Mahte 27

Yudaq Juîshi É Hkyô

Mrk 15:1; Luk 23:1-2; Yhn 18:28-32

1Nàpsûn noq le, hkyangjong agyi pé bànshoq bang eq míngbyu é sûwún wuî gi, Yesuq lé sat pyám nhâng râ matú chôm myìt hpyit yû bekô nghut ri. 2Haû mù, yhángmòq gi, Yhang lé tuî yù luî, shuî htoq ê kômù, mau zau Pilat chyáng ê àp byî akô nghut ri.

3Yesuq lé àp pyâm é sû Yudaq gi, Yesuq lé jéyáng dòqdân é hkyô lé myang sé jáng, nùngngham wó mù, haû ngùn sum xê chap lé, hkyangjong agyi pé eq sûwún wui chyáng ló dum tau byî ri. 4Haû mù, yhang gi, “Mara a bò Su é sui lé, ngò àp pyám bê nghut é yánmai, ngò mara wó bê.” ga taí jáng, yhángmòq gi, “Haú hkyô, ngá-mòq eq haî sêng lhê lhú? Haû gi, nàng eq shèq ru sêng lhê.” ga lhom taî kat akô nghut ri.

5Haû mù, Yudaq gi, ngùn haú lé, noqkuq yhúmhkaû má dú pyâm to luî, htoq ló mù, yhânggùng yhang ê juîshi byùq bê nghut ri.

6Haû hkyangjong agyi pé gi, ngùn chap haú pé kui yù luî, “Shî gi, sui hpau ngùn nghut lhê yánmai, alû sidèk má a ge kat.” ga taî akô. 7Haû mù, yhángmòq gi, tûngbaù pê é lùpdùng kut râ matú, au saí zo su é maumyî lé, ngùn hau èq wui hpyit yû râ dông, chôm myìt hpyit to bekô nghut ri. 8Hau é yánmai, ahkuî jé shoq, haú jowò lé, sui myigùng ga myhîng tô akô nghut ri. 9Haû gi, “Haû Isira-elaq byu pé mai, Yhang lé gù hpyit tô é ngùn sum xê chap lé, yhángmòq yù mù, haû Yhûmsîng Garai, ngo lé pying tô é eq rajung za, 10haû au saí zo su é maumyî lé, yhángmòq wui yù bekô nghut ri.” ga myìqhtoi Yeremi‑aq taî tô é dang lo dìk é nghut ri.

Yesuq Lé, Pilat Myî Jep Wú É Hkyô

Mrk 15:2-15; Luk 23:3-5, 13-26; Yhn 18:33-19:16

11Haú u lé, Yesuq gi, mau zau hpô é hí má yàp tô é nghut mù, haû mau zau hpó gi, Yhang lé, “Nàng gi, Yudaq byu pê é hkóhkâm nghut lhê lhú?” ga myi jáng, Yesuq gi, “Nàng taî é eq rajung za nghut lhê.” ga tû taî ri.

12Haû hkyangjong agyi pé eq sûwún wuî gi, Yhang lé, mara hûn kôjáng, Yhang gi, haî le a tû taí nghut ri. 13Haú hkûn, Pilat gi, Yhang lé, “Yhángmòq, Nang lé mara hûn sàksé haû í hkâm nyì kô é lé, Nàng a wó gyo lhú?” ga saî myî ri. 14Nghut kôlhang, Yesuq gi, dang rahkun lháng a tû taî é yánmai, haû mau zau hpó gi, gyai maú byùq bê nghut ri.

15Haû Lhoqlhai Poî u lé, mingbyû wuì ô nau é má cháng luî, haû mau zau hpó gi, htóng byû rayùq yùq lé nhâng byî é htûng jòq ri. 16Haú u lé, a gè myìng htoq é htóng byû, Barabaq ga sû rayùq nyi ri. 17Haû mù, byù mòqmó zùp zîng lò kô é hkûn, Pilat gi, yhángmòq lé, “Núngmòq é matú, hká yùq lé lhut byi nhâng nau akô lhú? Barabaq lùq? Haû a nghut jáng, Hkrisidùq gâ é Yesuq lé lùq?” ga myî ri. 18Yhang haû su ga myî é gi, yhángmòq, Yesuq lé manôn kôluî, yhâng chyáng lé àp byi kô é hkyô lé sê é yánmai nghut ri.

