema pacü rü paxa íyaxücü ga ãẽ̱xgacüxü̃tawa rü ngĩgürügü: —Chanaxwa̱xe i ñu̱xmatama paxa wüxi ya poratugu choxna cunaxã i Cuáü̃ ya báiü̃xẽẽruü̃eru —ngĩgürügü.

26Rü nüma ga ãẽ̱xgacü rü poraãcü inayarümaãchi, natürü yema norü petatanüxü̃pe̱xewa marü ngĩmaxã nax inaxunetaxü̃ca̱x, rü tama ngĩxü̃ nawomüxẽẽchaü̃.

27Rü yemaca̱x ga Eróde rü yexgumatama yéma ínapoxcuxü̃wa nanamu ga wüxi ga churara nax naxü̃tawa nangeaxü̃ca̱x ga Cuáü̃eru.

28Rü poxcupataü̃wa naxũ ga yema churara, rü Cuáü̃xü̃ nidaeru. Rü wüxi ga poratugu yema pacüna nanaxã. Rü ngĩma rü ngĩéna iyaxã.

29Rü yexguma yemaxü̃ nacuáchigagügu ga norü ngúexü̃gü ga Cuáü̃, rü yéma poxcupataü̃wa nayayauxgü ga naxü̃ne, rü inayata̱xgü.

Ngechuchu rü nanachibüexẽxẽ ga 5,000 ga yatügü

(Mt. 14.13-21; Lc. 9.10-17; Jn. 6.1-14)

30Rü yemawena rü yema norü ngúexü̃gü ga yamugüxü̃ rü Ngechuchumaxã nangutaque̱xegü. Rü namaxã nüxü̃ nixugüe ga guxü̃ma ga yema naxügüxü̃ rü yema nangu̱xẽẽtaegüxü̃.

31Rü Ngechuchu rü ñanagürü nüxü̃: —¡Nua pexĩ, rü ngĩxã wüxi i nachica i ngextá taxúema íxãpataxü̃wa taxĩ, nax paxaãchi ngẽxma yarüngü̃güxü̃ca̱x! —ñanagürü. Rü yema ñanagürü yerü namu ga duü̃xü̃gü ga ingugütanücüüxü̃ rü woeguxü̃. Rü yemaca̱x ga Ngechuchu rü norü ngúexü̃gü rü woo nax nachibüexü̃ca̱x rü nangechicagü.

32Rü yemaca̱x wüxi ga nguegu nichoü̃, rü noxrüwama wüxi ga nachica ga taxúema íxãpataxü̃wa naxĩ.

33Natürü muxü̃ma ga duü̃xü̃gü nüxü̃ nadaugü ga yexguma inaxĩãchigu, rü nüxü̃ nacua̱xgü ga texégü nax yixĩxü̃. Rü yemaca̱x guxü̃ne ga gumá ĩanegücüã̱x ga duü̃xü̃gü, rü dauxchitagu nibuxmü rü nape̱xegu nayayi.

34Rü yexguma nguewa ínaxüegu ga Ngechuchu, rü nüxü̃ nadau ga yema muxü̃ma ga duü̃xü̃gü. Rü nüxü̃́ nangechaü̃tümüü̃gü yerü ñoma carnérugü ga ngearü dauruü̃ã̱xgüxü̃rüxü̃ nixĩgü. Rü inanaxügü nax nangúexẽẽãxü̃ ga muxü̃ma ga ore.

35Rü yexguma marü nayáuanegu, rü norü ngúexü̃gü rü naxca̱x naxĩ, rü ñanagürügü: —Marü nayáuanexü̃chi rü ñaa rü wüxi i nachica i taxúema nagu ãpataxü̃ nixĩ.

36Rü ngẽmaca̱x name nixĩ i ícuyamugü i duü̃xü̃gü nax naanewa ipeagüxü̃ i duü̃xü̃güxü̃tawa rü ĩanexacügü ya ngaicamagunewa naxĩxü̃ca̱x nax ngéma norü õnaca̱x yataxegüxü̃ca̱x —ñanagürügü.

37Natürü ga Ngechuchu rü nanangãxü̃, rü ñanagürü nüxü̃: —¡Pematama penaxüwemü! —ñanagürü. Rü nümagü nanangãxü̃gü rü ñanagürügü: —¿Ẽ̱xna cunaxwa̱xe i 200 tachinü i diẽru nagúxü̃ i paũca̱x nüxü̃́ tayataxexü̃ nax ngẽmamaxã tanachibüexẽẽxü̃ca̱x? —ñanagürügü.

38Rü yexguma ga Ngechuchu rü ñanagürü nüxü̃: —¿Ñuxre i paũ pexü̃́ nangẽxma? ¡Rü ípeyada̱u̱x! —ñanagürü. Rü yexguma íyadaugüãgu, rü ñanagürügü nüxü̃: —Toxü̃́ nangẽxma i wüxime̱e̱xpü̱x i paũ rü taxre i choxni —ñanagürügü.

39Rü yexguma ga Ngechuchu rü norü ngúexü̃güxü̃ namu nax ñuxrechigü duü̃xü̃güxü̃ ínatogüxẽẽxü̃ca̱x ga maxẽte̱xewa.

