ܕܢܝܐܝܠ 5
5
ܟܬܵܒ݂ܬܵܐ ܕܥܲܠ ܓܘܼܕܵܐ
1ܒܸܠܫܵܨܲܪ ܡܲܠܟܵܐ ܥܒ݂ܝܼܕ ܠܹܗ ܐܲܪܚܘܼܬܵܐ ܓܘܼܪܬܵܐ ܩܵܐ ܐܲܠܦܵܐ ܓܘܼܪ̈ܵܢܘܼܗܝ، ܘܩܵܕ݇ܡܲܝܗܝ ܚܲܡܪܵܐ ܫܬܹܐ ܠܹܗ. 2ܟܲܕ ܛܥܝܼܡ ܠܹܗ ܒܸܠܫܵܨܲܪ ܚܲܡܪܵܐ، ܦܩܝܼܕ ܠܹܗ ܠܡܲܝܬܘܼܝܹܐ ܡܵܐܢܹ̈ܐ ܕܕܲܗܒ݂ܵܐ ܘܣܹܐܡܵܐ ܕܦܘܼܠܸܛ ܠܹܗ ܢܒ݂ܘܼܟܲܕܢܵܨܲܪ ܒܵܒܘܼܗܝ ܡ̣ܢ ܗܲܝܟܠܵܐ ܕܓܵܘ ܐܘܿܪܸܫܠܸܡ. ܕܫܵܬܝܼ ܒܝܼܲܝܗܝ ܡܲܠܟܵܐ ܘܓܘܼܪ̈ܵܢܘܼܗܝ، ܘܒܲܟ݂ܬܵܬܹ̈ܗ ܘܕܪ̈ܘܼܟ݂ܝܵܬܹܗ. 3ܗ̇ܝܓܵܗ ܡܘܼܐܬܹܐ ܠܗܘܿܢ ܡܵܐܢܹ̈ܐ ܕܕܲܗܒ݂ܵܐ، ܕܦܘܼܠܸܛ ܠܗܘܿܢ ܡ̣ܢ ܗܲܝܟܠܵܐ ܕܒܲܝܬܵܐ ܕܐܲܠܵܗܵܐ ܒܐܘܿܪܸܫܠܸܡ، ܘܫܬܹܐ ܠܗܘܿܢ ܒܝܼܲܝܗܝ ܡܲܠܟܵܐ ܘܓܘܼܪ̈ܵܢܘܼܗܝ، ܘܒܲܟ݂ܬܵܬܹ̈ܗ ܘܕܪ̈ܘܼܟ݂ܝܵܬܹܗ. 4ܫܬܹܐ ܠܗܘܿܢ ܚܲܡܪܵܐ، ܘܫܘܼܒܸܚ ܠܗܘܿܢ ܠܐܲܠܵܗܹ̈ܐ ܕܕܲܗܒ݂ܵܐ، ܘܣܹܐܡܵܐ، ܘܢܚܵܫܵܐ، ܘܦܪܸܙܠܵܐ، ܘܩܲܝܣܵܐ، ܘܟܹܐܦܵܐ.
