KARARIADI 42
42
Manga tuhang i Yusuf nakoa sarang Mesir guna ngu mul᷊uang gandung
1Su tempo ngi Yakub nakaringihi himoneu pia gandung su Mesir, i sie nangul᷊i su manga anae, “Nakurawe i kumu mangkate ko matatapi? 2#Wuk. 7:12 Seng daku nikaringihi himoneu pia gandung su Mesir, tamaiko sarang pai e'e dang pul᷊uangko gandung tadeau i kite kumbahang mate kal᷊unusang.” 3Bou e'e i sire mapul᷊o manga tuhang i Yusuf e'e natamai nul᷊uang gandung su Mesir. 4Kateho i Yakub ta nupakawala ngi Benyamin, tuari ngi Yusuf tutunge, tamai dingang i sire, ual᷊ing i sie mataku kumbahang pia silaka mariadi su anae e'e.
5Ual᷊ingu kal᷊ahutung su wanua ngu Kanaan, manga ana i Yakub dingang u taumata maul᷊i ko wal᷊inge natamai nul᷊uang gandung su Mesir. 6Ko nuwal᷊u gandung su manga taumata bou kaul᷊i u dunia ko i Yusuf, kere singkatau gubernur su Mesir. Watu'u e'e manga tuhang i Yusuf nusumongo dang nusuba su tingo nge. 7Su tempo ngi Yusuf nakawua manga tuhange, i sie nakakil᷊al᷊a si sire, kateho i sie nutul᷊ong kere ko wugha. Dingang mahasa i sie nakina si sire, “I kumu taumata bou apa?”
“I kami taumata ngu Kanaan. I kami nusumongo guna ngu mul᷊uang kang,” nisimbahi sire.
8Maneng i Yusuf nakakil᷊al᷊a manga tuhange, i sire ta nakakil᷊al᷊a si sie. 9#Kar. 37:5-10Bou e'e i sie nakatinaung ipinge hal᷊i i sire. Dang i sie nangul᷊i, “I kumu i'i ko mundandahiri; i kumu nusumongo tadeau mutuhung su apa kal᷊al᷊ome ngu wanua ngi kami.”
10“Ta we, Tuangku,” nisimbahi sire. “I kami manga l᷊ang i Tuang nusumongo kitang guna ngu mul᷊uang kang. 11I kami i'i ko singtamahuaring, Tuangku. I kami i'i taumata ko mapapia, wal᷊inge mundandahiri.” 12I Yusuf nangul᷊i si sire, “L᷊eo! I kumu nusumongo mai guna ngu mutuhung su apa kal᷊al᷊ome ngu wanua ngi kami i'i.”
13I sire nusumimbahi, “I kami i'i singtamahuaring mapul᷊odua su kataunge, Tuangku, i papa ngi kami simbau su Kanaan. Singkatau bo i kami seng napul᷊e asal᷊ie dang ko tuari i'i ene dingang i papa ngi kami.”
14“Mang tingari kere ko daku niul᷊i.” Nisimbahi Yusuf, “I kumu i'i ko mundandahiri. 15Ia mo manuka si kumu: Ia mutewa su areng u ratu himoneu i kumu ta sarung manintang u wanua i'i boko tuari ngi kumu ko tuari e'e ta sumongo mai. 16Singkatau bo i kumu mambeng kapul᷊e pangal᷊a si sie. Ko wal᷊inge sarung itahang sarang didato ngi kumu mal᷊ahe. Boko ta, su areng u ratu, i kumu i'i ko mundandahiri roka ko ipuseketang!” 17Bou e'e i sire nipasu su l᷊al᷊ung u tutupang tilu l᷊ou l᷊iwuenge.
18Su l᷊ou katilunge i Yusuf nangul᷊i si sire, “Ia singkatau ko mataku dang matuhu su Mawu Ruata. I kumu sarung daku ambangeng dingang simbau tundunge. 19Guna ngu putuhungang himoneu i kumu i'i ko matul᷊iri, singkatau bo i kumu sarung itahang su l᷊al᷊ung u tutupang; ko wal᷊inge botonge mapul᷊e dang pumbawa gandung ko seng nil᷊uangeng i kumu guna ngu walagheng ngi kumu ko seng kaputatahang u hutung. 20Bou e'e i kumu mambeng pumbawa tuari ngi kumu ko tuari sarang koaku. E'e tatiange himoneu didato ngi kumu e'e tingari, dang i kumu ta sarung ihukung u papate.”
I sire nutumuhu su putusang gubernur e'e. 21Bou e'e i sire nuhundidato singkatau su ko wal᷊inge, “Ho, i kite i'i nihukung ual᷊ingu kakanoa i kite horo ko nunsal᷊a su tuari ngi kite; i sie nundo tul᷊ung, kateho i kite mandi mupandung, maneng i kite seng nakawua himoneu i sie kere'e katurue. E'e sabapie i kite i'i nakapundang buhae i'i.”
