Matayo 13

Ʉmanyisi nʉwa mʉntʉ nʉkʉmyaga mbeʉ

Maliko 4:1-9; Lʉka 8:4-8

1Lʉhikʉ lʉlo lʉʉlo, Yesʉ wɨkapʉma mʉ nyʉmba nanso, akalongola kikiɨ mʉ mpelompelo a lʉzɨ nʉla Galilaya. 2Antʉ ɨdʉ ɨkamʉpilimɨkɨɨlya Yesʉ, nʉyo wɨkanankɨla mibɨnɨ wɨkikiɨ wɨkingɨla mʉmazɨ. Itungo nɨlanso antʉ ɨhi ɨkimɨka mʉ mʉmpelo a lʉzɨ, 3Yesʉ nʉyo wɨkaatambʉila nkani yɨdʉ kʉ mpyani. “Wɨkaaɨla tegeelyi! Mʉntʉ ʉng'wɨ aɨwendile myaga mbeʉ mʉ mʉgʉnda. 4Naɨ ʉkʉmyaga, mbeʉ ying'wɨ yɨkagwɨla mʉnzɨla, nyʉnyi yɨkailya. 5Mbeʉ ying'wɨ yɨkagwɨla mʉ matalagwe mihalʉ ikeehʉ. Yɨkakaya kʉhelʉka ingɨ kʉnsoko aɨ yɨtuhɨɨwe ihalʉ ikeehʉ. 6Ng'ʉng'wɨ naɨ wakɨla yɨkapya yɨkanyala, kʉnsoko mɨli akwe shanga aɨ yihɨmbɨɨye iza. 7Mbeʉ ying'wɨ yɨkagwɨla mʉ mɨtɨ amija, ɨmɨtɨ ɨkakʉla nʉkaisopa. 8Mbeʉ ying'wɨ yɨkagwɨla mihalʉ la mʉmboto, yɨkahelʉka, yɨkakʉla mimea ɨkapa mapemba. Ipemba lɨng'wɨ nseke igana, ipemba lʉlya nseke makʉmi mʉtandatʉ ipemba lulya nseke makʉmi ataatʉ.

9Yesʉ wɨkamaɨlya kʉlʉnga, “Nʉkete kʉtwɨ nʉwakija, nʉwije!”

Nsoko akʉmanyisa kʉ mpyani

Maliko 4:10-12; Lʉka 8:9-10

10Sʉnga amanyisigwa akwe ɨkaza ikʉmʉkolya, “Nɨkɨ ʉkʉamanyisa antʉ awa kʉ mpyani?

11Yesʉ wɨkaasʉkɨɨlya, “Ʉnyenye mʉkembetilwe ni Itunda kʉlɨnga makani nakɨlɨ kʉɨkwa kɨhenga mʉ ʉtemi nʉa kigʉlʉ, ingɨ nɨanso shanga akembetilwe kʉlɨnga makani nanso. 12Kʉnsoko mʉntʉ nʉkete kɨntu ʉkongeligwa, nʉyʉ nʉmʉgila anga kɨntʉ, nɨkɨ nɨkɨniino nʉkete ʉkʉhegeligwa. 13Yɨyo nsoko kʉitambʉlya nɨenso kʉmpyani, kʉ nsoko awo ɨgoza shanga ɨona, ɨtegeelya shanga ija, ang'wɨ shanga ɨlɨnga. 14Kʉnsoko apikɨɨla ayo naɨ ʉtambʉe mʉmanga Isaya kɨna.

‘Antʉ awa akʉtegeelya nʉkʉtegeelya, ingɨ shanga akʉlɨnga.

Antʉ awa akʉgoza nʉkʉgoza, ingɨ shanga akʉona.

15Kʉnsoko antʉ awa agila ʉhumi nʉwakʉtegeelya kɨsa,

hangɨ ahitile kʉmɨona ɨtai.

Anga ɨze shanga ʉʉ, aza azeaone kʉmiho ao,

aza aziija kʉakʉtwɨ ao, aza azelɨnga kʉmahala ao,

aza azeenkela ʉnene ni Isekʉlʉ, aza zee akomya.’

16“Ingɨ mʉkembetilwe ʉnyenye, kʉnsoko imiho anyʉ akʉona nɨakʉtwɨ anyʉ akija. 17Kʉmʉila ɨtai, amanga nɨ antʉ ɨdʉ nɨakende aɨ asʉmbɨɨye kʉona aya nɨmʉkʉona, shanga ɨkaona, nʉkija aya nɨmʉkija, shanga ɨkija.

Yesʉ ʉkʉpumya ndogoelyo a mpyani amʉmyagi

Maliko 4:13-20; Lʉka 8:11-15

18Itigwa, ʉnyenye tegeelyi ndogoelyo a mpyani a mʉmyagi. 19Antʉ ɨhi nɨija ʉlʉkani nʉla ʉtemi wang'wi Itunda ahite kʉlʉlɨnga, impyanigwe nimbeʉ naɨ yigwɨɨe mʉnzila, Shetani wɨza kʉheja nikitemewe mʉnkolo yao. 20Mbeʉ izo naɨ yigwɨɨe mitalaagwe yimpyanigwe nɨ antʉ nɨɨtegeelya lʉkani lang'wi Itunda nʉkʉlʉsɨhgɨɨlya kʉʉlowa. 21Ingɨ ʉlʉkani lang'wi Itunda shanga lingɨe mʉnkolo yao, ɨhʉiila itʉngo iniino ʉdu, hangɨ anga lwago lʉmʉhange ang'wɨ ʉonelwɨ wigele kʉnsoko alʉkani lʉlo, ɨleka kʉhʉila. 22Mbeʉ izo naɨ yigwɨɨe mʉmɨtɨ amija, ingɨ yɨmpyanigwe nɨ amʉntʉ niija ʉlʉkani lang'wi Itunda, ingɨ ʉlʉkani lisopwa kʉnsoko lwago nʉla milimo amʉnʉ mihɨɨ nʉ kʉloeligwa nsao, nʉ mʉntʉ nʉwanso shanga ɨtʉmaa makani nʉmaloilwe Itunda. 23Mbeʉ ɨzo naɨ yigwɨɨe mihalʉ nɨla mboto yimpyanigwe nɨ antʉ nɨɨtegeelya lʉkani lang'wi Itunda nʉkʉlinga, witʉmaa aya namʉloeeye Itunda, wɨhanga mʉmea nʉwɨpa nkali igana lɨng'wɨ nʉ ʉya makʉmi mʉtandatʉ nʉ ʉya makʉmɨ ataatʉ.

Mpyani a pʉngʉ

24Yesʉ wɨkaapa ɨantʉ mpyani ngɨɨza kɨna, “Ʉtemi nʉa kigʉlʉ wɨmpyani nʉ mʉntʉ naɨ ʉmyagile mbeʉ nɨnza mʉmʉgʉnda wakwe. 25Ingɨ ʉtikʉ antʉ naɨ alala, mʉlʉgʉ wɨkɨza, wɨkamyaga mbeʉ a pʉngʉ mʉmʉgʉnda wʉwo wʉʉwo, akahega akalongola. 26Itɨ gwa, mbeʉ naɨyahelʉka mɨmea ɨkakʉla nʉ kʉpununta, apʉngʉ nawo ɨkandya kʉpununta, papo itʉmi ɨkalɨnga. 27Itʉmi ɨkamʉtyata mʉkola mʉgʉnda ɨkamʉɨla, ‘Isekʉlʉ itɨɨ shanga aɨ ʉmyagile mbeʉ nɨnza mʉmʉgʉnda wako. Itɨɨ, apʉngʉ apʉma pɨɨ?’ 28Nʉwanso wɨkaasʉkɨɨlya, ‘Mʉlʉgʉ yʉyo ʉtendile itɨ, itʉmi akwe ɨkamʉkolya, itɨɨ ʉloilwe kende kipange ne?’ 29Nʉyo wɨkasʉkɨɨlya, leki kipi ʉ pʉngʉ, anga mipe mʉkʉkenkeelya nɨ mɨmea nɨmɨza. 30Mʉleki ʉ pʉngʉ ikʉlanie nɨ mbeʉ nɨnza kʉpikɨɨla ɨ maogola. itʉngo nɨlanso kʉaɨla ɨaogoli. Mʉtungi hanza ʉ pʉngʉ matita akʉsonsa moto, ingɨ ngano mɨogoli mʉpʉle mʉɨkɨle misalanka lane.”’

