လုကာကျမ်း 17
17
အခန်း (၁၇)
အပြစ်
(မဿဲ၊ ၁၈:၆-၇၊ ၂၁-၂၂။ မာကု၊ ၉:၄၂)
1ဟဇရသ်အီစာက “ဆွာဟာဗီ” တပည့်တို့အား “ဂူနာဟ်” အပြစ်မှား၍လမ်းလွဲစေသည့်အရာများကား မုချရှိမည်။ သို့ရာတွင် “လူတို့အား ‘ဂူနာဟ်’ အပြစ်မှား၍ လမ်းလွဲမှုကိုဖြစ်စေသောသူသည် အမင်္ဂလာရှိ၏။ 2ထိုသူသည် ဤသူငယ်တစ်စုံတစ်ယောက်ကို မှားယွင်းလမ်းလွဲစေမည့်အစား မိမိ၏လည်တွင်ကြိတ်ဆုံကျောက်ကြီးကိုဆွဲလျက် ပင်လယ်ထဲသို့ပစ်ချခံရခြင်းက သူ့အဖို့ကောင်းသေး၏။ 3သို့ဖြစ်၍သတိထားလျက်ပြုမူကြလော့။
သင်၏ညီအစ်ကိုသည် သင့်ကိုပြစ်မှားလျှင် သူ့အားဆုံးမလော့။ သူသည်နောင်တရလျှင် သူတို့ကိုအပြစ်ကိုခွင့်လွှတ်လော့။ 4တစ်နေ့တည်းတွင် ခုနှစ်ကြိမ်တိုင်အောင်သင့်ကိုပြစ်မှား၍ ခုနှစ်ကြိမ်တိုင်အောင်ပင်သင့်ထံသို့လာလျက် အကျွန်ုပ်နောင်တရပါပြီဟုဆိုလျှင် သင်သည်သူ့ကိုခွင့်လွှတ်ရမည်” ဟု “ဆွာဟာဗီ” တပည့်တော်တို့အားမိန့်တော်မူ၏။
5ထို့နောက် “ရစူလ်” တမန်တော်တို့က၊ “အကျွန်ုပ်တို့ ‘အီမာန်’ ယုံကြည်ခြင်းစိတ်ကို တိုးပွားစေတော်မူပါ” ဟု သခင်ကိုယ်တော်ကို လျှောက်ကြ၏။
6သခင်ကိုယ်တော်က၊ “သင်တို့သည် မုန်ညင်းစေ့ခန့်မျှလောက်သော ယုံကြည်ခြင်းရှိလျှင် ထိုသဖန်းပင်ကို၊ အချင်းအပင်၊ သင်သည် ဤပိုးစာပင်အား အမြစ်နှင့်တကွနုတ်၍ ပင်လယ်၌စိုက်လျက်နေလော့ဟုဆိုကြသော် သင်တို့စကားကို နားထောင်လိမ့်မည်။
7သင်တို့တွင် အဘယ်သူသည်မိမိ၏အစေခံအား လယ်ထွန်ရာမှဖြစ်စေ၊ သိုးကျောင်းရာမှဖြစ်စေ လယ်ကွင်းမှပြန်လာသောအခါ သင်သည် သူ့အား ‘ကြိုဆိုပါ၏၊ ညစာစားရန်အလျင်အမြန်လာ၍ထိုင်လော့’ ဟု ဆိုမည်နည်း။ 8ထိုသို့ဆိုမည့်အစား ‘ငါ့အတွက်ညစာကိုပြင်လော့။ ငါစားသောက်စဉ်ခါးကိုစည်း၍ ငါ့အားလုပ်ကျွေးလော့။ ပြီးမှသင်စားသောက်လော့’ ဟူ၍သာဆိုမည်မဟုတ်လော။ 9အစေခံသည်မိမိအရှင်စေခိုင်းသည့်အတိုင်း ဆောင်ရွက်သည့်အတွက်သူ့အားကျေးဇူးတင်စရာရှိသလော။ 10ထိုနည်းတူ သင်တို့သည်လည်း မိမိတို့အားစေခိုင်းသည့်အရာအားလုံးကိုဆောင်ရွက်ပြီးချိန်၌ ‘ငါတို့ကားသာမန်အစေခံများပင်ဖြစ်သည်။ ငါတို့ဆောင်ရွက်ရန်ရှိသည့် တာဝန်ဝတ္တရားကိုသာလျှင် ဆောင်ရွက်ခဲ့ကြခြင်းဖြစ်သည်’ ဟုဆိုကြလော့” ဟူ၍ မိန့်တော်မူ၏။