40Rü ínarütogü ga 100 chigü rü 50 chigü ga duü̃xü̃gü.

41Rü yexguma ga Ngechuchu rü nanade ga yema wüxime̱e̱xpü̱x ga paũ rü yema taxre ga choxni. Rü daxũguxü̃ ga naanegu nadawenüãcüma Tupanana moxẽ naxã. Rü inanabücu ga yema paũ, rü norü ngúexü̃güna nanana nax yema duü̃xü̃güxü̃ yanuxü̃ca̱x. Rü yema taxre ga choxni rü ta guxü̃ma ga yema duü̃xü̃güxü̃ nayanu.

42Rü guxü̃ma nachibüe ñu̱xmata meama nüxü̃́ yangu.

43Rü yemawena rü 12 ga pexchigü nanapagü namaxã ga yema paũtüchi rü choxnichipe̱xegü ga íyaxügüxü̃

44Rü yema yéma paũgü ngõ̱xgüxü̃ rü 5,000 ga yatügü nixĩ.

Dexáétügu nixũ ga Ngechuchu

(Mt. 14.22-27; Jn. 6.16-21)

45Rü yemawena ga Ngechuchu rü wüxi ga nguegu nayachoü̃xẽxẽ ga norü ngúexü̃gü nax nüxíra naxtaxaarü tocutüwa Bechaídawa naxĩxü̃ca̱x. Rü yexgumayane ga nüma rü duü̃xü̃güxü̃ ínimugü.

46Rü yexguma duü̃xü̃güxü̃ íyamugüguwena, rü ma̱xpǘnewa naxũ ga Ngechuchu nax yéma yayumüxẽxü̃ca̱x.

47Rü yexguma marü nachütagu, rü naxtaxaarü ngãxü̃tüwa nayexmagü ga norü ngúexü̃gü. Rü Ngechuchu rü nüxicatama dauxchitawa nayaxü̃ãchi.

48Rü nüxü̃ nadau nax guxchaãcüma yaxãgüxü̃ ga norü ngúexü̃gü, yerü ga buanecü rü nawaama nabuxuchi. Rü yexguma marü yangunechaü̃gu, rü Ngechuchu rü dexáétügu nawe narüxũ. Natürü ñoma nüxü̃ naxüpetüchaü̃xü̃rüxü̃ nügü nixĩxẽxẽ.

49-50Rü yexguma norü ngúexü̃gü nüxü̃ daugügu ga dexáétügu nax yaxũxü̃, rü nagu narüxĩnüe ga wüxi ga naxchi̱ximare nax yixĩxü̃. Rü yemaca̱x aita naxüe, yerü guxü̃ma nüxü̃ nadaugü rü poraãcü naba̱i̱xãchiãẽgü. Natürü yexgumatama ga Ngechuchu rü namaxã nidexa rü ñanagürü nüxü̃: —¡Peporae! Rü chomachire̱xtama chixĩ. ¡Taxṹ i pemuü̃exü̃! —ñanagürü.

51-52Rü nguegu nixüe, rü inarüxo ga buanecü. Natürü nümagü ga norü ngúexü̃gü rü naba̱i̱xãchiãẽgümare yerü woo nüxü̃ nax nadaugüxü̃ ga yema mexü̃ ga Tupanaarü poramaxã naxüxü̃ ga Ngechuchu ga yexguma yema paũ yamuxẽẽgu, natürü tama nüxna nacua̱xãchie nax Tupana Nane nax yixĩxü̃ yerü nüxü̃́ naguxcha nax yaxõgüãxü̃.

Yenecharéxanewa Ngechuchu nanameexẽxẽ ga ida̱xaweexü̃

(Mt. 14.34-36)

53Rü yexguma marü yanguü̃gu ga naxtaxawa, rü Yenecharéxanewa nangugü. Rü yexma naxãnacügu nanangãxü̃gü ga naweü̃.

54Rü yexguma nguewa ínachoü̃gu, rü yexgumatama ga duü̃xü̃gü rü nüxü̃ nicua̱xãchitanü ga Ngechuchu nax yixĩxü̃.

55Rü guxü̃ma ga yema naanewa nabuxmü ga yema duü̃xü̃gü. Rü yexguma nüxü̃ naxĩnüegu nax yéma nayexmaxü̃ ga Ngechuchu, rü yéma norü caruü̃gügu naxca̱x nanagagü ga ida̱xaweexü̃.

56Rü guxü̃wama ga ngextá íyanguchigüxü̃wa ga Ngechuchu, ga ĩanexacügüwa rü ĩanegüwa, rü naanegüwa, rü yexma namacüwagu naxca̱x nayamugü ga ida̱xaweexü̃. Rü nüxü̃ naca̱a̱xü̃gü nax tama nüxna nachúxãxü̃ca̱x nax naxchirupechinügumare yangõgügüxü̃ca̱x. Rü guxü̃ma ga yema nüxü̃ ingõgüexü̃, rü naxca̱x nitaanegü.

Markert nå:

Ore i mexü̃ ga Márcu ümatüxü̃ 6: tcaP

Marker

Kopier

Sammenlign

Del