လုကာကျမ်း 11

အခန်း (၁၁)

ဒိုအာတောင်းခြင်းအကြောင်းသွန်သင်တော်မူခြင်း

(မဿဲ၊ ၆:၉-၁၃၊ ၇:၇-၁၁)

1အခါတစ်ပါး၌ အီစာသည်တစ်စုံတစ်ခုသောအရပ်တွင် “ဒိုအာ” ဆုတောင်းလျက်နေတော်မူ၏။ “ဒိုအာ” ဆုတောင်းပြီးသောအခါ တပည့်တော်တစ်ဦးက “ဆရာသခင်၊ ယာဟ်ယာရေနစ်မင်္ဂလာသည် မိမိ၏ ‘ဆွာဟာဗီ’ တပည့်များအား ‘ဒိုအာ’ ဆုတောင်းနည်းသင်ပေးသကဲ့သို့ အကျွန်ုပ်တို့အားလည်း သင်ပေးတော်မူပါ” ဟု လျှောက်ထား၏။

2အီစာက “သင်တို့ ‘ဒိုအာ’ ဆုတောင်းသောအခါ၊

အို အဖ၊

အရှင်မြတ်၏နာမတော်ကိုရိုသေလေးမြတ်ကြပါစေသော။

အရှင်မြတ်၏နိုင်ငံတော်တည်ထောင်ပါစေသော။

3လိုအပ်သောအစားအစာကိုအကျွန်ုပ်တို့အား နေ့စဉ်နေ့တိုင်းပေးသနားတော်မူပါ။

4အကျွန်ုပ်တို့အားသူတစ်ပါးတို့မှားမိသည့်အပြစ်များကို အကျွန်ုပ်တို့ခွင့်လွှတ်ကြသကဲ့သို့

အ ကျွန်ုပ်တို့၏ ‘ဂူနာဟ်’ အပြစ်များကိုခွင့်လွှတ်တော်မူပါ။

အကျွန်ုပ်တို့သည်စုံစမ်းသွေးဆောင်ခြင်းကိုမခံရပါစေနှင့် ဟူ၍ ‘ဒိုအာ’ ဆုတောင်းကြလော့” ဟု မိန့်တော်မူ၏။

5ထို့နောက် အီစာက “သင်တို့တွင် တစ်စုံတစ်ယောက်သောသူသည် သန်းခေါင်အချိန်၌မိတ်ဆွေတစ်ဦး၏အိမ်သို့သွား၍ အဆွေ၊ 6ကျွန်ုပ်၏အိမ်သို့ ခရီးသည်မိတ်ဆွေတစ်ယောက်ရောက်ရှိလာပါသည်။ သို့သော် ကျွန်ုပ်ထံတွင်သူ့အားကျွေးစရာဘာမျှမရှိသဖြင့် မုန့်သုံးလုံးကိုချေးပါဟုဆိုသော်၊ 7အိမ်ရှင်က ကျွန်ုပ်ကိုမနှောင့်ယှက်ပါနှင့်။ အိမ်တံခါးကိုပိတ်ထားပြီးလေပြီ။ သားသမီးများနှင့်ကျွန်ုပ်သည် အိပ်ရာဝင်ကြပြီးဖြစ်၏။ ထို့ကြောင့်ကျွန်ုပ်ထ၍သင့်အားဘာမျှမပေးနိုင်ပါဟု အိမ်တွင်းမှပြောလိမ့်မည်။ 8အိမ်ရှင်သည်မိတ်ဆွေတစ်ဦးအနေဖြင့် အိပ်ရာမှထ၍ သူ့အားမုန့်များကိုပေးလိမ့်မည်မဟုတ်။ သို့သော်လည်းထိုသူသည် အရှက်အကြောက်ကင်းမဲ့စွာ မရမနေတောင်းခံနေသောကြောင့် အိမ်ရှင်သည်ထ၍လိုသမျှကိုပေးလိမ့်မည်။

