मर्कूस 5:14-20

यो देखेर सुँगुर चराउनेहरू त्‍यहाँबाट भागेर गए र यो कुरा गाउँ र सहरभरि नै फैलाए। धेरै मानिसहरू के भएछ भनेर हेर्न येशूकहाँ आए। तिनीहरूले पहिले धेरै भूतहरू लागेको मानिसलाई अहिले ठीक भई लुगा लगाएर येशूसँगै बसिरहेको देखे। अनि तिनीहरू ज्‍यादै छक्‍क परे। यो घटना देख्‍ने मानिसहरूले त्‍यस मानिस र सुँगुरको कुरा त्‍यहाँ आएका मानिसहरूलाई सुनाए। यस्‍तो कुरा सुनेर ती मानिसहरूले येशूलाई “हाम्रो मुलुक छोडेर जानुहोस्,” भनी बिन्‍ती गरे। येशू नाउमा चढ्‍न लाग्‍दा निको भएको मानिसले “मलाई पनि सँगै लानुहोस्,” भनेर बिन्‍ती गर्‍यो। तर येशूले उसलाई आफूसँग आउन नदिई यसरी भन्‍नुभयो, “आफ्‍नो घर जाऊ र परमप्रभुले तिमीलाई देखाउनुभएको दया र उहाँले गर्नुभएको सबै कुरा तिम्रा आफन्‍तहरूलाई सुनाऊ।” अनि त्‍यो मानिस दश सहरका इलाकामा गएर येशूले आफ्‍नो लागि गर्नुभएको काम सबैलाई सुनायो। अनि सुन्‍नेहरू सबै छक्‍क परे।