ܕܢܝܐܝܠ 7
7
ܚܸܠܡܵܐ ܕܐܲܪܒܲܥ ܚܲܝܘܵܬܹ̈ܐ
1ܒܫܹܢ݇ܬܵܐ ܕܚܕܵܐ ܠܒܸܠܫܵܨܲܪ ܡܲܠܟܵܐ ܕܒܵܒܹܠ، ܕܵܢܝܼܐܹܝܠ ܚܸܠܡܵܐ ܚܙܹܐ ܠܹܗ، ܘܚܸܙܘܹ̈ܐ ܕܪܹܫܹܗ ܟܲܕ ܥܲܠ ܫܘܝܼܬܹܗ. ܗ̇ܝܓܵܗ ܠܚܸܠܡܵܐ ܟܬܝܼܒ݂ ܠܹܗ، ܒܫܘܼܪܵܝܵܐ ܕܗܹܡܸܙܡܵܢܹ̈ܐ ܐ݇ܡܝܼܪܹܗ. 2ܓ̰ܘܼܘܸܒ ܠܹܗ ܕܵܢܝܼܐܹܝܠ ܘܐ݇ܡܝܼܪܹܗ: ”ܒܸܚܙܵܝܵܐ ܝܘܸܢ ܗ݇ܘܵܐ ܒܚܸܙܘܝܼ ܒܠܲܝܠܹܐ، ܘܗܵܐ، ܐܲܪܒܥܵܐ ܦܵܘܚܹ̈ܐ ܕܫܡܲܝܵܐ ܒܲܪܒܘܼܪܹܐ ܠܝܵܡܵܐ ܓܘܼܪܬܵܐ. 3ܘܐܲܪܒܲܥ ܚܲܝܘܵܬܹ̈ܐ ܓܘܼܪܹ̈ܐ ܒܹܐܣܵܩܵܐ ܡ̣ܢ ܝܵܡܵܐ، ܚܕܵܐ ܡ̣ܢ ܕܗ̇ܝ ܐ݇ܚܹܪ݇ܬܵܐ ܦܪܝܼܫܬܵܐ. 4ܩܵܕ݇ܡܵܝܬܵܐ ܐܲܝܟ݂ ܐܲܪܝܵܐ، ܘܓܘܼܠܦܵܢܹ̈ܐ ܕܢܸܫܪܵܐ ܐܝܼܬ ܗ݇ܘܵܘ ܠܵܗ̇. ܒܸܚܙܵܝܵܐ ܝܘܸܢ ܗ݇ܘܵܐ ܕܦܝܼܫ ܠܗܘܿܢ ܢܟ̰ܝܼܠܹܐ ܓܘܼܠܦܵܢܘܼ̈ܗ̇، ܘܦܝܼܫ ܠܵܗ̇ ܡܘܼܪܸܡܬܵܐ ܡ̣ܢ ܐܲܪܥܵܐ، ܘܥܲܠ ܬܲܪܬܹܝ ܐܲܩܠܵܬܹ̈ܐ ܐܲܝܟ݂ ܐ݇ܢܵܫܵܐ ܦܝܼܫ ܠܵܗ̇ ܡܘܼܩܸܡܬܵܐ، ܘܠܸܒܵܐ ܕܐ݇ܢܵܫܵܐ ܦܝܼܫ ܠܹܗ ܝܘܼܗ݇ܒ݂ܵܐ ܐܸܠܘܼܗ̇. 5ܘܗܵܐ، ܚܲܝܘܬܵܐ ܐ݇ܚܹܪ݇ܬܵܐ ܕܬܲܪܬܹܝ، ܒܸܕܡܵܝܵܐ ܠܕܸܒܵܐ، ܘܠܚܕܵܐ ܕܸܦܢܘܼܗ̇ ܦܝܼܫ ܠܵܗ̇ ܡܘܼܩܸܡܬܵܐ، ܘܬܠܵܬܵܐ ܐܸܠܥܹ̈ܐ ܒܦܘܼܡܘܼܗ̇ ܒܹܝܠ ܟܹܟܘܼ̈ܗ̇، ܘܗܲܕܟ݂ܵܐ ܐܵܡܪܝܼ ܐܸܠܘܼܗ̇، ’ܩܘܼܡ، ܐ݇ܟ݂ܘܿܠ ܒܸܣܪܵܐ ܪܵܒܵܐ.