KARARIADI 43
43
Manga tuhang i Yusuf nakoa sarang Mesir dingang i Benyamin
1-2Kal᷊ahutung su Kanaan mang katatambange, dang suapang walagheng i Yakub nikasueng u gandung ko niwawa i sire bou Mesir, i Yakub nangul᷊i su manga anae, “Tamaite sau sarang pai e'e dang pul᷊uangko gandung guna ngi kite.”
3Bou e'e i Yehuda nangul᷊i si sie, “I Gubernur u Mesir seng nangonggo u l᷊aingati ko masikari himoneu i kami ta botonge mupasaruang si sie boko i kami ta mumbawa tuari ngi kami e'e. 4Boko i papa mupakawala ngu tuari ngi kami patuhu, i kami mo matamai sarang pai e'e mul᷊uang kang. 5Kateho boko i papa ta mupakawala ngi Benyamin patuhu, i kami mandi matamai, watu'u gubernur e'e seng nangul᷊i himoneu i kami ta botonge mupasaruang i sie boko tuari ngi kami ta nutumuhu.”
6Angkung i Yakub, “Nakurawe i kumu nupakasusa ngu ia dingang u nuhabari su tau e'e himoneu i kumu mborong pia tuari.?”
7I sire nusumimbahi, “Tau e'e turusi-turusi nakina hal᷊i i kami dang hal᷊i u walagheng ngi kite, angkunge, ‘Mborong wiahi i papangu? Apa i kumu mborong pia tuari ko ese ko wal᷊inge?’ I kami nasihasa nusumimbahi apang kakinae. Kirapawe i kami botonge makatitong himoneu i sie ko sarung mundoi si kami pumbawa tuari ngi kami e'e?”
8Bou e'e angkung i Yehuda si papange, “Pakawalako ana e'e patuhu, hindo ia mutanggong jawapi si sie. I Kami sarung maehong matamai tadeau takoae sarang singkatau bo i kite mate kal᷊unusang. 9Ko ia makoa pataru, dang i papa botonge manuntu i sie si sia. Boko i sie ta sau daku iwawa dingang masal᷊amati, ia mananggong hukumange su kanandu u putatumbiahiku. 10Boko i kite ta nangampal᷊i kere'e kal᷊iwuenge, nal᷊ahe i kami kiri'i seng pakarua nusasul᷊e.”
11Bou e'e i papa ngi sire nangul᷊i, “Boko mambeng kere'e, wawako hasili ko kapiange bou wanua ngi kite i'i taho su manga karong i kumu kere paraseng guna ngu gubernur e'e: Kismis, madu, manga rampa, wua ngu kamiri l᷊au wua ngu badam. 12Wawako l᷊ai doi lebenge pakarua bou horo, ual᷊ingu doi ko nikarea su l᷊al᷊ung u karong i kumu mambeng isul᷊e ngi kumu. Pari e'e kitang nunsal᷊a taho. 13Wawae tuari ngi kumu, dang pusul᷊e pakaehong. 14Mal᷊umbako Mawu Ruata ko Tumaniu Makawasa mukoa gubernur e'e mukumindaghi si kumu, hakiu i sie sau manul᷊e ngi Benyamin l᷊au i Simeon si kumu. Arawe si sia i'i, boko ia mambeng kailangeng u manga anaku, koateng we kirapa.”
15Bou e'e manga tamahuaring i Yusuf numbawa manga paraseng e'e l᷊au doi lebenge pakarua bou horo, dang nuwua sarang Mesir dingang i Benyamin. Suapang nurating u pai e'e, i sire nupatingo i Yusuf. 16Su tempo ngi Yusuf nakawua si Benyamin, l᷊au manga tuhange, i sie nangul᷊i su paparentange ko nakoa tumbonang u ruma tanggae, “Wawako manga taumata e'e sarang wal᷊eku. I sire sarung kumang dingangku kal᷊ihae i'i, watu'u e'e puhatako binatang papal᷊iharang bou e'e sadiaiko e'e.” 17Paparentang e'e nukoa apang ko niparenta e'e dang numbawa manga tamahuaring i Yusuf e'e sarang l᷊al᷊ung u wal᷊e ngi gubernur.
