လုကာကျမ်း 12
12
အခန်း (၁၂)
သူတော်ကောင်းယောင်ဆောင်ခြင်းနှင့်ပတ်သက်၍သတိပေးခြင်း
(မဿဲ၊ ၁၀:၂၆-၂၇)
1ထိုအခါ ထောင်ပေါင်းများစွာသောလူတို့သည် စုဝေးလာကြသဖြင့် အချင်းချင်းပင်နင်းမိကြ၏။ အီစာသည် ဦးစွာ “ဆွာဟာဗီ” တပည့်တော်တို့အား “ဖာရိစီးစ်တို့၏ သူတော်ကောင်းယောင်ဆောင်ခြင်းတည်းဟူသောတဆေး#12:1 တဆေး မုန့်ကိုတဆေးဖြင့်ပြုလုပ်ပါကပုပ်သိုးသွားနိုင်သည်။ ဤနေရာ၌တဆေးဟု သုံးနှုန်းထားခြင်းမှာ အခြားသူများအား အကျင့်ပျက်စေနိုင်သော ဩဇာလွှမ်းမိုးမှုတစ်ခုကို ဖော်ပြရန်ဖြစ်ပါသည်။ကိုသတိပြုကြလော့။ 2ဖုံးအုပ်ထားသည့်အရာဟူသမျှသည် ပွင့်လာရလိမ့်မည်။ လျှို့ဝှက်ချက်ဟူသမျှသည်လည်း ပေါ်လာရလိမ့်မည်။ 3သို့ဖြစ်၍မှောင်မိုက်တွင် သင်တို့ပြောသောစကားများကို အလင်းတွင်လူတို့ကြားသိကြလိမ့်မည်။ အိမ်အတွင်းခန်းတွင် သင်တို့တီးတိုးပြောဆိုသောစကားများကို အိမ်ခေါင်မိုးထက်မှ ကြွေးကြော်ကြလိမ့်မည်” ဟု မိန့်တော်မူ၏။
4“ငါ့၏အဆွေတို့၊ သင်တို့အားငါဆိုသည်ကား ကိုယ်ခန္ဓာကိုသတ်၍ နောက်ထပ်မည်သို့မျှ အန္တရာယ်မပြုနိုင်သောသူတို့ကိုမကြောက်ကြနှင့်။ 5သင်တို့ကြောက်သင့်သူကိုငါဖော်ပြမည်။ ကိုယ်ခန္ဓာကိုသတ်ပြီးနောက် သင်တို့အား ‘ဂျဟန္နမ်’ ငရဲသို့ချနိုင်တော်မူသောသူကို ကြောက်ကြလော့။ သင်တို့အားငါဆိုသည်ကား ထိုအရှင်မြတ်ကိုကြောက်ကြလော့။ 6စာကလေးငါးကောင်ကို အဿရိ#12:6 အဿရိ အဿရိဟူသည် ရောမလူတို့၏ကြေးနီဒင်္ဂါးဖြစ်ပြီး၊ အဿရိတစ်ပြားသည် ဒေနာရိဒင်္ဂါး ဆယ့်ခြောက်ပုံတစ်ပုံနှင့်ညီမျှပါသည်။ ဒေနာရိဒင်္ဂါးတစ်ပြားသည် အလုပ်သမားတစ်ဦး၏ တစ်နေ့လုပ်အားခ ဖြစ်ပါသည်။နှစ်ပြားဖြင့် ရောင်းသည်မဟုတ်လော။ သို့ရာတွင်အလ္လာဟ်အရှင်မြတ်သည် စာကလေးတစ်ကောင်ကိုမျှမေ့လျော့တော်မမူ။ 7သင်တို့ ဦးခေါင်းကဆံပင်များကိုပင်လျှင် အကုန်အစင်ရေတွက်ထားတော်မူပြီ။ ထို့ကြောင့် မကြောက်ကြနှင့်။ သင်တို့ကားစာကလေးမြောက်မြားစွာထက် များစွာအဖိုးတန်၏” ဟုမိန့်တော်မူ၏။
