Luka 8
8
Svmarérìí Yesu dvzø:mò we
1Wemèpvng kadv́ngte màlé dvgvp, Yesu nø Gvray móngdàn Dvbùshv̀ngkà dvsha:ngò taqsórí, wamàrì nv̀ng mvrìngrì shvngbe sv̀ng dìá:mì. Coqcv́n Tiqcé Vnípè gø Àng nv̀ng tiqdø zv̀ne. #Luk. 4:43 2Yesuí cáng lúngaò nø̀ záyv̀ngrì dvbana yà:ngà we svmaré tiqmaq gø zv̀ne. Àngmaq taq cáng shvngøtgo lúngaa:pmà we Makdvla mvrìngmè Mari, #Mak. 15:40-41 3Herot chø̀m øp pè Kuza chø̀mmè Yohana gø, Susana nv̀ng dvgá mvme mè gø vbáe. Àngmaqí nø vdè gv̀msù:ngí Yesu nv̀ng coqcv́nrì sv̀ng dvzø:mòe.
Vmyø̀ wøn kàshvbóng
Mat. 13:1-23; Mak. 4:1-20
4Vsv̀ng loksok lokga nø tiqmvrìng nø tiqmvrìng kèní di ráì nø̀ Yesu yv́ng dvkǿmshì ráì kvt, À:ngí kàshvbóng yalòng shø̀:nòe. 5“Vmyø̀ wøn vsv̀ng nø vmyø̀ wøn nv̀ng búngá:mì. À:ngí wø:nò dvgvp, tiqmaq nø tvrà yv́ng vjáá:mì nø̀ vsà:ngí lvm bǿà. Carìí gø tǿvm bǿà. 6Tiqmaq nø lóngheq mvdv̀m vjáá:mì nø̀ yó lú:ngì we, tì mvlú:nò rvt shúngá:mì. 7Tiqmaq nø bv̀nghǿ póng vdòng vjáá:mì. Bv̀nghǿrì nø vmtø̀ng nv̀ng tiqdø té lú:ngì nø̀ vmtø̀ng sv̀ng shø̀rke bǿà. 8Tiqmaq nø vba shvlá taq vjáá:mì nø̀, té lú:ngì weí tiqyá dvtv̀ng àngshí shí lú:ngì,” a:lòe.
Yadv́ng pv̀n shǿn dá:ngí, “Tálv́m vnà vdá vsv̀ng nø laq tashì,” wa vkiqe.
9Àng coqcv́nrìí kàshvbóng welòng lvjøm pà í we Àng sv̀ng rø:tnòe. 10À:ngí, “Nàmaq sv̀ng nø Gvray móngdànò vmáshaq rì dang cíngrál nøt vzíshaq íe. Dvgárì kaq nø,
‘Àngmaqí dvjaqò nìgø mvyv̀nglv́m,
táò nìgø mvcínglv́m,’
kàshvbóng kèní shø̀:nò we íe. #Esa. 6:9-10
11Kàshvbóng lvjøm nø yadø íe. Vmyø̀ nø Gvray mòngkà íe. 12Tvrà mvdv̀m vjáá:mì rì nø mòngkà tá bǿà nìgø, àngmaq kv́m nø̀ chutchv́ng we mvlúnlv́m dvpvt, Satan di ráì nø̀ àngmaq nøt vdòng kèní mòngkà lùv́m bǿà rì íe. 13Lóngheq mvdv̀mø vjáá:mì rì nø, mòngkà sv̀ng tá bǿà kvt, dvbùnø:tní vtoshì rì íe. Íwe àngrø mvcaqshì weí, àngmaq nø tiqdvgvp wa kv́m nø̀, vløt we vhǿm bǿò kvt lángshìvm rì íe. 14Bv̀nghǿ póng vdòngø vjáá:mì rì nø, mòngkà tá bǿà kvt, àngmaq lvpat tvrà taq gónggilv́m rì, pø̀ vdálv́m rì nv̀ng góngsha dvbùlv́m rìí àngmaq sv̀ng shø̀rkéò rvtnø̀, àngshí mvgong rì íe. 15Vba shvlá taq vjáá:mì rì mv̀ng nø, shvla we nøt nv̀ng døngnø:tní mòngkà táò nø̀ kǿng vtøp mvnvtshì sórí tøn zánnø:tní àngshí shí rì íe.
