Populære bibelvers fra Baroma 3

Del

Khulwekhuuba babaandu boosi bayonaka, naluundi sibashiile ni khufuna shiriifwa shishaama isi Wele ta. Babaandu boosi bakwalaasibwa ni shiwaanwa she bubweela bwa Wele, khuubirira mu buwonesi, nga nibwo buli mu Kristo Yesu.

ne bukhosefu bwa Wele bunyolikhanila mu khufukiilila mu Yesu Kristo. Wele akhola shino isi abo boosi babafukiilila mu Kristo akhali khuromboola ta.

Uyo niye isi Wele arumana ari bare khufukiilila mu niye, nio asikule babaandu nga araambisa kamafuki keewe. Shino shakholekha khukhwokesanisa bukhosefu bwa Wele. Khulwekhuuba khaale, lwe khukhwikhaliilikha khweewe, Wele abe siwayinaanayo khu byoonako bye babaandu ta. Ne mu mbuka iye aluno ari, shili she khuwandalasa khuri Wele umweene ali umukhosefu, naluundi abo boosi babaali ni khuufukiilila mu Kristo, Wele abekyesa bakhosefu.

Khulwekhuuba imbaawo umuundu yeesi ulibalibwa ari ali umukhosefu mu moni tsa Wele, khulwe khukhola byeesi kamakaambila kaloma ta. Sheesi kamakaambila kakhola, nikhwo khukhumanyisa ifwe bubwoonaki nga ni buli.

Nga bibyaronebwa ni biloma biri, “Imbaawo umuundu na mutweela uli umukhosefu ta, imbaawo na mutweela ta; imbaawo na mutweela uli umukyesi ta. Naluundi imbaawo na mutweela uwisaaya Wele ta. Boosi bashuukha barura isi Wele; boosi bayonaka. Imbaawo na mutweela ukhola bulayi ta; imbaawo akhaba na mutweela ta.

Khulwekhuuba khwawandalasa khuri umuundu ekyela umukwalaafu khulwe khufukiilila, ne shili khulwe khukhola byeesi kamakaambila kaloma ta.

Seshinyalikha taawe. Wele ali ni khuuba uwa ŋali, abe ikhaba nga buli muundu akhaba umubeeyi. Nga shisharonebwa ni shiloma shiri, “Uli ni khukhwokesana uri uli umukwalaafu khuubirira mu lomo tsoowo; naluundi uli ni khufuura kumusaango kwoowo nga balikho bakhuwotsesa.”