Populære bibelvers fra Matye 6

Del

Kàjáa ki n yɛlɛ yele í da wi fǎngi ní wi sínni caa gbɛnʔɛnɛ, yáriri bee myɛ si naa taʔa yaà yele ma.

Koro na ki ga yɛlɛ yele fúnyi í da curugu nyɛ̀ʔɛna kéeli na í. Níì cán nyɛ̀ʔɛna funjurugori kèlē a gi yɛlɛ. Canʔa o canʔa kagbangēle n yɛlɛ ní gi ní n kwɔ́ɔ.

«Koro na mii a gi joo yele ma, ki ga yɛlɛ yele í kɔ́ ra yele fúnyi curugu yele sìíw kéele na í, si jo nyàʔá yele a lìi, wàlá nyàʔá yele a gbaa í. Yele a wɔ́ɔ kɔ́ ra yi curugu yele céri kéele na si jo nyàʔá yele a le í. Sìíw kéele ga kpɔ́ʔɔ n sɔ̀lɔ yaliiri kéele na ì? Ba céri kéele ga wɔ́ɔ̀ kpɔ́ʔɔ n sɔ̀lɔ fànilew kéele na ì?

Mɔ si na, mɔ ga naà Kolocɔlɔɔ nyɛ́ɛri lǎli ni lè, mi jée mɔ kpaafungi ni mí kɔ̀rigi tɔ́n máā nyɛ́ɛri mɔ Tóow ma wi lè tɛɛlaragi ni. Ki ga pye nya, mɔ Tóow wi kalaragèle nyaagi lè, woro a gi tɛ́ɛgi lúrugo mɔ ma.

Koro na ki yɛlɛ yaa nyɛ́ɛri kánmi naa na yé jo: ‹Wolo Tóow, mɔ wi lè nyɛ̀ʔɛni na, ki n yɛlɛ mɔ mɛ́ɛgi í da kpɔ̀ʔɔrɔ́. Mɔ fangi sáā maa. Mɔ nyɛ́nɛ kérigèle si wɔ́ɔ ra kpéʔele tári na àmɛɛ ge kpéʔele nyɛ̀ʔɛni na lè.

Yaliiri mɔ kaangi wolo ma lè canʔa o canʔa, mi níjanʔa wóri kaan wolo ma.

Mi wolo kapeegèle kùsulugo syɔɔ àmɛɛ wolo bele wòʔolo syoo lè.

Ki ga yɛlɛ mɔ í yarigaa yaʔa gi wolo kárima bi lége kapeele ni í. Ki n yɛlɛ mɔ í wolo syɔɔ Wobeew ma. [Níì cán fǎngi, ní séew, ní nìjangbɔɔri myɛ i nyɛ mɔ wóro làla o làla. Amiina!]›

Ye gi cán yele ga ni syɛ́ɛnbèle kapeegéle kusulugo syoo, yele Tóow wi lè nyɛ̀ʔɛni na, wi a wɔ́ɔ ra yele wógèle kùsulugo syoo.

Ye féjɛɛngèle kéele wéle. Ncan ke o yaliire lúru í, ke si wɔ́ɔ o yaliire lée ni kɔngi gbòdungēle ni í. Yele Tóow wi lè nyɛ̀ʔɛni na, wi si i ge kaangi ke i líi. Yele kéeli si ga kpɔ́ʔɔ n sɔ̀lɔ féjɛɛngèle wólo na ì?

«Ki ga yɛlɛ yele í da lɔ́ri caa da kɔngi yeyɛɛ ma tári na, beè dɔ́nw ní tátɔɔnw di kálagi lè í, ní beè kàyuubèle kpáayi fúrugu ní i yúu lè í. Fwɔɔ yele í da di caa da kɔngi yeyɛɛ ma nyɛ̀ʔɛni na beè dɔ́nw ní tátɔɔnw o di kálagi lè í. Ní beè kàyuubèle o kpáayi fúrugu ní i yúu lè í. Níì cán beè mɔ lɔ́ri ga pye lè, beè mɔ sɔnguri a wɔ́ɔ pye.

«Syɔɔn faala a gbǎn báara kùndigibéle siin ma í. Fwɔɔ wàa kéele í wi bɛɛn, wàa wólo si wi dɛ́nɛ. Wi a tan wàa na, si wiyɛɛ láagi yirige wàa ni. Yele a gbǎn pye Kolocɔlɔɔ falipyebèlē, si ní pye lɔ́ri falipyebèlē í.

Amɛɛ si Kolocɔlɔɔ sìnbirigi nyàā sámagi kánmi naa na lè, gee gi nyɛ lè gee níjanʔa, nyɛ̀ʔɛna pé gi le náagi ni, wi a yele sámaga bi sɔ̀lɔ koro na ì? Yele tágali n cɛ́rɛ.

Kàjáa mɔ ga ni yarigaa kaangi foomɔfɔbèle ma, gee kàliige kɔ́gi kpéʔele lè, ki ga yɛlɛ kàmɔnɔ kɔ́gi í kɔ́ gi cán í, jàngó mɔ yakaangi í pye làrama ni. Ki ga pye nya, mɔ Tóow wi kalaragèle nyaagi lè, woro a gi tɛ́ɛgi lúrugo mɔ ma.

«Yaa yeyɛɛ kɔ̀rɔsíi, ye a kɔ́ ra yele sínni kèlē kpéʔele syɛ́ɛnbèle nyɛ́nɛ na jàngó paa yele nyaagi í. Kapye koro ban í yele a tɔ̀nɔ taa yele Tóow ma wi lè nyɛ̀ʔɛni na í.

«Yele ga ni súnw nii, ki ga yɛlɛ yele í da yele yɛ́ɛyi taanri àmɛɛ syɛɛnjóotɛɛyi siin joofɔɔlɔ gi kpéʔele lè í. Pe i be yɛ́ɛyi fɛ̀ɛ́, jàngó syɛ́ɛnbèle í da poro nyaagi si gi cán poro i nyɛ sún na. Mii si a gi joo yele ma kányɛʔɛ ni, pe n be tɔ̀nɔw taa n kwɔ́ɔ. Kàjáa mɔ ga súnw le, mi mɔ yɛ́ɛgi jée, mí nùndaanna sìnmɛ tɛ́ʔɛ mi mɔ nyúngi kurugo, jàngó syɛ́ɛnbèle a kɔ́ gi cán mɔ i nyɛ sún na í, fwɔɔ mɔ Tóow wi lè tɛɛlaragi ni. Koro ga pye mɔ Tóow wi kalaragèle nyaagi lè, woro a gi tɛ́ɛgi lúrugo mɔ ma.