ܕܢܝܐܝܠ 6
6
ܕܵܢܝܼܐܹܝܠ ܒܓܘܼܒܵܐ ܕܐܲܪ̈ܝܵܘܵܬܹܐ
1ܫܦܝܼܪܵܗ̇ ܩܵܕ݇ܡ ܕܲܪܝܵܘܵܫ ܕܡܲܩܸܡ ܒܡܲܠܟܘܼܬܵܐ ܐܸܡܵܐܐ ܘܥܸܣܪܝܼ ܣܲܛܪ̈ܵܦܹܐ، ܕܗܵܘܝܼ ܗ݇ܘܵܘ ܒܟܠܵܗ̇ ܡܲܠܟܘܼܬܵܐ، 2ܘܥܸܠܸܠ ܡܸܢܲܝܗܝ ܬܠܵܬܵܐ ܫܲܠܝܼܛܹ̈ܐ، ܚܲܕ ܡܸܢܲܝܗܝ ܕܵܢܝܼܐܹܝܠ ܝܼܗ݇ܘܵܐ، ܕܗܵܘܝܼ ܗ݇ܘܵܘ ܐܲܢܹܐ ܣܲܛܪ̈ܵܦܹܐ ܒܝܼܵܗ݇ܒ݂ܵܐ ܐܸܠܲܝܗܝ ܚܸܫܒܘܼܢܵܐ، ܘܠܡܲܠܟܵܐ ܠܵܐ ܗܵܘܹܐ ܗ݇ܘܵܐ ܚܘܼܣܪܵܢܵܐ.
3ܗ̇ܝܓܵܗ ܐܵܗܵܐ ܕܵܢܝܼܐܹܝܠ ܢܦܝܼܠ ܠܹܗ ܠܵܩܵܕ݇ܡܵܐ ܡ̣ܢ ܫܲܠܝܼܛܹ̈ܐ ܘܣܲܛܪ̈ܵܦܹܐ، ܣܵܒܵܒ ܪܘܼܚܵܐ ܙܵܘܕܵܐ ܐܝܼܬ ܗ݇ܘܵܐ ܒܝܼܹܗ، ܘܡܲܠܟܵܐ ܬܘܼܚܡܸܢܹܗ ܠܡܲܩܘܼܡܹܗ ܥܲܠ ܟܠܵܗ̇ ܡܲܠܟܘܼܬܵܐ. 4ܗ̇ܝܓܵܗ ܫܲܠܝܼܛܹ̈ܐ ܘܣܲܛܪ̈ܵܦܹܐ ܛܵܥܝܼ ܗ݇ܘܵܘ ܠܡܲܫ݇ܟ̰ܘܼܚܹܐ ܥܸܠܬܵܐ ܕܲܠܩܘܼܒ݂ܠ ܕܵܢܝܼܐܹܝܠ ܕܐ݇ܣܝܼܪܬܵܐ ܒܡܲܠܟܘܼܬܵܐ، ܐܝܼܢܵܐ ܗܸܟ̃ ܥܸܠܬܵܐ ܘܓܢܵܗܵܐ ܠܵܐ ܡܨܹܐ ܠܗܘܿܢ ܠܡܲܫ݇ܟ̰ܘܼܚܹܐ، ܣܵܒܵܒ ܡܗܘܼܡܢܵܐ ܝܗ݇ܘܵܐ ܗ̇ܘ، ܘܗܸܟ̃ ܚܸܠܛܵܐ ܘܓܢܵܗܵܐ ܠܵܐ ܡܫ݇ܟ̰ܝܼܚ ܠܹܗ ܥܲܠܘܼܗܝ. 5ܗ̇ܝܓܵܗ ܐܲܢܹܐ ܓܲܒ݂ܪܹ̈ܐ ܐ݇ܡܝܼܪܗܘܿܢ، ”ܠܹܐ ܡܲܫ݇ܟ̰ܚܲܚ ܥܲܠ ܕܐܵܗܵܐ ܕܵܢܝܼܐܹܝܠ ܗܸܟ̃ ܥܸܠܬܵܐ، ܐܸܠܵܐ ܐܸܢ ܕܡܲܫ݇ܟ̰ܚܲܚ ܥܲܠܘܼܗܝ ܒܢܵܡܘܿܣܵܐ ܕܐܲܠܵܗܹܗ.“
