လုကာကျမ်း 15

အခန်း (၁၅)

ပျောက်ဆုံးသောသိုး ပုံဥပမာ

(မဿဲ၊ ၁၈:၁၂-၁၄)

1အခွန်ကောက်သူများနှင့် အပြစ်ဒုစရိုက်ကျူးလွန်သူ အပေါင်းတို့သည် အီစာ၏စကားတော်ကိုကြားနာရန် အထံတော်သို့ချဉ်းကပ်ကြ၏။ 2ဖာရိစီးစ်များနှင့် “အာလဲမ်” ကျမ်းတတ်ဆရာများက “ဤသူသည် အပြစ်ဒုစရိုက်ကျူးလွန်သူ များအားလက်ခံ၍ သူတို့နှင့်အတူစားသောက်ပါသည်တကား” ဟု ညည်းညူပြောဆိုကြ၏။

3ထို့ကြောင့် အီစာက သူတို့ကို ဒီပုံဥပမာကို ပြောခဲ့တယ်၊ 4“သင်တို့တွင် တစ်စုံတစ်ယောက်သောသူသည် သိုးအကောင်တစ်ရာရှိ၍ တစ်ကောင်ပျောက်လျှင် မည်သို့ပြုမည်နည်း။ သူသည် ကျန်ကိုးဆယ့်ကိုးကောင်ကိုတောတွင်ထားခဲ့၍ ပျောက်သောသိုးကို မတွေ့မချင်းရှာမည်မဟုတ်လော။ 5ထိုသိုးကိုတွေ့သောအခါ ရွှင်လန်းဝမ်းမြောက်စွာဖြင့် ပခုံးထက်တွင်တင်၍ ထမ်းလာလိမ့်မည်။ 6သူသည် အိမ်သို့ပြန်ရောက်သောအခါ မိတ်ဆွေများနှင့်အိမ်နီးချင်းများကိုခေါ်ကာ ‘ငါ၏ပျောက်သောသိုးကိုငါပြန်တွေ့ပြီဖြစ်သောကြောင့် ငါနှင့်အတူရွှင်လန်းဝမ်းမြောက်ကြလော့’ ဟု ဆိုလိမ့်မည်။ 7ထိုနည်းတူစွာ ‘သောင်ဗဟ်’ ပြုနောင်တရရန်မလိုသော ဖြောင့်မတ်မှန်ကန်သူကိုးဆယ့်ကိုးယောက်ထက် အပြစ်ဒုစရိုက်ကျူးလွန်သူ တစ်ယောက် ‘သောင်ဗဟ်’ နောင်တပြုသည့်အတွက်ကြောင့် ‘ဂျန္နသ်’ ရွှေမြို့တော်တွင်ရှိသော အလ္လာဟ်အရှင်မြတ်နှင့်ဖရိချ်သာများသည် ပို၍ရွှင်လန်းဝမ်းမြောက်ခြင်းရှိလိမ့်မည်” ဟု ငါဆိုသည်။

ပျောက်ဆုံးသောဒင်္ဂါး ပုံဥပမာ

8တစ်နည်းကား၊ အမျိုးသမီးတစ်ဦးသည် မိမိမှာရှိသည့် “ဒင်္ဂါး#15:8 ဒင်္ဂါး မူရင်းဂရိဘာသာတွင် ဒြမ္မဟုခေါ်သော ဂရိဒင်္ဂါး တစ်မျိုးဖြစ်ပြီး၊ ရောမ “ဒေနာရိ” ဒင်္ဂါးနှင့်တန်ဖိုးတူညီပါသည်။ “ဒေနာရိ” ဒင်္ဂါးတစ်ပြားသည် အလုပ်သမားတစ်ဦး၏ တစ်နေ့လုပ်အားခဖြစ်ပါသည်။ (အင်န်ဂျီလ်ကျမ်းတော်မြတ်မှ မဿဲ၊ ၂၀:၉-၁၃ ကိုကြည့်ပါ။)ဆယ်ပြားအနက် တစ်ပြားပျောက်သွား၏။ ထိုအခါသူသည် မီးအိမ်ကိုထွန်း၍ အိမ်ကိုလှည်းကျင်းကာ မတွေ့မချင်း သေချာစွာရှာမည်မဟုတ်လော။ 9သူမသည်ထိုဒင်္ဂါးကိုတွေ့သောအခါ မိတ်ဆွေများနှင့် အိမ်နီးချင်းများကိုခေါ်၍ ‘ပျောက်သွားသောဒင်္ဂါးကို ငါပြန်တွေ့ပြီဖြစ်သောကြောင့်။ ငါနှင့်အတူရွှင်လန်းဝမ်းမြောက်ကြလော့’ ဟု ဆိုလိမ့်မည်။ 10ထိုနည်းတူစွာ အလ္လာဟ်အရှင်မြတ်၏ ‘မလာအိကာဟ်’ ကောင်းကင်တမန်များသည် အပြစ်ဒုစရိုက်ကျူးလွန်သူတစ်ယောက် ‘သောင်ဗဟ်’ နောင်တပြုခြင်းအတွက် ရွှင်လန်းဝမ်းမြောက်ကြသည်ဟုငါဆို၏” ဟု မိန့်တော်မူ၏။

