Sáni Mateo 19
19
X. AMPE ENKA XÁNI JESUSI ÚKA
(19.1—23.39)
Jesusi jurap'erakueri ampe arhip'esti
(Mk 10.1-12; Lk 16.18)
1Jesusi íni ampe uantarini, Galilea uéakuntaspti ka Judea, iurhekua Jordanirhu parhikutini isï niraspti. 2Uánekuaksï chúxapaspti ka jima ima p'amenchatichani ampakerantaaspti.
3Máruksï fariseuecha Jesusini antarheraspti ka ts'ék'unksï arhispti: “¿Sésekua jatsiski acheti témpani ísku ampe jimpo jurak'uni?” 4Ka Jesusi arhiantaaspti: “¿Anti nóts'ï arhintaski karakatarhu eska uénakuarhutki uératini Diósï achetini ka uarhitini kueraaska? 5‘Ísï jimposï, tataka jurak'uauati tátjempani ka amampani ka tempuchaati, ka tempa jinkunksï mák'uentaati.’ 6Nóteruksï táchanistia, mák'uentastiksïa, ísï jimpo, ampe enka Diósï kúntaka, ásï nema jarhankutpe.” 7Ka fariseuechaksï arhispti: “¿Ka antisï Moisesi juramutspe uarhitini karakata ma úkuni, enka arhiaka eska jurak'unhaxaka?” 8Ka Jesusi arhiaspti: “Jimpokats'ï cha mintsitani chuperatixaka, Moisesiksïni sésekua íntskusti uarhitini jurak'uni, k'óru urhetku no ísïspti. 9Jíksïni arhixaka eska ima enka témpani jurak'uaka ka máteruni tempuntani, ka jini témpa no ísku jántikuni jarhani, ima ísku jánti úkorhexati.”
10Ka jurhenkorherichaksï Jesusini arhispti: “Enka acheti ma tempani ísï jatsika kámani, sánteru sésisti no tempuchani.” 11Ka Jesusi arhiantaaspti: “Nóksï iámentuecha íni ampe kurhankusïnti, imechak'u enka Diósï kurhankukua íntsaaka. 12Jimpokaksï jarhaska máru enkaksï no úk'a tempuchani jimpokaksï ísï kóntenhaska, ka jarhastiksï máteru enkaksï xák'unhak'a, ka jarhastiksï máteru enkaksï auantarhu anapu irechekua jimpo xáxekorhek'a ka nóksï tempuchasïnti. Ne enka íni ampe úk'a kurhankuni, kurhankue.”
Jesusi sapichani úch'akuraasti
(Mk 10.13-16; Lk 18.15-17)
13Jesusinksï sapirhatichani máru pákuaspti, eska ima p'áts'ïkuapirinka ka kómarhip'ekuani. Ka Jesusiri jurhenkorherichaksï xukaasïrempti imani enkaksï sapichani páani jápka; 14ka Jesusi uantaspti: “Jurak'ua je eskats'ïni sapirhaticha antarheraaka, ásï p'ínkua je, jimpoka auantarhu anapu irechekua imecheriska enkaksï sapini járhaka.” 15Ka p'áts'ïkuaspti ka kéntikuspti.
Tumpi jatsikorheri Jesusi jinkuni uantaxesti
(Mk 10.17-31; Lk 18.18-30)
16Tumpi ma Jesusini antarheraspti ka arhispti: “Jurhentpiri, ¿Ampesïni sési ampe ua enkani jimpo úaka tsípekua méntkisï jatsini?” 17Ka Jesusi arhispti: “¿Antirinisï sési ampe kurhamarhek'i? Diósïk'usï sési ampeti. K'óru enkari uék'a tsípekuarhu inchani, janhanharhia arhistatsperakua juramukatechani.” 18Ka tumpi kurhamarhespti: “¿Nákichani?” Ka Jesusi arhintaspti: “Ásï uántikpe. Ásï ísku jánti. Ásï sïpak'urha. Ka ásï jáma chkuántiraparini máteruni nósesi úkuni. 19Janhanharhi táteni ka nánteni, ka xénhchpe ísï eskari t'u na xénhchakorhek'a.” 20Ka tumpi arhispti: “Ideni ampe úskia, ¿Ampeterusïni kuerantachak'i?” 21Ka Jesusi arhispti: “Enkari k'amak'amasï kaxumpenhchak'a, atarantsï ampe enkarini xáni jatsikorheka ka kómu jántichani íntsaa, ka auantarhu jauati chéti jatsikorhekua ka xásïrini chúxapaaka.” 22Tumpi ísï kurharini kánekua kómu níntaspti jimpoka kánekua jatsikorherispka.
23Tátsekua Jesusi jurhenkorheri jémpechani arhiaspti: “Sési jimpoksïni arhixaka eska auantarhu anapu irechekuarhu, jatsikorheri ma kánekua úkua jinkuni inchaaka. 24Ménteruksïni arhixaka eska kameiu ma p'ikukueri p'orhoch'akuarhu isï sánteru sóntku parhich'akuaaka, eska jatsikorheri ma Diósïri irechekuarhu inchani.”
25Jurhenkorheri jémpechaksï íni ampe kurharini ískuksï pakareraspti ka uantasïremptiksï: “¿Jiák'ani nék'usï p'ímutanhantaa?” 26Ka Jesusi erateaparini arhiaspti: “Parhakpeni anapuechanksï nómeni úati ísï úni, k'óru Diósïni jimpo iámentu ampe úsïnti úkorheni.”
27Ka Pédru arhispti: “Juchaksïni t'únkeni chúxaputini iámentu ampechi jurak'uska, ¿Ampechi p'iua?” 28Ka Jesusi arhiaspti: “Sési jimpoksïni arhixaka, jiák'ani enka iámentu ampe jimpanheranhantaaka, enka Acheti Uáp'a t'íntskua jinkuni uaxakatini jauaka, chánksïni enkats'ïni chúxapuka, témpeni tsimani k'éri uaxantskuarhuksïni péraaka, témpeni tsimani Israeli anapu iretechani arhinharhikuani. 29Ka ima enka erachichani o pirenchichani, tátjempani o amampani o témpani, sapichani, ka echeri ampe jínteni jimpo jurak'uaka, iúmu ukuatse sánteru intsïnhantaati, ka tsípekua méntkisï anapu antakorheati. 30Ka uánekua enkaksï iásï k'éri ampeni jaka, xásïksï ísku nementaati ka enkaksï iásï ísku nemeka, xásïksï k'éri ampeuati.”
Terpilih Sekarang Ini:
Sáni Mateo 19: DKPJ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Biblia en P´urhépecha, Michoacán, México © Sociedad Bíblica de México, A.C.