6ܗ̇ܝܓܵܗ ܐܲܢܹܐ ܫܲܠܝܼܛܹ̈ܐ ܘܣܲܛܪ̈ܵܦܹܐ ܓ̰ܡܝܼܥ ܠܗܘܿܢ ܒܫܓ݂ܘܼܫܝܵܐ ܠܟܸܣ ܡܲܠܟܵܐ، ܘܗܲܕܟ݂ܵܐ ܐ݇ܡܝܼܪܗܘܿܢ ܐܸܠܹܗ، ”ܝܵܐ ܕܲܪܝܵܘܵܫ ܡܲܠܟܵܐ، ܠܥܵܠܡܝܼܢ ܚܝܝܼ. 7ܥܒ݂ܝܼܕ ܠܗܘܿܢ ܡܸܠܟܵܐ ܟܠܲܝܗܝ ܫܲܠܝܼܛܹ̈ܐ ܕܡܲܠܟܘܼܬܵܐ، ܥܲܡ ܓܘܼܪ̈ܵܢܹܐ، ܘܣܲܛܪ̈ܵܦܹܐ، ܘܡܵܠܘܿܟܹ̈ܐ، ܘܪܹ̈ܫܵܢܹܐ، ܠܡܲܩܘܼܡܹܐ ܩܵܢܘܿܢܵܐ ܡܲܠܟܵܝܵܐ ܘܠܡܫܲܪܘܼܪܹܐ ܡܲܟܠܵܝܬܵܐ، ܕܟܠ ܕܒܵܥܹܐ ܒܵܥܘܼܬܵܐ ܡ̣ܢ ܟܠ ܐܲܠܵܗܵܐ ܝܲܢ ܐ݇ܢܵܫܵܐ ܗܲܠ ܬܠܵܬܝܼ ܝܵܘܡܵܢܹ̈ܐ، ܫܒ݂ܘܿܩ ܡܸܢܘܼܟ݂، ܝܵܐ ܡܲܠܟܵܐ، ܦܵܐܹܫ ܕܸܪܝܵܐ ܠܓܘܼܒܵܐ ܕܐܲܪ̈ܝܵܘܵܬܹܐ. 8ܐܵܕܝܼܵܐ، ܝܵܐ ܡܲܠܟܵܐ، ܡܫܲܪܸܪܸܬ ܐܵܗܵܐ ܡܲܟܠܵܝܬܵܐ ܘܪܵܫܡܹܬ ܠܵܗ̇ ܒܟܬܝܼܒ݂ܬܵܐ، ܕܠܹܐ ܐܵܬܝܵܐ ܠܫܲܚܠܘܼܦܹܐ، ܐܲܝܟ݂ ܢܵܡܘܿܣܵܐ ܕܡܵܕܵܝ ܘܦܵܪܸܣ، ܘܕܠܹܐ ܒܵܛܹܠ.“
9ܣܵܒܵܒ ܐܵܗܵܐ ܡܲܠܟܵܐ ܕܲܪܝܵܘܵܫ ܪܫܝܼܡ ܠܹܗ ܡܲܟܠܵܝܬܵܐ ܒܟܬܝܼܒ݂ܬܵܐ. 10ܘܕܵܢܝܼܐܹܝܠ، ܟܲܕ ܝ݇ܕܝܼܥ ܠܹܗ ܕܪܫܝܼܡܵܐ ܝܗ݇ܘܵܐ ܟܬܵܒ݂ܵܐ، ܥܒ݂ܝܼܪܹܗ ܠܒܲܝܬܹܗ ܘܟܵܘܵܬܹ̈ܐ ܕܒܥܸܠܝܼܬܹܗ ܦܬܝܼܚܹܐ ܠܒܲܠܩܘܼܒ݂ܠ ܕܐܘܿܪܸܫܠܸܡ، ܘܬܠܵܬ ܓܵܗܹ̈ܐ ܒܝܵܘܡܵܐ ܗ̇ܘ ܟܹܐ ܒܵܪܹܟ ܗ݇ܘܵܐ ܥܲܠ ܒܘܼܪ̈ܟܵܟܘܼܗܝ، ܘܨܲܠܹܐ ܗ݇ܘܵܐ ܘܫܲܟܸܪ ܗ݇ܘܵܐ ܩܵܕ݇ܡ ܐܲܠܵܗܹܗ، ܕܵܐܟ݂ܝܼ ܕܟܹܐ ܥܵܒܹܕ ܗ݇ܘܵܐ ܡ̣ܢ ܩܵܕ݇ܡܵܝܬܵܐ. 11ܗ̇ܝܓܵܗ ܐܲܢܹܐ ܓܲܒ݂ܪܹ̈ܐ ܓ̰ܡܝܼܥ ܠܗܘܿܢ ܒܫܓ݂ܘܼܫܝܵܐ، ܘܡܘܼܫ݇ܟ̰ܸܚ ܠܗܘܿܢ ܠܕܵܢܝܼܐܹܝܠ ܦܲܪܦܘܼܠܹܐ ܘܢܵܘܢܘܼܝܹܐ ܩܵܕ݇ܡ ܐܲܠܵܗܹܗ. 12ܗ̇ܝܓܵܗ ܩܘܼܪܒܸܢܗܘܿܢ ܘܐ݇ܡܝܼܪܗܘܿܢ ܩܵܕ݇ܡ ܡܲܠܟܵܐ ܒܘܼܬ ܡܲܟܠܵܝܬܵܐ، ”ܗܵܐ ܠܵܐ ܡܲܟܠܵܝܬܵܐ ܪܫܝܼܡ ܠܘܼܟ݂، ܕܟܠ ܐ݇ܢܵܫܵܐ ܕܒܵܥܹܐ ܡ̣ܢ ܟܠ ܐܲܠܵܗܵܐ ܝܲܢ ܐ݇ܢܵܫܵܐ ܗܲܠ ܬܠܵܬܝܼ ܝܵܘܡܵܢܹ̈ܐ، ܫܒ݂ܘܿܩ ܡܸܢܘܼܟ݂، ܝܵܐ ܡܲܠܟܵܐ، ܦܵܐܹܫ ܕܸܪܝܵܐ ܠܓܘܼܒܵܐ ܕܐܲܪ̈ܝܵܘܵܬܹܐ؟“ ܓ̰ܘܼܘܸܒ ܠܹܗ ܡܲܠܟܵܐ ܘܐ݇ܡܝܼܪܹܗ، ”ܬܪܘܼܨܵܐ ܝܠܹܗ ܚܲܒܪܵܐ ܐܲܝܟ݂ ܢܵܡܘܿܣܵܐ ܕܡܵܕܵܝ ܘܦܵܪܸܣ، ܕܠܹܐ ܒܵܛܹܠ.“ 13ܗ̇ܝܓܵܗ ܓ̰ܘܼܘܸܒ ܠܗܘܿܢ ܘܐ݇ܡܝܼܪܗܘܿܢ ܩܵܕ݇ܡ ܡܲܠܟܵܐ، ”ܕܵܢܝܼܐܹܝܠ، ܕܡ̣ܢ ܒܢܲܝ̈ ܓܵܠܘܼܬܵܐ ܕܝܼܗܘܼܕ، ܠܵܐ ܡܘܼܬܸܒ݂ ܠܹܗ ܩܲܕܪܵܐ ܥܲܠܘܼܟ݂، ܝܵܐ ܡܲܠܟܵܐ، ܘܥܲܠ ܡܲܟܠܵܝܬܵܐ ܕܪܫܝܼܡ ܠܘܼܟ݂، ܘܬܠܵܬ ܓܵܗܹ̈ܐ ܒܝܵܘܡܵܐ ܒܸܒܥܵܝܵܐ ܝܠܹܗ ܒܵܥܘܼܬܹܗ.