9သင်တို့အားငါဆိုသည်ကား တောင်းကြလော့၊ တောင်းလျှင်ရကြလိမ့်မည်။ ရှာကြလော့၊ အကယ်၍ ရှာလျှင်တွေ့ကြလိမ့်မည်။ တံခါးကိုခေါက်ကြလော့၊ အကယ်၍ ခေါက်လျှင် တံခါးကိုဖွင့်လိမ့်မည်။ 10တောင်းသောသူသည်ရလိမ့်မည်။ ရှာသောသူသည်တွေ့လိမ့်မည်။ တံခါးကိုခေါက်သောသူအား တံခါးကိုဖွင့်ပေးလိမ့်မည်။

11သင်တို့တွင် အဘယ်ဖခင်သည် မိမိ၏သားကငါးကိုတောင်းလျှင် မြွေကိုပေးမည်နည်း။ 12ကြက်ဥကိုတောင်းလျှင် ကင်းမြီးကောက်ကိုပေးမည်နည်း။ 13သင်တို့သည် ဆိုးသောသူများဖြစ်လျက်ပင် သားသမီးများအား အကောင်းကိုပေးတတ်လျှင် ‘ဂျန္နသ်’ ကောင်းကင်အထက်အရပ်၌ရှိတော်မူသောသင်တို့အဖသည် တောင်းလျှောက်သောသူတို့အား ‘ရူဟုလ်ကုဒွတ်စ်’ သန့်ရှင်းသောဝိညာဥ်တော်ကို သာ၍ပင်ပေးတော်မူမည်မဟုတ်လော” ဟု မိန့်တော်မူ၏။

ဟဇရသ်အီစာနှင့်ဗေလဇေဗုလ

(မဿဲ၊ ၁၂:၂၂-၃၀။ မာကု၊ ၃:၂၀-၂၇)

14ဟဇရသ်အီစာသည် စကားမပြောနိုင်သောလူထဲမှ ညစ်ညမ်းသော “ဂျင်န်” နတ်ဆိုးကို နှင်ထုတ်ခဲ့တော်မူ၍၊ ညစ်ညမ်းသော “ဂျင်န်” နတ်ဆိုးထွက်သွားပြီးနောက်၊ ထိုသူသည် စကားစပြောသဖြင့် လူများအံ့ဩသွားကြသည်။ 15သို့ရာတွင်လူအချို့က “အီစာသည် ညစ်ညမ်းသော ဂျင်န် နတ်ဆိုး#11:15 ဂျင်န် နတ်ဆိုး ဗေလဇေဗုလသည် ဆိုသည်မှာ ညစ်ညမ်းသော ဂျင်န် နတ်ဆိုးတို့ခေါင်းဆောင် ရှိုင်တွာန် ဖြစ်ပါသည်။ တို့၏မင်း ဗေလဇေဗုလ ကိုအမှီပြု၍ ညစ်ညမ်းသော ‘ဂျင်န်’ နတ်ဆိုး #11:15 ညစ်ညမ်းသော ဂျင်န် နတ်ဆိုး မဿဲ၊ ၉:၃၄၊ ၁၀:၂၅ များကိုနှင်ထုတ်သည်” ဟု ဆိုကြ၏။ 16အချို့ကအီစာကိုစုံစမ်းနှောင့်ယှက်လိုသဖြင့် ကောင်းကင်မှသက်သေလက္ခဏာတစ်ရပ်ကိုပြတော်မူပါ ဟု တောင်းခံကြ၏။

