तितस 3
3
ख्रिस्तियान चालचलन
1सरकार र सरकारि हाकिमिलमको अधिनहाङ मुसा परना, ओउमयइ तोओ नेमलम पालन जाह्ङ्सा परना, र सधय पे-पेओ कामलम जाह्ङ्साको लागि तयार स्याउसा परना त दाह्यो कुरा नाङइ बिस्वासिलमकाय सम्झाउति बयु। 2ओउमयइ सुकायमा पेमालो दुस्त कुरालम तोजेलाम, र सुकुसिमा कायकायो काम जाह्ङ्जेलाम। बरु नम्र स्याउति जुदाकुसिले मिलति मुजेपनय। 3धइतिदाह्य्सा ख्रिस्तहाङ बिस्वास जाह्ङ्सासय ङ्हा निमा मुर्ख, आग्याकारि नाःमालो, र सय्तानको धोकाहाङ परओ मान्ता खेतहितो। अनि निपाय जुदा खालको दुस्त इच्छ्यालम र लयको मनकाय आसताको जुदा थोकलमको बन्धनहाङमा परओ खेतहितो। निको रुवाङखे दुस्त र चोःरो थोकलमइ ब्लिङो खेतो, अनि अरु मान्तालमइ निकाय हेला जाह्ङ्तहितो र निइमा ओउमयकाय हेला जाह्ङ्तह्य्नितो। 4तर निको मुक्तिदाता परमेस्वरइखे लयको योःन्मय र रापमय निकाय छ्यान्ति बइसास्यावा। 5परमेस्वरइ निकाय निइ जाह्ङो पेओ कामलमको कारनइ खेल, तर लयको योःन्मयको कारनइ दल्ताक्सास्यावो खेना। परमेस्वरइ निको पापलमकाय हुर्ति वाइसास्यावा, र पबित्र ग्वालाम दुवारा निकाय नया रुवाङ बइसास्यावा। 6परमेस्वरइ निको मुक्तिदाता येसु ख्रिस्त दुवारा निकाय प्रसस्त मात्राहाङ पबित्र ग्वालाम बइसास्यावा। 7परमेस्वरइ निकाय लयको अनुग्रहको कारनइ धर्मि त दाह्य्ति घोसना जाह्ङ्सास्यावा र अजम्बरि रुवाङको हकदार स्यावो आसा बइसास्यावा। 8ङाइ तोओ इ कुरालमखे बिस्वास जाह्ङ्सा ज्योओ सत्य कुराले खेना।
बिसेस जाह्ङ्ति नाङइखे ङाइ तोओ इ कुरालम मान्तालमइ पेतोकुसि चिःतोसम्म स्यानो ङा चाहनाङ। ओउतस्याउतोक बेलाहाङ परमेस्वरहाङ बिस्वास जाह्ङो मान्तालम पेओ कामलम जाह्ङ्साको लागि होसियार स्याउलेनय। ओउ कुरालमखे जुदा मान्तालमको लागि पेतो र फाइदाको लागि स्याउलेना। 9तर नाङखे बेर्थको कुराहाङ बाद-बिबाद जाह्ङो, पुर्खालमको गलमा द्युम्मालो बङ्सलमको बारेहाङ नोःओ, र परमेस्वरइ मोसा दुवारा बइसास्यावो नेम-कानुनको बारेहाङ बिबाद जाह्ङ्ति कायकायो मान्तालमकसय दल्ति मुअ, धइतिदाह्य्सा ओउतताह्ङो कुरालमखे दोह काममा लागमालो बेर्थको खेना। 10निङको माझहाङ वेङ्काइतो जाह्ङो मान्तालमकायखे यात-निस पल्तकाय दर्कति तोनु, ओउच्युक हाइतिमा माःनेनिलि त खेयाखे ओउमयको दोह वास्तामा जाह्ङ्लाम। 11धइतिदाह्य्सा ओउतताह्ङो मान्तालमखे सत्यकाय फेति भ्रस्त स्याउतिखायो स्याउनय, र ओउमयको पापलमइले ओउमयकाय दोसि जाह्ङ्नाथास।
पावलको अन्तिम सल्लाह
12ङाइ अर्तिमास र तुखिकस मध्येको यातचाककाय नाङकहाङ ल्होक्सा योजना जाह्ङो मुनाङ। ओउनिस मध्येको कुनय यातचाक नाङकहाङ दाहापछि, नाङखे ङाकाय क्रुस्लाङ निकोपोलिस सहरहाङ वाङ्साकाय कोसिस जाह्ङु। धइतिदाह्य्सा झ्युङकाले समयहाङखे ओहाङले मुसा ङाइ निर्नय जाह्ङो मुनाङ।#खबर २०:४; एफि ६:२१-२२; कल ४:७-८; २तिमो ४:१२ 13जेनास त मय्ङ्ओ वकिल र अपोल्लोसकाय ओउनिसको यात्राहाङ नाङइ लय खाइच्युकसम्मले सहयोग जाह्ङु, र ओउनिसकाय चाहओ थोकलममा जुर्याउति बयु।#खबर १८:२४; १कोर १६:१२ 14निको बिस्वासि होयालमखे पेओ कामलम जाह्ङ्सा स्यानपाइसि। ओउमयइ खान्चोहाङ परओलमकाय सहयोग जाह्ङ्सा खाइपानानि। ओउतहाइति बिस्वासिलमइ बेर्थको रुवाङ याक्सा परजेलाम।
15इहाङ ङाकुस मुओ जुदा बिस्वासिलमको तर्फसय नाङकाय अभिबादन मुना। अनि नाङइखे निकाय रापो ओहाङको जुदा बिस्वासिलमकायमा निको तर्फसय अभिबादन तोति बयु।
परमेस्वरको अनुग्रह निङ जुदाकुसिले स्याउपाना। आमेन।
© 2024 (Active), Mother Tongue Translators Society and Wycliffe Bible Translators, Inc. All rights reserved.