Jakobusi 2
2
Mwa tetera ndhango payikara yawanu
1Mwayendhange, amwe mwatawi mwaHekudyetu Jesus Kristusi, Fumu ghothishe. Mbadi mwa kona kutetera ndhango hanu popayikara yawo. 2Tu ninge eshi ngeshi oku muna kongana pofotji, ko kumwingenena munu ghokushupata tudeya tomangondo kuminwe dhendi no yivata yokutwedhima, munyima ha mwingenena karo munu ghomuhepwe thikuma mumakukongawedhero ghenu, oyu ghana vata yidjova. 3Popo amwe muna kununeka mukayivata mwene no kumwitha eshi: “Wiye no hungumane padyango mwene.” Ene kwamuhepwe, muna kumutongwera eshi: “Yende, kemane paya” ngambi eshi: “Wiye no hungumane kumapadhi ghange.” 4Mbadi mwa kutjakire mwathinda muyighayadhara yenu no kutetera ndhango hanu mumakwirwero ndi?
5Mu tegherere mwayendhange homwahakwa! Nane Nyambi ne mbadi gha torora awa ha kara ghuhepwe mukaye kano eshi, ha kare hatungi mumatawero no kuyora ghutungi oghu gha turekera awa ha mu haka ndi? 6Ene mwe, muna shwahura muhepwe yira thinu vene. Awo ne kadi hatungi awa hana kumukungura no kumukokakokera kughutho ghondhango ndi? 7Awo ne kadi wo hana kushwahura Dina dyoYu mwa kundamena ndi? 8Ene ngeshi ha mu kumitha mo shemwa muragho ghoghutungi waNyambi, thika di yapwa kwimana muYitjanga eshi: “Wa kona kuhaka muyendhoye di wa kuhaka ghothinda,” opo ne ngo ghuhunga muna kutendanga. 9Keho ngeshi ha mu tetera ndhango hanu pathinaghunu wawo, muna tendi diharwero, no muragho nagho ghuna kumutetera ndhango eshi, mwayiharuri mwe. 10No ngeshi ghumweya ha kumitha mo muragho ene aye kokuregha karo muragho ghofotji, oyo ne ghana reghi miragho dhodhiheya. 11Yoyishi Nyambi gha ninga eshi: “Wa tjora ghurugho,” no gha ningire karo eshi: “Ngeshi mbadi ghuna kutjora ghurugho, owe ne kupagha ghuna kupagha.” Owe ne ghomureghi ghomiragho dhodhiheya. 12Ghambe no tende ndani yira munu yu mbo ha tetera pathinamuragho ghohoro. 13Ndhango, mbadi mbo dhi fera n̂eke kwamunu yu gha dhirire ku neghedha thin̂eke thendi. Ene, thin̂eke tha witha ndhango.
Mu tawe no mu tende
14Nye sho yighamwene, mwayendhange, ngeshi ghumweya ha ghayara eshi aye ne gha tawa. Ene yitenda yendi, mbadi yina kukumenena mo? Matawero ghokemo ne, kukona kughamwena munu ndi? 15Tu ninge shi, ngeshi ha kara mina ngambi n̂amba ghowira, no kufa ndhara mutenya no ghuthiku. Ene mwe mbadi muna kuwapa yokuwaparitha. 16Kokuwatongwera ghumweya eshi: “Yikare thiwana nenu, mu yende mukakuyenyithe no mukakurikanyithe kudya.” Oku mwe nokamanana temba kokuwaparitha. Nye yina kughamwena yi? 17Kemo dyo ya kara karo mumatawero eshi: “Ngeshi mbadi ghana kurughana, ghafa.” 18Ene ghumweya ngwa gha kona kughamba eshi: “Yofotji gha kara nomatawero no ghumweya gha kara noyitenda.” Yiwa, ni neghedhe ne matawero ghoye ghokupira yitenda? Name karo mbo na kuneghedha matawero ghange ghokushwagha muyitenda. 19Wa tawa eshi, poghadi Nyambi yofotji ndi? Eyi ne ghuhunga. Hashadipinyi nawo karo ha yitawa no ha tutukwa. 20Owe muthuta, ghuna haka kuneghedha matawero ghokupira yitenda eshi gha pira mudyo ndi? 21Kerekandongo wetu Abrahamu, gha tupurire mwanendi Isaka pathinyaku. Eyi ne kadi yoyitenda yi gha mu thothwenenine Nyambi eshi, yihunga ndi? 22Po sho yi momene eshi, matawero ghendi pofotji noyitenda gha yendire. No gha yarire pakutanga payitenda. 23Kemo ya yara Yitjanga eyi ya ninga eshi: “Abrahamu ne gha tawa mwaNyambi, naNyambi gha yi mu hungekera.” Naye ha mu toyire eshi muhakwa waNyambi. 24Yodigho, amwe kumona muna kumona eshi, munu ha mu thothwenena popayitenda yendi. Kadi pamatawero ghendi vene. 25Oyu Ragabu ghomukarungu ne, mbadi ha mu hungamithire koyi gha tendire, pakwombitha hakamushongwe nondhira dhimweya ndi? 26Yirama yokudhira kutotha ne, yafa. Kemo dyo ghafa nagho karo matawero ghokupira yitenda.
Terpilih Sekarang Ini:
Jakobusi 2: MHW1986
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Mbunga dhoBayibili dhaNamibia (Bible Society of Namibia) 1986