17အီစာသည် ထိုသူတို့၏အကြံအစည်ကိုသိတော်မူသဖြင့် “တိုင်းနိုင်ငံတစ်ခုတွင် လူတို့စိတ်ဝမ်းကွဲပြားလျက်နေလျှင် ထိုနိုင်ငံသည်ပျက်စီးမည်သာဖြစ်၏။ အိမ်ထောင်တစ်ခုတွင် အိမ်သားတို့စိတ်ဝမ်းကွဲပြားလျက်နေလျှင် ထိုအိမ်ထောင်သည်ပျက်စီးမည်သာဖြစ်၏။ 18ငါသည်ဗေလဇေဗုလကိုအမှီပြု၍ ညစ်ညမ်းသော ‘ဂျင်န်’ နတ်ဆိုးများကိုနှင်ထုတ်သည်ဟု သင်တို့ဆိုကြသောကြောင့်၊ ရှိုင်တွာန်သည် မိမိအုပ်စိုးသော ညစ်ညမ်းသော ‘ဂျင်န်’ နတ်ဆိုးများနှင့်စိတ်ဝမ်းကွဲပြားလျှင် သူ၏အုပ်စိုးမှုအဘယ်သို့တည်တံ့နိုင်မည်နည်း။ 19အကယ်၍ငါသည် ဗေလဇေဗုလကိုအမှီပြု၍ ညစ်ညမ်းသော ‘ဂျင်န်’ နတ်ဆိုးများကိုနှင်ထုတ်လျှင် သင်တို့၏တပည့်များကား မည်သူကိုအမှီပြု၍ ညစ်ညမ်းသော ‘ဂျင်န်’ နတ်ဆိုးများကိုနှင်ထုတ်ကြသနည်း။ ထို့ကြောင့် ထိုသူတို့ကပင်လျှင် သင်တို့မှားကြောင်းသက်သေထူကြလိမ့်မည်။ 20သို့ရာတွင်ငါသည် အလ္လာဟ်အရှင်မြတ်၏ ‘ကူဒူရသ်’ တန်ခိုးတော်အားဖြင့် ညစ်ညမ်းသော ‘ဂျင်န်’ နတ်ဆိုးများကိုနှင်ထုတ်သည်ဖြစ်သောကြောင့် အလ္လာဟ်အရှင်မြတ်၏နိုင်ငံတော်သည် သင်တို့တွင်တည်လျက်ရှိလေပြီ” ဟု မိန့်တော်မူ၏။

21ထို့နောက် ကိုယ်တော်သည် မကောင်းဆိုးဝါးတို့ကို နှင်ထုတ်ခြင်းအားဖြင့် ရှိုင်တွာန်ထက်သာ၍ ဘုန်းတန်ခိုးကြီးမားကြောင်းကိုပြသရန် ပုံဥပမာဖြင့် မိန့်ဆိုတော်မူသည်မှာ “ခွန်အားကြီးသူသည်လက်နက်စုံနှင့်မိမိအိမ်ကိုစောင့်ကြပ်နေသောအခါ သူ၏ဥစ္စာပစ္စည်းများသည်လုံခြုံမှုရှိ၏။ 22သို့ရာတွင် ထိုသူထက်ခွန်အားကြီးသူသည်ရောက်လာ၍ သူ့ကိုတိုက်ခိုက်အောင်မြင်သောအခါ သူအားကိုးအားထားသည့် လက်နက်များကိုသိမ်းယူကာ တိုက်ခိုက်၍ရရှိသောဥစ္စာပစ္စည်းများကိုလည်း အခြားသူများအားခွဲဝေလိမ့်မည်။

23ငါ့ဘက်မှာမနေသူသည် ငါ့ကိုဆန့်ကျင်သူဖြစ်၏။ အလ္လာဟ်အရှင်မြတ်အတွက် လူတို့ကို စုဝေးရန် ငါ့အား မကူညီသောသူသည် လူတို့အား အလ္လာဟ်အရှင်မြတ်ထံမှ အဝေးသို့ တစ်ကွဲတပြားဖြစ်စေသူဖြစ်၏” ဟူ၍ဖြစ်၏။

ပြန်လာသည့် “ဂျင်န်” နတ်ဆိုး

24ညစ်ညမ်းသော “‘ဂျင်န်’ နတ်ဆိုးသည်သူပူးကပ်နေသော လူထဲကထွက်သည့်အခါ ခြောက်သွေ့ရာအရပ်သို့လှည့်လည်၍နားစရာနေရာကိုရှာတတ်၏။ သို့သော် ရှာမတွေ့လျှင် ‘ငါယခင်နေခဲ့သည့်အိမ်သို့ပင် ပြန်သွားမည်’ ဟုဆို၏။ 25သို့ဖြစ်၍သူသည် ထိုနေရာသို့ ပြန်သွားသောအခါ သပ်ရပ်စွာလှဲကျင်းထားသည်ကိုတွေ့သော်၊ 26မိမိထက်ညစ်ညမ်းသော ‘ဂျင်န်’ နတ်ဆိုး ခုနှစ်ယောက်ကိုသွား၍ခေါ်ခဲ့ပြီးလျှင် ထိုနေရာတွင်ဝင်၍နေလေ၏။ သို့ဖြစ်၍ ညစ်ညမ်းသော ‘ဂျင်န်’ နတ်ဆိုး ပူးဝင်သူ၏နောက်ဆုံးအခြေအနေသည် ပထမအခြေအနေထက်ဆိုးလေ၏” ဟု မိန့်တော်မူ၏။

