KARARIADI 45
45
I Yusuf nupakal᷊ahe u watangenge
1 #
Wuk. 7:13
I Yusuf seng ta makapukuhirang u pundange su tingo ngu manga pul᷊ahal᷊ie. Ual᷊ingu e'e niroie i sire panintang u tampa e'e tadeau i sie botonge mul᷊ahe watangenge su manga tamahuaringe. 2Suapang kaul᷊i u pul᷊ahal᷊ie nanintang u tampa e'e, i Yusuf numpal᷊ehe mauha-uha, hakiu manga taumata ngu Mesir su l᷊ikuru tampa e'e nakaringihi, dang habari e'e nurating sarang istana ngu ratu. 3I Yusuf nangul᷊i su manga tamahuaringe, “Ia i'i i Yusuf, mborong wiahi i papa?” Nakawua e'e manga tamahuaringe nataku kahingang hakiu ta makasimbahi. 4Bou e'e i Yusuf nangul᷊i si sire, “Maiko sarang si'i.” I sire nusumandighi, dang i sie sau nangul᷊i, “Ia i Yusuf, ko seng niwal᷊u i kumu sarang Mesir. 5Kumbahang mataku arako musisili u watangeng i kumu ual᷊ing i kumu seng nuwal᷊u u ia. Tuhu hinonge Mawu Ruata sisane ko numbawa si sia sarang i'i nangihoro si kumu guna ngu mangambang taumata maul᷊i. 6I'i mbuhue taung karuange bou tempo ngu kal᷊ahutung, dang l᷊iwuenge l᷊ima taung l᷊ai taumata ta sarung mangasi arako manipo. 7Mawu Ruata seng numbawa si sia nangihoro si kumu guna ngu mangambang si kumu dingang u l᷊al᷊eng ko makal᷊aherang i'i, dang guna ngu manadia kasasal᷊amati kumu l᷊au tuhu u hintou ngi kumu. 8Inau, tuhu hinonge, wal᷊inge i kumu nakakoa ia ene su si'i, kateho ko Mawu Ruata. I Sie seng nupakakoa u ia mul᷊al᷊ahal᷊i ko karangetange bou ratu ngu Mesir. Ia nionggol᷊ang u kawasa su kaul᷊i u ruma tanggae dang su kal᷊abo u Mesir.
9 #
Wuk. 7:14
Orasi i'i, pakaehongte i kumu pusul᷊e sarang koa i papa dang ul᷊i si sie, himoneu i Yusuf, anae, nangul᷊i kiri'i, ‘Mawu Ruata seng nupakakoa u ia mangangawasa su kaul᷊i u Mesir; songote pakaehong. 10I papa botonge matana su Gosyen, masandighi dingangku — i papa, dingang ana pung, domba, kambing, sapi dang kaul᷊i u rarotong i papa. 11Boko i papa ene su Gosyen, ia botonge mamal᷊ihara si papa. Tempo ngu kal᷊ahutung mborong l᷊ima taung l᷊iwuenge dang ia sarung mutawakal᷊i tadeau i papa, walagheng l᷊au manga binatang papal᷊iharang i papa kumbahang kasueng u manga apa.’ ”
12Angkung i Yusuf l᷊ai, “I'i i kumu sisane nakawua, i kau l᷊ai Benyamin, himoneu ia tinga-tingari i Yusuf. 13Ul᷊i si papa ngi kite kirapa kal᷊aboe kawasaku su si'i, su Mesir, dang wukete si sie apang ko seng nikawua ngi kumu. Bou e'e pakaehongte wawa i sie mai.”
14Bou e'e i sie nul᷊ahuku si Benyamin, tuaringe e'e, bou e'e numpal᷊ehe; i Benyamin l᷊ai numpal᷊ehe apiru kapul᷊ahukue si Yusuf. 15Bou e'e mborong kal᷊ehenge, i Yusuf nul᷊ahuku kaul᷊i u manga tamahuaringe dang nangimbu si sire. Nasue e'e i sire nanita nudidato dingange.
16Su tempo istana ngu ratu nakaringihi habari himoneu manga tamahuari ngi Yusuf nusumongo, ratu l᷊au manga mul᷊ahal᷊ie l᷊ai mal᷊uasi. 17Bou e'e ratu nangul᷊i si Yusuf, “Roite manga tamahuaring u e'e pul᷊urang keledai ngi sire dingang u gandung dang pakapul᷊e sarang Kanaan 18guna ngu pangal᷊a si papa l᷊au walagheng ngi sire bou e'e pangal᷊ing mai. Ia sarung mangonggo si sire tana ko kapiange su Mesir, dang i sire sarung botonge muwiahi masuku bou ghisi ngu tana e'e. 19Roite i sire l᷊ai pumbawa bou i'i pira mbau kereta guna ngu kawing l᷊au manga ana i sire ko mborong ko dadio, dang guna ngu pangal᷊a si papa ngi sire. 20I sire tawahal᷊uasi mutinaung manga barang ko mambeng itintang i sire, ual᷊ingu ko kapiange su Mesir mariadi koa i sire.”
21Manga ana i Yakub nutumuhu parenta ngu ratu e'e. I Yusuf nangonggo si sire kereta pira mbau, sintuhu dingang u parenta ngu ratu, dang l᷊ai sinasa su l᷊al᷊al᷊engang. 22Nionggoe l᷊ai si sire singkatau-singkatau pusimpari laku ko wuhu, arawe si Benyamin nionggoe tiluhasu doi sal᷊aka l᷊au l᷊ima mpari laku ko wuhu. 23I sie nundoho si papange mapul᷊o mbau keledai ko nil᷊urangeng u manga barang ko kapiange su Mesir, dang mapul᷊o l᷊ai keledai ko nil᷊urangeng u gandung, boroti l᷊au kang ko wal᷊inge guna ngu sinasae su l᷊al᷊al᷊engang simai sarang Mesir. 24Nasue e'e i sie nupuwua u manga tamahuaringe, apiru nangul᷊i si sire, “Kumbahang murarendehi su l᷊al᷊al᷊engang.”
25I sire nanintang u Mesir dang napul᷊e sarang Kanaan sarang koa i Yakub, i papa ngi sire. 26“I Yusuf mborong wiahi!” angkung i sire si sie. “I sie mangangawasa su Mesir!” Nakaringihi habari e'e, i Yakub mangkate ta inanoe, dang i sie ta mangimang si sire.
27Kateho suapang i sire nuwuke ngu kaul᷊i u ko nihabari Yusuf si sire, dang suapang i sie nakawua kereta ko niroho ngi Yusuf guna ngu mangal᷊a dang mumbawa si sie sarang Mesir, i sie natilang bou ta inanoe e'e. 28“Anaku i Yusuf mborong wiahi!” angkunge. “Kitang e'e ko daku ikao! Ia mambeng matamai dang mutuhung si sie su horo u ia mate.”
Nu geselecteerd:
KARARIADI 45: PLT
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