5ܒܗ̇ܝ ܣܵܥܲܬ ܦܠܝܼܛ ܠܗܘܿܢ ܨܸܒܥܵܬܹ̈ܐ ܕܐܝܼܕܵܐ ܕܐ݇ܢܵܫܵܐ، ܘܟܬܝܼܒ݂ ܠܗܘܿܢ ܒܲܠܩܘܼܒ݂ܠ ܕܡܢܵܪܬܵܐ ܥܲܠ ܓܸܨܵܐ ܕܓܘܼܕܵܐ ܕܒܲܝܬܵܐ ܕܡܲܠܟܵܐ. ܘܡܲܠܟܵܐ ܒܸܚܙܵܝܵܐ ܝܗ݇ܘܵܐ ܡܲܪܙܵܐ ܕܐܝܼܕܵܐ ܕܒܸܟܬܵܒ݂ܵܐ ܝܗ݇ܘܵܐ. 6ܗ̇ܝܓܵܗ ܡܲܠܟܵܐ ܪܲܢܓܹܗ ܪܘܼܦܹܐ ܠܹܗ، ܘܚܝܼܵܠܘܼ̈ܗܝ ܚܒ݂ܝܼܛ ܠܗܘܿܢ، ܘܩܲܛܵܪܹ̈ܐ ܕܚܲܨܹܗ ܦܝܼܫ ܠܗܘܿܢ ܫܸܪܝܹܐ، ܘܒܘܼܪ̈ܟܵܟܘܼܗܝ ܠܸܚܕܵܕܹ̈ܐ ܡܚܹܐ ܠܗܘܿܢ. 7ܩܪܹܐ ܠܹܗ ܡܲܠܟܵܐ ܒܩܵܠܵܐ ܪܵܡܵܐ ܠܡܲܥܒ݂ܘܼܪܹܐ ܠܐܵܫܘܿܦܹ̈ܐ، ܟܲܠܕܵܝܹ̈ܐ، ܘܩܵܨܘܿܡܹ̈ܐ. ܓ̰ܘܼܘܸܒ ܠܹܗ ܡܲܠܟܵܐ ܘܐ݇ܡܝܼܪܹܗ ܠܚܲܟܝܼܡܹ̈ܐ ܕܒܵܒܹܠ، ”ܟܠ ܐ݇ܢܵܫܵܐ ܕܩܵܪܹܐ ܐܵܗܵܐ ܟܬܵܒ݂ܬܵܐ ܘܦܘܼܫܵܩܹܗ ܡܲܕܸܥ ܠܝܼ، ܐܲܪܓܘܵܢܵܐ ܒܸܬ ܠܵܒܹܫ، ܘܬܵܘܩܵܐ ܕܕܲܗܒ݂ܵܐ ܥܲܠ ܩܕܵܠܹܗ، ܘܕܬܠܵܬܵܐ ܒܡܲܠܟܘܼܬܵܐ ܒܸܬ ܥܵܒܹܕ ܫܘܼܠܛܵܢܵܐ.“ 8ܗ̇ܝܓܵܗ ܥܒ݂ܝܼܪܗܘܿܢ ܟܠܲܝܗܝ ܚܲܟܝܼܡܹ̈ܐ ܕܡܲܠܟܵܐ، ܐܝܼܢܵܐ ܠܵܐ ܡܨܹܐ ܠܗܘܿܢ ܟܬܵܒ݂ܬܵܐ ܠܸܩܪܵܝܵܐ ܘܦܘܼܫܵܩܵܐ ܠܡܲܕܘܼܥܹܐ ܠܡܲܠܟܵܐ. 9ܗ̇ܝܓܵܗ ܡܲܠܟܵܐ ܒܸܠܫܵܨܲܪ ܪܵܒܵܐ ܦܝܼܫ ܠܹܗ ܚܒ݂ܝܼܛܵܐ، ܘܪܲܢܓܹܗ ܒܘܼܫ ܪܘܼܦܹܐ ܠܹܗ، ܘܓܘܼܪ̈ܵܢܘܼܗܝ ܫܥܝܼܫ ܠܗܘܿܢ.
