Jakobusi 1
1
1Edhi no ne dhaJakobusi, ghomukareri waNyambi naFumu Jesus Kristusi.
Kumako dikumi nomawadi, agha gha tapathana mukaye.
Dirumeritho kukwawo.
Matawero no ghunyanyami
2Mwayendhange, mwa kona kushamberera thikuma, ngeshi ha gha mwiyera mayerekero ghomengi. 3Yoyi mwa dimuka eshi ngeshi ha yereka matawero ghenu, ghana kureta madhidhimekero. 4No madhidhimekero gha ne, gha kona kukuma mo ndani. Eshi mu kone kukura mumupepo ghokuyara, no kupira yinyanda yimweya. 5Ngeshi poghadi yofotji ghopapenu oyu gha pira maghano, hasha gha kona kukumbera kwaNyambi. No Aye mbo ghana mupa, yoyishi Nyambi gha tapa kwawahe yoyihe. Aye mbadi gha yi tapanga nomutjimakoka no kunyohekera temba. 6Ene aye gha kona kuraperera yira mutawi, no kadi wa kutamangera. Yoyishi oyu ghokutamangera, gha kara yira dingumbi dyomudikuruviya, edi ghuna kukupinganitha mupepo no dina kukupingana tunda‐huka yenda‐huka. 7Munu ghokemo, mbadi gha kona kughayara eshi mbo ghana wana ndjambi kwaFumu, yoyishi gha kara nomatamanyi muyitenda yendi yoyihe. 8Karo gha kara nomitjima dhiwadi ho gha pemuka muyikara yendi.
Ghuhepwe no ghutungi ghomumbunga
9Mutawi ghomuhepwe, gha kona kushamberera. Yoyishi gha mu kutekera Nyambi. 10No ghumweya ghomutungi, aye ne yomuhepwe kughutho waNyambi. Yoyishi mutungi ne mbo ghana yowa yira mutemo ghomumuthitu. 11Ngeshi ha divu diyuwa noghughenyu wadyo, dina kwan̂itha yitondo no mitemo dhina kuwa, ghuwa wadho nagho ghuna kudhongonoka. Na mutungi naye kemo mbo gha yowa noyinu yendi yoyihe.
Mayerekero no mayedhawero
12Mukafiyaghudhi, munu yu ghana kudhidhimeka mumayerekero. Ngeshi ghana piti mumayerekero mbo ghana wana thikoroni thokawithitha moyo ghu gha tureka, Fumu, kwawa ha mu haka.
13Munu yu ghokukara mumayerekero, pererependi gha kone kuninga eshi: “Ame ne Nyambi ghana ni yereka.” Yoyishi Nyambi ne mbadi wa kukona kumwangera. Naye karo thinda mbadi wa kwangera munu. 14Ene munu ya kona kumwangera yirumbera yendi, eyi yina kumuyedhaghura no kumuthundawedha. 15Munyima, ngeshi ha yi kuru yirumbera, yina kureta diharwero. No ngeshi ha dikuru diharwero, adyo ne dina kureta yifa.
16Mwa kupemukitha mwathinda, mwayendhange homwahakwa. 17Kehe thitapa thothiwa no kehe thitapa mwene thonyara‐nyara, kuwiru tha tunda. Atho ne tha tunda kwaWihetu oyu gha varekire mashani ghodiwuri. Ene Aye, shivutaghuka no kadi wa kuvindighera yira mashani. 18Yoyishi pamahimeno ghendi, Nyambi gha tu tendire pan̂ando dhendi dhoghushwemwa. Eshi tu kone kukara twamutango ghoyivareka yendi yoyihe.
Kuyuva no kutenda
19Mwayendhange homwahakwa, eyi ne mwa kona kuyipaka mumaghano eshi: Kehe munu gha kone kuhima wangu kutegherera. Mbadi gha kona kughamba wangu no kupata wangu. 20Munu yu ghana kupata, mbadi ghana kutenda eyi ya hungama kughutho waNyambi. 21Yodigho mwa kona kuthigha didhiro dyodihe, no ghuyi ghoghuhe oghu ghuna kukura thikuma mumwenu. Ho mukutape ghutambura n̂ando edhi gha kuna Nyambi mumwenu. Yoyishi, n̂ando dhi ne dha kona kumuparitha.
22Amwe ne mwa kona kutenda eyi dhina kuninga n̂ando. No mbadi wa kudhitegherera vene. Kuninga eshi, maghana sho mu kwangere mwathinda. 23Oyu ghokutegherera vene roruhe n̂ando no mbadi wa kutenda, eyi dhina kuninga n̂ando, gha pitura yira yu ghana kumona rupara rwendi muthikumoneno. 24Aye ghana kukurera mo thinda. Ene pakutunda muthikumoneno, ghana kuvurama wangu nungu dhendi. 25Keho, munu yu ghana kudhegheterera mumuragho oghu ghuna kupaka munu mumukeya, no mbadi ghana kughumwagha no kuvurama temba eyi ghana kuyuva mo, ene ghana kuyikumitha mo. Aye mbo ghana wana fiyaghudhi moyi ghana kutenda.
26Ngeshi ghumweya ha ghayara eshi, mukakukarera yaNyambi no mbadi ghana kukwata, rudimi rwendi, thinda ghana kukwangera. No yikarera yendi ne yangara‐nyara. 27Ghukareri no ghukushuki, kughutho waNyambi ghoWihetu ne kughamwena hathighana, nawadidhi mumaghukukutu ghoyipara yawo, no kukukongora kumaghuyi ghokaye.
Terpilih Sekarang Ini:
Jakobusi 1: MHW1986
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Mbunga dhoBayibili dhaNamibia (Bible Society of Namibia) 1986