22 #
Kar. 37:21-22
Angkung i Ruben, “Wal᷊ingewe ia ndahuwite seng nangul᷊i si kumu tadeau kumbahang mupakasusa ngu ana e'e. Kateho i kumu mandi mundaringihi. Dang i'i papatenge niwal᷊isi si kite.” 23I Yusuf nakana wahasa ngi sire, kateho i sire wugha ngu hal᷊i e'e, ual᷊ing i sire mudidato dingang i Yusuf pia singkatau ko nakoa toloki. 24I Yusuf nanintang i sire, bou e'e nusumangi. Su tempo ngu seng botonge sau mudidato, i sie nusul᷊e sarang koa i sire, bou e'e nangal᷊a si Simeon, dang nundoi paki'iki i sie su tingo ngu kaul᷊i u ana tamahuari nge.
Manga tamahuaring i Yusuf nusul᷊e sarang Kanaan
25I Yusuf nuparenta tadeau manga karong ko niwawa u manga tuhange pakitaho u gandung, dang doi ngi sire singkatau-singkatau nipasu su l᷊al᷊ung u manga karong e'e. Tadeau i sire l᷊ai pakionggol᷊e ngu kang guna ngu sinasa su l᷊al᷊eng. Parentange e'e nikoa i sire. 26Bou e'e manga tuhang i Yusuf nulurang manga gandung ko seng nil᷊uangeng i sire e'e su wawo u keledai ngi sire, bou e'e i sire nuwua bou tampa e'e. 27Su tampa ko nikatikilang i sire, singkatau bo i sire namuka karong u gandunge, guna ngu mangonggo kang u keledainge. Nikareae doi nge su wawo u gandung e'e. 28“Doiku nisul᷊e,” nihabarie su manga tuhange. “Kenang tuhunge, ene su l᷊al᷊ung karongku!” I sire nataku dang su l᷊al᷊ung katatakutang i sire nukakina, “Apa ko nikoa u Mawu Ruata si kite?” 29Su apang nurating u Kanaan, i sire nuwuke si papa ngi sire kaul᷊i u patiku ko seng nikapundangeng i sire. Angkung i sire, 30“I gubernur u Mesir nudidato dingang mahasa si kami dang nangantang si kami ko mundandahiri wanua ngi sire. 31I kami nusumimbahi, ‘I kami taumata ko mapapia, wal᷊inge mundandahiri, i kami taumata ko matul᷊iri. 32I kami kaul᷊ie singtamahuaring mapul᷊odua su kataunge, ana bou iyamang simbau, dang singkatau seng napul᷊e asal᷊ie, arawe ko katuariange ene dingang i papa su Kanaan.’ 33Gubernur e'e nangul᷊i, ‘Ia mo manuka si kumu guna ngu mutuhung apa i kumu taumata ko matul᷊iri: Singkatau bo i kumu mambeng itintang; ko wal᷊inge botonge mapul᷊e pumbawa gandung su walagheng i kumu ko kaputatahang u hutung. 34Suapang i kumu seng nusul᷊e numbawa tuari ngi kumu ko katuariange, ia sarung matitong himoneu i kumu wal᷊inge mundandahiri, kateho taumata ko matul᷊iri. Kuteu tamahuaring i kumu ko daku nitahangeng e'e sarung daku isul᷊e si kumu dang i kumu botonge matana su wanua i'i dang botonge mudagang tuhu kao i kumu.’ ”
35Bou e'e, su tempo ngu i sire nangaung manga karong i sire, i sire nakarea manga dompeti sire singkatau-singkatau ko pia tahoe doi; bou e'e i sire nataku kahingang, i papa ngi sire l᷊ai nataku. 36Bou e'e i papa ngi sire nangul᷊i, “I kumu nakakoa si sia nikailangeng manga anaku. I Yusuf seng tarie'e; I Simeon l᷊ai seng tarie; dang su orasi i'i i kumu sarung mangal᷊a si Benyamin l᷊ai. Wal᷊inge gampang buha u kasasusaku!”
37Bou e'e angkung i Ruben si papa nge, “Sarakangte i Benyamin si sia, Papa; hindo ia sarung mumbawa si sie sau musul᷊e, boko ta, i papa botonge mamate si sire rua anaku kol᷊aese.”
38Kateho i Yakub nangul᷊i, “Ta! I Benyamin ta botonge iwawa i kumu; tuhange seng nate dang i'i kate i sie ko mborong ene. Kumbahang i sie makarea silaka su l᷊al᷊ung u l᷊al᷊al᷊engang e'e. Ia i'i seng maghurang, dang kasasusa ko sarung ipasongo ngi kumu e'e sarung makapate si sia.”
Nu geselecteerd:
KARARIADI 42: PLT
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