27ဟဇရသ်အီစာသည် ဤသို့မိန့်တော်မူပြီးသောအခါ လူပရိသတ်ထဲကအမျိုးသမီးတစ်ယောက်သည် “အရှင်ကိုမွေး၍ နို့တိုက်သောမိခင်သည်မင်္ဂလာရှိပါ၏” ဟု လျှောက်၏။

28သို့ရာတွင်အီစာက “အလ္လာဟ်အရှင်မြတ်၏နှုတ်ထွက်စကားတော်ကို ကြား၍လိုက်နာသောသူသည်သာ၍မင်္ဂလာရှိ၏” ဟူ၍ မိန့်တော်မူ၏။

သက်သေလက္ခဏာပြရန်တောင်းဆိုကြခြင်း

(မဿဲ၊ ၁၂:၃၈-၄၂)

29လူတူပရိသတ်တို့သည် စုရုံးလျက်နေကြစဉ် အီစာက “ယခုခေတ်လူတို့သည် ဆိုးညစ်သောလူမျိုးဖြစ်၏။ သူတို့သည်သက်သေလက္ခဏာကို တောင်းဆိုကြ၏။ သို့ရာတွင် နဗီတမန်တော်ယူနွတ်စ်#11:29 နဗီတမန်တော်ယူနွတ်စ် အလ္လာဟ်သည် မိမိဖျက်ဆီးတော့မည့် အာရှုရိပြည်၏မြို့တော်ဖြစ်သော နနိဝါမြို့သို့ နဗီတမန်တော် ယူနွတ်စ်ကို သတိပေးရန် စေလွှတ်တော်မူခဲ့သည်။ (ကိတာဘွလ်မုကာဒဲစ်မှ ယူနွတ်စ်၊ ၁:၁၇၊ ၂:၁၀ ကိုကြည့်ပါ။)၏သက်သေလက္ခဏာမှတစ်ပါး အဘယ်သက်သေလက္ခဏာကိုမျှ သူတို့အားပြလိမ့်မည်မဟုတ်။ 30နနိဝါမြို့သားတို့အတွက် ယူနွတ်စ်သည်သက်သေလက္ခဏာဖြစ်သကဲ့သို့ ဤခေတ်လူတို့အတွက်လူ့သားသည်လည်း သက်သေလက္ခဏာဖြစ်လိမ့်မည်။ 31ကိယာမတ်နေ့တွင်တောင်ပြည်ကိုအစိုးရသောဘုရင်မ#11:31 တောင်ပြည်ကိုအစိုးရသောဘုရင်မ တောင်အာရေဗျဒေသတွင်တည်ရှိနိုင်သော ရှီဗာပြည်မှဘုရင်မတစ်ပါးဖြစ်ပါသည်။ ထိုဘုရင်မသည်နဗီတမန်တော်စုလိုင်မာန်၏ဉာဏ်ပညာစကားကိုနားထောင်နိုင်ရန် အလည်အပတ်လာရောက်ခဲ့ပါသည်။ ထိုကဲ့သို့လာရောက်စဉ် သူသည် စုလိုင်မာန်မင်းကြီးနှင့်လက်ဆောင်များဖလှယ်၍ ကုန်သွယ်မှုစတင်ပြုလုပ်ခဲ့သည်။ (ကိတာဘွလ်မုကာဒဲစ်မှ ဓမ္မရာဇဝင်တတိယစောင်၊ ၁၀:၁-၁၀ ကိုကြည့်ပါ။) သည်ထ၍ ဤခေတ်လူတို့အား ပြစ်တင်စွဲချက်တင်လိမ့်မည်။ အကြောင်းမူကားထိုဘုရင်မသည် စိတ်အားထက်သန်၍ စုလိုင်မာန်မင်းကြီး၏ဉာဏ်ပညာစကားကို ကြားနာရအောင် အလွန်ဝေးသောအရပ်မှလာရောက်ခဲ့၏။ ယခုအခါ၌မူ စုလိုင်မာန်ထက်ကြီးမြတ်သောသူရောက်ရှိနေလေပြီ။ 32ကိယာမတ်နေ့၌ နနိဝါမြို့သားတို့သည်ထ၍ ဤခေတ်လူတို့အားပြစ်တင်စွဲချက်တင်ကြလိမ့်မည်။ အကြောင်းမူကားထိုမြို့သားတို့သည် ယူနွတ်စ်ဟောပြောခြင်းကြောင့် ‘သောင်ဗဟ်’ ပြုနောင်တရခဲ့ကြ၏။ ယခုအခါ၌မူ ယူနွတ်စ်ထက်ကြီးမြတ်သောသူရောက်ရှိနေလေပြီ” ဟု မိန့်တော်မူ၏။