Svmigwìn kàshvbóng
Mat. 5:15-16; Mak. 4:21-25; Luk. 11:33
16Svmigwìn dvciqò dá:ngí chú:ngí ku:pmò we, mø̀íni yøpjv̀m lv̀ngpvngø shvrú:ngò we kagǿ gø màvl. Chø̀m vdòng gòng ra vsv̀ngrìí gálòng lvyà:ngò dø, àng shvrúngrà taq lè shvrú:ngòe. 17Kadø íe wani vmáshaq pà í nìgø, Gvrayí dvtan lú:ngòe. Vrá, vwvmshaq pà ínìgø, shvngbeí sháò dø gá yv́ng dvtan lú:ngòe. #Mat. 10:26 18Wervt nàmaqí kadø ètá bǿshà we sv̀ng shvlá wa nàshatnø̀ng. Pawá wani v́laò gǿ sv̀ng nø rvma daqòe.#8:18 “Cíngrálnøt vl gǿ sv̀ng nø cíngrálnøt rvma daqòe” wa nø̀ gø rø daqe. Màv́laò gǿ kèní nø, èv́lange lv́nshì hvncè gø àng yv́ngkèní lù bǿòe,” a:lòe. #Luk. 19:26
Kv́m vsv̀ngrì nø Yesu àngrì àngrvp í we
Mat. 12:46-50; Mak. 3:31-35
19Wedvgvp Yesu Àngmè nv̀ng Àngnvmpèla Àng yv́ng di ráì. Íwe vsv̀ng loksok rvtnø̀ Àng shvnvng yv́ngsv̀ng àngmaqí dí mvlú:nò. 20Vsv̀ngrìí Àng sv̀ng, “Nvmè nv̀ng Nvnvmpèla nø Nà sv̀ng vhøm mvyǿ nø̀ vngámlap yv́ng ripme,” wa dvtáòe.
21Íwe Yesuí, “Gvray mòngkà táò nø̀ cv́n døng vsv̀ngrì mv̀ng Vmè nv̀ng Vnvmrì íe,” wa vtá:nòe.
Yesuí tima na:rò we
Mat. 8:18,23-27; Mak. 4:35-41
22Tiqni taq, Yesuí Àng coqcv́nrì sv̀ng, “Tìnúngmè kupa léshàì,” a:lòe. Wekvt àngmaq nø kùngshí taq zv́ngshì nø̀ rvpshìá:mì.
23Àngmaq rvpshì dvgvp Yesu nø yøpme. Wekvt tìnúngmè taq nv̀mbø̀ng mvrù mut ráì nø̀, kùngshí taq tì zǿng mvnshì lú:ngì weí, àngmaq vmv́nglv́m wae. 24Àngmaq di ráì weí Yesu sv̀ng dvsha:tnò nø̀, “Kàngpèá, Kàngpèá, vmv́nglv́m wàì lé!” wa vkiqe. Wekvt Àng kungshì nø̀ nv̀mbø̀ng nv̀ng pvlòng we tima sv̀ng ngvn bǿà nìnø, nv̀mbø̀ng mvrù shø̀má:mì nø̀ zø̀lá:mì.
25Yesuí, “Nàmaq kv́mnøt kayv́ng íá:mì má?” a:lòe.
Àngmaq svre nø̀ dàá:mì sórí, “Yapè nø kagǿ íe má? Nv̀mbø̀ng nv̀ng tì sv̀ng gø À:ngí dvká:mò nìnø, Àng kà tae,” wa vrùnge.
