Luka 7
7
Cìldùpèò dvzømshú dvba:nò we
Mat. 8:5-13; Yoh. 4:46-54
1Bashàrì sv̀ng Yesuí kà yarì shvngbe shǿn dv́ng bǿà kvt, Àng nø Kapernum wamà sv̀ng dìá:mì. 2Weyv́ng cìlcè tiqyá øpshú dùpèí gvzà shù:ngò we vshuq tiqpè nø za nø̀ shìlv́m dv́nshie. 3Cìldùpèí Yesu shv̀ngkà tá bǿà kvt, Yuda vsv̀ng shaqré shaqtvngrì dvzá:rò nø̀, Yesu di ra weí àng vshuqpè dvbanalv́m røtshìe. 4Àngmaq Yesu yv́ng tuq ráì kvt, Àng sv̀ng kórshì nø̀, “Yapè nø Nàí dvbvng vpǿ we tiqpè íe. 5Pàwá wani àng nø nøngmaq dvcì sv̀ng shóngshì nø̀, júrøt chø̀m gø èwáa yv̀ngshà,” a:lòe. 6Wekvt Yesu nø àngmaq nv̀ng tiqdø dìá:mì.
Cìldùpè chø̀m kèní kadv́ngte màrúm yv́ng tuq ráì ke, cìldùpèí àng rv̀mnvngrì dvzv́ra:tnà nø̀, “Kàngpèá, dvshá mèwashì rani. Pàwá wani ngà chø̀m sv̀ng Nà gònglv́m nø ngà màpǿng. 7Wervtnø̀ Nà yv́ngsv̀ng dìlv́m gø ngà màpǿng, wvng dvdvmshø̀nge. Nàí tiqkà shǿn dv̀ng èwàò, wekvt ngà dvzømshúpè nø banvme. 8Kadø íe wani ngà gø vmíng vkv́ng lv̀ngpvngø vl we tiqgǿ ǿngàe, ngà lv̀ngpvng gø cìlcèrì vle. Ngàí tiqpè sv̀ng, ‘Èdivm,’ vlò kvt, àng divme. Dvgá tiqpè sv̀ng ‘Èdi ra,’ vlò kvt, àng di rae. Ngà vshuqpè sv̀ng, ‘Yalòng èwàò,’ vlò kvt, à:ngí wàòe,” wa shǿn dvzá:ròe.
9Yesuí kà yarì tá bǿà kvt, cìldùpè sv̀ng vtiq sórí, Àng mèpvng cv̀n we vsv̀ng loksokrì kaq poshì nø̀, “Ngàí vla:tnìni, Israel dvcì dvhø̀ taq dv́ng, yadv́ngte kv́mnøt te we tiqgǿ gø mvyv̀ng dv́rò,” a:lòe. 10Dvzv́ra:tnà rì nø chø̀m sv̀ng vtv́ngá:mì kvt, vshuqpè nø ban dá:rì we yv̀ng bǿà.
Memàmè àngcè lòngzàpè dvzu:nò we
11Kadv́ngte màlé dvgvp, Yesu nø Nain tǿò we tiqmvrìng sv̀ng gòngá:mì. Àng coqcv́nrì nv̀ng vsv̀ng loksokrìí gø Àng mèpvng cà:nòe. 12Mvrìng gòngchit yv́ng tuq ráì dvgvp, memà tiqmèò àngcè lòngzàpè shì vnàng baqa:tnà we vhǿ:mòe. Memàmè nv̀ng tiqdø mvrìngcèrì gø mvme zv̀ne.#1Kk. 17:17-24; 2Kk. 4:17-37; Luk. 8:40-42,49-56 13Kàngpèí memàmè sv̀ng yv̀ng bǿà kvt, àng sv̀ng mvré lú:ngà nø̀, “Mèngøni,” a:lòe.
14Yesu tvp di ráì nø̀ chà sv̀ng zø̀:mòe. Wekvt vnàng baqò rì ripmá:mì. À:ngí, “Gùchàngrépèá, Ngàí vlvtnø̀ng, èkungshì,” a:lòe. 15Shì pè nø kungshì nø̀ kà shø̀n lú:ngì. Wekvt Yesuí àngmè sv̀ng tvleòe.
16Vsv̀ng shvngbe nø dvdvm vtiq nø̀ svreá:mì. Àngmaqí Gvray ngø̀rdvgùng shvri:ngò sórí, “Ring we kàdvtutshú tiqgǿ nøngmaq dvhø̀ bung lú:ngì. Gvrayí Àng bashàrì sv̀ng dvbvnglv́m dì daqì,” wae. #Luk. 1:68 17Yuda móngkøp nv̀ng gùrhømhøm rvgaq shvngbe sv̀ng Yesu dang shv̀ngkà yalòng dvshvng bǿà.