19Pilat gi, târâ jéyáng jihpûng htoq má zung tô ashî hkûn, yhang myi gi, “Haû mara a bò Sû lé, haî le hkâkut; hkâsu mù gâ le, hkû-nyí za lháng, yhupmòq má, haú yùq é yánmai, ngò tsómra hpuzô pyám bê nghut lhê.” ga, yhâng chyáng dang pying kat ri.

20Nghut kôlhang, haû hkyangjong agyi pé eq sûwún wuî gi, Barabaq lé dûng htoq yû râ eq Yesuq lé sat pyám nhâng râ matú, shiwa byu pé lé wum byi bekô nghut ri.

21Haû mau zau hpó gi, “Shî í yùq mâ é hká yùq lé, nhâng byi nhâng nau akô lhú?” ga myi jáng, yhángmòq gi, “Barabaq!” ga tû taî akô nghut ri.

22Haû mù, Pilat gi, “Haû jáng gi, Hkrisidùq gâ é Yesuq lé, ngò hkâsu kut râ lhú?” ga dum myî kat jáng, yhángmòq bànshoq bang gi, “Yhang lé tapzîng má jén sat pyám aq!” ga dum tû taî akô nghut ri.

23Nghut kôlhang, yhang gi, “Haî mù luî lhú? Yhang gi, hai mara kut shut bê lhú?” ga dum myi jáng, yhángmòq gi, htê mó èq, “Yhang lé tapzîng má jén sat pyám aq!” ga je riyhang garû lo bum akô nghut ri.

24Pilat gi, hká dông le a dàt kut lô é eq byu pé gabyông lò kôrâ nghut é hkyô lé myàng luî, ûchyam yù mù, shiwa byu pê hí má lòq chi luî, taî é gi, “Shí yùq é sui gi, ngò eq haî a séng; núngmòq eq za ru sêng lhê.” gâ ri.

25Haû shiwa byù lhúnglhâng bang gi, “Yhâng é sui gi, ngá-mòq eq ngá-mòq é yhang zo yhang shû pê htoq má jòq nyì sháng gàq.” ga, dum tû taî kat akô nghut ri.

26Haú hkûn, Pilat gi, Barabaq lé nhâng byi bê nghut ri. Yesuq lé kúm gi, nhuq bàt nhâng mù, tapzîng má jén sat pyám râ matú àp byî kat bê nghut ri.

Yesuq Lé, Gyèzô Pé Rhoi É Hkyô

Mrk 15:16-21; Yhn 19:2-3

27Hau htâng, mau zau hpô é gyèzô pé gi, Yesuq lé, mau zau hpô é yhûmwàng mó hkaû má shuî wang ló kômù, Yhâng é lhînghkyùq má, gyèdap gón lé ji tsîng tô akô. 28Yhángmòq gi, Yesuq é mèbu hkyut pyám byi kôluî, zam zam ne é buhîng hut byi kômù, 29zumuq ralhum saî yù kôluî, Yhâng é ulhum má tsung byî akô nghut ri. Yhángmòq gi, jàm yang rahkat lé, Yhâng é lòqyo lòq má kat byi kômù, Yhâng é hí má hkyîhput htuq kôluî, “Yudaq byu pê é hkóhkâm hpó ê! Chyung hîng xê hing nyì sháng gàq ô!” ga, jihpoi dang taî akô. 30Yhángmòq gi, Yhang lé sôkan byé gyun luî, Yhâng é lòq mai jàm yang lú yû mù, Yhâng é ulhum má dum bàt bàt kut akô nghut ri. 31Yhángmòq gi, Yhang lé rhoî jihkyoî ban kut yû kôjáng, Yhang wùt tô é buhîng lé hkyut yû kômù, Yhâng é mèbu lé dum hut byi luî, tapzîng má jén sat pyám râ matú, Yhang lé shuî htoq e ló bekô nghut ri.