ခန္ဓာကိုယ်၏ဆီမီး

(မဿဲ၊ ၅:၁၅၊ ၆:၂၂-၂၃)

33အဘယ်သူမျှ “ဆီမီးကိုထွန်းညှိ၍ဖုံးကွယ်ထားလေ့မရှိ။ တောင်းဖြင့်လည်း အုပ်ထားလေ့မရှိ။ အိမ်ထဲသို့ဝင်လာသူများအလင်းရစေရန် မီးတင်ခုံပေါ်မှာတင်ထားလေ့ရှိ၏။ 34သင်၏မျက်စိသည် ကိုယ်ခန္ဓာတစ်ခုလုံးအတွက် မီးအိမ်သဖွယ်ဖြစ်၏။ အကယ်၍ သင်သည်မျက်စိကောင်းလျှင် သင်၏ကိုယ်ခန္ဓာတစ်ခုလုံးလင်းလိမ့်မည်။ အကယ်၍ သင်သည်မျက်စိမကောင်းလျှင်မူကား သင်၏ကိုယ်ခန္ဓာတစ်ခုလုံးသည် မှောင်မိုက်နေလိမ့်မည်။ 35သို့ဖြစ်၍ သင်တို့တွင်ရှိသည့်အလင်းသည် အမှောင်မဖြစ်စေရန်သတိပြုကြလော့။ 36အကယ်၍သင်၏ကိုယ်ခန္ဓာတစ်ခုလုံးသည် အမှောင်လုံးဝမရှိဘဲလင်းလက်နေလျှင် မီးအိမ်သည်တောက်ပသောအလင်းဖြင့် သင့်အပေါ်၌ထွန်းလင်းသကဲ့သို့ သင်တို့ကိုယ်ခန္ဓာတစ်ခုလုံးသည် အလင်းနှင့်ပြည့်လိမ့်မည်” ဟု မိန့်တော်မူ၏။

ဖာရိစီးစ်နှင့် “အာလဲမ်” ကျမ်းတတ်ဆရာတို့ကို အပြစ်တင်တော်မူခြင်း

(မဿဲ၊ ၂၃:၁-၃၆။ မာကု၊ ၁၂:၃၈-၄၀)

37ထိုသို့အီစာမိန့်တော်မူပြီးသောအခါ ဖာရိစီးစ်တစ်ယောက်သည် အီစာကိုသူနှင့်အတူညစာသုံးဆောင်တော်မူရန်ပင့်ဖိတ်၏။ အီစာသည်ထိုသူ၏အိမ်သို့ကြွ၍ စားပွဲတွင်ထိုင်တော်မူ၏။ 38ဤသို့အစာမစားမီ အီစာသည် လက်တော်ကိုဆေးကြောသန့်စင်ခြင်းပြုတော်မမူသည်ကို ထိုဖာရိစီးစ်သည်မြင်သောအခါ အံ့ဩလေ၏။