“ 14ܗ̇ܝܓܵܗ ܡܲܠܟܵܐ، ܟܲܕ ܐܵܗܵܐ ܗܹܡܸܙܡܵܢ ܫܡܝܼܥ ܠܹܗ، ܪܵܒܵܐ ܗܘܹܐ ܠܵܗ̇ ܣܪܝܼܬܵܐ ܐܸܠܹܗ، ܘܥܲܠ ܕܵܢܝܼܐܹܝܠ ܡܘܼܣܸܡ ܠܹܗ ܒܵܠܵܐ ܠܦܲܪܘܼܩܹܗ. ܘܗܲܠ ܓܢܵܝܬܵܐ ܕܫܸܡܫܵܐ ܚܲܦܘܼܛܹܐ ܝܗ݇ܘܵܐ ܠܦܲܨܘܼܝܹܗ. 15ܗ̇ܝܓܵܗ ܐܲܢܹܐ ܓܲܒ݂ܪܹ̈ܐ ܓ̰ܡܝܼܥ ܠܗܘܿܢ ܒܫܓ݂ܘܼܫܝܵܐ ܠܟܸܣ ܡܲܠܟܵܐ ܘܐ݇ܡܝܼܪܗܘܿܢ ܐܸܠܹܗ، ”ܝ݇ܕܸܥ، ܝܵܐ ܡܲܠܟܵܐ، ܕܢܵܡܘܿܣܵܐ ܝܠܹܗ ܠܡܵܕܵܝ ܘܦܵܪܸܣ، ܕܟܠ ܡܲܟܠܵܝܬܵܐ ܘܩܵܢܘܿܢܵܐ ܕܡܲܠܟܵܐ ܡܲܩܸܡ ܠܹܐ ܦܵܐܹܫ ܫܘܼܚܠܸܦܵܐ.“ 16ܗ̇ܝܓܵܗ ܡܲܠܟܵܐ ܦܩܝܼܕ ܠܹܗ، ܘܡܘܼܐܬܹܐ ܠܗܘܿܢ ܠܕܵܢܝܼܐܹܝܠ، ܘܕܪܹܐ ܠܗܘܿܢ ܠܓܘܼܒܵܐ ܕܐܲܪ̈ܝܵܘܵܬܹܐ. ܓ̰ܘܼܘܸܒ ܠܹܗ ܡܲܠܟܵܐ ܘܐ݇ܡܝܼܪܹܗ ܠܕܵܢܝܼܐܹܝܠ، ”ܐܲܠܵܗܘܼܟ݂ ܕܐܲܢ݇ܬ ܟܹܐ ܦܵܠܚܹܬ ܐܸܠܹܗ ܐܲܡܝܼܢܵܐܝܼܬ، ܗ̇ܘ ܦܲܪܸܩ ܠܘܼܟ݂.“ 17ܘܦܝܼܫ ܠܹܗ ܡܘܼܐܬܝܵܐ ܚܲܕ ܟܹܐܦܵܐ ܘܡܘܼܬܒ݂ܵܐ ܥܲܠ ܦܘܼܡܵܐ ܕܓܘܼܒܵܐ، ܘܚܬܝܼܡ ܠܹܗ ܡܲܠܟܵܐ ܒܥܸܙܲܩܬܹܗ، ܘܒܥܸܙܲܩܬܵܐ ܕܓܘܼܪ̈ܵܢܘܼܗܝ، ܕܠܵܐ ܫܲܚܠܸܦܵܐ ܨܒ݂ܘܼܬܵܐ ܒܘܼܬ ܕܵܢܝܼܐܹܝܠ.