‘ 6ܒܵܬ݇ܪ ܐܵܗܵܐ، ܒܸܚܙܵܝܵܐ ܝܘܸܢ ܗ݇ܘܵܐ، ܘܗܵܐ، ܚܲܝܘܬܵܐ ܐ݇ܚܹܪ݇ܬܵܐ ܐܲܝܟ݂ ܢܸܡܪܵܐ، ܘܐܝܼܬ ܗ݇ܘܵܐ ܠܵܗ̇ ܐܲܪܒܥܵܐ ܓܘܼܠܦܵܢܹ̈ܐ ܕܛܲܝܪܵܐ ܥܲܠ ܓܹܒܵܢܘܼ̈ܗ̇، ܘܐܲܪܒܥܵܐ ܪܹ̈ܫܵܢܹܐ ܐܝܼܬ ܗ݇ܘܵܘ ܠܵܗ̇ ܚܲܝܘܬܵܐ، ܘܫܘܼܠܛܵܢܵܐ ܦܝܼܫ ܠܹܗ ܝܘܼܗ݇ܒ݂ܵܐ ܐܸܠܘܼܗ̇. 7ܒܵܬ݇ܪ ܐܵܗܵܐ، ܒܸܚܙܵܝܵܐ ܝܘܸܢ ܗ݇ܘܵܐ ܒܚܸܙܘܵܐ ܕܠܲܝܠܹܐ، ܘܗܵܐ، ܚܲܝܘܬܵܐ ܕܐܲܪܒܲܥ، ܡܲܙܕܸܥܵܢܬܵܐ ܘܣܲܗܡܵܢܬܵܐ ܘܥܲܫܝܼܢܬܵܐ ܪܵܒܵܐ، ܘܟܹܟܹ̈ܐ ܓܘܼܪܹ̈ܐ ܕܦܪܸܙܠܵܐ ܐܝܼܬ ܗ݇ܘܵܘ ܠܵܗ̇، ܒܹܐܟ݂ܵܠܵܐ ܝܗ݇ܘܵܐ ܘܕܲܩܕܘܼܩܹܐ ܝܗ݇ܘܵܐ، ܘܣܵܗܡܵܐ ܦܝܼܫܵܐ ܒܐܲܩܠܵܬܘܼ̈ܗ̇ ܕܲܫܕܘܼܫܹܐ ܝܗ݇ܘܵܐ. ܗ̇ܝ ܦܪܝܼܫܬܵܐ ܝܗ݇ܘܵܐ ܡ̣ܢ ܟܠܲܝܗܝ ܚܲܝܘܵܬܹ̈ܐ ܕܩܵܕ݇ܡܘܼܗ̇، ܘܥܣܲܪ ܩܵܪ̈݇ܢܵܢܹܐ ܐܝܼܬ ܗ݇ܘܵܘ ܠܵܗ̇. 8ܬܲܚܡܘܼܢܹܐ ܝܘܸܢ ܗ݇ܘܵܐ ܒܘܼܬ ܩܵܪ̈݇ܢܵܢܹܐ، ܘܗܵܐ، ܩܵܪ݇ܢܵܐ ܐ݇ܚܹܪ݇ܬܵܐ ܙܥܘܿܪܬܵܐ ܐ݇ܣܝܼܩ ܠܵܗ̇ ܒܹܝܠܲܝܗܝ، ܘܬܠܵܬ ܡ̣ܢ ܩܵܪ̈݇ܢܵܢܹܐ ܩܲܕ݇ܡܵܝܹ̈ܐ ܦܝܼܫ ܠܗܘܿܢ ܥܩܝܼܪܹܐ ܡ̣ܢ ܩܵܕ݇ܡܘܼܗ̇، ܘܗܵܐ، ܥܲܝܢܹ̈ܐ ܐܲܝܟ݂ ܥܲܝܢܹ̈ܐ ܕܐ݇ܢܵܫܵܐ ܒܐܵܗܵܐ ܩܵܪ݇ܢܵܐ، ܘܦܘܼܡܵܐ ܗܲܡܙܘܼܡܹܐ ܚܬܝܼܪ̈ܘܼܝܵܬܹܐ.