39ဟဇရသ်အီစာက “သင်တို့သည် ဖာရိစီးစ်များက ခွက်နှင့်ပန်းကန်၏ပြင်ပကိုစင်ကြယ်အောင် ဆေးကြောကြသော်လည်း သင်တို့၏စိတ်အတွင်းမှာကားလုယက်မှု၊ ဆိုးညစ်မှုတို့ဖြင့်ပြည့်လျက်နေ၏။ 40အသင်လူမိုက်တို့၊ ပြင်ပသဏ္ဌာန်ကိုဖန်ဆင်းတော်မူသောအရှင်သည် အတွင်းသဏ္ဌာန်ကိုလည်း ဖန်ဆင်းတော်မူသည်မဟုတ်လော။ 41သို့သော် သင်တို့၌ရှိသောအရာတို့ကို ဆင်းရဲနွမ်းပါးသူတို့အား စိတ်ရင်းအမှန်ဖြင့် အပြည့်အဝပေးကမ်းကြလော့။ ထိုသို့ပြုလျှင် သင်တို့သည် အလ္လာဟ်အရှင်မြတ်၏ရှေ့တော်၌အမှန်ပင် သန့်ရှင်းစင်ကြယ်လိမ့်မည်ဖြစ်သည်။

42အသင်ဖာရိစီးစ်တို့၊ သင်တို့သည်အမင်္ဂလာရှိကြ၏။ သင်တို့သည်ပင်စိမ်းရွက်၊ လျူရွက်#11:42 ပင်စိမ်းရွက်၊ လျူရွက် ပင်စိမ်းရွက်၊ လျူရွက်သည်ပင်စိမ်းနှင့်နံနံ ကဲ့သို့သောဆေးဖက်ဝင်အပင်များထဲတွင် အသေးငယ်ဆုံးနှင့် စျေးအသက်သာဆုံးဖြစ်သည်။နှင့်အခြားဆေးဘက်ဝင်အရွက်အမျိုးမျိုးကို ဆယ်ဖို့တစ်ဖို့ ပေးလှူကြသော်လည်း တရားမျှတခြင်းနှင့် အလ္လာဟ်အရှင်မြတ်အားချစ်ခြင်းတို့ကို လျစ်လျူရှုကြသည်။ အထက်ကဆိုသောအရာတို့ကိုလျစ်လျူမရှုဘဲ၊ တရားမျှတခြင်းနှင့်ချစ်ခြင်းတို့သည်လည်း သင်တို့ကျင့်ဆောင်ရမည့်အရာများဖြစ်သည်။

43ဖာရိစီးစ်တို့၊ သင်တို့သည်အမင်္ဂလာရှိကြ၏။ သင်တို့သည်ဝတ်ကျောင်းတော်များ#11:43 ဝတ်ကျောင်းတော်များ ဝတ်ကျောင်းတော်များသည် ဂျူးလူမျိုးများစုဝေးဆုတောင်းရန်၊ ကျမ်းစာဖတ်ရန်နှင့် ၎င်းတို့၏ယုံကြည်ချက်များကို သွန်သင် ပေးကြပြီး အလ္လာဟ်အရှင်မြတ်အား ဝတ်ပြုကိုးကွယ်ရာနေရာဖြစ်သည်။တွင် မြင့်မြတ်သောနေရာများကိုလည်းကောင်း၊ ဈေးတွင်လူတို့ရိုသေစွာစလာမ်ပေးခြင်းကိုလည်းကောင်း နှစ်သက်ကြ၏။

44သင်တို့သည် အမင်္ဂလာရှိကြ၏။ သင်တို့သည်အမှတ်အသားမရှိသည့် ‘ကဗရ်’ သင်္ချိုင်းဂူများနှင့်တူ၏။ လူတို့သည် ထိုကဗရ်များအပေါ်မှာလျှောက်၍သွားကြသောအခါ ကဗရ်ဖြစ်မှန်းကိုမသိကြ” ဟု မိန့်တော်မူ၏။

45“အာလဲမ်” ကျမ်းတတ်ဆရာတစ်ယောက်က “ဆရာသခင်၊ ဤသို့မိန့်တော်မူသည်မှာ အကျွန်ုပ်တို့ကိုလည်းစော်ကားရာရောက်ပါသည်” ဟု လျှောက်၏။

46အီစာက “အသင် အာလဲမ်တို့၊ သင်တို့သည်အမင်္ဂလာရှိကြ၏။ ထမ်းရခက်သည့်ဝန်ထုပ်များကိုသင်တို့သည်လူများအားထမ်းစေကြလျက် သင်တို့ကိုယ်တိုင်မူကား ထိုဝန်ထုပ်များကိုလက်ဖျားနှင့်မျှမတို့ကြ။