Yesuq Lé Jén Pyâm É Hkyô

Mrk 15:22-32; Luk 23:27-43; Yhn 19:17-27

32Yhángmòq htoq e ló nyi le, Kuruni wà mó byû nghut é Simun ga sû lé myàng kômù, yhang lé, zìk luî tapzîng wàq nhang akô nghut ri. 33Yhángmòq gi, Golagahta gâ é jowò má jé e ló bekô nghut ri. Golagahta gâ é lichyúm gi, ugyap jòq é jowò lé gâ é nghut lhê. 34Haú má jé jáng, yhángmòq gi, Yesuq lé, hkô jung eq nyhô tô é tsibyiq wing lé byi huq akô; nghut kôlhang, Yhang gi, haú lé chyam wú mù, a shuq byi kut pyâm ri. 35Yhángmòq gi, Yesuq lé tapzîng má jén tap tô é htâng, Yhâng é mèbu lé lháng, hkyîn shosé she é dông gam yu pyám byî akô. 36Hau htâng, yhángmòq gi, haú jowò má zung to mù, Yhang lé zúng nyi akô nghut ri. 37Yhâng é u htoq má, “SHÍ YÙQ GI, YUDAQ BYU PÊ É HKÓHKÂM, YESUQ NGHUT LHÊ.” ga, Yhang lé mara hun é laiká kâ tap tô akô. 38Haú hkûn, Yhang eq rahá, da-myàq í yùq lé le, Yhâng é lòqpaî hkyam shut rayùq, lòqyo hkyam shut rayùq kut, tapzîng htoq má jén tap tô akô nghut ri. 39Hkyô sô laî ló é bang gi, nyhap é dông u‑ngut ngut mù, taí kô é gi, 40“Noqkuq yhûm lé hpyoq pyám luî, sum nyí gyoro má dum wó saî lhê ga Sû ê! Nàng, Garai Gasâng é Yhangzo nghut le gi, Náng gûng nàng hkyi yù luî, tapzîng mai gyó lo wú aq mhaî!” gâ akô nghut ri.

41Haû eq rajung za, hkyangjong agyi pé, târâ sará pé eq sûwún wuî le, Yhang lé rhoî jihkyoî kut mù, taí kô é gi, 42“Shí yùq gi, góbang lé hkyi yù sû nghut kôlhang, Yhânggùng yhang gi, a wó hkyi yù nghut ri myhî-nhung! Yhang gi, Isira-elaq byu pê é hkóhkâm nghut lhê lhâ! Ngá-mòq wó lùmjíng râ matú, Yhang, tapzîng mai gyó lo wú sháng gàq. 43Yhang gi, Garai Gasang lé lùmhkaû sû nghut lhê mù, Garai ô nau é sû nghut le gi, ahkuî Yhang lé hkyi yù sháng gàq; hkâsu mù gâ le, Yhang gi, ‘Ngò, Garai Gasâng é Yhangzo nghut lhê.’ ga taî ri.” gâ bum akô nghut ri. 44Haû eq rajung za, Yhang eq rahá tapzîng má jén to huî é da-myàq í yùq le, Yhang lé rhoî dang taî akô nghut ri.

Yesuq Kângsoq Byìt É Hkyô

Mrk 15:33-41; Luk 23:44-49; Yhn 19:28-30

45Nyí-káng raxe í hkyíng mai myínhtâng sum hkyíng jé shoq, ra-mau gón mauchut tuq dùt byùq bê nghut ri. 46Myínhtâng sum hkyíng kô má, Yesuq gi, “Eloi, Eloi, lama sabakhtani?” ga, htê mó èq garû kat ri. Hau é lichyúm gi, “Ngá Garai ê, Ngá Garai ê, Nàng, haî mù, Ngo lé tô pyâm tô lhê lhú?” gâ é nghut ri.#Hkya-on 22:1

47Haú nâm má yàp tô é bang ra-am gi, haú lé wó gyo kôjáng, “Yhang gi, myìqhtoi Eliya lé wùt nyi ri.” ga taî akô.

48Haú hkûn jáng, yhángmòq mâ é rayùq gi, din e ló mù, wuìmaù lé ê yu ri. Yhang gi, haú lé tsibyiq wing chyîn má jum yù luî, jàm yang má tuî tap mù, Yesuq shuq râ matú yhun byî ri. 49Góbang gi, “Yhang lé, Eliya, lé hkyi yu lhê laq, ngá-nhúng chôm láng wú sháng.” ga taî akô nghut ri.