10ܡܲܠܟܬܵܐ، ܒܘܼܬ ܗܹܡܸܙܡܵܢܹ̈ܐ ܕܡܲܠܟܵܐ ܘܓܘܼܪ̈ܵܢܘܼܗܝ، ܥܒ݂ܝܼܪܵܗ̇ ܠܒܲܝܬܵܐ ܕܡܸܫܬܘܼܬܵܐ. ܓ̰ܘܼܘܸܒ ܠܵܗ̇ ܡܲܠܟܬܵܐ ܘܐ݇ܡܝܼܪܵܗ̇، ”ܝܵܐ ܡܲܠܟܵܐ، ܠܥܵܠܡܝܼܢ ܚܝܝܼ. ܠܵܐ ܚܵܒ݂ܛܝܼ ܠܘܼܟ݂ ܚܝܼܵܠܘܼ̈ܟ݂، ܘܠܵܐ ܪܲܦܹܝܬ ܪܲܢܓܘܼܟ݂. 11ܐܝܼܬ ܓܲܒ݂ܪܵܐ ܓܵܘ ܡܲܠܟܘܼܬܘܼܟ݂ ܕܪܘܼܚܵܐ ܕܐܲܠܵܗܹ̈ܐ ܩܲܕܝܼܫܹ̈ܐ ܐܝܼܬ ܒܝܼܹܗ، ܘܒܝܵܘܡܵܢܹ̈ܐ ܕܒܵܒܘܼܟ݂ ܒܲܗܪܵܐ ܘܦܲܪܡܵܝܬܵܐ ܘܚܸܟ݂ܡܬܵܐ ܐܲܝܟ݂ ܚܸܟ݂ܡܬܵܐ ܕܐܲܠܵܗܹ̈ܐ ܡܫ݇ܟ̰ܝܼܚ ܠܗܘܿܢ ܒܝܼܹܗ. ܘܡܲܠܟܵܐ ܢܒ݂ܘܼܟܲܕܢܵܨܲܪ، ܒܵܒܘܼܟ݂، ܡܘܼܩܸܡ ܠܹܗ ܓܘܼܪܵܐ ܕܚܲܪ̈ܵܫܹܐ ܥܲܠ ܐܵܫܘܿܦܹ̈ܐ، ܘܟܲܠܕܵܝܹ̈ܐ، ܘܩܵܨܘܿܡܹ̈ܐ، 12ܣܵܒܵܒ ܪܘܼܚܵܐ ܙܵܘܕܵܐ، ܘܝ݇ܕܲܥܬܵܐ، ܘܦܲܪܡܵܝܬܵܐ، ܘܦܵܫܲܩܬܵܐ ܕܚܸܠܡܹ̈ܐ، ܘܡܲܕܲܥܬܵܐ ܕܩܸܨܸܡܝܵܬܹ̈ܐ، ܘܫܪܵܝܬܵܐ ܕܟܸܬܪܹ̈ܐ ܡܫ݇ܟ̰ܝܼܚ ܠܗܘܿܢ ܒܝܼܹܗ، ܒܕܵܢܝܼܐܹܝܠ، ܕܡܲܠܟܵܐ ܡܘܼܬܸܒ݂ ܠܹܗ ܫܸܡܹܗ، ܒܸܠܛܫܵܨܲܪ. ܐܵܕܝܼܵܐ ܕܵܢܝܼܐܹܝܠ ܦܵܐܹܫ ܩܸܪܝܵܐ، ܘܦܘܼܫܵܩܵܐ ܒܸܬ ܡܲܕܸܥ.“
13ܗ̇ܝܓܵܗ ܕܵܢܝܼܐܹܝܠ ܦܝܼܫ ܠܹܗ ܡܘܼܥܒܸܪܵܐ ܩܵܕ݇ܡ ܡܲܠܟܵܐ. ܓ̰ܘܼܘܸܒ ܠܹܗ ܡܲܠܟܵܐ ܘܐ݇ܡܝܼܪܹܗ ܠܕܵܢܝܼܐܹܝܠ، ܐܲܢ݇ܬ ܝܼܘܸܬ ܕܵܢܝܼܐܹܝܠ، ܕܡ̣ܢ ܒܢܲܝ̈ ܓܵܠܘܼܬܵܐ ܕܝܼܗܘܼܕ، ܕܡܘܼܐܬܹܐ ܠܹܗ ܡܲܠܟܵܐ ܒܵܒܝܼ ܡ̣ܢ ܝܼܗܘܼܕ؟ 14ܫܡܝܼܥ ܠܝܼ ܒܘܼܬ ܕܝܼܘܼܟ݂ ܕܪܘܼܚܵܐ ܕܐܲܠܵܗܹ̈ܐ ܐܝܼܬ ܒܝܼܘܼܟ݂، ܘܒܲܗܪܵܐ، ܘܦܲܪܡܵܝܬܵܐ، ܘܚܸܟ݂ܡܬܵܐ ܙܵܘܕܵܐ ܡܫ݇ܟ̰ܝܼܚ ܠܗܘܿܢ ܒܝܼܘܼܟ݂. 