Luka 14
14
Góng gv́ng vsv̀ng dvba:nò we
1Narni tiqni taq, Yesu nø Parisi øpshú tiqpè chø̀m yv́ng v́mpà v́mlv́m gòngá:mì nìnø, àngmaqí Àng sv̀ng dvjà:mòe. 2Weyv́ng Àng mv́rdv̀ngø góng gv́ng we vsv̀ng tiqpè vle. 3Yesuí dvrá svrarì nv̀ng Parisirì sv̀ng, “Narni taq záyv̀ng dvban daq má, mvdaq má?” wa rø:tnòe. 4Íwe àngmaq dø màwá vle. Wervt À:ngí wepè zø̀:mò nø̀ dvba:nò dá:ngí shvloòe.
5Wekvt Yesuí, “Nàmaq kèní tiqgǿ nø, àngcè #14:5 Kàru tiqmaq taq “lòzècè” wae. mø̀íni nungwà tiqgo vdá we, Narni taq tìtung sv̀ng la vjavm nìnø, wela:ngí ni mvlùò we kagǿ vle má?” wa rø:tnòe. #Mat. 12:11 6Àngmaqí tiqkà gø vtv́n mvlú:nò.
Cipshìlv́m shvngø:tnò we
7Vgoshaq rì nø ring we rúngràrì sv̀ng kadø rvcvngshì we Yesuí yv̀ng bǿà kvt, kàshvbú:ngí àngmaq sv̀ng, 8“Tiqgǿgǿí zvmì shvzøng bóy sv̀ng nà kaq ègovt ke, ring we rúngrà taq mèrungni. Pàwá wani nà mvdv̀m té dvgùng vl we tiqgǿ sv̀ng vgoshaq í we màshá. #Ksh. 25:6-7 9Wekvt nàní kaq ègoshì pè di ra weí nà sv̀ng, ‘Yagǿ dvpvt rúngrà èyilaò,’ la wa ra ni, nà nø shèraqshì sórí vcip vtvng rúngrà sv̀ng vcílshì nàdu longe. 10Íwe vsà:ngí ègovt dvgvp, vcip vtvng rúngrà taq èrung. Wekvt nà sv̀ng ègo pè di ra weí, ‘Rv̀mnvngpèá, té ring we rúngrà yv́ng nàcílshì long,’ èvlvtne. Wekvt mv̀ng nà nv̀ng tiqdø rung we zaqlèrì shvngbe mv́rdv̀ngø shvring we èlún lú:ngòe. 11Kadø íe wani shvringshì gǿ vrv̀m sv̀ng nø cip lú:ngòe. Cipshì gǿ sv̀ng nø shvring lú:ngòe,” a:lòe. #Mat. 23:12; Luk. 18:14
Dvshà vsv̀ng kaq mvréza rà we
12Wekvt Àng sv̀ng goò pè kaq Yesuí, “Nàí vyáng v́mpà, mø̀íni dørø̀m v́mpà èdóò dvgvp, nà rv̀mnvngrì, nvnvmrì, nvrì nvyàngrì, mø̀íni mvgàmré tiqdv́ng vsv̀ngrì mègoni. Kadø íe wani àngmaqí gø nà sv̀ng vrá ègo nø̀ tvle nàwv́ngavtne. 13Íwe nàí v́mbóy èdóò dvgvp, dvshàrì, vzerì, híshúngrì nv̀ng nemànrì sv̀ng lè ègoò. 14Wekvt mv̀ng nàí ìshøt èlún lú:ngòe. Àngmaqí nà sv̀ng tvle vwv́ngalv́m màdá nìgø, døngman vsv̀ngrì zun long ni taq nà sv̀ng nàwv́ngavtne,” a:lòe. #Ksh. 19:17
V́mbóymè kàshvbóng
Mat. 22:2-14
15Àng nv̀ng tiqdø rung rì kèní tiqgǿí kà yalòng tá bǿà kvt, Yesu sv̀ng, “Gvray móngdàn v́mbóy taq v́m lún vsv̀ng nø ìshøt vle,” a:lòe.
16Yesuí wepè sv̀ng, “Vsv̀ng tiqgǿí v́mbóymè tiqlòng wàò nø̀ vsv̀ng mvme goòe. 17V́m rvtø̀ høqa:tnà dvgvp, à:ngí dvzømshú tiqpè dvzá:rò nø̀, vgoshaq rì sv̀ng, ‘Èdi ránø̀ng, akvt nø shvngbe tvlú í á:mì,’ wa vl dvzá:ròe.
18Íwe àngmaq shvngbe dvcháchá túlshì lú:ngì. Nv̀mlat gǿí, ‘Ngàí rvmá tiqhv́ng wvn bǿngà nø̀ wehv́ng yv́ng nv̀ng dí ràngv́mà. Kadø màwá, leq chutnangé,’ wae.