50Haú hkûn, Yesuq gi, htê mó èq dum garû kat luî, Yhâng é kângsoq byìt bê nghut ri.

51Haú u lé, haû noqkuq yhûm mâ é pán-gyang gi, ahtoq mai a‑ô í hkyam byáng gòq byùq bê nghut ri. Myigùng le nún lô mù, lùqgòk pé le gòq byùq bê nghut ri. 52Lùp pé gi, bóng lô mù, shi byùq bê é chyoiyúng bang myo myo gi, lhoqdui é huî akô. 53Haú bang gi, Yesuq dum dui toq é htâng, lùp mai htoq lô kômù, chyoiyúng wà mó#27:53 Chyoiyúng wà mó gâ é gi, Yerusalem wà mó lé gâ é nghut lhê. má wang ê luî, byù myo myô hí má htoq shit akô nghut ri.

54Shô ùp gyèzau hpó eq, yhang eq rahá Yesuq lé zúng nyi é bang gi, layàng nún é eq dùt lo é hkyô bànshoq lé myàng kôjáng, gyùq dàn kômù, “Yhang gi, gè gè yhang, Garai Gasâng é Yhangzo nghut rî-nhung!” ga taî akô nghut ri.

55Myiwe wuì myo myo le, we we mai wú nyi bum akô. Haú bang gi, Yesuq râ é má garúm râ matú, Galile mau mai Yhang htâng châng lé é bang nghut akô. 56Haú bang má, Magadalaq wà mâ é Mariq, Yakuq eq Yosep nhiktang é yhâng nu Mariq eq Zebedi é yhang zô nhiktang é yhâng nû pé le bo akô nghut ri.

Yesuq Lé, Myhup Pyâm É Hkyô

Mrk 15:42-47; Luk 23:50-56; Yhn 19:38-42

57Myínhtâng jé lô jáng, Yesuq é chángzo dùt bê nghut é, sùt wó sû, Aramahti wà mó byù Yosep ga sû lé lo ri. 58Yhang gi, Pilat chyáng ê mù, Yesuq é gùngsôm lé ê dung jáng, Pilat gi, yhang lé byi râ matú hkunmó hkyô kat bê nghut ri. 59Yosep gi, gùngsôm lé yù mù, pán yúng èq htup yùp luî, 60lùqgòk lé kyûng tô é, yhâng é lùp sik hkaû má ê kat tô ri. Hau htâng, yhang gi, lùphkum má, lùqlông èq lhêng chî pyâm to luî, ló byùq bê nghut ri. 61Magadalaq wà mâ é Mariq eq góyùq Mariq gi, lùp hí má zung tô akô nghut ri.

Lùp Zúng É Hkyô

62Haû Hên Lajang Buìnyì laî é htang nyí lé, hkyangjong agyi pé eq Hparishe pé gi, Pilat chyáng ê mù, 63“Yhûmsîng ê, Yhang, chyungxe dui nyi ashî hkûn, ‘Sum nyí nghû râ buìnyì má, Ngò dum dui toq lô râ.’ ga, haû byù mhaú taî é dang lé, ngá-mòq bûn nyi lhê. 64Haû mù, haû sum nyí nghû râ buìnyì jé shoq, lùp lé rago za zúng nhang to aq. Haû a nghut jáng, Yhâng é chángzô pé, màng lé lé hkaû yu ló mù, Yhang shi é mai dum dui toq lô bê ga, byu pé lé taí kôrâ nghut lhê. Shî, ló htâng dàm mhaû é hkyô gi, sânghî dàm htoq je wui râ nghut lhê.” ga, lé taî akô nghut ri.

65Haú hkûn, Pilat gi, “Núngmòq sê é dông, lùp lé haî a dùt loshoq, gyèzô pé lé zúng nhang to keq.” ga tû taî kat ri. 66Haû mù, yhángmòq gi, ê luî, lùp lé gau shoq ga, lùqgòk má dizìk htung mù, lùp zúng byû nyhi to bekô nghut ri.

Terpilih Sekarang Ini:

Mahte 27: znot

Highlight

Kongsi

Salin