8“သင်တို့အားငါဆိုသည်ကား လူတို့ရှေ့တွင်ငါ့ကိုသိမှတ်ဝန်ခံသောသူကို လူ့သားသည်လည်း အလ္လာဟ်အရှင်မြတ်၏ ‘မလာအိကာဟ်’ ကောင်းကင်တမန်များတို့၏ရှေ့တွင် သိမှတ်ဝန်ခံတော်မူလိမ့်မည်။ 9ငါ့ကိုလူတို့ရှေ့တွင်ပစ်ပယ်သောသူကို လူသား သည် အလ္လာဟ်အရှင်မြတ်၏ ‘မလာအိကာဟ်’ တို့ရှေ့တွင် ပစ်ပယ်လိမ့်မည်။ 10လူ့သားကိုဆန့်ကျင်ပြောဆိုသူသည် ‘ဂုနာဟ်’ အပြစ်များခွင့်လွှတ်ခြင်းကိုရလိမ့်မည်ဖြစ်သော်လည်း ‘ရူဟုလ်ကုဒွတ်စ်’ သန့်ရှင်းသောဝိညာဥ်တော်ကိုကဲ့ရဲ့ပြစ်မှားသူမူကား ‘ဂုနာဟ်’ အပြစ်များခွင့်လွှတ်ခြင်းကိုရလိမ့်မည်မဟုတ်။
11လူတို့သည်သင်တို့ကို ဝတ်ကျောင်းတော်များသို့လည်းကောင်း၊ မင်းများအာဏာပိုင်များရှေ့သို့လည်းကောင်း ခေါ်ဆောင်လာကြသောအခါ အဘယ်သို့ပြန်လည်ချေပပြောဆိုရမည်ကို မစိုးရိမ်ကြနှင့်။ 12အဘယ်ကြောင့်ဆိုသော် သင်တို့အဘယ်သို့ချေပပြောဆိုရမည်ကို ‘ရူဟုလ်ကုဒွတ်စ်’ သန့်ရှင်းသောဝိညာဥ်တော်သည် ထိုအချိန်၌ သွန်သင်ပေးတော်မူလိမ့်မည်” ဟု မိန့်တော်မူ၏။
သူဌေးမိုက်ပုံဥပမာ
13ပရိသတ်ထဲမှလူတစ်ယောက်က “ဆရာသခင်၊ အကျွန်ုပ်အားအမွေခွဲဝေပေးရန် အစ်ကိုဖြစ်သူကိုအမိန့်ရှိတော်မူပါ” ဟု အီစာအားလျှောက်ထား၏။
14အီစာက “အသင်လူ၊ အဘယ်သူသည်ငါ့ကို သင်တို့၏တရားသူကြီးအဖြစ်ဖြင့်လည်းကောင်း၊ အမွေခွဲဝေသူအဖြစ်ဖြင့်လည်းကောင်း ခန့်ထားသနည်း” ဟု ပြန်၍မိန့်တော်မူ၏။ 15ထိုနောက် လူတို့အား “လောဘအမျိုးမျိုးကိုသတိနှင့် ရှောင်ကြဉ်ကြလော့။ လူ၏အသက်သည် ဥစ္စာပစ္စည်းကြွယ်ဝမှုအပေါ်တွင်မတည်” ဟု မိန့်တော်မူ၏။
16ထို့နောက်အီစာသည် ပုံဥပမာကိုဆောင်၍ “သူဌေးတစ်ဦးသည် မိမိ၏လယ်ယာမှအသီးအနှံများစွာထွက်သဖြင့်၊ 17ငါ၏လယ်ယာထွက် ‘သီးနှံများကိုသိုထားရန်နေရာမရှိ။ ငါသည်အဘယ်သို့ပြုရမည်နည်း’ ဟု တစ်ကိုယ်တည်းတွေးတောလျက်နေ၏။
18ထို့နောက် ‘ငါဤသို့ပြုမည်။ ကျီဟောင်းများကိုဖျက်၍ ပိုမိုကြီးမားသောကျီသစ်များကိုတည်ဆောက်မည်။ ငါ၏ဂျုံစပါးနှင့် အခြားပစ္စည်းဥစ္စာများကို ထိုကျီသစ်ကြီးများတွင်သိုမှီးထားမည်။ 19ထိုနောက် သင်သည်နှစ်ပေါင်းများစွာသုံးဆောင်ရန် ဥစ္စာပစ္စည်းများကိုသိုမှီးထားပြီးဖြစ်၍ စိတ်ချမ်းသာစွာနေလော့။ စားသောက်ပျော်ပါးစွာနေလော့’ ဟု ငါ့ကိုယ်ကိုငါပြောမည်ဟူ၍ဆို၏။