Cáng dvchøp vsv̀ng dvba:nò we
Mat. 8:28-34; Mak. 5:1-20
26Àngmaq nø kùngshí taq rvpshì nø̀ Galili móng tìnúngmè kupa Gerasen rvgaq sv̀ng tuq ráì. 27Yesu nø vdàmpa sv̀ng ngang lú:ngì ke, wamà kèní cáng dvchøp we tiqpè nø Àng nv̀ng vhøme. Wepè nø bèlaq mvgwashì we, chø̀m yv́ng màvl we nv̀ng lóngdùng dvgv̀m gòng yv́ng wa vl we vlé ráì. 28Yesu sv̀ng à:ngí yv̀ng bǿà kvt, Àng yv́ng pvnciq tushì sórí, “Vháng Vtvng Gvray Àngcèpè Yesué, Nà nø ngà nv̀ng pà singlv́m vle má? Mèdèkøngànø̀ng, wvng nímshø̀nge,” wa shaqmèí vkiqe. 29Kadø íe wani wepè yv́ngkèní cáng lúshìlv́m Yesuí dvkv́mshaq íe. Àng nø vzv̀ng kèní mvme kvt cáng zv́ngshì pè íe. Vsv̀ngrìí wepè hí wur sv̀ng shv̀m mvngbǿ:ngí dù:ngò nø̀ vsù:ngò nìgø, mvngbǿng sv̀ng peqpeq ra:tnò nø̀, cá:ngí rvgaq mvgung sv̀ng shøl bǿòe.
30Yesuí àng sv̀ng, “Nà bø̀ng kadø íe?” wa rø:tnòe.
À:ngí, “Loksok íshàe,” a:lòe. Àng taq cáng mvme dvchøp rvt wedø vtv́nshì we íe. 31Yesuí àngmaq kaq naqràng dòngjøm sv̀ng màshvlolv́m rvt, Yesu sv̀ng kórshìe.
32Àngmaq shvnvng mvrùl yv̀ngø waq tiqrénùng rvnúlvm nø̀ vle. Waqré vdòng gònglv́m vkv́ng Yesu sv̀ng røtshì bǿì kvt, À:ngí àngmaq sv̀ng vkv́ng zíòe. 33Wekvt cángrì nø wepè kèní lúshì nø̀, waqré taq zv́ngshìá:mì. Waqré nø dv̀ngdár dangdang tìnúngmè sv̀ng shvrøtshì nø̀, sungsung vløpmá:mì.
34Waq roqshúrìí wedø íá:mì we sv̀ng yv̀ng bǿà kvt, àngmaq vtná:mì nø̀, wamà nv̀ng gùrhøm vtv́r rvgaq yadang dvsha:ngòe. 35Kadødø íá:mì we sv̀ng yv̀nglv́m rvt vsv̀ngrì dì ráì. Yesu vl yv́ng sv̀ng tuq ráì kvt, cángrì lúshì dá:rì pè nø bèlaq gwashì nø̀ Yesu hí shvnvngø vrǿng làshv̀ng rung da we yv̀ng bǿà kvt, àngmaq svre lú:ngì. 36Cáng dvchøp pè sv̀ng kadø dvba:nò we yv̀ng dá:rà rìí vsv̀ngrì kaq dvtáòe. 37Wekvt Gerasen rvgaq gùrhømhøm vsv̀ng shvngbe nø vtvngshaq svreá:mì rvt, àngmaq yv́ngkèní lolv́m rvt Yesu sv̀ng kórshìe. Wervt Àng nø kùngshí taq zv́ngshì nø̀ búnglv́m wae.
38Cángrì lúshì dá:rì pè nø, Yesu nv̀ng tiqdø v̀llv́m sv̀ng kórshìe. Íwe Yesuí àng sv̀ng yadø a:lò nø̀ shvloòe. 39“Nà chø̀m sv̀ng èlovm. Gvrayí nà dvpvt èwáa bǿì rì kadvngshì ring we dèshvng bǿò,” a:lòe. Wekvt àng búngá:mì nø̀, Yesuí àng dvpvt wáa bǿà rì kadvngshì ring we sv̀ng wamà køp taq dvsha:ngòe.