47သင်တို့သည် အမင်္ဂလာရှိကြ၏။ အကြောင်းမူကား သင်တို့၏ဘိုးဘေးများကသတ်သော နဗီတမန်တော်များအတွက် သင်တို့က ‘ဒရ်ဂါ’ ဂူဗိမာန်များတည်ဆောက်ပေးကြ၏။ 48ဤသို့ဖြင့် သင်တို့၏ဘိုးဘေးများ ကျူးလွန်ခဲ့သည့်အမှုများကို သဘောတူကြောင်း သက်သေခံကြ၏။ အကြောင်းမူကား သင်တို့၏ဘိုးဘေးများသည် နဗီတမန်တော်များကိုသတ်၍ သင်တို့ကဒရ်ဂါများကိုတည်ဆောက်ပေးကြ၏။ 49ထို့ကြောင့်အလ္လာဟ်အရှင်မြတ်သည် ရွှေဉာဏ်တော်ဖြင့် ဤလူများထဲသို့ နဗီတမန်တော်၊ ‘ရစူလ်’ တမန်တော်များကိုငါစေလွှတ်မည်။ ထိုနဗီတမန်တော်များ၊ ‘ရစူလ်’ များအနက် အချို့ကို သူတို့ညှဉ်းဆဲ၍ အချို့ကိုသတ်ကြလိမ့်မည် ဟု မိန့်တော်မူ၏။ 50ထို့ကြောင့် ကမ္ဘာတည်ချိန်မှစ၍အသတ်ခံခဲ့ကြရသည့် နဗီတမန်တော်တို့၏အသွေးကို ဤခေတ်လူတို့သည်ပေးဆပ်ရလိမ့်မည်။ 51သင်တို့အား ငါအမှန်ဆိုသည်ကား ‘ဟာဗီလ်’ ၏အသွေးမှစ၍ ‘ဗိုင် (က်) တွလ်မုကာဒဲစ်’ ဝတ်ဗိမာန်တော်အတွင်းပိုင်းနှင့် ကုရ်ဗာနီပြုလုပ်ရာစားပွဲတော်အကြားတွင် အသတ်ခံခဲ့ကြရသည့် ဇကရိယာ၏အသွေးတိုင်အောင် ဤခေတ်လူတို့သည် ပေးဆပ်ရလိမ့်မည်။#11:51 ဟာဗီလ်သည် ဓမ္မဟောင်းကျမ်းတွင် ပထမဆုံး အသတ်ခံရခြင်းဖြစ်သည် (ကမ္ဘာဦး၊ ၄:၈) ဇာကာရိသည် နောက်ဆုံးအသတ်ခံခဲ့ရသူဖြစ်သည် (၂ ရာဇဝင်ချုပ်၊ ၂၄:၂၀-၂၂)။

52အာလဲမ်တို့၊ သင်တို့သည်အမင်္ဂလာရှိကြ၏။ အကြောင်းမူကား သင်တို့သည် အသိပညာတံခါးသော့ကိုသိမ်းထားပြီးလျှင် ကိုယ်တိုင်လည်းမဝင်၊ ဝင်လိုသူများကိုလည်းဆီးတားကြ၏” ဟု မိန့်တော်မူ၏။

53ထိုအရပ်မှအီစာထွက်ခွာတော်မူသောအခါ အာလဲမ်များနှင့်ဖာရိစီးစ်များသည် အီစာအားပြင်းထန်စွာဆန့်ကျင်မှုကိုစတင်ပြုလုပ်လာကြ၏။ 54စကားတော်တွင်အမှားရှာရန် များစွာသောအကြောင်းအရာတို့ကို သူတို့ကလျှင်မြန်စွာ မေးမြန်းကြ၏။

လက်ရှိရွေးချယ်ထားမှု

လုကာကျမ်း 11: MBe

အရောင်မှတ်ချက်

ကူးယူ

နှိုင်းယှဉ်

မျှဝေရန်

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

Musselmani Burmese Bible by Beyond Translation is licensed under Creative Commons Attribution-ShareAlike 4.0 License.

လုကာကျမ်းအင်ဂျီလ်ကျမ်းတော်မြတ် အကြောင်းကို ပို၍ သင်ယူပါ။