20သို့ရာတွင် အလ္လာဟ်အရှင်မြတ်က ‘အသင်လူမိုက်၊ ယခုညပင်သင့်အသက် ချုပ်ငြိမ်းရလိမ့်မည်။ သို့ဖြစ်၍သင်စုဆောင်းထားသည့်ဥစ္စာပစ္စည်းများကား အဘယ်သူ၏လက်သို့ရောက်လိမ့်မည်နည်း’ ဟု မိန့်တော်မူ၏။
21မိမိအတွက်ဘဏ္ဍာသိုမှီးထားသော်လည်း အလ္လာဟ်အရှင်မြတ်၏ရှေ့တော်တွင်ဆင်းရဲသောသူကား အဆိုပါသူဌေးနှင့်တူသတည်း” ဟု မိန့်တော်မူ၏။
ဂရုစိုက်ခြင်းနှင့် စိုးရိမ်ခြင်း
(မဿဲ၊ ၆:၂၅-၃၄)
22ထို့နောက် ဟဇရသ်အီစာက “ဆွာဟာဗီ” တပည့်တော်တို့အား “သို့ဖြစ်၍ သင်တို့သည်အဘယ်သို့စားရမည်နည်း ဟု အသက်ရှင်ရေးအတွက် မစိုးရိမ်ကြနှင့်။ အဘယ်အရာကိုဝတ်ရမည်နည်းဟု ကိုယ်ခန္ဓာအတွက်မစိုးရိမ်ကြနှင့်။ 23အသက်သည်အစာထက်အရေးကြီး၏။ ကိုယ်ခန္ဓာသည်အဝတ်ထက်အရေးကြီး၏။ 24ကျီးကန်များကို ကြည့်ရှုဆင်ခြင်ကြလော့။ သူတို့သည်မျိုးစေ့ကိုမကြဲ၊ အသီးအနှံများကို မရိတ်မသိမ်း။ သူတို့မှာကုန်လှောင်ခန်းများ၊ ကျီများမရှိ။ သို့ရာတွင်အလ္လာဟ်အရှင်မြတ်သည် သူတို့အားကျွေးမွေးတော်မူ၏။ သင်တို့ကား ငှက်များထက်များစွာအဖိုးထိုက်သည်မဟုတ်လော။ 25သင်တို့တွင် အဘယ်သူသည် စိုးရိမ်ခြင်းအားဖြင့် မိမိ၏အသက်ကိုနှစ်အနည်းငယ်မျှ ပို၍ရှည်စေနိုင်သနည်း။ 26ဤသို့သေးငယ်သောအမှုကိုမတတ်နိုင်လျှင် အဘယ်ကြောင့်အခြားအမှုများအတွက်စိုးရိမ်နေကြသနည်း။
27တောရိုင်းပန်းကလေးများ မည်ကဲ့သို့ရှင်သန်ကြီးထွားကြသည်ကို ကြည့်ရှုကြလော့၊ ၎င်းတို့သည် ခက်ခဲပင်ပန်းသည့် အလုပ်ကိုလည်းမလုပ်ကြ။ အဝတ်အထည်များကိုလည်း မချုပ်လုပ်ကြပေ။ သို့သော် သင်တို့အား ငါဆိုသည်ကား ရှေးယခင်ကဘုန်းစည်းစိမ်ဥစ္စာနှင့်ပြည့်စုံသည့် စုလိုင်မာန်ဘုရင်ကြီးသည်ပင် လှပတင့်တယ်သည် ဝတ်ကောင်းစားလှများကို ဝတ်ဆင်ခဲ့သော်လည်း သူ၏အဝတ်အစားများသည် ဤတောရိုင်းပန်းကလေးများထဲမှ တစ်ပွင့်လောက်မျှပင် လှပတင့်တယ်ခြင်းမရှိခဲ့ပေ။ 28‘အီမာန်’ ယုံကြည်ခြင်းနည်းပါးသူတို့၊ ယနေ့ကွင်းထဲတွင်ရှိ၍ နက်ဖြန်မီးဖိုထဲသို့ရောက်ရသောတောမြက်ကို အလ္လာဟ်အရှင်မြတ်သည် ဤသို့ဝတ်ဆင်ပေးလျှင် သင်တို့အားထိုထက်မက