9ܒܸܚܙܵܝܵܐ ܝܘܸܢ ܗ݇ܘܵܐ
ܟܘܼܪ̈ܣܝܹܐ ܦܝܼܫ ܠܗܘܿܢ ܡܘܼܬܒܹܐ،
ܘܥܲܬܝܼܩܵܐ ܕܝܵܘܡܵܢܹ̈ܐ ܝ݇ܬܝܼܒ݂ ܠܹܗ.
ܠܒ݂ܝܼܫܬܹܗ ܚܘܵܪܬܵܐ ܐܲܝܟ݂ ܬܲܠܓܵܐ،
ܘܣܲܥܪܵܐ ܕܪܹܫܹܗ ܕܸܟ݂ܝܵܐ ܐܲܝܟ݂ ܥܲܡܪܵܐ،
ܟܘܼܪܣܝܹܗ ܠܵܗܹ̈ܐ ܕܢܘܼܪܵܐ،
ܘܓܝܼܓ݂ܠܘܼ̈ܗܝ ܢܘܼܪܵܐ ܠܵܗܝܵܢܵܐ.
10ܢܲܗܪܵܐ ܕܢܘܼܪܵܐ ܒܸܓ̰ܪܵܝܵܐ
ܘܒܸܦܠܵܛܵܐ ܡ̣ܢ ܩܵܕ݇ܡܘܼܗܝ،
ܐܵܠܸܦ ܐܲܠܦܝܼ̈ܢ ܒܸܥܒ݂ܵܕܵܐ ܚܸܠܡܲܬ ܐܸܠܹܗ،
ܘܪܸܒܘܿ ܪܸ̈ܒܘܵܢ ܟܹܐ ܟܵܠܝܼ ܩܵܕ݇ܡܘܼܗܝ.
ܕܝܼܘܵܢ ܝ݇ܬܝܼܒ݂ ܠܵܗ̇،
ܘܟܬܵܒܹ̈ܐ ܦܝܼܫ ܠܗܘܿܢ ܦܬܝܼܚܹܐ.
11ܗ̇ܝܓܵܗ ܒܸܚܝܵܪܵܐ ܝܘܸܢ ܗ݇ܘܵܐ ܡ̣ܢ ܥܸܠܬܵܐ ܕܩܵܠܵܐ ܡܸܠܝܵܐ ܕܚܬܝܼܪ̈ܘܼܝܵܬܹܐ ܕܩܵܪ݇ܢܵܐ ܗܲܡܙܘܼܡܹܐ ܝܗ݇ܘܵܐ؛ ܒܸܚܝܵܪܵܐ ܝܘܸܢ ܗ݇ܘܵܐ ܗܲܠ ܕܦܝܼܫ ܠܵܗ̇ ܩܛܝܼܠܬܵܐ ܚܲܝܘܬܵܐ، ܘܦܝܼܫ ܠܹܗ ܛܘܼܠܩܵܐ ܓܘܼܫܡܘܼܗ̇، ܘܦܝܼܫ ܠܵܗ̇ ܝܘܼܗ݇ܒܸܠܬܵܐ ܠܝ݇ܩܵܕܬܵܐ ܕܢܘܼܪܵܐ. 12ܘܣܵܗܡܵܐ ܦܝܼܫܵܐ ܕܚܲܝ̈ܘܵܬܹܐ، ܦܝܼܫ ܠܹܗ ܫܩܝܼܠܵܐ ܫܘܼܠܛܵܢܲܝܗܝ، ܐܝܼܢܵܐ ܝܘܼܪܟ݂ܘܼܬܵܐ ܕܚܲܝܹ̈ܐ ܦܝܼܫ ܠܵܗ̇ ܝܘܼܗ݇ܒܸܠܬܵܐ ܐܸܠܲܝܗܝ ܗܲܠ ܙܲܒ݂ܢܵܐ ܘܥܕܵܢܵܐ.
