1 Timoteghusi 1
1
Mbapira Dhokutanga kwaTimoteghusi
1Edhi dhina tundu kwaPaghulusi. Mupostoli waKristus Jesusi muthirughana thaNyambi, ghoMushuturi wetu naKristus Jesusi, ghomakurupero ghetu.
2KwaTimoteghusi ghomwanange, mumatawero. N̂eke, nothin̂eke nothiraro thaNyambi ghoWihetu naKristus Jesusi ghoHekudyetu!
Mashingero ghokuyihongaghura yombango
3Thika di rwa karire ruyendo rwange rokuMasedoniya, dyo na kukupambeka nowe karo eshi, ghu ka kare muEfesusi. Yoyishi mwadi hanu, awa hana kutapathanitha yihonga yombango. Owe ne wa kona kayiwashinga. 4Mbadi ha kona kumwangera noyithimwetwedha yawakerekendongo wawo. Yinu yokemo, ya reta n̂anani no mbadi yatamba koyi gha paka po Nyambi pamatawero. 5Thitambo thoyirughana yino ne, tharuhakitho rokushwagha mumutjima ghoghukushuki no yighayara mwene, nomatawero ghomahunga. 6Po hadi hanu hamweya awa ha yongara kuyinu yino, no ha yowera muyighamba yombango. 7Awo ha hima kukara hahongi homuragho, ene mbadi hana kutjwathana man̂ando ghawo hathinda, ngambi kuyinu yi hana kukutendera ghushemwa muyighamba yawo.
8Twa dimuka eshi muragho ne ghuhunga, ngeshi oku ghana kughutenda munu pamuhingo ghoghuwa. 9Munu gha kone kughayara eshi, muragho ne mbadi muragho wawatawedhi vene. Ene wawanu wa ha dhira kurongama kumuragho no kadi wa thotera. Yira hanyambi hombago nawayiharuri, hakakudhira kukutekera yokupongoka noyi ha pongora, noyu ghokupagha wihe ngambi nyina, awo ne hapaghi, 10hakarungu, ropayirama yawo hathinda, hombithi, hakambango, hakakwedha mbango, ngambi awa hana kutenda yinu yimweya yokwipitha yoghushemwa. 11Yihonga yoghushemwa yarikanya nombudhi dhi ha nipa. Mbudhi dhi dhoghushemwa ne dhaNyambi ghomuhunga.
Matumero kun̂eke dhaNyambi
12Ame na mu tumera paHekudyetu Kristus Jesusi. Yoyishi Aye gha ni pire ngcamu, no gha ni kuruperire pa kunipaka muthirughana thendi. 13Ngambi kenge na mu shinyine no kumukuthakutha no kumushanuna. Ene Nyambi gha ni fererire n̂eke. Yoyishi mbadi na dimukire ethi na kutenda mukupira matawero ghange. 14Hekudyetu gha ni yaritha non̂eke dhendi nomatawero noruhakitho, oru twa yerana mwaKristus Jesusi.
15N̂ando dhi ne dha makurupero nomudyo, mukupira madhikanunutho. Eshi Kristus Jesusi gheyire pakaye, kukushutura hakamaharwero. Papawo ne yame no mukakupiterera. 16Yashemwa po gha ni fererire n̂eke Nyambi. Eshi Jesus Kristusi gha hokore ghudhidhimeka ghoghuhe mumwange. Ho mbo ghu kare thitamenedhi thawa ha mu tawa. Mbo ha wane moyo ghororuheya, 17kwaFumu ghororuheya ghokudhira kufa, ghokudhira kumona ghoNyambi yofotji, gha fumane noghufumu kate kuroruheya! Amen.
18Thirughana thino, kutapa na kuthitapa kukoye we, Timoteghusi, ghomwanange yira mukukutha man̂ando ghawapumbi, agha ha ghambire pakare yokukoye. No man̂ando gha, wa kona kurwa nagho yita yoyiwa. 19Kwate matawero, no kare noyihima mwene. Yoyishi hamweya mbadi hana kutegherera kudiywi dyoye. Opo po ha yongarithera matawero ghawo. 20Hamweya hopapawo ne, haHimeneghusi naAleksanderi, awa na napire kwaShatani. Kemo sho ha kuhongere po eshi, mbadi wa kukona kushamuna Nyambi.
Terpilih Sekarang Ini:
1 Timoteghusi 1: MHW1986
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Mbunga dhoBayibili dhaNamibia (Bible Society of Namibia) 1986