အရေပြားရောဂါသည်ဆယ်ဦးအား သန့်စင်စေတော်မူခြင်း
11ထို့နောက် အီစာသည် ဂျေရုဆလာမ်မြို့သို့ သွားရာလမ်းရှိ ဆာမာရိပြည်နှင့် ဂါလိလဲပြည်တို့၏နယ်စပ်ကြားကို ဖြတ်သွားတော်မူ၏။ 12ရွာတစ်ရွာသို့ဝင်တော်မူသောအခါ အရေပြားရောဂါသည်ဆယ်ယောက်တို့သည် အီစာကိုခရီးဦးကြိုပြု၍ ခပ်လှမ်းလှမ်းတွင်ရပ်လျက်၊ 13“ဟဇရသ်အီစာသခင်၊ အကျွန်ုပ်တို့ကို ‘ရဟ်မသ်’ သနားတော်မူပါ” ဟု ဟစ်အော်လျှောက်ထားကြ၏။
14ထိုသူတို့ကိုမြင်သောအခါ အီစာက “သင်တို့သွား၍မိမိတို့ကိုယ်ကို ‘အီမာမ်’ ရှေ့ဆောင်များအားပြလော့” ဟုမိန့်တော်မူ၏။ သူတို့သည် “အီမာမ်” များထံသွားနေစဉ် ရောဂါသန့်စင်သွားကြကုန်၏။
15သူတို့အနက်လူတစ်ယောက်သည် မိမိရောဂါပျောက်ကင်းသွားကြောင်းကိုသိသောအခါ အလ္လာဟ်အရှင်မြတ်၏ဂုဏ်တော်ကို အသံကျယ်စွာချီးမွမ်းလျက် အီစာ၏ထံသို့ပြန်လာ၏။ 16ထိုနောက်ခြေတော်ရင်းမှာ ပျပ်ဝပ်လျက် အီစာကိုကျေးဇူးတင်လေ၏။ ထိုသူကားဆာမာရိတန်အမျိုးသားဖြစ်သတည်း။
17ဟဇရသ်အီစာက “ဆယ်ယောက်တို့သည် အရေပြားရောဂါသန့်စင်သွားကြသည်မဟုတ်လော။ အခြားလူကိုးယောက်ကားအဘယ်မှာနည်း။ 18အလ္လာဟ်အရှင်မြတ်၏ဘုန်းအသရေတော်ကို ချီးကျူးရန် ဤလူမျိုးခြားတစ်ဦးမှတစ်ပါး ပြန်လာသူတစ်ယောက်မျှမရှိသလော” ဟု မေးတော်မူ၏။ 19ထိုနောက် ထိုသူအား “သင်ထ၍သွားလော့။ သင်၏ ‘အီမာန်’ ယုံကြည်ခြင်းသည်သင့်ရောဂါကို ပျောက်စေပြီ” ဟု မိန့်တော်မူ၏။
အလ္လာဟ်အရှင်မြတ်၏နိုင်ငံတော်တည်မည့်အချိန်
(မဿဲ၊ ၂၄:၂၃-၂၈၊ ၂၄:၃၇-၄၁)
20တစ်နေ့သ၌ ဖာရိစီးစ်အချို့တို့က “အလ္လာဟ်အရှင်မြတ်၏နိုင်ငံတော်သည်အဘယ်အခါ၌တည်ပါမည်နည်း” ဟုအီစာအားမေးလျှောက်ကြ၏။ ထိုအခါအီစာက “အလ္လာဟ်အရှင်မြတ်၏နိုင်ငံတော်သည် မြင်သာအောင်တည်သည်မဟုတ်။ 21ကြည့်လော့၊ နိုင်ငံတော်သည်ဤအရပ်တွင်တည်ပြီ။ ထိုအရပ်တွင်တည်ပြီဟူ၍မပြောနိုင်။ အမှန်စင်စစ်သော်ကား အလ္လာဟ်အရှင်မြတ်၏နိုင်ငံတော်သည် သင်တို့၏အထဲတွင်တည်လျက်ရှိသည်” ဟု မိန့်တော်မူ၏။
