2 Timoteghusi 2
2
Mukayita ghomuhunga waKristusi
1Ene we, mwanange, tanarere pan̂eke dhi twa wana mwaKristus Jesusi. 2Eyi wa yuvitha we kughutho wawatunonga hohengi, wa kona kuyitapa kwawakamakurupero, awa mba kona kuyikumitha mo, mu kukona kuyihonga karo hamweya.
3Dhidhimeke mumaghukukutu, yira mukayita ghoshemwa waKristus Jesusi. 4Mukayita muthirughana thendi, gha haka kushambereritha mukamiti wendi. Aye mbadi gha tokomena yinu yoyipara yonyaranyara. 5Mukakudhondoka yu gha kara mukukutangawera, gha kona kuwitha ngeshi ha kuthu marongekero. 6Ndjimi ghokurughana thikuma, yo gha kona kuwana pakutanga yiyangura. 7Ghayare koyi na kughamba eshi, Fumu mbo ghana kupa maghano ghokutjwathana yoyihe.
8Vuruke roruhe eshi, Jesus Kristusi ghomwanahoka waDavita ne, ha mu tumunine mwawafu. Edhi ne dhombudhi dhokumuyuvitha. 9Pambudhi dhino po na kunyandera me, murupetho nomumighodhi, yira nothiharuri. Ene n̂ando dhaNyambi mbadi dha kukona kughanga. 10Yodigho na kudhidhimekera me muyoyihe, pamurandu wawa hapwa kutorora eshi nawo mba wane karo makomweneno ghomwaKristus Jesusi nomoyo ghororuheya nothishe. 11Edhi no ne dhon̂ando dhomakurupero:
Ngeshi ngo pofotji twa fire nendi,
mbo tuna para pofotji nendi karo,
12ngeshi ngo twa tanara mumatawero,
mbo tuna raghura pofotji nendi,
ngeshi ha tu mu hamura,
Naye mbo ghana hamura karo,
13ngeshi ha tu dhiri kumukurupera
Aye ne gha kara makurupero:
Aye thinda mbadi gha kona kukuhamura.
Katapa ghomatawedhero
14Kon̂otwedhe hatawi pakawavurukitha yinu yino no kuwashinga thikuma kughutho waNyambi eshi, ha thighe kukukanana muman̂ando. Eyi ne mbadiko yi yaghamwena. Ene ghuyi yareta kwawakakukuyuva. 15Dhundeke ghu kare murughani yu gha paka po Nyambi, noyu gha tawedha Nyambi eshi, mbadi gha kona kufa honyi muthirughana thendi, pakuyuvitha n̂ando dhoghushemwa. 16Ene man̂ando ghomayi no ghokupira mudyo, gha ndhanye. Yoyishi, oyu ghana kughatapathanitha, mbo ghana wera mwawanyambi hombango. 17No man̂ando ghawo mbo ghana wa di yira thikorwa thokangiri. Mukatji kawo, mo hadi haHimeneghusi naFiletusi. 18Awa, ha yongara mughushemwa pakuninga eshi, muvumbukero ne kare wa kara po. Payinu yi, po ha withera matawero ghawamweya. 19Karo kashemandhugho ka gha pakire po Nyambi, katanara noman̂ando gha ha ngangera po:
“Fumu gha dimuka yu gha kara wendi,”
“No yomuhe ghokuninga eshi ye ne gha kara waFumu,
gha kone ndani kutunda kughuyi.”
20Mudiyugho dishokuru, mbadi mwa kara yomangondo noyikuvo keho. Ene mwa kara karo yoyitondo no yoghuma. Yimweya ne ya kurughanitha mumayuwa ghofuma, yimweya ne ya kehe pano. 21Ngeshi ghumweya ha kushuka kughuyi, mbo ghana kara munu ghothirughanitho thofuma. No mbo ghana mu pongora hekudyendi thinda, no kukara thirughanitho thomudyo, no kumuroghethera kehe thirughana thothiwa. 22Ndhanye yirumbera eyi yina kutwara hamuregheya mughuyi. Ho tambe kughuhunga, kumatawero, kuruhakitho nothiraro, pofotji nawahe awa hana kwitha Fumu nomitjima dhodhikushuki. 23Mbadi wa kona kukuvunga mun̂anani dhawathuta no dhombango. Yoyishi, wa yidimuka shemwa eshi, mo ya tunda yita. 24Mupika Fumu ne mbadi gha kona kutenda yita. Karo eshi, gha kone kukara nothihemo kwawahe. Aye gha dimuke kuhonga, no gha dhidhimeke koyoyimango. 25No ghukuhema wendi, gha kone kuhungeka hakan̂ore dhendi. Eyi ne ya kona kukara eshi, Nyambi yo mukakuwathighura, ha dimuke ghushemwa. 26Munyima po mbo ha kuma karo kumaghano mwene no kushutuka kukayeye kashadipinyi, aka kawakwata pakutawa kumahimeno ghendi.
Terpilih Sekarang Ini:
2 Timoteghusi 2: MHW1986
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Mbunga dhoBayibili dhaNamibia (Bible Society of Namibia) 1986