ကရုဏာကြီးမားသောဖခင်ပုံဥပမာ

11ထို့နောက်အီစာက တစ်ခါကလူတစ်ယောက်မှာသားနှစ်ယောက်ရှိ၏။ 12တစ်နေ့တွင် သားငယ်သည်အဖအား “အဖ၊ ကျွန်တော်ရထိုက်သောအမွေကိုခွဲဝေပေးပါ” ဟု ဆို၏။ ထိုအခါဖခင်သည် မိမိ၏ဥစ္စာပစ္စည်းများကို သားနှစ်ယောက်အားခွဲဝေပေး၏။

13ထို့နောက် ရက်အနည်းငယ်ကြာသောအခါ သားငယ်သည် မိမိ၏ဓနဥစ္စာရသမျှကိုယူ၍ ဝေးလံရပ်ခြားတိုင်းတစ်ပါးသို့ထွက်သွား၏။ သူသည်ထိုပြည်တွင်အပျော်အပါးလိုက်စားကာ မိမိပိုင်ဆိုင်သမျှကိုဖြုန်းတီးပစ်၏။ 14ရှိသမျှဥစ္စာကုန်ချိန်၌ ထိုပြည်တွင် ပြင်းထန်သောအစာငတ်မွတ်ခေါင်းပါးခြင်းဘေးဆိုက်ရောက်သဖြင့် သူသည်ငတ်ပြတ်လေ၏။ 15သို့ဖြစ်၍ ထိုပြည်သားတစ်ယောက်ထံတွင် သွား၍အစေခံရ၏။ ထိုသူကသူ့အား လယ်တောသို့စေလွှတ်၍ ဝက်များကိုကျောင်းစေ၏။ 16သူသည် ဝက်များစားနေသည့်ပဲတောင့်ကိုပင် စားချင်စိတ်ပေါက်လာ၏။ သို့သော်သူ့အားစားစရာတစ်စုံတစ်ခုကိုမျှ ပေးမည့်သူမရှိ။

17ထိုအခါသူသည် အမြင်မှန်ရရှိလာသဖြင့် ငါ့အဖ၏လုပ်သားအားလုံးပင် ဝစွာစားရကြ၏။ ငါမူကားဤအရပ်တွင်ငတ်ပြတ်လျက်သေရပါတော့မည်။ 18ဒါကြောင့် ငါထ၍အဖထံသို့သွားပြီးလျှင် “အဖ၊ ကျွန်တော်သည်အလ္လာဟ်အရှင်မြတ်ကို လည်းကောင်း၊ အဖကိုလည်းကောင်းပြစ်မှားပါပြီ။ 19ကျွန်တော်သည် အဖ၏သားဟူ၍ပင် အခေါ်မခံထိုက်တော့ပါ။ အဖ၏အစေခံတစ်ယောက်ကဲ့သို့ ကျွန်တော့်ကိုထားပါလော့” ဟု ငါပြောမည် ဟူ၍ဆို၏။ 20ထိုနောက်သူသည်ထ၍ ဖခင်ထံသို့ပြန်သွားလေ၏။

အဝေး၌ပင်ရှိနေစဉ်ဖခင်သည် သူ့ကိုမြင်သော်သနားသဖြင့် ပြေး၍ဖက်ပြီးလျှင်နမ်းရှုပ်လေ၏။

21သားဖြစ်သူက အဖ၊ ကျွန်တော်သည်အလ္လာဟ်အရှင်မြတ်ကိုလည်းကောင်း၊ အဖကိုလည်းကောင်းပြစ်မှားပါပြီ။ သို့ဖြစ်၍အဖ၏သားဟူ၍ပင် အခေါ်မခံထိုက်တော့ပါ ဟု ဆို၏။#15:21 အချို့စာမူများတွင် “ကျွန်ုပ်ကို ကိုယ်တော်၏ကျွန်ကဲ့သို့ ပြုမူပါ” ဟူသော စကားလုံးပါရှိသည်။