22တစ်ဖန်အီစာက “ဆွာဟာဗီ” တပည့်တော်တို့အား “လူ့သား၏အုပ်စိုးမည့်နေ့ရက်တို့တွင်တစ်ရက်ကို သင်တို့မြင်တွေ့လိုသောအချိန်ရောက်လာလိမ့်မည်။ သို့ရာတွင်သင်တို့တွေ့မြင်ရလိမ့်မည်မဟုတ်။ 23လူတို့က လူ့သားသည် ဤအရပ်မှာရှိသည်။ ‘ထိုအရပ်မှာရှိသည်’ ဟုဆိုသော်လည်း သင်တို့လိုက်၍မရှာကြနှင့်။ 24လျှပ်စစ်လက်သောအခါ လျှပ်စစ်ရောင်သည် မိုးကုတ်စက်ဝိုင်းတစ်ခုမှ အခြားတစ်ခုသို့တိုင်အောင် မိုးကောင်းကင်ကိုထွန်းတောက်စေသည်ကို မြင်ရသကဲ့သို့ လူ့သားသည် ‘ဒွန္နယာ’ ကမ္ဘာလောကသို့ကြွလာတော်မူသောနေ့၌ဖြစ်လိမ့်မည်။ 25သို့ရာတွင် လူ့သားသည် ပြင်းပြသောဝေဒနာကိုလည်းကောင်း၊ ဤခေတ်လူတို့၏ ပစ်ပယ်ခြင်းကိုလည်းကောင်း ဦးစွာခံရလိမ့်မည်။
26နူဟ်လက်ထက်၌#17:26 နူဟ်လက်ထက်၌ အလ္လာဟ်အရှင်မြတ်သခင်သည် လူတို့ကို ရေလွှမ်းမိုးမှုဖြင့် အပြစ်ပေးသောအခါ၊ နူဟ်နှင့်သူ၏မိသားစုသာ အသက်ရှင်ကျန်ရစ်ခဲ့သည်။ (ကမ္ဘာဦး၊ ၁၉:၁-၂၉)ဖြစ်ပျက်သကဲ့သို့ လူ့သားကြွလာရာကာလ၌ဖြစ်ပျက်လိမ့်မည်။ 27သင်္ဘောထဲကို နူဟ်ဝင်ပြီးနောက်ရေလွှမ်းမိုးသဖြင့် လူခပ်သိမ်းတို့သေကျေပျက်စီးကြသည့်နေ့မတိုင်မီ လူတို့သည်စားသောက်လျက်၊ ထိမ်းမြားစုံဖက်လျက်နေခဲ့ကြ၏။
28ထိုနည်းတူ လူသ်၏လက်ထက်၌လူတို့သည် စားသောက်လျက်၊ ရောင်းဝယ်လျက်၊ စိုက်ပျိုးလျက်၊ အိမ်ဆောက်လျက်နေခဲ့ကြ၏။ 29သို့သော် စဒူမ်မြို့မှလူသ်ထွက်ခွာသွားသောနေ့၌ ကောင်းကင်မှကန့်နှင့်ရောသောမီးမိုးရွာ၍မြို့သားအားလုံး သေကျေပျက်စီးကြကုန်၏။
30ထိုနည်းတူ လူ့သားပေါ်ထွန်းတော်မူသောနေ့၌ဖြစ်လိမ့်မည်။ 31ထိုနေ့ရက်၌အိမ်မိုးပေါ်တွင်ရှိသောသူသည် မိမိအိမ်ထဲမှာရှိသည့် ဥစ္စာပစ္စည်းကိုယူရန်မဆင်းစေနှင့်။ ထိုနည်းတူလယ်ကွင်းသို့ရောက်နေသူသည်လည်း တစ်ခုခုယူရန်အိမ်ကိုမပြန်စေနှင့်။ 32လူသ်၏ဇနီး #17:32 လူသ်၏ဇနီး နောက်သို့လှည့်မကြည့်ရန် လူသ်၏ဇနီးအား ပညတ်ထားပါသော်လည်း သူသည်စဒူမ်မြို့ကို