13ܒܸܚܙܵܝܵܐ ܝܘܸܢ ܗ݇ܘܵܐ ܒܚܸܙܘܹ̈ܐ ܕܠܲܝܠܹܐ،
ܘܗܵܐ، ܥܲܡ ܥܢܵܢܹ̈ܐ ܕܫܡܲܝܵܐ
ܚܲܕ ܐܲܝܟ݂ ܒܲܪܢܵܫܵܐ ܒܹܐܬܵܝܵܐ،
ܘܗܲܠ ܥܲܬܝܼܩܵܐ ܕܝܵܘܡܵܢܹ̈ܐ ܐ݇ܬܹܐ ܠܹܗ،
ܘܠܩܵܕ݇ܡ ܕܝܼܹܗ ܩܲܡ ܩܲܪܒܸܢܝܼ ܠܹܗ.
14ܘܐܸܠܹܗ ܦܝܼܫ ܠܹܗ ܝܘܼܗܒ݂ܵܐ ܫܘܼܠܛܵܢܵܐ، ܘܐܝܼܩܵܪܵܐ، ܘܡܲܠܟܘܼܬܵܐ،
ܕܟܠܲܝܗܝ ܥܲܡܡܹ̈ܐ، ܘܐܸܡܘܵܬܹ̈ܐ، ܘܠܸܫܵܢܹ̈ܐ ܐܸܠܹܗ ܦܵܠܚܝܼ،
ܫܘܼܠܛܵܢܹܗ ܫܘܼܠܛܵܢܵܐ ܕܥܵܠܲܡ ܕܠܹܐ ܥܵܒܹܪ،
ܘܡܲܠܟܘܼܬܹܗ ܠܵܐ ܡܸܬܚܲܪܒ݂ܵܢܬܵܐ ܝܠܵܗ̇.
ܚܸܠܡܵܐ ܕܕܵܢܝܼܐܹܝܠ ܦܘܼܫܩܵܐ
15ܦܫܝܼܡ ܠܵܗ̇ ܪܘܼܚܝܼ ܒܓܵܘܝܼ، ܐܵܢܵܐ ܕܵܢܝܼܐܹܝܠ، ܘܚܸܙܘܹ̈ܐ ܕܪܹܫܝܼ ܚܒ݂ܝܼܛܸܢܗܘܿܢ. 16ܩܘܼܪܒܸܢܝܼ ܠܟܸܣ ܚܲܕ ܡ̣ܢ ܐܵܢܝܼ ܕܟܸܠܝܹܐ ܝܗ݇ܘܵܘ، ܘܫܪܵܪܵܐ ܒܘܼܩܸܪܝܼ ܡܸܢܹܗ ܥܲܠ ܟܠܵܗ̇ ܐܵܗܵܐ. ܩܲܡ ܐܵܡܹܪܝܼ، ܘܦܘܼܫܵܩܵܐ ܕܚܲܒܪ̈ܵܢܹܐ ܡܘܼܕܸܥܸܢܹܗ: 17’ܐܲܢܹܐ ܐܲܪܒܲܥ ܚܲܝܘܵܬܹ̈ܐ ܓܘܼܪܹ̈ܐ، ܐܲܪܒܥܵܐ ܡܲܠܟܹ̈ܐ ܝܢܵܐ ܕܒܸܬ ܩܵܝܡܝܼ ܡ̣ܢ ܐܲܪܥܵܐ. 18ܐܝܼܢܵܐ ܩܲܕܝܼܫܹ̈ܐ ܕܥܸܠܵܝܵܐ ܒܸܬ ܩܲܒܠܝܼ ܡܲܠܟܘܼܬܵܐ، ܘܒܸܬ ܝܵܪܬܝܼ ܡܲܠܟܘܼܬܵܐ ܗܲܠ ܥܵܠܲܡ، ܘܗܲܠ ܥܵܠܲܡ ܥܵܠܡܝܼܢ.‘
19ܗ̇ܝܓܵܗ ܒܣܝܼܡ ܠܵܗ̇ ܠܝܼ ܠܝܼܕܵܥܵܐ ܫܪܵܪܵܐ ܥܲܠ ܚܲܝܘܬܵܐ ܕܐܲܪܒܲܥ، ܦܪܝܼܫܬܵܐ ܡ̣ܢ ܟܠܲܝܗܝ، ܡܲܙܕܸܥܵܢܬܵܐ ܪܵܒܵܐ، ܟܹܟܘܼ̈ܗ̇ ܕܦܪܸܙܠܵܐ، ܘܛܸܦܪ̈ܵܬܘܼܗ̇ ܕܢܚܵܫܵܐ، ܒܹܐܟ݂ܵܠܵܐ، ܕܲܩܕܘܼܩܹܐ، ܘܣܵܗܡܵܐ ܦܝܼܫܵܐ ܒܐܲܩܠܵܬܘܼ̈ܗ̇ ܕܲܫܕܘܼܫܹܐ، 20ܘܐܘܼܦ ܒܣܝܼܡ ܠܵܗ̇ ܠܝܼ ܠܝܼܕܵܥܵܐ ܫܪܵܪܵܐ ܥܲܠ ܥܣܲܪ ܩܵܪ̈݇ܢܵܢܹܐ ܕܒܪܹܫܘܼܗ̇، ܘܚܕܵܐ ܐ݇ܚܹܪ݇ܬܵܐ ܕܦܠܝܼܛ ܠܵܗ̇، ܘܢܦܝܼܠ ܠܗܘܿܢ ܡ̣ܢ ܩܵܕ݇ܡܘܼܗ̇ ܬܠܵܬ ܩܵܪ̈݇ܢܵܢܹܐ. ܐܵܗܵܐ ܩܵܪ݇ܢܵܐ ܐܘܼܦ ܥܲܝܢܹ̈ܐ ܐܝܼܬ ܗ݇ܘܵܘ ܠܵܗ̇، ܘܦܘܼܡܵܐ ܗܲܡܙܘܼܡܹܐ ܚܲܒܪܹ̈ܐ ܓܘܼܪܹ̈ܐ، ܘܚܸܙܘܘܼܗ̇ ܓܘܼܪܵܐ ܡ̣ܢ ܚܲܒܲܪ̈ܝܵܬܘܼܗ̇. 21ܒܸܚܙܵܝܵܐ ܝܘܸܢ ܗ݇ܘܵܐ ܘܐܵܗܵܐ ܩܵܪ݇ܢܵܐ ܥܒ݂ܝܼܕ ܠܵܗ̇ ܦܠܵܫܵܐ ܥܲܡ ܩܲܕܝܼܫܹ̈ܐ، ܘܡܨܹܐ ܠܵܗ̇ ܒܝܼܲܝܗܝ، 22ܗܲܠ ܕܐ݇ܬܹܐ ܠܹܗ ܥܲܬܝܼܩܵܐ ܕܝܵܘܡܵܢܹ̈ܐ، ܘܕܝܼܘܵܢ ܦܝܼܫ ܠܵܗ̇ ܝܘܼܗ݇ܒܸܠܬܵܐ ܠܩܲܕܝܼܫܹ̈ܐ ܕܥܸܠܵܝܵܐ، ܘܙܲܒ݂ܢܵܐ ܡܛܹܐ ܠܹܗ ܘܡܲܠܟܘܼܬܵܐ ܝ݇ܪܝܼܬ ܠܗܘܿܢ ܩܲܕܝܼܫܹ̈ܐ.
23ܗܵܕܟ݂ܵܐ ܐ݇ܡܝܼܪܹܗ: ’ܚܲܝܘܬܵܐ ܕܐܲܪܒܲܥ
ܡܲܠܟܘܼܬܵܐ ܕܐܲܪܒܲܥ ܝܠܵܗ̇
ܕܒܸܬ ܗܵܘܝܵܐ ܒܐܲܪܥܵܐ.
ܒܸܬ ܗܵܘܝܵܐ ܦܪܝܼܫܬܵܐ ܡ̣ܢ ܟܠܲܝܗܝ ܡܲܠܟܘܵܬܹ̈ܐ،
ܘܒܸܬ ܐܵܟ݂ܠܵܐ ܟܠܵܗ̇ ܐܲܪܥܵܐ،
ܘܒܸܬ ܕܲܫܕܸܫܵܐ ܠܵܗ̇، ܘܒܸܬ ܕܲܩܕܸܩܵܐ ܠܵܗ̇.
