भजनसंग्रह 145:13-21

तपाईंको राज्‍यको अन्‍त छैन र तपाईं सदासर्वदाको लागि राजा हुनुहुन्‍छ। परमप्रभुले आफ्‍ना प्रतिज्ञाहरू पूरा गर्न विश्‍वासयोग्‍य हुनुहुन्‍छ र उहाँ आफ्‍ना सबै कामहरूमा दयालु हुनुहुन्‍छ। कष्‍टमा परेकाहरूलाई उहाँ सहायता गर्नुहुन्‍छ, उहाँले लडेकाहरूलाई उठाउनुहुन्‍छ। सबै जीवित प्राणीहरूले तपाईंलाई आशा गरेर हेर्दछन् र तिनीहरूलाई चाहिएका बेलामा तपाईं भोजन दिनुहुन्‍छ। तिनीहरूलाई तपाईंले पेटभरि खुवाउनुहुन्‍छ र तिनीहरू सबैका अभावहरू पूरा गरिदिनुहुन्‍छ। आफूले गर्नुभएका सारा कामहरूमा परमप्रभु धार्मिक हुनुहुन्‍छ, आफ्‍ना सबै काममा उहाँ कृपालु हुनुहुन्‍छ। उहाँलाई पुकार्नेहरू उहाँलाई साँचो मनले पुकार्नेहरू, सबैका नजिक उहाँ हुनुहुन्‍छ। उहाँलाई आदर गर्नेहरूका अभावहरू उहाँले भरिदिनुहुन्‍छ, उहाँले तिनीहरूको पुकार सुन्‍नुहुन्‍छ र तिनीहरूलाई बचाउनुहुन्‍छ। उहाँलाई प्रेम गर्ने हरेकलाई उहाँले रक्षा गर्नुहुन्‍छ, तर दुष्‍टहरूलाई भने उहाँले नाश गर्नुहुनेछ। म सधैँ परमप्रभुको प्रशंसा गर्नेछु, उहाँका सारा सृष्‍टिले सदासर्वदा उहाँको पवित्र नामको प्रशंसा गरोस्।