Tìløp Yohaní àng coqcv́nrì dvzv́ra:tnà we
Mat. 11:2-19
18Yohan coqcv́nrìí yadv́ng pv̀n shvngbe Yohan sv̀ng dvtáòe. Wekvt Yohaní àng coqcv́n vnípè goò nø̀ 19Kàngpè yv́ngsv̀ng dvzá:rò sórí, “Dìlv́m vdv́nshaq pè nø Nà èí má? Mø̀íni dvgá tiqpè sv̀ng caì ni má?” wa røt dvzá:ròe.
20Wepèní Yesu yv́ng tuq ráì kvt, “Tìløp Yohaní ngàní lvngà Nà yv́ngsv̀ng dèzv́rshì nø̀, ‘Dìlv́m vdv́nshaq pè nø Nà èí má? Mø̀íni dvgá tiqpè sv̀ng caì ni má?’ wa røt dèzv́rshìe,” a:lòe.
21Wervtø̀ taq ni, vna zø̀nlìrìí za vsv̀ng mvme nv̀ng cáng dvchøp rì mvme kaq Yesuí dvbanaòe. Nemàn mvme gǿ sv̀ng gø yvngshì dvzá:ròe. 22Wervt À:ngí àngní sv̀ng, “Yohan yv́ng nàtv́ngv́mshì nø̀ nàníí èyv̀ngshò rì nv̀ng ètáshò rì àng sv̀ng dètá bǿshò. Nemànrì vne yvngshì nø̀, híze rì die. Mvnggang vnarì shèrvm nø̀ vnà mvtá rìí tá lú:nòe. Shì vsv̀ngrì zun nø̀ dvshà rì sv̀ng gø Dvbùshv̀ngkà dvsha:ngòe. #Esa. 35:5; 61:1 23Ngà rvtnø̀ nøt màdvtiqshì gǿ nø ìshøt vle,” wa vtá:nòe.
Yesuí Yohan dvsha:ngò we
24Yohan dvzv́rpèní loá:mì mèpvng, Yesuí vsv̀ng loksokrì kaq Yohan dang yadø shǿn pà:ngòe. “Nàmaq nø kapà yv̀nglv́m rvgaq mvgung sv̀ng èdìv́mshà má? Nv̀mbø̀:ngí vwa:tnò we gungzì tv̀ng yv̀nglv́m rvt í má? 25Mø̀íni, kapà yv̀nglv́m èbúngv́mshà má? Shøpshøp wa we bèlaq gwashì we tiqpè sv̀ng yv̀nglv́m rvt í má? Ngø̀r we gwálá:mì dvcøpshì nø̀, dvnglún lúnshì rì nø koqkv́m tø̀ngnørì taq lè vle. 26Íni, kapà yv̀nglv́m èbúngv́mshà má? Kàdvtutshú sv̀ng yv̀nglv́m rvt í má? Íe. Ngàí vla:tnìni, Yohan nø kàdvtutshú mvdv̀m té ring we tiqpè íe. #Luk. 1:76-79
27‘Èyv̀ngnø̀ng, Ngàí Nà vzv̀ngzv̀ng Ngà dvzv́r
dvzv́r dakngò nø̀,
à:ngí Nà dvpvt tvrà dègǿa dae,’#7:27 Mal. 3:1
wa Shànshér Kàru taq vru yà:ngà kà nø Yohan sv̀ng wae. 28Ngàí vla:tnìni, svmaréí gà:lò rì taqkèní, Yohan mvdv̀m ring we nø tiqgǿ gø màvl. Ínìgø, Gvray móngdàn taq cv́m vtvng gǿ nø, àng mvdv̀m té ringe,” a:lòe. #Luk. 1:15
29Bashàrì shvngbeí Yesu kàrì tá bǿà kvt, àngmaq nv̀ng kùyà gúnshúrìí gø Gvray tvrà nø vdu vbónge wa vchà:ngòe. Kadø íe wani àngmaq nø Yohaní tìløpmashaq rì íe. 30Íwe Parisirì nv̀ng dvrá svrarì nø, Yohan tìløp màtoshì rvtnø̀, àngmaq dvpvt Gvray gvcvt sv̀ng gø màtoshì.