24ܘܒܘܼܬ ܥܣܲܪ ܩܵܪ̈݇ܢܵܢܹܐ،
ܡ̣ܢ ܐܵܗܵܐ ܡܲܠܟܘܼܬܵܐ
ܥܸܣܪܵܐ ܡܲܠܟܹ̈ܐ ܒܸܬ ܩܵܝܡܝܼ.
ܘܐ݇ܚܹܪ݇ܢܵܐ ܒܸܬ ܩܵܐܹܡ ܒܵܬ݇ܪܲܝܗܝ،
ܘܗ̇ܘ ܒܸܬ ܗܵܘܹܐ ܦܪܝܼܫܵܐ ܡ̣ܢ ܩܲܕ݇ܡܵܝܹ̈ܐ،
ܘܬܠܵܬܵܐ ܡܲܠܟܹ̈ܐ ܒܸܬ ܡܲܟܸܦ.
25ܘܗܹܡܸܙܡܵܢܹ̈ܐ ܠܕܲܠܩܘܼܒ݂ܠ ܕܥܸܠܵܝܵܐ ܒܸܬ ܗܲܡܙܸܡ،
ܘܠܩܲܕܝܼܫܹ̈ܐ ܕܥܸܠܵܝܵܐ ܒܸܬ ܡܲܒܠܹܐ،
ܘܒܸܬ ܚܵܫܹܒ݂ ܠܡܲܚܠܘܼܦܹܐ ܙܲܒ݂ܢܹ̈ܐ ܘܢܵܡܘܿܣܵܐ،
ܘܒܸܬ ܦܵܝܫܝܼ ܝܘܼܗ݇ܒܹܐ ܒܐܝܼܕܹܗ
ܗܲܠ ܥܕܵܢܵܐ ܘܥܕܵܢܹ̈ܐ
ܘܦܲܠܓܵܐ ܕܥܕܵܢܵܐ.
26ܐܝܼܢܵܐ ܕܝܼܘܵܢ ܒܸܬ ܝܵܬܒ݂ܵܐ، ܘܫܘܼܠܛܵܢܹܗ ܒܸܬ ܦܵܐܹܫ ܫܩܝܼܠܵܐ،
ܘܦܘܼܢܝܵܐ ܘܛܘܼܠܩܵܐ ܗܲܠ ܚܲܪܬܵܐ.
27ܘܡܲܠܟܘܼܬܵܐ ܘܫܘܼܠܛܵܢܵܐ،
ܘܓܘܼܪܘܼܬܵܐ ܕܡܲܠܟܘܼܬܵܐ ܬܚܘܿܬ ܟܠܵܗ̇ ܫܡܲܝܵܐ،
ܒܸܬ ܦܵܝܫܵܐ ܝܘܼܗ݇ܒܸܠܬܵܐ ܠܥܲܡܵܐ ܩܲܕܝܼܫܵܐ ܕܥܸܠܵܝܵܐ.
ܡܲܠܟܘܼܬܹܗ ܡܲܠܟܘܼܬܵܐ ܕܥܵܠܲܡ،
ܘܟܠܲܝܗܝ ܫܘܼܠܛܵܢܹ̈ܐ ܐܸܠܹܗ ܒܸܬ ܦܵܠܚܝܼ ܘܒܸܬ ܡܲܨܝܸܬܝܼ.‘
28ܠܐܲܟ݂ܵܐ ܒܸܚܬܵܡܵܐ ܝܠܹܗ ܚܸܙܘܵܐ. ܐܵܢܵܐ ܕܵܢܝܼܐܹܝܠ، ܪܵܒܵܐ ܚܝܼܵܠܝܼ̈ ܩܲܡ ܚܵܒ݂ܛܝܼ ܠܝܼ، ܘܪܲܢܓܝܼ ܪܘܼܦܹܐ ܠܝܼ، ܐܝܼܢܵܐ ܚܲܒܪܵܐ ܒܠܸܒܝܼ ܢܛܝܼܪܝܼ.“
လက္ရွိေရြးခ်ယ္ထားမွု
ܕܢܝܐܝܠ 7: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation