KARARIADI 44
44
Wohosi ko nailang
1Tintal᷊a e'e i Yusuf nuparenta su tumbonang u ruma tanggae, “Tahoneko manga karong i sire e'e dingang u gandung, ul᷊ie sarang botonge ikawawa i sire, dang tahoko doi ngi sire simbau-simbau su l᷊al᷊ung u karong i sire, su wawo u gandung e'e. 2Taho l᷊ai wohosi sal᷊akaku su l᷊al᷊ung u karong u tuari ngi sire ko kahembokange, dingang u wawaehi gandunge.” Paparentang e'e nukoa apang niparenta e'e. 3Ndai mal᷊ou, mal᷊uka-l᷊ukari, i Yusuf nutal᷊ei dingang u manga tamahuaringe, bou e'e i sire nuwua dingang u keledai ngi sire. 4I sire mborong ta marau bou e'e, su tempo ngu i Yusuf nangul᷊i su tumbonang u ruma tanggae, “Kaehongte watuke manga taumata e'e. Boko seng nikawatukang, ‘Ul᷊i si sire, nakurawe i kumu namal᷊isi kapapia dingang u kal᷊al᷊ai? 5Nakurawe i kumu nanako piala sal᷊aka ngi tuangku?#44:5: simbau salenang ko tuwei Nakurawe i kumu nanako wohosi sal᷊aka ngi tuangku? Su wahasa Ibrani manga didato e'e takoae. Wohosi e'e ipake'e guna ngu manginung dang kere alati pamatehi. I kumu seng nukoa pusansal᷊a ko l᷊abo!’ ”
6Su tempo ngu paparentang e'e nurating u manga tamahuaring i Yusuf, niul᷊ie apang ko niparenta ngi Yusuf. 7Nisimbahi sire si sie, “Apa pandung L᷊uadateng? I kami mutewa himoneu i kami ta nukoa kere'e! 8I Tuang sisane matitong himoneu doi ko nikarea i kami su l᷊al᷊ung u manga karong i kami su wawo u gandung e'e, seng nisul᷊e ngi kami si Tuang, inau tumaniewe i kami manako sal᷊aka arako wul᷊aeng bou wal᷊e ngi gubernur! 9Tuang, boko barang ikarea su singkatau bo i kami, walate i sie pakihukung u papate, dang i kami makoa l᷊ang i Tuang.”
10Paparentang e'e nangul᷊i, “Kere'ete, kateho kitang si sai wohosi e'e ikarea, seng i sie ko sarung makoa l᷊angku; ko wal᷊inge botonge kapul᷊e.” 11Bou e'e masahawu-sahawu i sire singkatau-singkatau nupal᷊intu dang namuka karonge. 12Paparentang i Yusuf e'e namariksa manga karong e'e dingang matiti, manita bou karong u ko iyakang sarang karong u ko kahembokange, dang wohosi e'e nikarea su l᷊al᷊ung u karong i Benyamin. 13Manga tuhange nasusa kahingang hakiu nungganggehe l᷊aku i sire. I sire nundui karong i sire su wawo u keledai ngi sire dang nusul᷊e sarang soa.
14Su tempo ngi Yehuda l᷊au manga tamahuaringe nurating u wal᷊e ngi Yusuf, i sie mborong ene su se'e, dang i sire nusuba su tingonge. 15Kuteu i Yusuf nangul᷊i, “Apa ko nikoa i kumu e'e? Apa i kumu wugha himoneu taumata kere ia botonge makatitong kakanoa i kumu ko dal᷊ai dingang u titong ko marundung?”
16“Apa ko ihabari i kami, Tuangku?” nisimbahi Yehuda. “Kirapa i kami makapundendehi dang makapangunturi tul᷊iri kami? Mawu Ruata seng nanibo pusansal᷊a ngi kami. Orasi i'i i kami kaul᷊ie l᷊ang i Tuang, wal᷊inge kitang i sie ko si sai nikarea wohosi e'e.”