Parisirì sv̀ng gùngkéò we
31Vrá Kàngpèí, “Yamvrilcèrì sv̀ng Ngàí kapà nv̀ng shvbónglv́m í má? Àngmaq nø kadø vshv́me má? 32Àngmaq nø gvttø̀mø rung taqsórí, ‘Nøngmaqí nàmaq dvpvt biman møtnaì we, lemèlv̀mnø̀ngni. Rv̀ngshvng wàì nìgø, lemèngǿnø̀ngni!’ wa àngmaq nø àngmaq mvrinke we cv̀mrérì dø vshv́me. 33Kadø íe wani Tìløp Yohan nø zidòng mvvm, bìmtì mvaq nìnø, ‘Àng nø cáng dvchøpme,’ èwànø̀nge. 34Vsv̀ng Àngcèpè nø vm aq nìnø, ‘Ku, v́mlv́m nv̀ng bìmtì mvlá pè, kùyà gúnshúrì nv̀ng mvrà vl rì rv̀mnvngpè,’ èwànø̀nge. 35Íwe, Gvray zitnøt nø vdu vbóng we sv̀ng, zitnøt àngcèrìí dvta:nòe,” a:lòe.
Yesu sv̀ng ngórdorcìí ma:tnò we
36Parisi tiqpèí Yesu sv̀ng àng nv̀ng tiqdø v́mpà v́mlv́m goòe. Wekvt Yesu nø Parisipè chø̀m sv̀ng gòngá:mì nø̀ v́mlv́m runge. 37We wamà yv́ngø mvrà wàò we svmaré tiqmè vle. Parisipè chø̀m taq Yesu v́mpà vm we à:ngí shá bǿà kvt, ngórdorcì zvng we lóngshú chúngcè tiqchv̀ng lv́nga:tnà. 38Wemè nø Yesu mèpvnglap hí shvnvngø rip ráì. Ngø sórí àng necìí Yesu hí sv̀ng dvshaqò nø̀ àng vnií shøqaòe. Àng hí sv̀ng gø vbú ma:nò nø̀ ngórdorcìí ma:tnòe.
39Yesu sv̀ng goò pè Parisipèí welòng yv̀ng bǿà kvt, “Yapè nø kàdvtutshú la í nìnø, Àng sv̀ng shupma:tnà mè nø kagǿ í we nv̀ng kadøwa mvrà vl mè í we sv̀ng dǿ:mò ni we,” wa dvda:mòe.
40Yesuí àng sv̀ng, “Simoná, Ngàí nà sv̀ng shø̀nlv́m tiqkà vle,” a:lòe.
À:ngí, “Svrapèá, shǿn dv̀ng íe,” a:lòe.
41Yesuí, “Pø̀ rumvm we tiqgǿ sv̀ng shvrv́n vjø we vní gǿ vle. Tiqgǿ nø dinari pungwàyá, tiqgǿ nø dinari pùngwàcé vjøe. #7:41 Tiq dinari nø tiqni zìbè íe. 42Àngní nø shvrv́n teqshìlv́m màdá rvtnø̀, à:ngí vnígǿgǿ sv̀ng chutnaòe. Wedø íni, yagǿní kèní àng sv̀ng té shóngshì we nø kagǿ íe?” wa rø:tnòe.
43Simoní, “Té chutna bǿà gǿ dvíni, wvng dvdvmòe,” wa vtá:nòe.
Yesuí, “Nàí jò dø dèdvm bǿà,” a:lòe.
44Yesu nø svmarémè lap poshì dá:ngí Simon sv̀ng, “Svmaré yamè èyà:ngò má? Nà chø̀m sv̀ng Ngà gòng rángà kvt, Ngà hí zv́lshìlv́m tì nàí mèzǿnga. Íwe svmaré yamèí nø àng necìí Ngà hí sv̀ng dèshak nø̀, àng vnií èshøknge. #Nnp. 18:4 45Nàí nø Ngà sv̀ng mènàbòngà. Yamèí mv̀ng Ngà gòng rángà lvng kèní mànarnar Ngà hí sv̀ng nàbònge. 46Nàí nø Ngà vgo sv̀ng zanlúnyøí mènàdøra. Yamèí nø Ngà hí sv̀ng ngórdorcìí èmatne. 47Wervtnø̀ Ngàí vlvtnø̀ng, yamè mvrà nø gvzà luq we, vchutnashaq íá:mì. Wervt à:ngí shóngnøt té dvta:nòe. Íwe, vrvmcè chutna lún gǿ nø vrvmcè wa shóngshìe,” a:lòe.
48Wekvt Yesuí svmarémè sv̀ng, “Nà mvrà chutnang bǿngà,” a:lòe. #Luk. 5:20-21
49Àng nv̀ng tiqdø rung rì tasv̀ng vrùng lú:ngì nø̀, “Mvrà chutna gø lú:nò we yapè nø kagǿ íe má?” wae.
50À:ngí svmarémè sv̀ng, “Nà kv́mnø:tní nà sv̀ng èchv́ng bǿì. Pàmvrà èlovm,” a:lòe.#Luk. 8:48; 17:19; 18:42
Terpilih Sekarang Ini:
Luka 7: GSM
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2025 Rvcv́ngcè Kàru Gomidi Kristu Shvngø̀mré. All Rights Reserved.
