2 Timoteghusi 1
1
Mbapira dhoghuwadi dhokwaTimoteghusi
1Edhi dhina kutunda kwaPaghulusi ghomupostoli waKristus Jesusi oyu ghapwa kutuma eshi, na gha yuvithe matoyedhero ghomumoyo waKristus Jesusi.
2KwaTimoteghusi ghomuhakwa wange.
N̂eke, nothin̂eke nothiraro thaNyambi Wihetu no thaHekudyetu Kristus Jesusi!
Makurupero ghokumbudhi dhodhiwa
3Ame na kutumera Nyambi. Oyu na kukarera me yira hakerekandongo wange noyihima mwene, apa na kuvurukanga we roruhe mutenya noghuthiku mumandapero ghange. 4Ame na kuvuruka maruhodhi ghoye ghondhagho, ho na haka thikuma eshi twa kukumone karo. Name mbo na shamberera thikuma. 5Ame kuvuruka na kuvuruka karo kumatawero ghoye ghogushemwa. Matawero gha, gha karire nagho nyakudyoye Loyisi no mwanyoko Eghunise. Name kunongonona na kuyinongonona eshi nowe nagho ghudi.
6Yo na kukuvurukitha pathinu thi thitapa thon̂eke thaNyambi, ethi gha kupire apa na kukambekire moko eshi yikare yira mudiro ghu ghuna kwekeshera. 7Ene Mupepo ghu gha tupa Nyambi, mbadi ghuna kutuyapitha. Ne wa tu yaritha nongcamu noruhakitho nomakurawero ghetu twathinda.
8Mbadi wa kona kufa honyi, mukunongonona Hekudyetu: No karo wafa honyi kukwange me na kara mun̂otwa muDina dyendi. Karo kondjere mbudhi dhodhiwa nongcamu edhi gha kupa Nyambi. 9Aye yo gha tu ghamwena no gha twitha eshi, tu kare pofotji Nendi. Eyi ne mbadi gha yitendire popayitenda yetu. Ene kumahimeno ghendi thinda, no n̂eke dhororuheya edhi gha tu pire mwaKristus Jesusi. 10N̂eke dhino ne dha tu hokokera pamwiyero waMushuturi wetu Kristus Jesusi. Aye ne gha withire ngcamu dhokufa. No pambudhi dhodhiwa, po gha hokorire moyo ghokudhira kufa. 11Pambudhi dhino, po gha ni pakera me muyaghuri nomupostoli no muhongi.
12Payinu yi po na kunyandera name. Ene mbadi yina kuniyapitha. Yoyishi na dimuka yu na kurupera. Name na nongonona eshi, Aye ne gha kara nongcamu, edhi gha nipa me. Edhi mbo dhi kara po kate mudiyuwa dyomwiyero wendi.
13Kwate man̂ando gha wa yuva kukwange. Gha kare thitamenenitho thomayuvithero ghomawa. No gha kuthe mumatawero nomuruhakitho eyi twa kara nayo mwaKristus Jesusi. 14Eyi ha kutoyedhera ne ya kuroghera. Yikunge paMupepo ghoKupongoka yu gha tunga mumwetu.
15Thika di wa yidimuka we eshi, muthiko thaAsiya ne, pithange ha ni thighire mumaghukukutu. Mukatji kawo wa ha ni thighire, mwa karire Figelusi naHermogenesi.
16Thin̂eke thaFumu thi kare nawakadidhiko dyaOnesiforusi. Yoyishi, rwingi gha ni rekurire. Karo mbadi gha fire honyi ngambi oku me mumighodhi. 17Ene apa gha kumine muRoma, gha ni tokomenine thikuma ku ni shana kate ku ni wana. 18Fumu, ngo mbo gha mupe thin̂eke, mudiyuwa dyomwiyero wendi. Ene yi gha tendire kukwange Onesiforusi nawahe homuEfesusi, nowe ghothinda wa yidimuka thiwana.
Terpilih Sekarang Ini:
2 Timoteghusi 1: MHW1986
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Mbunga dhoBayibili dhaNamibia (Bible Society of Namibia) 1986