22ဖခင်က သူ၏အစေခံများကို သူ့ကိုအကောင်းဆုံးသောဝတ်လုံကိုအမြန်ယူခဲ့၍ သူ့အားဝတ်ပေးကြ။ သူ၏လက်၌လက်စွပ်ကိုဆင်ပေးကြ။ ဖိနပ်ကိုစီးပေးကြ။ 23ဆူဖြိုးအောင်ကျွေးထားသည့် နွားကလေးကိုသတ်ကြ။ ငါတို့ပျော်ရွှင်စွာစားကြစို့။ 24အကြောင်းမူကားငါ့သားသည် ယခင်ကသေသော်လည်းယခုပြန်၍ အသက်ရှင်လာပြီ။ ယခင်ကသူပျောက်ဆုံးသော်လည်း ယခုငါသည်ပြန်တွေ့ပြီ ဟု မိမိ၏အစေခံတို့အားဆို၏။ ထိုနောက်သူတို့သည်ပျော်ရွှင်ပွဲကိုဆင်နွှဲကြကုန်၏။

25သို့ရာတွင် ထိုအချိန်၌ သားကြီးဖြစ်သူသည် လယ်တောတွင်ရောက်ရှိနေ၏။ သူပြန်လာ၍အိမ်အနီးသို့ရောက်သောအခါ တီးမှုတ်သံနှင့်ကခုန်သံကိုကြားရ၏။ 26ထိုအခါသူသည်အစေခံတစ်ယောက်ကိုခေါ်၍ အဘယ်သို့ဖြစ်နေသနည်း ဟု မေး၏။ 27အစေခံက “အသင်၏ညီသည် ဘေးမဲ့လုံခြုံစွာပြန်ရောက်လာသဖြင့် အသင်၏ဖခင်သည် ဆူဖြိုးအောင်ကျွေးထားသော နွားကလေးတစ်ကောင်ကိုသတ်ပါ၏” ဟု ဆို၏။

28သားကြီးသည်စိတ်ဆိုးလျက် အိမ်ထဲသို့မဝင်ဘဲနေ၏။ ဖခင်သည်အပြင်သို့ထွက်လာ၍သားကြီးအား အိမ်ထဲသို့ဝင်ရန်ဖျောင်းဖျ၏။ 29သားကြီးက “‘ကျွန်တော်သည်နှစ်ပေါင်းများစွာ အဖ၏အစေကိုခံခဲ့ပါ၏။ အဖ၏အမိန့်ကိုအဘယ်အခါကမျှ မလွန်ဆန်ခဲ့ဖူးပါ။ ဒါတောင် ငါ့သူငယ်ချင်းများနှင့်အတူ ကျွန်တော်ပျော်ရွှင်စွာစားသောက်ရန်အတွက် အဖသည်အဘယ်အခါကမျှ ဆိတ်ကလေးတစ်ကောင်ကိုပင်မပေးခဲ့ပါ။ 30အဖ၏ဥစ္စာပစ္စည်းများကို ပြည့်တန်ဆာများနှင့်ပျော်ပါးဖြုန်းတီးပစ်သည့်သား ပြန်လာသောအခါ၌မူ သူ့အတွက် ဆူဖြိုးအောင်ကျွေးထားသော နွားကလေးကိုသတ်လေပြီ’ ဟု ဆို၏။

31အဖဖြစ်သူက ‘ငါ့သား၊ သင်သည်ငါနှင့်အတူအမြဲနေ၏။ ငါ့ဥစ္စာပစ္စည်းရှိသမျှကိုသင်ပိုင်၏။ 32သင့်ညီသည် ယခင်ကသေသော်လည်း ယခုပြန်၍အသက်ရှင်လာ၏။ ယခင်ကသူ့ကို ပျောက်ဆုံးခဲ့သော်လည်းယခုပြန်၍တွေ့ရ၏။ သို့ဖြစ်၍ငါတို့သည် ဝမ်းမြောက်လျက် ပျော်ပွဲကိုဆင်နွှဲသင့်ပေ၏’ ဟုဆို‌လေ၏” ဟူ၍မိန့်တော်မူ၏။

လက်ရှိရွေးချယ်ထားမှု

လုကာကျမ်း 15: MBe

အရောင်မှတ်ချက်

ကူးယူ

နှိုင်းယှဉ်

မျှဝေရန်

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

Musselmani Burmese Bible by Beyond Translation is licensed under Creative Commons Attribution-ShareAlike 4.0 License.

လုကာကျမ်းအင်ဂျီလ်ကျမ်းတော်မြတ် အကြောင်းကို ပို၍ သင်ယူပါ။