19Vrá tiqgǿí, ‘Ngàí nungwà pungwà zǿm wvn bǿngà nø, werì vløt nv̀ng dønge. Kadø màwá, leq chutnangé,’ wae.
20Vrá tiqgǿí, ‘Ngà nø akvtwa zvmì longshø̀ng bǿngà rvt dí mvlúnò,’ wae.
21Dvzømshú wepè vtv́ng ráì nø̀ àngkàngpè sv̀ng yarì dvtáòe. Wekvt chø̀m àngkàngpè shv̀mná rí lú:ngì nø̀ dvzømshúpè sv̀ng, ‘Wamà tvrà nvmdøngrì nv̀ng tvràcèrì yv́ngsv̀ng cancan èdi nø̀, dvshàrì, vzerì, nemànrì nv̀ng híshúngrì sv̀ng ègoa:tnò,’ a:lòe.
22Wemèpvng dvzømshúpèí, ‘Kàngpèá, nàí dèkv́mà dø wá dv́ng bǿngà. Íwe, rúngrà wedøni chǿnge,’ a:lòe.
23Àngkàngpèí, ‘Ngà chø̀m taq vsv̀ng zø̀nglv́m dvpvt, vtv́r rvgaq tvrà nvmdøngrì nv̀ng tvràcèrì sv̀ng èdì nø̀, vsv̀ngrì mvdø̀ng mvdaq dègònga:tnò. 24Ngàí vla:tnìni, vzv̀ng vgoshaq rì tiqgǿí gø ngà v́mbóy v́mpà sv̀ng tin mvlúnshì,’” a:lòe.
Coqcv́n wáshì mvyǿ rì sv̀ng shvngø:tnò we
Mat. 10:37-38
25Vsv̀ng loksu:kngí Yesu sv̀ng cà:nò ke, Àng lv́m poshì nø̀ àngmaq sv̀ng, 26“Ngà yv́ng di ra we kagǿ ínìgø, àngpè àngmè, àngchø̀mmè, àngcèrì, àngnvmrì nv̀ng, vrá, vdè gø̀nshaq sv̀ng gø, màshvngoshì gǿ nø, Ngà coqcv́n wá mvlúnshì. #Luk. 18:29-30; Yoh. 12:25 27Vdè wurgang baqshì sórí Ngà mèpvng mvcv̀n we kagǿ ínìgø, Ngà coqcv́n wá mvlúnshì. #Luk. 9:23
28Nàmaq kèní tiqgǿí muqtu chø̀m#14:28 Gvzà vháng we chø̀m sv̀ng wae. tiqchø̀m la vrvng mvyǿ nìnø, dvdv́nglv́m gv̀msùng luq mvluq wa nø̀ vzv̀ng rung dá:ngí mvsu:nò we kagǿ vl má? 29Wedø màsunshaq à:ngí chø̀mpøt vra:ngò nø̀ dvdv́ng mvlún lú:ngò nìnø, yà:ngò rì shvngbeí àng sv̀ng, 30‘Yapèí nø chø̀m wá pà:ngò dá:ngí, dvdv́ng la mvngut dárà,’ wa zerké lú:ngòe.
31Vrá, koqkv́m tiqpè nø dvgá koqkv́m nv̀ng cìl vshvtlv́m rvt búnglv́m wa dvgvp, cìlcè vnímùn shø:lò nø̀ àng nv̀ng vshvtlv́m dì ráì pè sv̀ng cìlcè tiqmù:ní vtú dv́ng mvdv́ng wa nø̀ vzv̀ng rung dá:ngí mvda:kngò we kagǿ vl má? 32Dv́ngkélv́m dø mø̀í nìnø, koqkv́m wepè vrúm yv́ng shini vl dvgvp gvsà dvzá:rò nø̀, vrv́m vrálv́m røtshì rà longe. 33Welòng dø nàmaq gø, nàdánø̀ng dv́ngte mègurnø̀ng nìnø, Ngà coqcv́n wá mvlúnshì.
Shvlaq Kàshvbóng
Mat. 5:13; Mak. 9:50
34Shvlaq nø shvlae. Íwe àng kílòng la bvlvm nìnø, vrá lvkí long dø kadø wá lúnshì má? 35Vba dvpvt gø, ngò wàlv́m dvpvt gø vjú màvlvm rvtnø̀, vtv́ng lap sv̀ng gurlv́m wa íe. Tálv́m vnà vdá vsv̀ng nø laq tashì,” a:lòe.
Terpilih Sekarang Ini:
Luka 14: GSM
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2025 Rvcv́ngcè Kàru Gomidi Kristu Shvngø̀mré. All Rights Reserved.