Yeru àngcèmè dvzu:nò we nv̀ng tiqcé vnínǿng za mè dvba:nò we
Mat. 9:18-26; Mak. 5:21-43
40Yesu vtv́ng ráì kvt, vsv̀ng loksu:kngí Àng sv̀ng shaqshaqwa vtoòe. Pàwá wani àngmaq shvngbeí Àng sv̀ng vlǿmshì nø̀ ca dárà. 41Wekvt Yeru tǿò we júrøt chø̀m øpshú tiqpè dì ráì. Yesu hí shvnvng kǿng kupshì nø̀, àng chø̀m sv̀ng dìlv́m rvt kórshìe. 42Pàwá wani tiqcé vnínǿng dv́ngte í we àngcè lòngzàmè shìlv́m dv́nshie. Yesu di ráì dvgvp vsv̀ng loksokrìí Àng sv̀ng shvgøra:tnà.
43Wedvgvp, tiqcé vnínǿng shvwi vyø nø̀ zà daqì we svmaré tiqmè gø vbáe. Àng vdá dv́ngte shvngbe cìsvrarì yv́ng dvbé bǿà nìgø, dvban lúnò vsv̀ng tiqgǿ gø màvl. 44Wemè nø Yesu mèpvng lap kèní dì ráì weí, Àngò mvdv̀m bèlaq mvtú sv̀ng shup bǿà nìnø, wela:ngí ni àng shvwi vyø lòng vtvngá:mì.
45Yesuí, “Ngà sv̀ng èshup we kagǿ íe?” wa rø:tnò nìnø shvngbe mashìe.
Wekvt Piterí, “Kàngpèá, Nà sv̀ng nø vsv̀ng loksu:kngí shègør nø̀ shènip we íe,” a:lòe.
46Íwe Yesuí, “Ngà sv̀ng èshup bǿngà we tiqgǿ vle, pàwálv́m wani Ngà taqkèní jórnònggùn búngá:mì we Ngà dǿmshø̀nge,” a:lòe.
47Svmaré wemè nø, ma mvlúnshì we sháshì bǿì rvt, vdv̀n sórí dì ráì nø̀, Àng mv́rdv̀ngø kǿng kupshìe. Àng sv̀ng pàwálv́m shup bǿà we nv̀ng àng kadø chàng baná:mì we bashàrì shvngbe mv́rdv̀ngø shǿnshìe. 48Wekvt Yesuí, “Ngàcèmèá, nà kv́mnø:tní nà sv̀ng dèban bǿì. Pàmvrà èlovm,” a:lòe.
49Àng wedø shø̀n la:ngí, júrøt chø̀m øpshúpè chø̀m kèní tiqgǿ dì ráì nø̀, “Nvcèmè shìá:mì. Svrapè sv̀ng dvshá mèluni,” a:lòe.
50Wekà Yesuí tá bǿà nø̀ Yeru sv̀ng, “Mèsèreni, kv́mdv̀ng èwa. Wekvt nvcèmè ban longe,” a:lòe.
51Chø̀m sv̀ng tuqá:mì kvt, Piter, Yohan, Yaku nv̀ng cv̀mrémè àngpè àngmèní wa mø̀í nìnø, À:ngí dvgádø kagǿ sv̀ng gø Àng nv̀ng tiqdø góng màdvzá:rò. 52Vsv̀ng shvngbe nø cv̀mrémè dvpvt rv̀ngshvng wa nø̀ ngøe. Íwe À:ngí, “Mèngǿnø̀ngni. Pàwá wani àng nø shì we mø̀í, yøp we lè íe,” a:lòe.
53Cv̀mrémè nø shìá:mì we àngmaqí sháò rvtnø̀, Yesu sv̀ng vhøòe. 54Íwe, Yesuí cv̀mrémè wur zø̀:mò sórí, “Cv̀mrémèá, èkungshì,” wa mvri:nòe. 55Àng pvlàcè vtv́ng ráì nø̀, wela:ngí àng kungshì lú:ngì. Wekvt àng sv̀ng v́mlv́m tiqpv̀npv̀n zílv́m Yesuí dvká:mòe. 56Àngpè àngmèní nø dádv̀ng wàá:mì. Íwe, bø̀ná:mì lòng dang kagǿ sv̀ng gø màdvtálv́m Yesuí àngní sv̀ng dvká:mòe. #Mak. 7:36; Luk. 5:14
Terpilih Sekarang Ini:
Luka 8: GSM
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2025 Rvcv́ngcè Kàru Gomidi Kristu Shvngø̀mré. All Rights Reserved.
