HAGONEGAHANI 47
47
1Vikê o Josepo ki merarâ o veogana gi rima tanga na maneraha i Esipito. Ngaia ki vi tanga na maneraha, ki vi: “O vaemaku ma o goaku ka râ me tenia i Kanani henira na togoha iata ma henigi na ara ni nahuninga hato iata. I ngekê ngaira ka oga i na apanena i Gosene.” 2Ma hemuri ngaia ki hagararingenira o veogana tanga na maneraha. 3Na maneraha ki hagatera, ki vi: “Na ta ka na tagaraha iami?”
Ngaira ka arami, ka vi: “Maneraha, igami ka na ani ni sipi mangara na êvarimami. 4Igami kami râ me, hanana vigami gâga i na agua ikê, suria i pasimami i Kanani ki ramo era igê na magêha ma ki mareha na go tangara na togoha iamami. Gu hagamarumungenigami, kami oga i na apanena i Gosene.”
5Na maneraha ki vi tanga o Josepo, ki vi: “Suria o vaemamu ma na goamu ka ata me, 6i koro ma ka gâga i na agua mavê ga obania ikê i Esipito. Nakara vê ke oga i na apanena i Gosene, na mako koro teha ngavê. Manga i berarogata ma ka oga igê na mane ga manisi ni bâsuriana na togoha, go kasira ka bâbâsurira na togoha iaku.”
7Ma hemuri o Josepo ki merâ o Jakobo o vaemana ma ki hagagirara na maneraha renia. O Jakobo ki nungia God, hanana vi koro tanga na maneraha. 8Na maneraha ki hagatea, ki vi: “Gi hita na harisi iamu?”
9O Jakobo ki arami, ki vi: “Inê kê rârâ i maveta surigi noga na harisi 130. Na harisi ngegana ka pe rako ma na marâ gi tage na mamasiaganiha. Na harisi iaku ka pe rako mangagi na harisi iata na êvariku.” 10O Jakobo ki nungia nikâ God tanga na maneraha ma ki kahu râ.
11Ma hemuri o Josepo ki katora o vaemana ma o goana ka oga i Esipito. Ngaia ki haganahunira renia na mako koro teha ngavê hagarangia na hinua i Ramesesi, manga i bani visia na maneraha. 12O Josepo ki bâsurira o vaemana ma o goana ma na raraha hato getera iana o vaemana henira na ara ni kare gari renigi na ngauha.
Na magêha
13Na magêha ki raha teha ngavê. Ki mareha ngavê vi na kere ngêra surigi na hinua. Na ai ni Esipito ma ni Kanani ka arutaveo ngavê renia na magêha. 14Matena na enoni ka vuri koni, o Josepo ki tavogi na haga hato na meni ma ki toregi râ tanga na ruma raha iana na maneraha. 15Matena i Esipito me Kanani ka vurivuri hato renigi na haga hato iata, na ai ni Esipito ka arâ i pasina o Josepo, ka vivi: “Vategami na ngauha, naka ma i marehasigami na haga. Gu botage renigami, i era ma kami me i maamu.”
16O Josepo ki arami, ki vi: “Mu merarâ me na togoha iami ma kamu hohoro renigi na ngauha, manga vi marehasigamu na haga.” 17Vikê ngaira ka merarâ me na togoha iata tanga o Josepo ma ngaia ki vatera na ngauha meta na hosi iata, na sipi iata, na puruka iata ma na tonki iata. Suria na harisi ngekana ngaia ki vatera igê na ngauha meni na ara ni togoha hato iata.
18I na harisi i muri me ngaira ka râ me nikâ i pasina o Josepo ma ka vi: “Araha, igami kami pe obania, vigami pinihia ta na marâ tenigo. I monari, igami ki marehasigami ngavê na haga, ma igo ko nahunira na togoha iamami. I mareha vige hita rârâ ta na marâ, hanana vigami vurivuri ngauha renigi tenigo, nga noga ma na apemami ma na mako iamami. 19Gu botage renigami, i era ma kami me. Siana ki banogo na mako iamami. Gu vurigami igami ma na mako iamami renigi na ngauha. Igami ki koro ma vigami voravora re na kare rakuraku iana na maneraha. Ngaia ki koro ma vi nahunigi na mako iamami. Gu vategami na ngauha, hanana mi tahitahi. Gu vategami na ngauha ni hasinga, hanana mi hasihasi i mu iamami.”
20O Josepo ki vurigi na ara ni mako hato i Esipito tanga na maneraha. Suria na magêha ki ramo teha ngavê, tahema ki katora na ai ni Esipito hato ka hagavuringenigi na mako iata. Na ara ni mako hato ki têgi na maneraha. 21O Josepo ki katora na enoni suria i Esipito hagenani ka vora re na kare vurivuri. 22Ngaia ki vurigi na ara ni mako hato, nga noga ma na mako iata na mane ni vogasiha. Ngaira ka pe hagavuringenigi na mako iata, suria na maneraha ki vatera na meta, hanana vi ga mauri re.
23O Josepo ki vi tangara na enoni, ki vi: “Hoita, inê kê bani vurigamu igamu ma na mako iami tanga na maneraha. Na ngauha ni hasinga tangagamu kani igê tangagi na mu iami. 24Ma na matena ga maua, ki tuguhigamu, vigamu mahatangenia na pita na apaneni na harisi iami tanga na maneraha. Ma na ani i hitahita râ kamu ngêngê tani igamu ma na ahemata iami ma kamu hasihasi tani.”
25Ngaira ka arami, ka vi: “Araha, igo ko hagatahigami. Igo ko koro tangagami ma igami kami page vora re na kare vurivuri iana na maneraha.” 26Vikê o Josepo ki naka na ramata tanga i Esipito hagenani, hanana vi na pita na apanena na harisi ki arâ tanga na maneraha. Na ramata ngekê ki arâ mênga mataro me i ngekê. Nga noga ma na mako iata na mane ni vogasiha na maneraha ki pe têgi.
O Jakobo ki nungia God ki tamanirerua o Eparaimi mo Manase
27Na Isiraelita ka oga i Esipito i na apanena i Gosene. Ngaira ka ruruguha igê ma ka rako na kareta. 28O Jakobo ki oga i Esipito surigi na harisi tangahuru matare pi, mataro me ki tonga na 147 na harisi iana. 29Matena ngaia ki sugia ma vige meme, ngaia ki unia me o Josepo o karena ma ki vi tanga, ki vi: “Gu naka na rimanu i berarogani na tangaku ma ko tohetohe, vi igo ki asa vigu bagiê so Esipito. 30Inê kê obania, go bagiê henira na êvariku. Go toreê tenia i Esipito ma ko bagiê igê na agua, ga bani bagira igê na êvariku.”
O Josepo ki arami, ki vi: “I koro ma, gê page bagigo i ngekana.”
31O Jakobo ki vi: “Gu tohe, vi igo ko katokato monari nga vikana.” O Josepo ki tohe ma o Jakobo ki rahesia God i ngekana igê na bea iana.
Terpilih Sekarang Ini:
HAGONEGAHANI 47: KCB
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2011 Bible Society of the South Pacific