18Su tempo ngi sire niwawa sarang l᷊al᷊ung u wal᷊e ngi Yusuf, i sire su katatakutang dang nusipiri, “I kite niwawa sarang i'i, ual᷊ingu doi ko nikarea i kite su l᷊al᷊ung u karong i kite su tempo ngi kite namai horo. I sire singkahuwiu sarung maname si kite, bou e'e sarung mangal᷊a keledai ngi kite dang mukoa si kite l᷊ang i sire.” 19Ual᷊ingu e'e, masandighi u tukari u wal᷊e ngi Yusuf, i sire nangul᷊i su tumbonang u ruma tangga, 20“Mundo ampung, Tuang, i kami seng mbuae namai guna ngu mul᷊uang kang. 21-22Su l᷊al᷊al᷊engang mapul᷊e, su tempo ngi kami matiki, i kami namuka karong i kami. Singkawua kaul᷊i u doi wawaehi gandung i kami ene su wawo u gandung. I kami wugha i sai nutaho doi e'e. Orasi i'i i kami numbawa doi e'e dang isul᷊e si Tuang. Su l᷊ikuru e'e i kami mborong numbawa doi l᷊ai guna ngu sau pul᷊uang kang.”
23Paparentang e'e nangul᷊i, “Kumbahang mataku. Kumbahang maghagha. Mawu Ruata ngi kumu, e'e Mawu Ruata ko nisumba ngi papa ngi kumu, ko I Sie nutaho doi e'e su l᷊al᷊ung u karong i kumu. Ia seng nanarima wawaehi kumu guna ngu gandung e'e.”
Bou e'e niwawae i Simeon sarang koa i sire, 24bou e'e ninturie i sire sarang l᷊al᷊ung wal᷊e. I sie nangonggo si sire ake guna ngu panguhasi l᷊aeri, dang l᷊ai kang guna ngu keledai ngi sire. 25Bou e'e i sire nanadia paraseng guna ngu ionggo si Yusuf boko i sie sumongo kal᷊ihae, ual᷊ing i sire seng nihabareng himoneu i sire sarung kumang singkahindo dingange. 26Su tempo ngi Yusuf nurating u wal᷊e, i sire nangonggo manga paraseng e'e si Yusuf apiru nusuba si sie. 27I Yusuf nakina hal᷊i u kakakoa i sire, bou e'e nangul᷊i, “I kumu seng nuwuke si sia hal᷊i u i papa ngi kumu ko seng maghurang e'e. Kirapa kakakoae? Mapia we?”
28I sire nusumimbahi, “L᷊ang i Tuang, i papa ngi kami, mapia kakakoae.” Bou e'e I sire nusuba si sie. 29Su tempo ngi Yusuf nakawua si Benyamin, tuari nge, i sie nangul᷊i, “Inau, ko i'i tuari ngi kumu ko katuariange e'e, ko seng nihabari kumu si sia? Mal᷊umbako Mawu Ruata mangal᷊amati si kau, anaku.” 30Naung i Yusuf nusumahoka ual᷊ingu kaou naunge l᷊au kakindaghie su tuari nge. I sie masandighi ta makatahang mukuhirang u pundange, ual᷊ingu e'e singkawua i sie nuwua bou e'e nusumu sarang l᷊al᷊ung u kamari dang numpal᷊ehe. 31Bou e'e i sie nanguhau, dang sau nusumuwang, dang dingang nutatahang u naunge, i sie nundoi pakipanadia kang. 32I Yusuf nukumang su meda simbau ko nahae, dang manga tamahuaringe su meda ko wal᷊inge. Manga tau Mesir ko ene su se'e nukumang su meda ko wal᷊inge l᷊ai, watu'u i sire pundang mahina boko kumang singkahindo dingang u tau Ibrani. 33Manga tamahuaring i Yusuf nipilo su meda ko nutumatingo dingang meda ngi Yusuf, tumuhu umuri simbau-simbau, manita bou ko kaiyakanenge sarang ko katuariange. Su tempo ngi sire nutuhung atorang u kakangianeng e'e, i sire nutatuhung naherang. 34I sire nionggol᷊ang u kang bou meda ngi Yusuf, dang i Benyamin nital᷊ungang paka l᷊ima lebe maul᷊i bou manga tuhange. Bou e'e i sire nukumang dang nanginung singkahindo dingang i Yusuf sarang nikal᷊aerang.
Nu geselecteerd:
KARARIADI 43: PLT
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
