Populære bibelvers fra Tyai Á̱zanson 6

Del

Nang n nwuan a̱ni, n si̱ kin di tsaai, vam hu li ma̱ bunbung a̱nbung nang ntong a̱ni! A̱tyu a̱ si̱ nyeak tsaai ji a̱ni, á̱ ngyei, “A̱khwu;” a̱wot a̱kpa̱ndang a̱chyet nggu wu á̱ ngyei, “A̱bi.” Á̱ si̱ nang ba chet tazwa sot jhyung mami susot nyaai á̱niet swanta ba; ba̱ hyaai á̱niet ma̱ng tswat, ma̱ng a̱gba̱ndang zong, ma̱ng mbyep nzwán, ma̱ng á̱ka̱tuk nyam a̱yit a̱ni.

Nang n nwuan a̱ni, n si̱ kin di a̱sai tsaai nang gu yong! A̱tyu a̱ nyeak tsaai ji a̱ni, a̱ ba̱ng a̱ta, a̱wot á̱ si̱ kup gu bung tyok. A̱ si̱ ghwut da̱nian a̱ ka ya zwáng ma̱ a̱di̱di̱t, a̱wot a̱ bu swuo chet á̱niet ma̱ a̱di̱di̱t mi̱ swanta hu.

Nang Fi̱ng A̱nfwuk hu nghwok a̱timi a̱fwuon wu a̱ni, n si̱ nwuan a̱tafa a̱tyii neap za̱nang wu, n si̱ kin di tswá á̱niet nang á̱ hyaai mat shei a̱lyiat A̱gwaza mba hu tsotswat a̱ni.

Ba̱ si̱ koot a̱gugwong ma̱ng a̱gba̱ndang a̱nwuat mi̱ chet nyia̱, “Ka̱a̱t A̱gwaza! A̱ yet A̱gba̱ndang A̱gwam a̱ nyia̱ tyok a̱mgba̱m swanta a̱ni, A̱za̱za̱rak A̱tyu a̱ bu byia̱ a̱tsatsak a̱lyiat a̱ni; zang jen ja a na nyia̱ á̱niet mi̱ swanta bani shi̱ri̱ya, a bu tan a̱sok nzi̱t na mat hyaai nang ba̱ hyaai nzi̱t a̱ni?!” A̱jawa á̱ si̱ nwuak kuzang a̱yin ma̱ á̱niet ba nang á̱ hyaai mat a̱lyiat A̱gwaza na a̱ni, a̱junjung a̱sai a̱toot. Á̱ si̱ nyia̱ ma̱ a̱mba; ba̱ ya ndabeang ba̱ fwung ma̱ a̱da̱dei, si̱ á̱kum á̱na̱nyiuk mba ka, ba̱ yet á̱khwo Yesu, nang á̱ bu na hyaai di̱ a̱bada̱dei njen a̱ni; si̱ nang á̱kpa mba ka bai cha̱chaat.

A̱jawa tsaai jhyang si̱ kin ghwut, ji̱ shong ma tsontswang! A̱tyu a̱ ku nyeak ji a̱ni, á̱ si̱ nwuak gu a̱gba̱ndang tswat ma̱ng tyok nang gu na nvwuong swat nyinyang mi̱ swanta hu a̱ni. A̱wot á̱ si̱ nyia̱ zwang ma̱ng hyaai á̱niet mi̱ kuzang a̱vwuo.

Mat a̱gba̱ndang mam a̱tsotswat mwai lyen mba hu bai; a̱nyan wa maai a̱ shot?!”

A̱wot n si̱ bu ndi Fi̱ng A̱nfwuk hu ku ghwok a̱timi a̱taa wu. A̱wot mi̱ di̱ yong a̱hwa, a̱byin ka si̱ kin tyi̱ri̱m ba̱t! Mam hu si̱ tyia̱ lyin nang a̱dyundyung a̱toot a̱ni! A̱wot zwat ji si̱ bwuak shong nang a̱sok a̱ni! Á̱ta̱ngwat na si̱ bu kwa̱i a̱byin nang wun ni̱ nhyap a̱kwon a̱bwabwap mi̱ chet, nang a̱bun sum wu kurum a̱byin a̱ni!

Nang Fi̱ng A̱nfwuk hu nghwok a̱timi a̱tat wu a̱ni, n si̱ kin nfa̱k kyang nswuan tat hu yei nyia̱, “Ghwut, a nkat!” Nang n nwuan a̱ni, n si̱ kin di a̱dyundyung tsaai, a̱wot a̱tyu a̱ nyeak tsaai ji a̱ni, si̱ ba̱ng kyang mai yak mbwak! A̱wot n si̱ nfa̱k a̱nwuat ka̱ ghwut ma̱ a̱ka̱wa̱tyia̱ nkyang nswuan naai a̱nia nyia̱, “Burodi a̱lka̱ma a̱nyiung, ku burodi bali a̱tat; ba̱ ya kurum ta̱m kwa mam a̱tyu nta̱m a̱nyiung! A̱wot ta̱bam a du byian hya̱u za̱itun ma̱ng a̱sa̱khwot a̱na̱p na!”

Kyai tswazwa hu si̱ kuut nang ta̱ka̱da nang á̱ kut di̱n shan a̱ni! A̱wot a̱mgba̱m a̱ka̱fan ma̱ng bibyin a̱ka̱wa̱tyia̱ a̱sa̱khwot, si̱ shya̱i da̱ a̱ka̱vwuo nswat mba na! A̱wot konyan mi̱ swanta hu; á̱gwam swanta ba, á̱niet nyia̱ ntyok, a̱yaakwak a̱son á̱niet nzwang, á̱niet nzwá, a̱cha̱chet á̱niet, ma̱ng kuzang á̱khwo ma̱ng a̱tyu a̱ nwai yet á̱khwo a̱ni; a̱mgba̱m ba si̱ ya̱khwi mami nkuu a̱ka̱fan ma̱ng tsutsok.