गलाती 2
2
पावल नेरो अरू कुल्मिंबै चेला चिब्मैं
1च्युसे प्लिदिं लिउँइँ बारनाबास ने ङ यरूशलेमर ह्यामा ङइ तीतसलाज्यै या बोइ।#चिब्मैं ११:३०; १५:२ 2परमेश्वरजी ङने चर ह्याद् बिबइले ङ ह्याइ। ङइ लरिबै के खेरो आह्यारिगे बिसि खाबज्यै आसेल्ले चर्बै चिब्मैंने मत्त्रे ङइ अरू ह्रेंमैंलाज्यै बिमिंबै सैं तोंबै ताँमैंए बारेर बिइ। 3ङने बालु मुँबै तीतस ग्रिक मुँलेया ट्हुबि क्ह्याल् त्हुम् बिसि खाबज्यै कर आल्हैदि। 4दिलेया स्योलिबै ताँ लोमिंब्मैं ट्हुबि क्ह्याल् त्हुम् बिसि खाबज्यै आसेल्ले खसि बिश्वास लब्मैंए म्हाँजोर होंइ। धै ख्रीष्टउँइँले मुक्ति योंब्मैंलाइ छैं लसि स्योंम्बै ठिममैं म्हाँदिबर कर ल्हैदिमल। 5सैं तोंबै ताँउँइँले योंबै आशिक क्हेमैंए लागिर जोगेल् खाँरिगे बिसि चमैंए उँइँर ङि तिफुँइँ आकुर।
6च मिं कालदिब्मैं कति ह्रब् सेब् मुँलेया ङलाइ तोइ फरक आपर्दि, तलेबिस्याँ परमेश्वरजी म्हि ङ्ह्योसि आफेल! दिलेया ङइ बिबै ताँए फिर चमैंइ तोइ ताँ आथप्दिल।#व्य १०:१७ 7बरु सैं तोंबै ताँ बिप्रबर यहूदीमैंए#2:7 यहूदीमैं ग्रिक क्युइरि, ज्युर चिनु लब्मैं ल्हागिर परमेश्वरजी पत्रुसलाइ त्हाँब् धोंले अरू ह्रेंमैंए#2:7 अरू ह्रेंमैं ग्रिक क्युइरि, ज्युर चिनु आलब्मैं ल्हागिर खीजी ङलाइ त्हाँइमुँ बिसि चमैंइ क्होइ। 8तलेबिस्याँ परमेश्वरजी खीए शक्तिउँइँले सैं तोंबै ताँ बिप्रबर ज्युर चिनु लबै यहूदीमैंए ल्हागिर पत्रुसलाइ त्हाँब् धोंले ज्युर चिनु आलबै अरू ह्रेंमैंए ल्हागिर ङलाइ त्हाँब् ग। 9याकूब, पत्रुस नेरो यूहन्ना बिश्वासीमैं न्होंर्बै चिब्मैं मुँल। परमेश्वरए दयाम्हाँया ङए फिर मुँबइले ङइ छ्याँबै के लइमुँ बिब् चमैंइ क्होसि ङ नेरो बारनाबासलाइ खेंमैंने संगतिर घ्रि तल् पिंइ। छले खेंमैंइ यहूदीमैं न्होंर, ङिइ अरू ह्रेंमैं न्होंर परमेश्वरए के लबै ल्हागिर चमैं ङिने सैं क्ह्रिइ। 10चमैंए सैंर खेंमैंए न्होंर्बै ङ्हाँदुमैंलाइ ङिइ ल्होमिंरिगे ङ्हाँमैं, ङलै या छाबै सैंन् मुँल।
पावल नेरो पत्रुस आक्ह्रिब
11दिलेया पत्रुस एन्टिओखियार खमा ङइ ताँनए उँइँर चए दोषमैं उँइँमिंइ, तलेबिस्याँ चइ गल्ति लल। 12याकूबइ कुल्मिंबै म्हिमैं एन्टिओखियार युब् भन्दा ओंसों चइ अरू ह्रेंमैंने बालु चब् थुँब् लमल। दिलेया च “अरू ह्रेंमैंए बिश्वासीमैंलाज्यै या ज्युर चिनु लल् त्हुम्” बिबै म्हिमैं चर फेनेबै त्हेर अरू ह्रेंमैंने बालु चब आचल्ले स्योले टिल। तलेबिस्याँ [ज्युर चिनु लल् त्हुम् बिबै यहूदीमैंइ चिनु आलब्मैंने चब्-टिब् लल् आत बिमल।] 13छलेन अरू यहूदी बिश्वासीमैंज्यै या लल् आतबै केमैं लमल। चमैंइ छ लब् म्रोंसि बारनाबासज्यै या चमैंइ धोंन् लइ। 14सैं तोंबै ताँइ बिब् धोंले चमैं आप्रब् म्रोंसि ताँन् म्हिमैंए उँइँर ङइ पत्रुसने बिइ, “क्हि यहूदी तसेया यहूदीमैंए छ्यार आप्रल्ले अरू ह्रेंमैं धोंले प्रइमुँ। छतसि अरू ह्रेंर्बै म्हिमैंने यहूदीमैंए छ्यार प्रल् त्हुम् बिसि क्हिइ खैले कर ल्हैदिम्?”