ဝတ်ဆင်ပေးတော်မူမည်မဟုတ်လော။ 29အဘယ်အရာကိုစားရမည်နည်း၊ အဘယ်အရာကိုသောက်ရမည်နည်းဟူ၍ စိုးရိမ်ပူပန်မှုမရှိကြနှင့်။ 30ထိုအရာများကို ကမ္ဘာပေါ်ရှိ ‘ကာဖိရ်’ မယုံကြည်သူတို့သည် ရှာဖွေတတ်ကြ၏။ ထိုအရာများကို သင်တို့လိုကြောင်းကို သင်တို့အဖသိတော်မူ၏။ 31သို့သော် သင်တို့သည်အလ္လာဟ်အရှင်မြတ်၏ နိုင်ငံတော်ကိုရှာကြလော့။ သို့ပြုလျှင် ထိုအရာများကိုလည်း သင်တို့အားပေးတော်မူလိမ့်မည်” ဟုမိန့်တော်မူ၏။
32“ငါ၏ ‘ဆွာဟာဗီ’ တပည့်တို့၊ သင်တို့သည်လူနည်းစု#12:32 လူနည်းစု မူရင်းဂရိဘာသာတွင် “သိုးစုငယ်၊ မကြောက်နှင့်။ သင်တို့အဖသည်သင်တို့အားအလ္လာဟ်အရှင်မြတ်၏နိုင်ငံတော်ကိုပေးရန်အလိုရှိတော်မူ၏” ဟု ရေးသားထားသည်။ဖြစ်သော်လည်း မကြောက်ကြနှင့်။ အကြောင်းမူကားသင်တို့သည် အလ္လာဟ်အရှင်မြတ်ကဲ့သို့ နိုင်ငံတော်အုပ်စိုးရန် သင်တို့အဖ အလိုရှိတော်မူ၏။ 33သင်တို့သည်မိမိတို့၏ဥစ္စာပစ္စည်းများကိုရောင်း၍ ဆင်းရဲသူတို့အားပေးကမ်းစွန့်ကြဲကြလော့။ မဆွေးမမြေ့နိုင်သည့် ပိုက်ဆံအိတ်များကိုဆောင်ကြလော့။ သူခိုးမကပ်၊ ပိုးမဖျက်ဆီးရာ ‘ဂျန္နသ်’ ရွှေမြို့တော်၌ ကုန်ခမ်းခြင်းမရှိနိုင်သည့်ဘဏ္ဍာကို ဆည်းပူးကြလော့။ 34အဘယ်ကြောင့်ဆိုသော် သင်တို့၏ဘဏ္ဍာရှိရာသို့ သင်တို့စိတ်သည်လည်း ရောက်တတ်သောကြောင့်ဖြစ်၏” ဟုမိန့်တော်မူ၏။
သတိနှင့်စောင့်နေသောအစေခံများ
35“သင်တို့သည်အဆင်သင့်ဖြစ်စေရန် ခါးစည်းကြိုးကိုစည်းလျက် မီးအိမ်များကိုထွန်းညှိထားကြလော့။ 36‘ဝလီမာ’ မင်္ဂလာဆောင်ပွဲမှပြန်လာသော မိမိတို့၏သခင်သည်တံခါးကိုခေါက်လျှင် ချက်ချင်းဖွင့်ပေးရန် စောင့်မျှော်နေကြသော အစေခံများကဲ့သို့ဖြစ်ကြလော့။ 37အစေခံတို့အသင့်စောင့်မျှော်နေကြသည်ကို သခင်ပြန်ရောက်ချိန်၌တွေ့ရှိရ၏။ ထိုအစေခံတို့သည်မင်္ဂလာရှိကြ၏။ သင်တို့အား အမှန်အကန်ငါဆိုသည်ကား သခင်သည် ထိုအစေခံတို့ကို စားပွဲတွင်ထိုင်စေလျက် မိမိကိုယ်တိုင်ခါးစည်းကိုစည်းကာ ဧည့်ခံကျွေးမွေးလိမ့်မည်။ 38သခင်သည် သန်းခေါင်ယံ၌သော်လည်းကောင်း၊ မိုးသောက်ယံ၌သော်လည်းကောင်း ပြန်လာသောအခါ စောင့်မျှော်လျက်နေသော အစေခံတို့သည်မင်္ဂလာရှိကြ၏။ 39အကယ်၍အိမ်ရှင်သည် သူခိုးလာမည့်အချိန်ကိုသိပြီးအဆင်သင့်ရှိလျှင် မိမိအိမ်ကိုသူခိုးအဖောက်ခံလိမ့်မည်မဟုတ်ကြောင်းမှတ်ထားကြလော့။ 40ငါလူ့သားသည် သင်တို့မမျှော်လင့်သည့်အချိန်၌ကြွလာမည်ဖြစ်၍ သင်တို့သည်လည်း အသင့်ရှိနေကြလော့” ဟု မိန့်တော်မူ၏။
41ပေတရုက “သခင်၊ ဤပုံဥပမာကို အကျွန်ုပ်တို့အတွက်မိန့်တော်မူပါသလော။ သို့မဟုတ်လူခပ်သိမ်းတို့အတွက်လော” ဟု မေးလျှောက်၏။
42ထိုအခါ ဟဇရသ်အီစာက “သစ္စာရှိ၍ ပညာအလိမ္မာနှင့် ပြည့်စုံသောစီမံခန့်ခွဲသူသည် မည်သူနည်း။ ထိုသူသည် အစေခံများကို အုပ်ချုပ်ရန်နှင့်အချိန်တန်သောအခါ အချိန်တန်သောအခါ စားနပ်ရိက္ခာကိုခွဲဝေစေရန် သခင်ခန့်ထားသောသူဖြစ်၏။ 43တာဝန်ကိုသစ္စာရှိစွာ ဆောင်ရွက်နေသည်ကို အိမ်ရှင်ပြန်လာချိန်၌တွေ့ရလျှင် ထိုအစေခံသည်မင်္ဂလာရှိ၏။ 44အမှန်အကန်သင်တို့အားငါဆိုသည်ကား အိမ်ရှင်သည်မိမိဥစ္စာပစ္စည်းရှိသမျှကို စီမံအုပ်ချုပ်ရန် ထိုအစေခံအားအပ်နှင်းလိမ့်မည်။ 45သို့ရာတွင် အကယ်၍ထိုအစေခံသည် ‘ငါ့သခင်ပြန်လာရန်ကြာဦးမည်’ ဟုစိတ်တွင်အောက်မေ့ကာ အစေခံယောက်ျား၊ အစေခံမိန်းမတို့အားရိုက်ပုတ်၍ သောက်စားမူးယစ်လျက်နေ၏။ 46ထိုသူမမျှော်လင့်သည့်နေ့၊ မသိမြင်သည့်အချိန်၌အိမ်ရှင်သည်ပြန်လာ၍ သူ့ကိုပြင်းထန်စွာဒဏ်ခတ်၍ ‘ကာဖိရ်’ မယုံကြည်သူတို့နှင့်အတူ နေရာချထားလိမ့်မည်။
47သခင်၏အလိုဆန္ဒကိုသိလျက်နှင့် အသင့်ပြင်ဆင်၍မထား၊ ထိုအလိုဆန္ဒသို့လိုက်လျောခြင်းကိုမပြုဘဲနေသော အစေခံသည် ကြိမ်ဒဏ်များစွာခံရလိမ့်မည်။ 48သို့ရာတွင် သခင်၏အလိုဆန္ဒကို မသိဘဲကြိမ်ဒဏ်ထိုက်သောအမှုကိုပြုမိသောသူမူကား အနည်းငယ်သာ ကြိမ်ဒဏ်ခံရလိမ့်မည်။ ကျေးဇူးပြုခြင်းများစွာခံရသောသူသည် များစွာပေးဆပ်ရန် အလ္လာဟ်အရှင်မြတ်သခင်မျှော်လင့်ပေလိမ့်မည်။ ပို၍ယုံကြည်အပ်နှံခြင်းခံရသောသူသည်လည်း များစွာဆောင်ရွက်ရန် မျှော်လင့်ပေလိမ့်မည်” ဟုမိန့်တော်မူ၏။
ဟဇရသ်အီစာသည်စိတ်ဝမ်းကွဲပြားမှုကိုဖြစ်စေသည်
(မဿဲ၊ ၁၀:၃၄-၃၆)