15ܘܐܵܕܝܼܵܐ، ܦܝܼܫ ܠܗܘܿܢ ܡܘܼܥܒܸܪܹܗ ܩܵܕ݇ܡܝܼ ܚܲܟܝܼܡܹ̈ܐ ܘܐܵܫܘܿܦܹ̈ܐ ܕܐܵܗܵܐ ܟܬܵܒ݂ܬܵܐ ܩܵܪܝܼ، ܘܦܘܼܫܵܩܹܗ ܡܲܕܥܝܼ ܠܝܼ، ܐܝܼܢܵܐ ܠܵܐ ܡܨܹܐ ܠܗܘܿܢ ܦܘܼܫܵܩܵܐ ܕܚܲܒܪܵܐ ܠܡܲܕܘܼܥܹܐ. 16ܘܐܵܢܵܐ ܫܡܝܼܥ ܠܝܼ ܒܘܼܬ ܕܝܼܘܼܟ݂ ܕܡܵܨܹܝܬ ܦܘܼܫܵܩܹ̈ܐ ܠܡܲܕܘܼܥܹܐ، ܘܟܸܬܪܹ̈ܐ ܠܸܫܪܵܝܵܐ. ܐܵܕܝܼܵܐ ܐܸܢ ܡܵܨܹܝܬ ܟܬܵܒ݂ܬܵܐ ܠܸܩܪܵܝܵܐ، ܘܦܘܼܫܵܩܹܗ ܠܡܲܕܘܼܥܝܼ، ܐܲܪܓܘܵܢܵܐ ܒܸܬ ܠܵܒ݂ܫܹܬ، ܘܬܵܘܩܵܐ ܕܕܲܗܒ݂ܵܐ ܥܲܠ ܩܕܵܠܘܼܟ݂، ܘܕܬܠܵܬܵܐ ܒܡܲܠܟܘܼܬܵܐ ܒܸܬ ܥܵܒ݂ܕܹܬ ܫܘܼܠܛܵܢܵܐ.“
ܕܵܢܝܼܐܹܝܠ ܦܲܫܘܼܩܘܼܗ̇ ܟܬܵܒ݂ܬܵܐ
17ܗ̇ܝܓܵܗ ܓ̰ܘܼܘܸܒ ܠܹܗ ܕܵܢܝܼܐܹܝܠ ܘܐ݇ܡܝܼܪܹܗ ܩܵܕ݇ܡ ܡܲܠܟܵܐ، ”ܡܵܘܗܒ݂ܵܬܘܼ̈ܟ݂ ܐܸܠܘܼܟ݂ ܗܵܘܝܼ، ܘܦܘܼܪ̈ܥܵܢܘܼܟ݂ ܠܐ݇ܚܹܪ̈݇ܢܹܐ ܗܲܒ݂݇ܠ، ܐܝܼܢܵܐ ܟܬܵܒ݂ܬܵܐ ܒܸܬ ܩܵܪܹܝܢ ܠܡܲܠܟܵܐ، ܘܦܘܼܫܵܩܵܐ ܒܸܬ ܡܲܕܥܸܢܹܗ. 18ܐܲܢ݇ܬ، ܝܵܐ ܡܲܠܟܵܐ، ܐܲܠܵܗܵܐ ܥܸܠܵܝܵܐ ܝܘܼܗ݇ܒܸܠ ܠܹܗ ܡܲܠܟܘܼܬܵܐ، ܘܓܘܼܪܘܼܬܵܐ، ܘܐܝܼܩܵܪܵܐ، ܘܚܸܩܪܵܐ ܠܢܒ݂ܘܼܟܲܕܢܵܨܲܪ ܒܵܒܘܼܟ݂، 19ܘܡ̣ܢ ܓܘܼܪܘܼܬܵܐ ܕܝܘܼܗ݇ܒܸܠ ܠܹܗ ܐܸܠܹܗ، ܟܠܲܝܗܝ ܥܲܡܡܹ̈ܐ، ܘܐܸܡܘܵܬܹ̈ܐ، ܘܠܸܫܵܢܹ̈ܐ، ܗܘܹܐ ܠܗܘܿܢ ܒܸܫܥܵܫܵܐ ܘܒܸܙܕܵܥܵܐ ܡ̣ܢ ܩܵܕ݇ܡܘܼܗܝ؛ ܗ̇ܘ ܕܒܵܣܡܵܐ ܗ݇ܘܵܐ ܠܹܗ ܒܸܩܛܵܠܵܐ ܝܗ݇ܘܵܐ، ܘܗ̇ܘ ܕܒܵܣܡܵܐ ܗ݇ܘܵܐ ܠܹܗ ܚܲܡܘܼܝܹܐ ܝܗ݇ܘܵܐ ܚܵܝܵܐ؛ ܘܗ̇ܘ ܕܒܵܣܡܵܐ ܗ݇ܘܵܐ ܠܹܗ ܡܲܪܘܼܡܹܐ ܝܗ݇ܘܵܐ، ܘܗ̇ܘ ܕܒܵܣܡܵܐ ܗ݇ܘܵܐ ܠܹܗ ܡܲܟܘܼܦܹܐ ܝܗ݇ܘܵܐ. 20ܘܟܲܕ ܪܝܼܡ ܠܹܗ ܠܸܒܹܗ، ܘܪܘܼܚܹܗ ܙܘܼܪܒܸܢܵܗ̇ ܠܸܙܝܵܪܵܐ، ܦܝܼܫ ܠܹܗ ܡܘܼܨܠܝܼܵܐ ܡ̣ܢ ܟܘܼܪܣܝܵܐ ܕܡܲܠܟܘܼܬܹܗ، ܘܐܝܼܩܵܪܹܗ ܦܝܼܫ ܠܹܗ ܫܩܝܼܠܵܐ ܡܸܢܹܗ، 21ܘܡ̣ܢ ܒܢܲܝ̈ ܐ݇ܢܵܫܵܐ ܦܝܼܫ ܠܹܗ ܛܪܝܼܕܵܐ، ܘܠܸܒܹܗ ܥܲܡ ܚܲܝܘܬܵܐ ܗܘܹܐ ܠܹܗ ܫܲܘܝܵܐ، ܘܥܲܡ ܚܡܵܪܹ̈ܐ ܕܒܲܪܝܼܵܐ ܡܲܥܡܪܹܗ، ܓܸܠܵܐ ܐܲܝܟ݂ ܬܵܘܪܹ̈ܐ ܩܲܡ ܡܲܐܟ݂ܠܝܼ ܠܹܗ، ܘܡ̣ܢ ܛܠܘܼܠܵܐ ܕܫܡܲܝܵܐ ܓܘܼܫܡܹܗ ܦܝܼܫ ܠܹܗ ܡܘܼܬܪܝܼܵܐ، ܗܲܠ ܕܝ݇ܕܝܼܥ ܠܹܗ ܕܫܲܠܝܼܛܵܐ ܝܠܹܗ ܐܲܠܵܗܵܐ ܥܸܠܵܝܵܐ ܒܡܲܠܟܘܼܬܵܐ ܕܐ݇ܢܵܫܹ̈ܐ، ܘܠܡ̇ܢ ܕܒܵܣܡܵܐ ܠܹܗ ܟܹܐ ܡܲܩܸܡ ܥܲܠܘܼܗ̇. 22ܘܐܲܢ݇ܬ ܒܪܘܿܢܹܗ، ܒܸܠܫܵܨܲܪ، ܠܵܐ ܡܘܼܟܸܦ ܠܘܼܟ݂ ܠܸܒܘܼܟ݂، ܐܵܦܸܢ ܕܟܠܵܗ̇ ܐܵܗܵܐ ܝ݇ܕܝܼܥ ܠܘܼܟ݂، 23ܘܥܲܠ ܡܵܪܵܐ ܕܫܡܲܝܵܐ ܡܘܼܪܸܡ ܠܘܼܟ݂ ܓܵܢܘܼܟ݂، ܘܠܡܵܐܢܹ̈ܐ ܕܒܲܝܬܹܗ ܡܘܼܐܬܹܐ ܠܗܘܿܢ ܩܵܕ݇ܡܘܼܟ݂، ܘܐܲܢ݇ܬ، ܘܓܘܼܪ̈ܵܢܘܼܟ݂، ܘܒܲܟ݂ܬܵܬܘܼ̈ܟ݂ ܘܕܪ̈ܘܼܟ݂ܝܵܬܘܼܟ݂، ܚܲܡܪܵܐ ܫܬܹܐ ܠܵܘܟ݂ܘܿܢ ܒܝܼܲܝܗܝ، ܘܠܐܲܠܵܗܹ̈ܐ ܕܣܹܐܡܵܐ، ܘܕܲܗܒ݂ܵܐ، ܘܢܚܵܫܵܐ، ܘܦܪܸܙܠܵܐ، ܘܩܲܝܣܵܐ، ܘܟܹܐܦܵܐ، ܕܠܹܐ ܚܵܙܝܼ، ܘܠܹܐ ܫܵܡܥܝܼ، ܘܠܹܐ ܝܵܕܥܝܼ، ܫܘܼܒܸܚ ܠܘܼܟ݂، ܘܠܐܲܠܵܗܵܐ ܕܢܫܲܡܬܘܼܟ݂ ܒܐܝܼܕܹܗ ܝܠܵܗ̇ ܘܐܘܼܦ ܟܠܲܝܗܝ ܐܘܼܪ̈ܚܵܬܘܼܟ݂، ܠܵܐ ܚܩܝܼܪܘܼܟ݂. 