ܐܲܠܵܗܵܐ ܦܲܪܘܼܩܹܐ ܠܕܵܢܝܼܐܹܝܠ ܡ̣ܢ ܓܘܼܒܵܐ ܕܐܲܪ̈ܝܵܘܵܬܹܐ
18ܗ̇ܝܓܵܗ ܐ݇ܙܝܼܠ ܠܹܗ ܡܲܠܟܵܐ ܠܩܲܨܪܹܗ، ܘܡܘܼܥܒܸܪܹܗ ܠܲܝܠܹܐ ܟܲܕ ܡܘܼܒܝܸܬܵܐ، ܘܐܲܣܒܵܒܹ̈ܐ ܕܙܡܵܪܵܐ ܠܵܐ ܡܘܼܥܒܸܪܹܗ ܩܵܕ݇ܡܘܼܗܝ، ܘܫܸܢܬܹܗ ܦܪܝܼܕ ܠܵܗ̇ ܡܸܢܹܗ. 19ܗ̇ܝܓܵܗ ܡܲܠܟܵܐ ܒܨܲܦܪܵܐ ܩܝܼܡ ܠܹܗ، ܡ̣ܢ ܩܵܕ݇ܡ ܙܪܵܩܵܐ، ܘܒܡܲܠܝܲܙܬܵܐ ܐ݇ܙܝܼܠ ܠܹܗ ܠܓܘܼܒܵܐ ܕܐܲܪ̈ܝܵܘܵܬܹܐ. 20ܘܟܲܕ ܩܘܼܪܒܸܢܹܗ ܠܓܘܼܒܵܐ، ܠܕܵܢܝܼܐܹܝܠ ܒܩܵܠܵܐ ܦܫܝܼܡܵܐ ܡܘܼܩܘܸܚ ܠܹܗ، ܓ̰ܘܼܘܸܒ ܠܹܗ ܡܲܠܟܵܐ ܘܐ݇ܡܝܼܪܹܗ، ”ܝܵܐ ܕܵܢܝܼܐܹܝܠ، ܪܹܓܵܐ ܕܐܲܠܵܗܵܐ ܚܵܝܵܐ، ܐܲܠܵܗܘܼܟ݂، ܕܐܲܢ݇ܬ ܟܹܐ ܦܵܠܚܹܬ ܐܸܠܹܗ ܐܲܡܝܼܢܵܐܝܼܬ، ܡܨܹܐ ܠܹܗ ܠܦܲܪܘܼܩܘܼܟ݂ ܡ̣ܢ ܐܲܪ̈ܝܵܘܵܬܹܐ؟“ 21ܗ̇ܝܓܵܗ ܕܵܢܝܼܐܹܝܠ ܥܲܡ ܡܲܠܟܵܐ ܗܘܼܡܙܸܡ ܠܹܗ، ”ܝܵܐ ܡܲܠܟܵܐ، ܠܥܵܠܡܝܼܢ ܚܝܝܼ. 22ܐܲܠܵܗܝܼ ܫܘܼܕܸܪܹܗ ܡܲܠܲܐܟܹܗ، ܘܐ݇ܟ̰ܝܼܡ ܠܹܗ ܦܘܼܡܵܐ ܕܐܲܪ̈ܝܵܘܵܬܹܐ، ܘܠܵܐ ܚܘܼܙܕܸܓܸܢܗܘܿܢ، ܣܵܒܵܒ ܩܵܕ݇ܡܘܼܗܝ ܙܲܟܵܝܵܐ ܦܝܼܫ ܠܝܼ ܡܫ݇ܟ̰ܝܼܚܵܐ، ܘܐܘܼܦ ܩܵܕ݇ܡܘܼܟ݂، ܝܵܐ ܡܲܠܟܵܐ، ܓܢܵܗܵܐ ܠܵܐ ܥܒ݂ܝܼܕ ܠܝܼ.“ 23ܗ̇ܝܓܵܗ ܡܲܠܟܵܐ ܪܵܒܵܐ ܫܦܝܼܪܵܗ̇ ܥܲܠܘܼܗܝ، ܘܐ݇ܡܝܼܪܹܗ ܠܡܲܐܣܘܼܩܹܐ ܠܕܵܢܝܼܐܹܝܠ ܡ̣ܢ ܓܘܼܒܵܐ. ܘܦܝܼܫ ܠܹܗ ܡܘܼܐܣܩܵܐ ܕܵܢܝܼܐܹܝܠ ܡ̣ܢ ܓܘܼܒܵܐ، ܘܗܸܟ̃ ܚܘܼܙܕܵܓܵܐ ܠܵܐ ܦܝܼܫ ܠܹܗ ܡܫ݇ܟ̰ܝܼܚܵܐ ܒܝܼܹܗ، ܣܵܒܵܒ ܗܘܼܡܸܢܹܗ ܒܐܲܠܵܗܹܗ. 24ܘܦܩܝܼܕ ܠܹܗ ܡܲܠܟܵܐ، ܘܡܘܼܐܬܹܐ ܠܗܘܿܢ ܠܐܲܢܹܐ ܐ݇ܢܵܫܹ̈ܐ ܕܡܚܹܐ ܠܗܘܿܢ ܕܲܪܗܲܩ ܕܕܵܢܝܼܐܹܝܠ، ܘܠܓܘܼܒܵܐ ܕܐܲܪ̈ܝܵܘܵܬܹܐ ܕܸܪܝܲܝ ܠܗܘܿܢ، ܐܵܢܝܼ، ܘܒܢܘܿܢܲܝ̈ܗܝ، ܘܒܲܟ݂ܬܵܬܲܝ̈ܗܝ. ܘܟܲܕ ܠܵܐ ܡܸܛܝܹܐ ܠܐܸܫܬܵܐ ܕܓܘܼܒܵܐ، ܫܘܼܠܛܹܐ ܠܗܘܿܢ ܒܝܼܲܝܗܝ ܐܲܪ̈ܝܵܘܵܬܹܐ، ܘܟܠܲܝܗܝ ܓܲܪ̈ܡܲܝܗܝ ܕܘܼܩܕܸܩ ܠܗܘܿܢ.
25ܗ̇ܝܓܵܗ ܕܲܪܝܵܘܵܫ ܡܲܠܟܵܐ ܟܬܝܼܒ݂ ܠܹܗ ܠܟܠܲܝܗܝ ܥܲܡܡܹ̈ܐ، ܘܐܸܡܘܵܬܹ̈ܐ ܘܠܸܫܵܢܹ̈ܐ، ܕܟܹܐ ܥܵܡܪܝܼ ܒܟܠܵܗ̇ ܐܲܪܥܵܐ، ܒܹܐܡܵܪܵܐ: ”ܫܠܵܡܵܘܟ݂ܘܿܢ ܙܵܐܹܕ. 26ܡ̣ܢ ܠܟܸܣ ܠܝܼ ܡܘܼܬܒ݂ܵܐ ܝܠܹܗ ܦܘܼܩܕܵܢܵܐ، ܕܒܟܠܹܗ ܫܘܼܠܛܵܢܵܐ ܕܡܲܠܟܘܼܬܝܼ، ܐ݇ܢܵܫܹ̈ܐ ܗܵܘܝܼ ܒܸܪܓܵܕܵܐ ܘܒܸܙܕܵܥܵܐ ܡ̣ܢ ܩܵܕ݇ܡ ܐܲܠܵܗܵܐ ܕܕܵܢܝܼܐܹܝܠ،
ܣܵܒܵܒ ܗ̇ܘ ܝܼܠܹܗ ܐܲܠܵܗܵܐ ܚܵܝܵܐ،
ܘܡܩܵܘܝܵܢܵܐ ܝܠܹܗ ܠܥܵܠܡܝܼܢ، ܘܡܲܠܟܘܼܬܹܗ ܠܵܐ ܡܸܬܚܲܪܒ݂ܵܢܬܵܐ ܝܠܵܗ̇،
ܘܫܘܼܠܛܵܢܹܗ ܗܲܠ ܥܵܠܲܡ.
27ܟܹܐ ܦܲܪܸܩ ܘܟܹܐ ܦܲܨܹܐ،
ܘܟܹܐ ܥܵܒܹܕ ܢܝܼܫܲܢܩܹ̈ܐ ܘܥܵܓ̰ܸܒܘܵܬܹ̈ܐ ܒܫܡܲܝܵܐ ܘܒܐܲܪܥܵܐ،
ܕܦܘܼܪܸܩ ܠܹܗ ܠܕܵܢܝܼܐܹܝܠ ܡ̣ܢ ܐܝܼܕܵܐ ܕܐܲܪ̈ܝܵܘܵܬܹܐ.“
28ܘܐܵܗܵܐ ܕܵܢܝܼܐܹܝܠ ܡܘܼܢܬܹܐ ܠܹܗ ܒܡܲܠܟܘܼܬܵܐ ܕܕܲܪܝܵܘܵܫ، ܘܒܡܲܠܟܘܼܬܵܐ ܕܟܘܿܪܸܫ ܦܵܪܣܵܝܵܐ.
လက္ရွိေရြးခ်ယ္ထားမွု
ܕܢܝܐܝܠ 6: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation