तितस 2
2
परमेस्वरको सत्य स्यानराय
1तर तितस, नाङइखे बिस्वासिलमकाय परमेस्वरको सत्य स्यानराय मात्र स्यानु। 2पाको बुधा गोय्चोलमखे मान-सम्मान दोःसा ज्योओ, र लयको मन र रुवाङको अनुसासनहाङ मुसाखायो स्याउसा परना त दाह्यो कुरा ओउमयकाय स्यानु। अनि ओउमयकुस पेओ बिस्वास, रापमय र धइरेतामा स्याउसा परना।
3ओउतले पाको बुधि मोम्चोलमखे परमेस्वरकाय मान-सम्मान स्याउतो पेओ कामलम जाह्ङ्ति याक्सा परना त दाह्य्ति ओउमयकाय स्यानु। ओउमयइखे अरु मान्तालमकाय जवओ, र नाःतो ङोतिः तुङो काम जाह्ङ्सास्याउल। बरु अरु मान्तालमकाय पे-पेओ कुरालम स्यानो काम जाह्ङ्सा परना। 4ओउ पाको बुधि मोम्चोलमइखे “ल-लयको पाचालम र चोः चोःद्याङलमकाय राप्सा परना” त दाह्य्ति जवान मोम्चोलमकाय तालिम बइसा परना।
5जवान मोम्चोलमखे बेबहारिक र योःन्मय स्याउसा परना, अनि लयको पाचाकाय मान-सम्मान जाह्ङो पेओ माचा स्याउसा परना। यदि ओउमय ओउतहाइति पेतोकुसि याक्नय त खेयाखे, सु मान्तालमइमा परमेस्वरको आखरको बिरोतहाङ पेमातो नोःसा खाइलेनिलि।
6ओउतले जवान गोय्चोलमकायमा बुद्दिमानि स्याउति याक्साको लागि हउसला बयु। 7नाङइ जाह्ङो जुदा कुराहाङ पे-पेओ काम जाह्ङ्ति ओउमयको लागि यातज्यो उधारन स्याव। नाङइ बिस्वासिलमकाय स्यानतोक बेलाहाङ इमान्दार अनि गम्भिर स्याउति स्यानु। 8सत्य कुरालम मात्र स्यानु, ओउत हाइतोकहाङ सुइमा नाङको स्यानरायको बिरोत जाह्ङ्सा खाइनिलि। निको बिरोत जाह्ङ्साकाय दोह तुसमा स्याउमायापछि ओउ बइरिलम लयमयले रास्सितो स्याउलेनय।
9नोकरलमइखे लयको मालिकको जुदा आग्यालम पालन जाह्ङ्सा, अनि ओउमय झाक्तो कामलम जाह्ङ्साले परना। नोकरलमइ लयको मालिकलमकुस बाद्याउति मुजेलाम, 10अथबा लयको मालिकलमको दोह थोकलममा कुःजेलाम। ओउमयखे माहा जोक्तो इमान्दार र बिस्वासिलो स्याउसा परलेनय। ओउतखेयाकाय मात्र जुदा मान्तालमइ निको मुक्तिदाता परमेस्वरको बारेहाङ स्यानो कुरालमकाय ताह्ङ्तो मान-सम्मान जाह्ङ्लेनानि।
11धइतिदाह्य्सा जुदा मान्तालमइ मुक्ति दोःपनय त दाह्य्ति परमेस्वरइ लयको अनुग्रह छ्यान्ति बइसास्यावो मुना। 12ओउ अनुग्रहइ निकाय परमेस्वरको बिरोतहाङ दोह काममा जाह्ङ्सास्याउल र सङ्सारिक इच्छ्या अनुसारको रुवाङ याक्सामा स्याउल, बरु इ सङ्सारहाङ मुच्युकसम्म लयको मनकाय अनुसासनहाङ गम्ति परमेस्वर झाक्तोको धर्मि रुवाङ याक्सा परना त दाह्य्ति अर्थि बइनातहि। 13येसु ख्रिस्त लयको महान् महिमाकुस इ ल्हाउदयबाङहाङ द्याह्न्ति वाङ्साखेओ निको महान् आसाकाय ल्युह्ङ्ति मुतोकहाङ निखे ओउतहाइतिले याक्सा परनातहि। अनि ओउ येसु ख्रिस्तले निको महान् परमेस्वर र मुक्तिदाता खेसास्याउना। 14निकाय जुदा खालको पापलमसय छुत्कारा बइसा, र निको ल्हुङतुककाय सुद्ध जाह्ङ्साको लागि येसुइ बलिदानको रुपहाङ लयको रुवाङले बइसास्यावा। येसुइखे निकाय लयको मान्ता स्यावो र पे-पेओ कामलम जाह्ङ्सा मात्र झाको चाहसास्यावोझ्यान्ते ओउत जाह्ङ्सास्यावो खेना।#प्रस १९:५; बेब ४:२०; ७:६; १४:२; भजन १३०:८; १पत्र २:९
15तितस, नाङइखे बिस्वासिलमकाय इ कुरालम स्यान्सा, र इ कुरालम जाह्ङ्ताक्साको लागि ओउमयकाय सहयोग जाह्ङ्सा परतेना। नाङइ ओउमयकाय जुदा अधिकारकुसिले हउसला बयु र जान्ति तोउ, र सुइमा नाङइ तोओ कुराकाय इन्कार जाह्ङ्तो स्याउजेलाम।
© 2024 (Active), Mother Tongue Translators Society and Wycliffe Bible Translators, Inc. All rights reserved.