17Angkung i Yusuf, “Ta! Ia mandi mukoa kere'e! Kitang i sie ko si sai nikarea wohosi e'e sarung makoa l᷊angku. Ko wal᷊inge botonge mapul᷊e sarang koa i papa ngi kumu.”
I Yehuda nanatawang si Benyamin
18I Yehuda nusumandighi si Yusuf dang nangul᷊i, “Mundo ampung, Tuangku, pakawalako l᷊ang u mudidato sau dingang i Tuangku. Ari puwawal᷊uang su l᷊ang u; I Tuangku seng kere ratu ngu Mesir sisane. 19I Tuang seng nakina si kami i'i, ‘apa i kami mborong pia i papa arako l᷊ai sintamahuaring ko wal᷊inge?’ 20I kami nusumimbahi, ‘i papa ngi kami seng maghurang dang tuari ngi kami nipahinding su tempo ngi papa seng marange umurie. Tuhang u tuari ngi kami tamba mama e'e seng napul᷊e asal᷊ie, inau orasi i'i kitang i sie sisane ko mborong wiahi bo i sire rua, dang i papa makindaghi kahingang si sie.’ 21I L᷊uadatengku nundoi si kami pakiwawa mai i sie, tadeau i L᷊uadatengku botonge makawua si sie, 22bou e'e i kami nusumimbahi himoneu ana e'e ko tawe maghea bo i papange; boko i sie mutal᷊ei bo i papange, i papa sarung mate. 23Bou e'e i Tuangku nangul᷊i, ‘I kumu ta botonge mupasaruang u ia sau boko ta mumbawa tuari ngi kumu e'e.’
24Su tempo ngi kami nusul᷊e sarang koa i papa ngi kami, i kami nangul᷊i si sie didato ngi Tuangku e'e. 25Bou e'e i papa ngi kami nundoi si kami pamai sau pul᷊uang kang. 26I kami nusumimbahi, ‘I kami ta makatamai sarang pai e'e, watu'u i kami ta makapupasaruang gubernur boko tuari ngi kami ko kahembokange ta i patuhu. I kami kitang botonge matamai sarang pai e'e boko i sie l᷊ai matamai.’ 27Bou e'e i papa ngi kami nangul᷊i, ‘I kumu matitong himoneu kawingku i Rahel kitang pia ana darua. 28Ko kahimotongange seng nanintang u ia. I sie nal᷊ahe seng nitimbo u binatang ko wawahani, ual᷊ingu sarang orasi i'i ia seng ta sau nakawua. 29Boko i kumu mangal᷊a anaku ko katuariange i'i bou ia, dang mariadi manga apa si sie, kasasusa ko ipasongo ngi kumu si sia e'e sarung makapate si sia, ual᷊ingu ia i'i seng maghurang.’ ”
30-31“Ual᷊ingu e'e, Tuangku,” angkung i Yehuda si Yusuf, “Boko i kami musul᷊e sarang koa i papa ngi kami takoae tuari ngi kami, nal᷊ahe i papa ngi kami sarung mate. Sinangonge naghantong su ana e'e, dang i sie seng kere'e kaghurange hakiu kasasusa ko ipasongo ngi kami e'e sarung makapate si sie. 32Dingang l᷊ai, l᷊ang u seng nudiandi si papa himoneu l᷊ang u makoa pataru ana e'e. L᷊ang u nangul᷊i si sie, himoneu boko l᷊ang u ta mumbawa ana e'e musul᷊e sarang koae, l᷊ang u ko sarung mananggong hukumang su kanandu u puwawiahi. 33Inau l᷊ang u mukahioro, Tuangku pakawalako l᷊ang u matana su si'i makoa l᷊ang i Tuangku mungganti tuari ngi kami e'e, walate i sie pakapul᷊e dingang u manga tuhange. 34Kirapa l᷊ang u mapul᷊e sarang koa i papa ngi kami boko ana e'e ta mawawa? L᷊ang u ta makatahang ntihang mutuhung apa ko sarung mariadi si papa ngi kami e'e.”
Nu geselecteerd:
KARARIADI 44: PLT
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
