Populære bibelvers fra Isaías 60

Del

Chömöledö israel jojodö, a̧la̧ibaduwi. A̧la̧ibö, Dios dejatinö ujulu i̧sȩkwaduwi. Jau chömöledö, Isabenö Jo̧ma iteda dejatinö ujulu i̧sȩbö, ökwödönö pjaatajabe, jo̧kwajabetjö̧ dejatinö ujuluma ökwödönö idejatajabe.

Jobekwö kwidewaduwiawö̧, tjitebokwena jojodöma kwö̧jaduwobekwö tjichakwedö, yȩayi dewachi̧danö salöinö kwidewaduwiawö̧, inesö la'aka luwedöbi kwö̧jaduwobekwö tjichibakwedö.

Jau chömöledö, bö̧jȩ ba̧kwemeachibanö yȩa'wo la̧kobe, tjitebo tenia jojodöma inesö yȩa'wonö tjö̧jakwedö. Jo̧kwaijayonö Isabenö Jo̧ma iteda dejatinö ujulu ökwödönö idejatakobe, ja̧danö Diosda ujulu kwi̧sȩkwaduwakwedöja.

Israel jojodötjö baikwönönöbedöma, ba̧jȩkwaso baibanö otiwanö tjö̧jakwedö, ja̧danö jelesotjö baikwönönö ja'yuwasoma, tjitebosaso jwiinö juluwasö batjibakwedö. Ja̧ baledakwa̧ma, ötjö Isabenö Jo̧ Diosda yötawaduwakwö, ja̧danö baledakwa̧ möle badekwachenama, juluwanö jobekwö baledobö wetakwo̧sa, jö̧ba̧lö yöawobe Diosma.

Ja̧danö, ja̧ möle, möle jawo̧ma idejatökakwo̧, ja̧danö yö̧te jawo̧bi idejatökakwo̧. Ötjö Isabenö Jo̧ Diosda kwiteboduwi chidejatakwo̧sa, ötjö dejatinö chujuluda otiwanö dejatakobe, otiwanö edö kwö̧jaduwakobetjö̧.

Jobekwö ötjöda dejatö chö̧jobetjö̧, möle jawo̧ la'akatjöda meajokobedanö ichejekwakobe, ja̧danö yöte jawo̧ dewi̧ma, la'akatjöda 'dö̧ibajöködanö ichekwakobe. Jau chömöledö, ötjöda tibibökönö, ba̧kwelöjatebö dejatö chöjakwo̧sa. Budekwö kwö̧jaduwi̧ma 'dö̧ibakobe

Jobekwö baledi̧ edö, jwiinö kwo̧'woduwi ösöwachibanö kwö̧jaduwakwedöja, ösödachibö kwomajadeduwima tjö̧awakobe ichejekwa, jwiinö kwo̧'woduwi ösöwachibanö kwitji̧muduwinö kwedaduwobetjö̧. Jau chömöledö, inesö mikwawi̧ jawa, jwaibalawabenö tjichejebakwedö ökwödönö, tjitebotenia nöinö mikwawi̧ jawama, ökwödönö iyö tjichibakwedö, kwo̧'woduwi ösöwachibanö.

Jobekwö baledakwa̧, baikwö yöawobe Diosma: Pöbamö edö bakwachobetenia ko̧ko̧kwö tjichobe kwedadaduwakwedöja. Kwi̧tji̧muduwi ömadö ödötjö tjichobekwö kwedaduwakwedöja, ja̧danö kwitji̧muduwi ya̧dönö apjö̧alö tjichejebobekwö kwedaduwakwedöja.

ja̧danö okobe deinö kwömöledö israel jojodöma, bakobe weti̧ a̧ja̧kwö tjö̧jakwedö, ja̧danö 'döbibajökönö, ba̧kwelöjatebö otiwanö israel nijinö tjö̧jakwedö. Jau chömöledö, jojodö towi tjujuni̧danö, ötjöda israel jojodönö chujunocha, —Duluwo̧ Diosma otiwo̧, —jö̧ba̧lö ötjönö tjösödakobetjö̧. Ja̧danö chujunajawö̧, otiwanö 'diinö tjö̧jakwedö.

