Sáni Mateo 20
20
Ánchetpiri enka sési maiampek'a
1“Auantarhu anapu irechekua, xáxesti eska achamasï enka echerini ma kánkorhek'a enka úba jukaka, ka tsípku uérasti ánchekorherichani jirinhaani enkaksï jima ánchekorhepirinka enka úba jukaka. 2Ka pakatperasptiksï eska xáni maiamuapirinka eska ma jurhiatekua na antanhak'a, ka axaspti ánchekorheni jima enka úba jukaka. 3Ka ménteru sáni ióntakuarhu uérasti, ka kópekuarhu exeaspti máru enkaksï ísku jápka, 4ka arhiaspti: ‘Ni je chát'u ánchekorheni ka jíksïni maiamuaka na enka xántku sésku jauaka.’ Ka imaksï niraspti. 5Ka ménteru teruxutini uéraspti, ka ték'amatiru isï ménteru, ka mák'ueni úspti. 6Ka inchatirut'u máteru exeantaaspti enkaksï ísku jámani jápka ka arhiaspti: ‘¿Antits'ïsï ísku chúskuta?’ 7Ka imaksï arhintaspti: ‘Jimpokats'ïni nónema ánchetaska.’ Ka ima arhiaspti: ‘Ni je chát'u ánchekorheni ka maiamuakaksïni na enka xáni sésku jauaka.’”
8“Chúrekua, ima tata enka ánchekorherichani káani jápka, arhispti imani enka ánchekorherichani urhekuani jápka: ‘Imechani urheta uantap'aa ka maiamua enkaksï inchatiru inchaakuka, ka xásïri imani maiamuauaka enkaksï tsípku ichaakuka.’ 9Ka antarherasptiksï ima enkaksï inchatiru ichaakupka ka mántani arhinksï ma jurhiatekueri maiamunhaspti. 10Ka niáranchasptiksï ima enkaksï tsípku uénapka ánchekorheni, eratseparinksï eskaksï sánteru kánhachani p'ipirinka, k'óruksï imat'u ma jurhiatekuerik'u maiamunhaspti. 11Enkaksï maiamunhapka, imani achetini enkaksï ánchekorhekuni jápka mámaru ampeksï uantatsespti, 12ka arhisptiksï: ‘Ima enkaksï iásï sáni janoka nóksï ióni ánchekorhesti, ka mák'ueniri maiamuaska eskats'ïni juchantsïni enkachi xáni tsántu chúskutaka ánchekorheni.’ 13Ka ima acheti ima ma ísïni mókukuspti: ‘Pámpiri, nómpemakini nósesi ampe úchexaka. ¿Anti nóchi pakatperaspki eskaksïni xántku maiamupirinka eska ma jurhiatekua na antanhak'a? 14P'i na enka xáni chétika ka janharia níntani. Ji maiamuauaka imani enkaksï iásï sáni janoka eskakini t'únkeni náxani maiamuka. 15¿Anti ji no sésekua jatsiski jucheti tuminani úrani, ampe enkani ji uékaaka úrani? ¿Órini epurhexaki enkani ji jarhop'eni jaka?’ 16Ísï jimpo, enkaksï iásï urhetika, xásïksï tátsepani péranhaati ka enkaksï tátsepani jaka, xásïksï urhetiuati, jimpokaksï uánekua ióarhinhaska ka namuntkuksïsï erakukateti.”
Jesusi ménteru uantanukukorhesti
(Mk 10.32-34; Lk 18.31-34)
17Enka Jesusi Jerusaleni karhamani jápka, xanhari jimpo jurhenkorheri jémpechani támu páaspti ka arhiaspti: 18“Iásïchi Jerusaleni karhamaxaka, Acheti Uáp'anksï k'éri tátechani ka juramukua jurhentpirichani intsïnharhitaati, ka imaksï uántikutarkorheati, 19ka uérakua anapuechanksï intsïnharhitaati ka imaksï teresmarhuati ka k'uikirheatiksï ka cháparhataatiksï; k'óru ima tanimu jurhiatekua jimpo tsíntaati.”
Auantarhu Táte juramusïnti
(Mk 10.35-45)
20Jesusini antarheraspti Sebedeo tempa uáp'echa jinkuni, ka t'inkuixurhikutini ma ampe kurhakuspti. 21Ka Jesusi arhispti: “¿Amperisï uék'i?”
Ka uarhiti arhintaspti: “Ekari t'u chéti irechekuarhu jauakia, juramu eskaksïni jucheti uátsïticha, ma jurhik'antani ka máteru uikixkantani uaxakachetini jauaka.” 22Ka Jesusi arhiantaaspti: “Nóts'ï míteska ampe enkats'ï kurhak'orheni jaka. ¿Anti itsïmats'ï imani enkani ji itsïmaaka? ¿Anti itsï atats'ïkunhats'ï imani jimpo enkani ji itsï atats'ïkunhaaka?” Imaksï arhintaspti: “Jo, jucha úaka.” 23Ka Jesusi arhiaspti: “Sési jimpo imani enkani ji itsïmaaka, chát'uts'ï itsïmaaka, ka imani jimpo enkani ji itsï atats'ïaka, chát'uts'ï itsï atats'ïkunhaaka, k'óru no jucheti jimpo jarhasti jucheti jurhik'antani o uikixkantanksïni uaxastani, jimpoka imaksï jima uaxastanhaaka enka jucheti Táte eratsekata jatsiaka.”
24Máteruksï témpeni jurhenkorhericha kurhach'aatini erachichanksï ikiakuaspti. 25Ka Jesusi uantap'aaspti ka arhiaaspti: “Mítetixakats'ï eskaksï juramuti no jakak'uticha uinhamarhetspesïnka juramuni, ka eskaksï k'érati achecha úinhamarhetspesïnka juramuni. 26Ka chánksïni jinkuni no ísïuati, ima enka k'éri ampenhchak'a, marhuacheksïni, 27ka ima enka urhetinhchak'a, jatsistiksïni marhuacheni; 28ísï eska Acheti Uáp'a na juka marhuatspeni, ka uánekuechani jimpo imeri tsípekua íntspeni ka no jurhasti eska marhuamenhaaka.”
Jesusi tsimani pátenharhichani ampakerantaasti
(Mk 10.46-52; Lk 18.35-43)
29Enkaksï Jeriko uéakuntapka, uánekuaksï chúxapaxapti. 30Ka tsimani pátenharhichaksï enkaksï xanharu uaxarupka, Jesusinksï kurharini enka jimesï nitamani jápka uantasptiksï: “¡Tata, Dabi Uáp'a, p'amok'uts'ïni!” 31Ka xukaasïremptiksï nónaksï pínasku jatsiani, k'óruksï ima sánteru uinhachaspti: “¡Tata, Dabi Uáp'a p'amok'uts'ïni!” 32Jesusi anhaxurhispti ka uantap'aaspti ka arhiaspti: “¿Ampets'ïsï uék'i eskaksïni úcheaka?” 33Imaksï uantaspti: “Tata, uékasïnkachi exeni.” 34Jesusi p'amok'uaspti, p'ánharhikuaspti ka imaksï úspti exeni ka chúxapasptiksï.
Terpilih Sekarang Ini:
Sáni Mateo 20: DKPJ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Biblia en P´urhépecha, Michoacán, México © Sociedad Bíblica de México, A.C.