လှည့်ကြည့်ခဲ့သည်။ ထိုသို့လှည့်ကြည့်သောကြောင့် သူသည်ဆားတိုင်ဖြစ်သွားလေ၏။ ကမ္ဘာဦး၊ ၁၉:၁၂-၂၉။မည်သည့်အရာကို ဖြစ်ဖျက်ခဲ့သည်ကို သတိရကြလော့။ 33မိမိအသက်ကိုကယ်ဆယ်လိုသောသူသည် အသက်ရှုံးလိမ့်မည်။ ငါ့ကြောင့် မိမိအသက်ကိုရှုံးစေသောသူသည် ထာဝရအသက်ကိုရရှိလိမ့်မည်။ 34သင်တို့အားငါဆိုသည်ကား ထိုညတွင် အိပ်ရာတစ်ခုမှာအိပ်နေသူလူနှစ်ယောက်အနက် ယုံကြည်သူတစ်ယောက်ကို ဂျန္နသ်ရွှေမြို့တော်သို့ခေါ်ယူသွား၍ တစ်ယောက်ကိုထားခဲ့လိမ့်မည်။#17:34 “ထိုညတွင်” ငါ့ကိုယုံကြည်သူနှစ်ဦးကို ကောင်းကင်ဘုံသို့ ခေါ်ဆောင်သွားမည်ဖြစ်ပြီး ကျန်တစ်ဦးမှာ ကျန်နေရစ်မည့် အိပ်ရာတစ်ခုပေါ်တွင် အိပ်ပျော်နေသော လူနှစ်ဦးကို “ထိုညတွင်” အဓိပ္ပါယ်ဖွင့်ဆိုနိုင်သည်။ 35ကြိတ်ဆုံလှည့်နေသူ အမျိုးသမီးနှစ်ယောက်အနက် တစ်ယောက်ကိုဂျန္နသ်ရွှေမြို့တော်သို့ခေါ်ယူသွား၍ တစ်ယောက်ကိုထားခဲ့လိမ့်မည်။ 36လယ်ထဲတွင်ရှိသူနှစ်ယောက်အနက် တစ်ယောက်ကိုဂျန္နသ်ရွှေမြို့တော်သို့ခေါ်ယူသွား၍ တစ်ယောက်ကိုထားခဲ့လိမ့်မည်” ဟု မိန့်တော်မူ၏။
37“ဆွဟာဗီ” တပည့်တော်တို့က “အရှင်၊ အဘယ်အရပ်တွင်ဤအရာများဖြစ်ပျက်ပါမည်နည်း” ဟု မေးလျှောက်ကြ၏။
အီစာက “အသေကောင်ရှိရာအရပ်တွင်လင်းတ#17:37 လင်းတ လင်းတများသည် လူသေကောင်ကို အမြဲပင်ရှာတွေ့နိုင်သော ငှက်များဖြစ်သည်။ ဤနေရာ၌ အဓိပ္ပာယ်နှစ်မျိုးရှိနိုင်ပါသည်။ ၎င်းတို့မှာ (၁) လူသား ကြွလာခြင်းသည် အထင်အရှားဖြစ်ပေလိမ့်မည်။ (၁၇:၂၄ တွင်ဖော်ပြထားသည့် လျှပ်စစ်ပြက်ခြင်းနှင့်နှိုင်းယှဉ်ကြည့်ပါ)။ (၂) လူသား သည်တရားစီရင်ဖို့ရန် လိုအပ်သည့် နေရာကိုကြွလာမည် ဟူ၍ဖြစ်ပါသည်။များစုရုံးကြလိမ့်မည်” ဟု မိန့်တော်မူ၏။
လက်ရှိရွေးချယ်ထားမှု
လုကာကျမ်း 17: MBe
အရောင်မှတ်ချက်
ကူးယူ
နှိုင်းယှဉ်
မျှဝေရန်
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Musselmani Burmese Bible by Beyond Translation is licensed under Creative Commons Attribution-ShareAlike 4.0 License.