Kwiteboduwitjö ja'yubebi jojodönö suli̧ tjöwaedökakwedö, ja̧danö kwiteboduwi bakwachobe okwama, pjolö loböbi, söbebö loböbi suli̧ tjöwaedökakwedö. Otiwanö kwö̧jibaduwinö pjatatobetjö, pjatataja̧ omukwatö, kwitebo comunidad tjöekwemima, —Ji̧kwawade, —jö̧ba̧lö kwimidaduwakwedöja, ja̧danö apjudema, —Diosnö ösödö lo̧awade, —jö̧ba̧lö kwimidaduwakwedöja.

Ja̧danö jwiinö otiwanö pjatatobetjö̧, wene jwiinö otiwanö kwö̧jaduwakwedöja. Mölebi, yö̧tebi comunidad apjudebiya kwutumataduwökakwedöja, ba̧kwelöjatebö po̧ekwakobe apjudema, tjitebotenia jojodö tjitea mikwawi̧ jawa ökwödönö iyö tjichejebakobetjö̧. Ju'wibi tjitebotenia inesö la'aka luwedöma kwömöayedöduwi batjibanö tjö̧jakwedö, ja̧danö ju'wedö ötjibawö̧ kwö̧jaduwobekwö tjichibakwedö.

Jwiinö nöinö tjichejebobetjö̧, kameyodö tea e'ewadöma, kwiteboduwi niji su̧'be baibanö tjö̧ba̧jekwachakwedö, Madian nijitjöbi, Efa nijitjöbi ichajadö kameyodöma. Ja̧danö Saba nijitjö orobi, omewi̧nö 'dö̧ekwi̧ jawabi tjichejebakwedö. Okobe deinö Isabenö Jo̧nö ösödö, —Israel jojodö tjösödökwe Isabenö Jo̧ma jwiinö otiwo̧, —jö̧ba̧lö jobekwö tjichibakwedö.

Ja̧ möle ju'wedö tjitebo jojodöma ichibö, kwiteboduwi comunidadbiya tjöbebö tjotidakwedö, otiwanö 'diinö tjöekwemi conmunidadnö kwö̧jaduwakobetjö̧. Ja̧danö tjitebotenia inesö la'aka luwedöma, ökwödö kwömöayedöduwi ja̧nö, weköbaduwi̧ otidö tjö̧jakwedö. Jau chömöledö, ajayinö dameakwö ja̧nö, ökwödönö lȩtebijatö, jö̧tö? Jo̧kwaijayonö lȩbebajo̧, lȩlöjinö edö pjatatakwo̧sa, ökwödönö chösödobetjö̧.

Ajayinö le'dedö lotjawö̧, tjöpöjödadawö̧ kwö̧jinaduwobe chömöledö, ja̧danö kwiteboduwi ö'wejenö baledinöködö jojodöma. Jo̧kwaijayonö kwiteboduwi inesö otiwobe baibanö pjatatakwo̧sa, ja̧danö ba̧kwelöjatebö 'dö̧bibajökönö, kwo̧'woduwi ösöwachibanö kwö̧jaduwakwedöja.

Jau, tjitebotenia jojodö tjiteabi, inesö la'aka luwedö tjiteabi, ökwödö israel jojodöda otiwanö kwujuna̧laduwakwedöja. Ja̧danö jobekwö balediawö̧, otiwanö kwöwaisachibaduwakedöja, Ötjö Isabenö Jo̧ Diosda kwö̧jibaduwinö pjabato̧ma, jö̧ba̧lö. Jau chömöledö, —Jacob ösödinökwe Inesö Juluwo̧ Diosda dö̧jibinö pjabato̧ma, —jö̧ba̧lö kwöwaisaduwakwedöja.