15ङइ पत्रुसने अझै बिइ, “ङ्योम् फिब् ओंनोंबै यहूदी ग, अरू ह्रेंमैं धोंबै पापिमैं ङ्यो आङिं। 16दिलेया ‘यहूदीमैंए ठिम म्हाँदिसि म्हि ठिक आठर्दि, येशू ख्रीष्टए फिर बिश्वास लसि मत्त्रे म्हिमैं परमेश्वरए उँइँर ठिक ठर्दिम्,’ बिसि ङ्योइ था सेइमुँ। ठिमइ लद् बिबै के लबर्न परमेश्वरए उँइँर खाबै या ठिक ठर्दिल् आखाँ। छतसि ख्रीष्टए फिर बिश्वास लसि मत्त्रे ङ्यो परमेश्वरए उँइँर ठिक ठर्दिरिगे बिसि ङ्योज्यै या ख्रीष्ट येशूए फिर बिश्वास लइ।#भज १४३:२; रोम ३:२०; रोम ३:२२
17“ङ्यो यहूदीमैं येशू ख्रीष्टए फिर बिश्वास लसि परमेश्वरए उँइँर ठिक ठर्दिल् म्हैमा अझै ङ्योज्यै या ठिम म्हाँदिब् पिसि आछ्याँबै के लरिब् स्यास्याँ, ख्रीष्टजी म्हिमैंलाइ ‘तम् तम्, आछ्याँबै के ललेन् तम्’ बिम् रो वा? आबि! तिफुँइ आबि! 18तलेबिस्याँ ह्रोंसइ म्हाँदिब् पिवाबै ठिम धबै ङइ म्हाँदिस्याँ ङइ ह्रोंसलाइन ङ आछ्याँबै के लबै म्हि ग बिबै प्रमण पिंम्। 19तलेबिस्याँ ङ परमेश्वरए ल्हागिर सोरिगे बिसि ओंसोंबै ङइ म्हाँदिबै ठिमइ लमा ठिमए ल्हागिर ङ सिब् धोंन् तइमुँ। 20ङ ख्रीष्टने बालुन् क्रूसर च्योसि सिइमुँ। छतसि तारे पिरु सोब ङ आङिं, दिलेया ख्रीष्ट ङए सैं न्होंर तसि सोइमुँ। तोगो चु ज्युर ङ सोरिबै छ्ह परमेश्वरए च्ह येशू ख्रीष्टए फिर बिश्वास लसि सोरिबै छ्ह ग, तलेबिस्याँ खीजी ङलाइ म्हाँया लसि ङए ल्हागिर खीए ज्युन् सुम्पिदिइ। 21छतसि ङइ खोंयोंइ बिलै परमेश्वरए दयाम्हाँयाए फिर भर लम्, तलेबिस्याँ ठिम म्हाँदिसि म्हिमैं परमेश्वरए उँइँर ठिक ठर्दिल् खाँम् बिस्याँ ख्रीष्ट फाक्कर्न सिइ!”
Markert nå:
गलाती 2: GCMB
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2020, Wycliffe Bible Translators, Inc. All rights reserved.