24ܒܘܼܬ ܐܵܗܵܐ، ܡ̣ܢ ܠܟܸܣ ܠܹܗ ܦܝܼܫ ܠܹܗ ܫܘܼܕܪܵܐ ܡܲܪܙܵܐ ܕܐܝܼܕܵܐ، ܘܐܵܗܵܐ ܟܬܵܒ݂ܬܵܐ ܦܝܼܫ ܠܵܗ̇ ܪܫܝܼܡܬܵܐ. 25ܘܐܵܗܵܐ ܝܠܵܗ̇ ܟܬܵܒ݂ܬܵܐ ܕܝܼܠܵܗ̇ ܪܫܝܼܡܬܵܐ: ܡܢܹܐ، ܡܢܹܐ، ܬܩܝܼܠ، ܘܦܲܪܣܝܼܢ. 26ܐܵܗܵܐ ܝܠܹܗ ܦܘܼܫܵܩܵܐ ܕܚܲܒܪܵܐ: ܡܢܹܐ–ܡܢܹܐ ܠܹܗ ܐܲܠܵܗܵܐ ܡܲܠܟܘܼܬܘܼܟ݂، ܘܬܝܼܡܵܐ ܠܹܗ. 27ܬܩܝܼܠ–ܬܩܝܼܠܵܐ ܝܘܸܬ ܒܡܲܣܲܐܝܵܬܹ̈ܐ، ܘܦܝܼܫ ܠܘܼܟ݂ ܡܫ݇ܟ̰ܝܼܚܵܐ ܒܵܨܘܿܪܵܐ. 28ܦܪܝܼܣ–ܦܪܝܼܣܬܵܐ ܝܠܵܗ̇ ܡܲܠܟܘܼܬܘܼܟ݂، ܘܝܘܼܗ݇ܒܸܠܬܵܐ ܠܡܵܕܵܝ ܘܦܵܪܸܣ.“
29ܗ̇ܝܓܵܗ ܦܩܝܼܕ ܠܹܗ ܒܸܠܫܵܨܲܪ ܕܡܲܠܒܸܫܝܼ ܠܕܵܢܝܼܐܹܝܠ ܐܲܪܓܘܵܢܵܐ ܘܬܵܘܩܵܐ ܕܕܲܗܒ݂ܵܐ ܥܲܠ ܩܕܵܠܹܗ، ܘܕܵܪܝܼ ܩܵܠܵܐ ܒܘܼܬ ܕܝܼܹܗ ܕܒܸܬ ܗܵܘܹܐ ܫܲܠܝܼܛܵܐ ܕܬܠܵܬܵܐ ܒܡܲܠܟܘܼܬܵܐ.
30ܒܗ̇ܘ ܠܲܝܠܹܐ ܦܝܼܫ ܠܹܗ ܩܛܝܼܠܵܐ ܒܸܠܫܵܨܲܪ ܡܲܠܟܵܐ ܕܟܲܠܕܵܝܹ̈ܐ. 31ܘܕܲܪܝܵܘܵܫ ܡܵܕܵܝܵܐ ܩܘܼܒܸܠ ܠܹܗ ܡܲܠܟܘܼܬܵܐ، ܟܲܕ ܐܲܝܟ݂ ܒܲܪ ܐܸܫܬܝܼ ܘܬܲܪܬܹܝ ܫܸܢܹ̈ܐ ܝܗ݇ܘܵܐ.
လက္ရွိေရြးခ်ယ္ထားမွု
ܕܢܝܐܝܠ 5: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation