လုကာကျမ်း 16

အခန်း (၁၆)

ပါးနပ်သောဘဏ္ဍာစိုး

1တစ်ဖန်အီစာက “ဆွာဟာဗီ” တပည့်တော်တို့အား “အခါတစ်ပါး၌ သူဌေးတစ်ယောက်မှာ ဘဏ္ဍာစိုးတစ်ဦးရှိ၏။ ထိုသူသည် သူဌေး၏ဥစ္စာပစ္စည်းများကို ဖြုန်းတီးလျက်နေကြောင်းကို လူတို့ကသူဌေးအားတိုင်တန်းကြ၏။ 2သူဌေးသည် သူ့ကိုခေါ်၍ ‘သင့်အကြောင်းငါကြားရသည်မှာ အဘယ်သို့နည်း။ သင်၏လုပ်ငန်းနှင့်ဆိုင်သော ငွေစာရင်းများကိုတင်ပြလော့။ အကြောင်းမူကား သင်သည်ဆက်၍ငါ၏ဘဏ္ဍာစိုး လုပ်ရတော့မည်မဟုတ်’ ဟု ဆို၏။

3ထိုအခါ ဘဏ္ဍာစိုးသည် ‘ငါအဘယ်သို့ပြုရမည်နည်းဟု မိမိကိုယ်ကိုပြောနေသည်။ ငါ့သူဌေးသည်ဘဏ္ဍာစိုးရာထူးကိုရုပ်သိမ်းလေပြီ။ ငါ့မှာမြေတူးဆွနိုင်သောခွန်အားမရှိ။ တောင်းရမ်းစားရန်လည်းငါရှက်၏။ 4ငါ့ရာထူးပြုတ်ပြီးနောက် လူတို့သည် မိမိတို့အိမ်များတွင် ငါ့ကိုလက်ခံပေါင်းဖော်ကြစေရန် အဘယ်သို့ပြုရမည်ကိုငါသိပြီ’ ဟု တစ်ကိုယ်တည်းပြောဆိုကာ၊

5သူဌေးထံမှအကြွေးယူထားသူ အားလုံးကိုခေါ်၏။ ထိုနောက်ပထမလူအား ‘သင်သည် ငါ့သူဌေးကိုသင်ပေးဆပ်ရန် အကြွေးမည်မျှရှိသနည်း’ ဟု မေး၏။

6ထိုသူက ‘ဆီအချိန်ခွက်တစ်ထောင်#16:6 ဆီအချိန်ခွက်တစ်ထောင် မူရင်းဂရိဘာသာတွင် ၁၀၀ “ဘာတော့စ်” ဟု ဖော်ပြထားပါသည်။ တစ် “ဘာတော့စ်” သည် ပိဿာ (၂၀) ပမာဏမျှနှင့် တူညီပါသည်။ (ထိုဆီကို သံလွင်ဆီဟုရေးလိုပါက ရေးနိုင်ပါသည်။) ရှိပါသည်’ ဟု ပြန်ပြော၏။

ထိုအခါဘဏ္ဍာစိုးက ‘သင်၏စာရင်းကိုယူလော့။ အမြန်ထိုင်၍ခွက်ငါးရာဟုရေးလော့’ ဟု ဆို၏။

7ထို့နောက် အခြားသူတစ်ယောက်အား ‘သင်သည်လည်းပေးဆပ်ရန် အကြွေးမည်မျှရှိသနည်း’ ဟု မေး၏။

ထိုသူက ‘ဂျုံစပါးအတင်းတစ်တောင်ရှိပါသည်’ ဟု ဆိုလျှင်

ဘဏ္ဍာစိုးက ‘သင်၏စာရင်းကိုယူလော့၊ အမြန်ထိုင်၍အတင်းရှစ်ရာဟုရေးလော့’ ဟု ဆို၏။

8ဤသို့ပါးနပ်လိမ္မာစွာပြုသည့်အတွက် မရိုးဖြောင့်သည့်ဘဏ္ဍာစိုးကို သူဌေးသည်ချီးကျူးလေ၏။ အဘယ်ကြောင့်ဆိုသော် ‘ဒွန္နယာ’ လောကီသားတို့သည် ဒွန္နယာ လောကီ ကိစ္စဆောင်ရွက်ရာတွင် အလင်းနှင့်ဆိုင်သောသားများထက် ပါးနပ်လိမ္မာကြ၏” ဟု မိန့်တော်မူ၏။ 9ထိုမှတစ်ပါး “သင်တို့အားငါဆိုသည်ကား၊ သူတစ်ပါးကိုကူညီခြင်းဖြင့်သင်တို့၏ မမြဲသောနည်းလမ်းဖြင့်ရရှိသော ‘ဒွန္နယာ’ လောကီစည်းစိမ်ချမ်းသာမူကိုအသုံးပြုပါ၊ သို့မှသာထို ‘ဒွန္နယာ’ လောကီစည်းစိမ်ကုန်ဆုံးသောအခါ သင်တို့အားထာဝရအိမ်တော်ထာဝရအိမ်တော်တွင်ကြိုဆိုလက်ခံလိမ့်မည်။

10အမှုငယ်တွင်သစ္စာရှိသူသည် အမှုကြီးတွင်လည်း သစ္စာရှိလိမ့်မည်။ အမှုငယ်တွင်မရိုးဖြောင့်သူသည် အမှုကြီးတွင်လည်း ရိုးဖြောင့်လိမ့်မည်မဟုတ်။ 11သို့ဖြစ်၍ သင်တို့သည်မမြဲသော ဒွန္နယာ လောကီစည်းစိမ်နှင့်ပတ်သက်၍သစ္စာမရှိပါမူ အဘယ်သူသည်သင်တို့အား စည်းစိမ်အစစ်အမှန်ကိုအပ်မည်နည်း။ 12သင်တို့သည်သူတစ်ပါးပိုင်သည့်ဥစ္စာပစ္စည်းနှင့်ဆိုင်၍ သစ္စာမရှိပါမူ အဘယ်သူသည် သင်တို့ပိုင်ဆိုင်မည့်အရာကို သင်တို့အားပေးအပ်မည်နည်း။

13အဘယ်အစေခံမျှတစ်ပြိုင်နက်တည်း သခင်နှစ်ဦး၏အစေကိုမခံနိုင်။ အကြောင်းမူကားသူသည်သခင်တစ်ဦးကိုမုန်း၍ တစ်ဦးကိုချစ်မည်။ တစ်ဦးကိုသစ္စာရှိ၍တစ်ဦးကို မလေးမခန့်ပြုမည်။ သင်တို့သည် အလ္လာဟ်အရှင်မြတ်၏အစေနှင့် ဒွန္နယာ လောကီစည်းစိမ်၏အစေကိုမခံနိုင်ကြ” ဟု မိန့်တော်မူ၏။

14ငွေကိုတပ်မက်သူများဖြစ်သည့် ဖာရိစီးစ်များသည် ထိုစကားများကိုကြားလျှင် အီစာကိုပြက်ရယ်ပြုကြ၏။ 15အီစာက “သင်တို့သည်မိမိတို့ကိုယ်ကိုဖြောင့်မတ်သောသူများဟု လူတို့အားထင်မြင်စေကြ၏။ သို့ရာတွင်အလ္လာဟ်အရှင်မြတ်သည် သင်တို့၏စိတ်နှလုံးကိုသိတော်မူ၏။ အကြောင်းမူကား လူတို့အမြတ်တနိုးထားသောအရာသည်အလ္လာဟ်အရှင်မြတ်၏ရှေ့တော်မှာ စက်ဆုပ်ရွံရှာဖွယ်ဖြစ်၏။

အီစာ၏နှုတ်ထွက်စကားတော်အချို့

(မဿဲ၊ ၁၁:၁၂-၁၃၊ ၅:၃၁-၃၂)

16ယဟ်ယာမပေါ်မီကာလက သိူရာသ်ကျမ်းနှင့်နဗီတမန်တော်တို့၏ကျမ်းများရှိ၏။ ယာဟ်ယာပေါ်ပြီးချိန်မှစ၍ အလ္လာဟ်အရှင်မြတ်၏နိုင်ငံတော်အကြောင်း သတင်းကောင်းကိုဟောပြောကြေညာခဲ့၏။ လူအပေါင်းတို့သည်လည်း နိုင်ငံတော်သို့အနိုင်အထက်ကြိုးစား၍ ဝင်ကြကုန်၏။ 17သို့ရာတွင် သိူရာသ်ကျမ်းတော်မြတ်မှသေးငယ်သောအစိတ်အပိုင်းတစ်ခုပျက်စီးရန်ထက် ကောင်းကင်နှင့်ကမ္ဘာမြေကြီးပျက်စီးရန်ကသာ၍လွယ်၏။

18တစ်စုံတစ်ယောက်သည် မိမိ၏ဇနီးကို ‘တွလာက်’ ပေးကွာရှင်း၍အခြားသောမိန်းမနှင့် ထိမ်းမြားသောသူသည် ‘ဇိနာ’ အိမ်ထောင်ရေးဖောက်ပြန်ခြင်းနှင့် ကွာရှင်းထားသောမိန်းမနှင့်ထိမ်းမြားသော သူသည် ဇိနာ အိမ်ထောင်ရေးဖောက်ပြန်ခြင်းပင်ဖြစ်၏” ဟု မိန့်တော်မူ၏။

သူဌေးနှင့်လာဇရု

19ထို့နောက်အီစာက “အခါတစ်ပါး၌သူဌေးတစ်ဦးရှိ၏။ သူသည် နေ့စဉ်ခရမ်းရောင်ပိတ်ချောထည်များကို ဝတ်ဆင်လျက် စည်းစိမ်ခံစားလျက်နေ၏။ 20သူ၏အိမ်တံခါးအနီးတွင် လာဇရုဆိုသူ ဆင်းရဲသားတစ်ယောက်သည် တုံးလုံးလဲနေ၏။ သူ့မှာတစ်ကိုယ်လုံးအနာစိမ်းများပေါက်လျက်ရှိ၏။ 21သူသည်သူဌေး၏စားပွဲမှကျသည့် စားကြွင်းစားကျန်များကိုစားရရန် တောင့်တနေတတ်၏။ ထိုမျှမက ခွေးတို့သည်လာ၍ သူ၏အနာစိမ်းများကို လျက်ကြ၏။

22ထိုနောက်ဆင်းရဲသားသည် သေလွန်သွားသဖြင့် ‘မလာအိကာဟ်’ ကောင်းကင်တမန်တို့သည် သူ့အားအီဗ်ရာဟိမ်၏လက်ယာဘက် သို့ ပို့ဆောင်ကြ၏။ သူဌေးသည်လည်းသေလွန်၍ လူတို့ကသူ့ကို ‘ဒဖန်’ ပြုလုပ်သင်္ဂြိုဟ်ခြင်းကိုခံရ၏။ 23သူသည် ‘ဂျဟန္နမ်’ #16:23 ဂျဟန္နမ် “ဟားဒဲ့စ်” ဟူသော စကားလုံးသည် အပြစ်ကျူးလွန်သူတို့ (အမှန်အားဖြင့် သေလွန်သူများ၏ ဝိညာဉ်များ) အဆုံးစီရင်ခြင်းအထိ တည်ရှိရာနေရာကို ရည်ညွှန်းသည်။ငရဲတွင် ဝေဒနာပြင်းစွာခံနေရသဖြင့် မျှော်ကြည့်လိုက်သောအခါအဝေး၌ အီဗ်ရာဟိမ်ကိုလည်းကောင်း၊ အီဗ်ရာဟိမ်၏လက်ယာဘက်တွင် လာဇရုကိုလည်းကောင်းမြင်လေ၏။ 24သူဌေးက အဖ အီဗ်ရာဟိမ်၊ အကျွန်ုပ်ကို ‘ရဟ်မသ်’ သနားတော်မူပါ။ အကျွန်ုပ်သည် ဤမီးလျှံထဲတွင်ပြင်းစွာ ဝေဒနာခံနေရသောကြောင့် လာဇရုသည်လက်ဖျားကိုရေမှာနှစ်၍ အကျွန်ုပ်၏လျှာကိုအေးစေမည့်အကြောင်း သူ့အားအကျွန်ုပ်ထံသို့စေလွှတ်တော်မူပါ ဟု အော်၍လျှောက်၏။