49“ငါသည်ဤ ‘ဒွန္နယာ’ လောကမြေပေါ်၌ မီးလောင်စေရန်လာ၏။ ယခုပင်မီးလောင်စေချင်လှပြီ။ 50ငါခံယူမည့် နှစ်မြှုပ်ခြင်းတစ်ပါးရှိ၏။ ထိုအမှုကိုဆောင်ရွက်၍မပြီးမချင်း ငါသည်စိတ်ဒုက္ခရောက်လှ၏။ 51ဤဒွန္နယာကို ငြိမ်းချမ်းသာယာမှုပေးရန် ငါလာသည်ဟုထင်ကြသလော။ ထိုသို့မဟုတ်။ လူအချင်းချင်းစိတ်ဝမ်းကွဲပြားစေရန်သာလျှင်ငါလာ၏။ 52ယခုမှစ၍လူငါးယောက်ရှိသည့်အိမ်ထောင်တွင် နှစ်ယောက်ကတစ်ဖက်၊ သုံးယောက်ကတစ်ဖက် စိတ်ဝမ်းကွဲပြားကြလိမ့်မည်။ 53ဖခင်နှင့်သား၊ မိခင်နှင့်သမီး၊ ယောက္ခမဖြစ်သူနှင့်ချွေးမတို့သည် အချင်းချင်းစိတ်ဝမ်းကွဲပြားလိမ့်မည်” ဟု မိန့်တော်မူ၏။
ခေတ်ကာလကိုသိခြင်း
(မဿဲ၊ ၁၆:၂-၃)
54ထို့နောက် အီစာက ပရိသတ်တို့အား “အနောက်အရပ်တွင် မိုးတိမ်တက်လာသည်ကိုမြင်လျှင် မိုးရွာလိမ့်မည်ဟု သင်တို့ချက်ချင်းပြောတတ်ကြ၏။ သင်တို့ပြောသည့်အတိုင်းလည်းဖြစ်တတ်၏။ 55တောင်လေလာသည်ကိုမြင်သော် နေပူလိမ့်မည်ဟု ပြောတတ်ကြ၏။ သင်တို့ပြောသည့်အတိုင်းလည်း ဖြစ်တတ်၏။ 56သူတော်ကောင်းယောင်ဆောင်သူတို့၊ သင်တို့သည် ကောင်းကင်နှင့်ကမ္ဘာမြေကြီး၏အရိပ်အခြေကိုထောက်လျက် ရာသီဥတုအခြေအနေကိုသိနိုင်ကြပါလျက်နှင့် ဤခေတ်ကာလကိုအဘယ်ကြောင့်မသိနိုင်ကြသနည်း။
57မှန်ကန်သည့်အမှုကိုပြုရန် အဘယ်ကြောင့်သင်တို့ကိုယ်တိုင် မဆုံးဖြတ်ကြသနည်း။ 58သင်၏တရားတွေ့ဘက်နှင့်အတူ တရားသူကြီးထံသို့သွားရာလမ်းတွင် ကျေအေးအောင်စေ့စပ်လော့။ ထိုသို့မပြုပါမူ သူသည်သင့်အား တရားသူကြီး၏ရှေ့သို့ ဆွဲခေါ်သွားလိမ့်မည်။ တရားသူကြီးသည်သင့်အား မင်းမှုထမ်းလက်သို့ ပေးအပ်လိုက်လိမ့်မည်။ မင်းမှုထမ်းသည်လည်းသင့်အား ထောင်ချထားလိမ့်မည်။ 59သင်ပေးဆပ်ရမည့်ငွေကို အကုန်အစင်မပေးဆပ်မချင်း သင်သည်ထောင်မှထွက်ရလိမ့်မည်မဟုတ်ဟု” သင်တို့အားငါဆို၏ဟူ၍ မိန့်တော်မူ၏။
လက်ရှိရွေးချယ်ထားမှု
လုကာကျမ်း 12: MBe
အရောင်မှတ်ချက်
ကူးယူ
နှိုင်းယှဉ်
မျှဝေရန်
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Musselmani Burmese Bible by Beyond Translation is licensed under Creative Commons Attribution-ShareAlike 4.0 License.