Mpyani a mʉmea nʉitangwaa haladali

Maliko 4:30-32; Lʉka 13:18-19

31Yesʉ wɨkaaɨla ɨantʉ mpyani ngɨɨza, “Ʉtemi nʉa kigʉlʉ wimpyanigwe nɨ mbeʉ niino nitangwa haladali mʉntʉ ʉng'wɨ naɨ ʉmitemee mʉmʉgʉnda wakwe. 32Mbeʉ ahaladali ingɨ niino kʉkɨla mbeʉ yɨhi, anga ʉmɨtemele ikʉle mʉmea wakwe wɨtʉla ʉkʉlʉ kʉkɨla mɨmea ɨhi. Ingɨ ɨkʉla wɨkatula mʉtɨ ʉkʉlʉ ni nyʉnyi yitʉma iuyɨ mʉmatambi yakwe.”

Mpyani a amila

Lʉka 13:20-21

33Yesʉ akalongoleka kʉtambʉla mpyani ngɨɨza. “Ʉtemi nʉa Kigʉlʉ wimpyani itɨ, mʉsʉngʉ ʉng'wɨ naɨ ʉhoile amila wɨkagahɨɨlya mʉ utu nʉwa ngano madebe abɨɨlɨ ni ikinda, sʉnga utu wɨhi wɨkagasa nʉkʉhupa.”

Nsoko ang'wa Yesʉ kʉmanyisa kʉ mpyani

Maliko 4:33-34

34Yesʉ aɨʉamanyisilye antʉ aya ɨhi kʉ mpyani. Shanga aɨ wɨtambʉlaa nkani yɨhi shanga waze ʉapumɨɨye mpyani, 35ingɨ lɨhʉme kʉpikɨɨla ɨkani naɨ litambʉwe nʉmʉmanga.

“Nɨkitambʉlya nɨanso kʉmpyani,

kʉpihʉʉla naɨ apihilwe pʉma ʉʉmbwa nʉa ʉnkʉmbigʉlʉ.”

Yesʉ ʉkʉkumʉʉla mpyani a pʉngʉ

36Sʉnga Yesʉ wɨkaalaga antʉ, wɨkingɨla mʉnyʉmba. Amanyisigwa akwe ɨkamʉhanga, ɨkamʉkolya, “Kʉkumʉɨle impyani iyo nʉwa pʉngʉ mʉmʉgʉnda.”

37Yesʉ wɨkasʉkɨɨlya, wɨkalʉnga, “Mʉmyagi nʉa mbeʉ ninza nɨyanso niya ngano ingɨ Ng'wana nʉwa Mʉntʉ. 38Mʉgʉnda ingɨ ʉnkʉmbigʉlʉ. Mbeʉ izo ninza ingɨ antʉ awo nʉʉtemi nʉa kigʉlʉ ingɨ wao. Apʉngʉ ingɨ antʉ awa nɨamʉtyatile Mʉlʉgʉ. 39Mʉlʉgʉ ʉyʉ nʉ ʉtemee apʉngʉ ingɨ Shetani. Maogola ingɨ mpelo a ʉnkumbigʉlʉ, nɨ itʉmi ingɨ a Itʉmi akigʉlʉ niang'wi Itunda. 40Anga nɨyɨlɨ apʉngʉ nɨɨtungwa matita nʉ kʉsonswa moto, Itɨʉ izeetula kʉmpelo a ʉnkumbigʉlʉ, 41Ng'wana nʉwa Mʉntʉ ʉkʉalagɨɨlya a Itʉmi akigʉlʉ niang'wi Itunda ilingɨɨle antʉ ɨhi kʉpuma mʉ ʉhumi wakwe nɨɨsasha antʉ itʉme mɨlandʉ, nawa ɨhi nɨitʉma makani nɨmabɨ, 42nʉ kʉagʉmɨla mʉ moto ʉtaki nishanga wɨlima kalɨ na kalɨ, kʉng'wanso akʉlɨla nʉkʉkelya mino. 43Sʉnga, antʉ awa nɨakende azemɨlɨgɨnta anga lyoa mʉʉtemi wang'wa Tata wao. Kʉlʉlo mʉntʉ nʉkete kʉtwɨ nʉwakija, nʉije!

Mpyani akɨntʉ ka nsaɨlo nkʉlʉ nɨkipihile

44“Ʉtemi nʉa kigʉlʉ wɨmpyanigwe nɨ kɨntʉ ka nsaɨlo nkʉlʉ naɨ kɨpihilwe mʉmʉgʉnda. Mʉntʉ ʉng'wɨ wɨkakʉga, wɨkakɨpiha hangi. Sʉnga mʉ wiloi wakwe, wɨkalongola wɨkagʉlya maintʉ ɨhi naɨ ʉkete, wɨkagʉla mʉgʉnda nʉanso.

Mpyani a nsaɨlo nkʉlʉ nɨtangwa lulu

45“Hangi, ʉtemi nʉwakigʉlʉ wimpyanigwe nʉ mʉsʉlʉja ʉng'wɨ naɨ ʉkʉpenza lulu nɨnza. 46Naɨ walija lulu ing'wɨ nɨkete nsaɨlo nkʉlʉ, wɨkalongola wɨkagʉlya ɨhi naɨ ʉkete, wɨkamigʉla lulu nanso.

Mpyani anyabu akʉbuɨla nsamaki

47“Hangi, ʉtemi nʉa kigʉlʉ wɨmpyanigwe nɨ nyabu nɨgʉmɨwe mʉlʉzi, ɨkaambisa nsamaki niya mpyani yɨhi. 48Nyabu naɨizʉla, antʉ ɨkaluta kitʉmbɨ, ɨkikiɨ, ɨkaholanɨa nsamaki izi ninza ɨkaɨkɨla mʉnkapu yao, nsamaki nimbɨ ɨkagʉma. 49Itɨ ʉʉ izeetula matungo ampelo. Itʉmi akigʉlʉ nɨang'wi Itunda aziigela kʉkomatʉla antʉ nɨɨtenda aya namʉloeeye Itunda nawa nɨɨtenda aya nɨmabɨ, 50aze agʉmɨla mʉmoto nʉʉtaki nʉwa kalɨ na kalɨ awa nɨɨtenda nɨ mabɨ, mʉng'wanso azɨɨza lɨla nʉkʉkelya mino.”

Maintʉ nɨmapya naya nakalɨ

51Yesʉ wɨkaakolya hangɨ amanyisigwa akwe, itɨɨ, malɨngane makani aya ɨhi?” Ɨkamʉsʉkɨɨlya,

“Ee kalɨnga.”

52Yesʉ wɨkaatambʉila, “Itɨ gwa, mʉmanyisi wɨhi nʉa malago ang'wa Musa nʉwɨkaɨlɨka kʉtula mʉmanyisigwa nʉwa ʉtemi nʉwa kigʉlʉ wɨmpyani nʉ mʉkola nyʉmba nʉwɨpʉmya mʉ maintʉ a nsaɨlo nkʉlʉ intʉ niipya nizi niya kalɨ.”

Yesʉ ʉkʉhitwa kʉ Nazaleti

Maliko 6:1-6; Lʉka 4:16-30

53Yesʉ naɨ wakondya kʉatambʉila mpyani niyanso wɨkahega pang'wanso, 54naɨ wapɨka mʉkɨsalɨ kakwe. Kʉng'wanso wɨkatula amanyisa antʉ mʉ nyʉmba akʉtankanɨla Ayahudi ɨkakʉɨlwa, ɨkalʉnga, “Mʉntʉ ʉyʉ waligɨlya pɨɨ mahala aya nɨ mɨʉkʉɨlwa ɨyɨ? 55Mʉntʉ ʉyʉ shanga ng'wana wa mʉsesa mbaone? Nʉ nyinya shanga ʉ Malɨa! Nɨa aluna akwe ga shanga ɨa Yakobo nʉ Yosepu nʉ Simoni nʉ Yʉda? 56Nɨ alʉna akwe nɨa kɨsʉngʉ, shanga wawa ɨhi nɨkɨkalanɨa palʉng'wɨ nʉsese? Itɨɨ, waligɨlya pɨɨ aya itɨ ɨhi?” 57Kʉlʉlo ɨkamʉhita,

Ingɨ Yesʉ wɨkaaɨla, “Mʉmanga wɨkʉligwa nkɨka yɨhi, ingɨ shanga wɨkʉligwa mʉkɨsalɨ kakwe nʉ mʉalʉna akwe!” 58Kʉlʉlo, shanga aɨ witʉmile mampɨlʉ nɨdʉ mʉkɨsalɨ kakwe kʉnsoko aɨ agila anga ʉhʉɨɨli.

Ketahui Lebih Lanjut tentang Isanzu

Matayo 13

Ayat Alkitab yang Popular daripada Matayo 13

Ayat Alkitab yang Popular daripada
Matayo 13