25သို့ရာတွင် အီဗ်ရာဟိမ်က ငါ့သား၊ သင်အသက်ရှင်စဉ် သုခချမ်းသာခံစားခဲ့ရသည်ကိုလည်းကောင်း၊ လာဇရုသည်ဆင်းရဲဒုက္ခခံခဲ့ရသည်ကိုလည်းကောင်း သတိရပါလော့။ ယခုမှာမူသူသည် သက်သာခြင်းကိုခံစားရ၍ သင်မူကား ‘အဇားဗ်’ ဒုက္ခဝေဒနာကိုခံရလေပြီ။ 26ထိုမှတစ်ပါး သင်တို့နှင့်ငါတို့စပ်ကြားတွင် နက်စွာသောချောက်ကြီးတစ်ခုတည်ရှိ၏။ ထို့ကြောင့် သင်တို့ဘက်မှငါတို့ဘက်သို့လည်းကောင်း၊ ငါတို့ဘက်မှသင်တို့ဘက်သို့လည်းကောင်း ကူးဖြတ်လိုသူတို့သည် မကူးဖြတ်နိုင်ကြ ဟု ပြန်၍ပြော၏။

27သူဌေးက ‘အဖ အီဗ်ရာဟိမ်၊ ထိုသို့ဖြစ်ပါမူ လာဇရုအားအကျွန်ုပ်ဖခင်၏အိမ်သို့ စေလွှတ်ပေးပါရန် တောင်းပန်ပါ၏။ 28အကျွန်ုပ်တွင်ညီငါးယောက်ရှိပါ၏။ သူတို့သည်လည်း ဤဝေဒနာခံရာအရပ်သို့ မရောက်ကြစေရန်သူတို့အားသတိပေးရန် လာဇရုကိုစေလွှတ်တော်မူပါ’ ဟု လျှောက်၏။

29အီဗ်ရာဟိမ်က ‘သင်၏ညီများအားသတိပေးရန် မူစာနှင့်နဗီတမန်တော်များရှိကြ၏။ ထိုသူတို့၏ရှရီယသ်ပညတ်ချက်တို့ကို လိုက်နာနားထောင်ကြပါစေ’ ဟု ဆို၏။

30သို့ရာတွင်သူဌေးက အဖ အီဗ်ရာဟိမ်၊ ထိုသို့မဟုတ်ပါ။ အကယ်၍သေလွန်သူများအနက် တစ်ယောက်သော သူသည် သူတို့ထံသို့သွားသည်ရှိသော် သူတို့သည် ‘သောင်ဗဟ်’ ပြုနောင်တရကြပါလိမ့်မည် ဟု ဆို၏။

31အီဗ်ရာဟိမ်က ‘သူတို့သည် မူစာနှင့်နဗီတမန်တော်များ၏ ရှရီယသ်ပညတ်ချက်တို့ကိုမလိုက်နာလျှင် သေခြင်းမှလူတစ်စုံတစ်ယောက်ထမြောက်လာသော်လည်း သူတို့ယုံကြည်ကြလိမ့်မည်မဟုတ်ဟု’ ဆိုလေ၏” ဟု မိန့်တော်မူ၏။

လက်ရှိရွေးချယ်ထားမှု

လုကာကျမ်း 16: MBe

အရောင်မှတ်ချက်

ကူးယူ

နှိုင်းယှဉ်

မျှဝေရန်

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

Musselmani Burmese Bible by Beyond Translation is licensed under Creative Commons Attribution-ShareAlike 4.0 License.

လုကာကျမ်းအင်ဂျီလ်ကျမ်းတော်မြတ် အကြောင်းကို ပို၍ သင်ယူပါ။