HAGONEGAHANI 48
48
1I ta na matena i muri, o Josepo ki rongoa, vi o vaemana ki maeha bâraha. Vikê ngaia mo Manase mo Eparaimi o karena gi rua ka râ ka bâsia o Jakobo. 2Matena o Jakobo ki rongoa, vi o Josepo o karena ki râ me, hanana vi bâsia, ngaia ki hagaramoramo ki aharaga ki oga i bea. 3O Jakobo ki vi tanga o Josepo, ki vi: “God raramohaga hunia ki vora tangê i Luse i Kanani ma ki tamaniê. 4Ngaia ki vi tangê, ki vi, ‘Inê be hagarakonira na raraha iamu, hanana ga voravora na apaneni me gahu. Inê be haganahunira na raraha iamu renia na agua ikê, hanana ga nahunia hagahu.”
5O Jakobo ki vi nikâ: “O Josepo, igo ko apararerua o karemu gi rua i Esipito, ma i murina gê râ me ikê ngairerua ka na kareku. O Eparaimi ma o Manase ngairerua ka na kareku mangarerua o Rubeni ma o Simeone. 6Manga vi igo ma ko aparara nikâ tani o karemu, hoi na animu igo ngegana. Ngaira ki asa vige page nahunigi na nahuninga gê meme tenigi, nga noga ma o Eparami ma o Manase kani garu page vatera. 7Inê kê kato vikê suria ma kenamu ka Ragele. Inê kê mesia ngavê, matena i me i Kanani hagarangia i na akerena na tara tanga i Eparata.” I Eparata ka hêtana i ngekê vi i Beteleheme.
8Matena o Jakobo ki bâsirerua o karena o Josepo, ngaia ki hagate, ki vi: “Ti ka na kere mane igê?”
9O Josepo ki arami, ki vi: “O kareku ngegê. God ki vateê renirerua ikê i Esipito.”
O Jakobo ki vi: “Mererârua me tangê be têbuhirerua.” 10O Jakobo ki guruha na maana, suria i merahaga ngavê ma ki pe marava na maana. O Josepo ki torererua me na kere mane tanga o Jakobo. O Jakobo ki ruirerua ma ki siginirerua.
11Ma hemuri o Jakobo ki vi tanga o Josepo, ki vi: “Inê kê girara i bara vi ve page bâsigo nikâ. Henaka, ma God ki katoê kê bâsirerua nogaterua o karemu.” 12Ngairerua karu oga hetangenia o Jakobo. O Josepo ki têrerua aporo me ma ki tube so i ano tanga.
13O Josepo ki naka o Eparaimi i mahana o Jakobo ma ki naka o Manase i otona, hanana vi o Jakobo ki têtêbuhia o Eparaimi renia na rimana na mahana ma o Manase renia na otona. 14Ma o Jakobo ki urusia ki têbuhia o Eparaimi renia na rimana i otona, henaka vi ngaia ki na ani i vora hemuri, ma ki têbuhia o Manase renia na rimana na mahana, hanaka vi ngaia ki na bêbê ni kare. 15Ngaia ki nungia God tanga o Josepo, ki vi: “God na êvariku o Abarahamo ma o Isako karu rahesia, ke korokoro tangarerua na kere mane igê. God, i ngahisiê tare mataro me i ngekê, ke ngahisirerua. 16Na angero i hagatahiê tenigi na ara ni eraha hato, ke anumasirerua. Na raraha iamami inê ma na êvariku o Abarahamo ma o Isako ke tataka tare renirerua na kare mane ngegê, ke rakorako na kareterua ma na raraha iaterua.”
17O Josepo ki hataera na obana, matena i bâsia o vaemana i têbuhia o Eparaimi renia na rimana na otona. Vikê ngaia ki têa na otona o vaemana ma ki panegenia râ tenia na bêna o Eparaimi tanga na bêna o Manase. 18Ngaia ki vi tanga o vaemana, ki vi: “Mama, siana ko kato vikana. Na bêbê ni kare hete ikê. Gu têbuhia renia na otomu.”
19O Jakobo ki usi, ki vi: “O kareku, inê kê girara! Inê kê girara! Na raraha iana o Manase ka page gahugahu ngavê nikâ. Ma o vesina ngaia ki page teharia, suria na raraha iana ka page gahu igê na hakuta ninuni.”
20Igê na tangiana ngekana ngaia ki têbuhirerua igê, ki vi: “Na Isiraelita ka page visigi na atamurua, matena ga visira koro heri. Ngaira ka page vivi, ‘God ke katogamu maratoraterua o Eparaimi ma o Manase.” Igê na tarana ngekana o Jakobo ki katoa o Eparaimi ki manga na bêbê ni kare.
21Hemuri o Jakobo ki vi tanga o Josepo, ki vi: “Bâ, inê ki sugia ma vi ve meme. God ki page ngahisigamu ma ki page toregamu aporo tanga na agua iata na êvarimi. 22Inê kê haganahunigo igo getego ma renia na mako koro i Sekemi, gê henahuraua tenira na Amorita, nga noga ma na goamu getera râ ki mareha.”
Terpilih Sekarang Ini:
HAGONEGAHANI 48: KCB
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2011 Bible Society of the South Pacific