1 Timoteghusi 2
2
Mahongero ghondapero
1Pakutanga, na kumutjokedha eshi, mu kare nomakuhemeno, nomandapero ghokukumbera, nondapero dhomatumero dhawanu wahe, 2kwawaraghuri no kwawahe wa ha kara nongcamu dhokuraghura, ha hima eshi tu kone kupara thiwana teghete nomuthiraro, muyinu yaNyambi no mufuma. 3Eyi no ne yoyinu yoyiwa no yaroghera kughutho waNyambi ghoMushuturi wetu. 4Oyu gha haka eshi, hanu wahe ngo hapwe kukomonona no ha dimuke ghushemwa. 5Yoyishi, roruhe ne Nyambi yofotji gha kara po naMughambwereri yofotji ghopakatji kaNyambi nawanu, munu yu ne Kristus Jesusi. 6Oyu gha kutapire thinda gha kare yira thikomononitho thawahe. Eyi, ya karire po eshi, yi neghedhe mahimeno ghaNyambi. 7Nothitambo thino, po ha ni pakera eshi ni kare muyaghuri nomupostoli. Nomuhongi wawahayidena wa ha dhira kutawa mbudhi dhomatawero noghushemwa. Ame ne ghushemwa na kughamba no mbadi na kwangera.
Yirughana yawarume nawakamadi mumbunga
8Na himi eshi hatutughuru ha rapere no ha yeyure nyara dhoghukushuki kwaNyambi, mukupira nya non̂anani temba. 9Kwawakamadi na haka me eshi, nawo karo ha vate yitere yi yawafumanena, no yoyikaritha yoyiwa. Ene yikuyenga yawo, mbadi ya kona kukara yira, ndjendja, mangondo endi makwarara, ngambi yivata yondhiro. 10Ene yirughana yoyiwa yi, yaroghera hakamadi awa hana kunongonona eshi wo ne ha karera Nyambi. 11Mukamadi gha kona kukara ghuporothi, mumakonganeno no gha kona kukufupipitha no ha mu honge. 12Ame mbadi na haka eshi, mukamadi gha honge endi gha rawere mundambo wendi nongcamu dhokupiterera munu wendi. Aye ne gha kone kuporera. 13Yoyishi Adami, yo ha tangire kuvareka, ndani ne munyima ne Eva. 14Adami yu, mbadi yo ha pemukithire. Ene mukamadi yo gha pemukire no yo gha neghire muragho. 15Ene ye, mbo ghana wana maghamweno ghendi muyikara yoghukamadi. Ngeshi ha dhidhimeka mumatawero, muruhakitho no mughupongoki, no kukukongora.
Terpilih Sekarang Ini:
1 Timoteghusi 2: MHW1986
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Mbunga dhoBayibili dhaNamibia (Bible Society of Namibia) 1986