Luka 13
13
Nøt língshìlv́m shvngøt we
1Wervtø̀ taq Galili rì tiqmaqí shvt núngpà shvrúngò dvgvp, Pilatní àngmaq sv̀ng sha:tnò nø̀ àngmaq shvwi nø àngmaq shvrúng núngpà rì nv̀ng vshúò tvrà, Yesu sv̀ng tiqmaqí dvtáòe. 2Wekvt Yesuí àngmaq sv̀ng, “Galili rì kaq wedø shvt bǿà rvtnø̀, àngmaq nø dvgá Galili rì shvngbe mvdv̀m té mvrà rvnaqe wa dèdvmnø̀ng má? 3Ngàí vla:tnìni, wedø mø̀í. Nàmaq nøt mèlíngshìnø̀ng nìnø, nàmaq shvngbe gø nàmv́ng lóngnø̀nge. 4Mø̀íni Silom yv́ng muqtu chø̀m vtung ke shì bǿì we tiqcé shvt gǿ nø, Yerusalem yv́ng vl rì shvngbe mvdv̀m mvrà vl rì íe, wa dèdvmnø̀ng má? 5Ngàí vla:tnìni, wedø mø̀í. Nàmaq nøt mèlíngshìnø̀ng nìnø, nàmaq shvngbe gø nàmv́ng lóngnø̀nge,” wa vtá:nòe.
Àngshí mvshí we nv̀mgwètø̀ng kàshvbóng
6Wekvt À:ngí kàshvbóng yalòng shø̀:nòe. “Vsv̀ng tiqgǿí àng bìm kùlwàng taq nv̀mgwè tiqtø̀ng ka:tnòe. Àng nø wetø̀ng kèní àngshí røpmvmlv́m dì ráì we, tiqchv̀ng gø lá mvlú:nò. 7Wervt à:ngí kùlwàng vsóngshú pè sv̀ng, ‘Èyà:ngò, ya vshø̀m nǿng høq ngàí nv̀mgwè yatø̀ng kèní àngshí røpmvmlv́m døngnø̀ng gø, àngshí mvshí. Èrǿ:mò! Pàwálv́m vba sv̀ng vshø̀ng màshǿng dvtø̀mlv́m íe?’ a:lòe.
8Íwe vsóngshú pèí, ‘Kàngpèá, dènǿng gø shini laq yo. Wetø̀ng gùrhøm ngàí dùngò nø̀ ngò#13:8 Ngò wa long nø vbashú, nvmpun sv̀ng wae. zv́nglv́m íe. #2Pt. 3:9,15 9Nvpnǿng àngshí la shí long nìnø shvlae. Mvshí long nìnø wekvt mv̀ng rǿm dv̀ng íe,’ wa vtá:nòe.” #13:9 Luk. 3:9
Narni taq juq dvgoq mè dvba:nò we
10Narni taq júrøt chø̀m tiqchø̀m yv́ng Yesuí shvngø:tnòe. 11Weyv́ngø svmaré tiqmè vle. Àng nø cá:ngí tiqcé shvt nø̀ng dvzàkéò rvt juq dvgoq weí tiqhvncè gø mvzvnshì màshvla. 12Yesuí wemè yv̀ng bǿà kvt, Àng yv́ngsv̀ng goò nø̀, “Svmarémèá, nà záyv̀ng dvban bǿngà,” a:lòe. 13Wekvt àng mvdv̀mø Yesu wur hapshì nìnø, wela:ngí àng juq mvdóng lú:ngì nø̀, Gvray dvgùng shvri:ngòe. 14Íwe Yesuí Narni taq za vsv̀ng dvba:nò rvt, júrøt chø̀m øpshú pè shv̀mná rí nø̀ vsv̀ng loksokrì kaq, “Bv̀nlì wàlv́m nø vchuq ni vle. Wenila taq mv̀ng dvban lúnlv́m èdi ránø̀ng. Narni taq nø mvdaq,” a:lòe. #Bng. 20:9; Drd. 5:13 15Wekvt Kàngpèí àng sv̀ng, “Vnínøt ènøtnø̀ng rìé, nàmaq kagǿ gø Narni taq nungwà nv̀ng lòzè sv̀ng kok kèní èpǿnnø̀ng nø̀, tì shvaqlv́m èshølnø̀ng we mø̀í má? #Luk. 14:5 16Abraham pvlí pvlaq yamè sv̀ng Sataní tiqcé shvt nǿng dùng yà:ngà. Narni ínìgø, àng sv̀ng dù:ngò we mvngbǿng kèní shvláng vdu we mø̀í má?” wa vtá:nòe.
17Yesuí yadø vl bǿà nìnø, Àng sv̀ng vtùò rì shvngbe shvraqshìá:mì. Íwe bashàrì nø Yesuí wàò we vtiqlv́m bv̀nlìrì shvngbe rvt dvbùe.
Mvngakashí nv̀ng butdvshi kàshvbóng
Mat. 13:31-33; Mak. 4:30-32
18Wervtnø̀ Yesuí, “Gvray móngdàn nø, pà nv̀ng vbóng má? Ngàí kapà nv̀ng shvbóngò má? 19Gvray móngdàn nø mvngakashí tiqchv̀ngcè nv̀ng vbónge. Vsv̀ng tiqpèí àng kùlwàng taq wechv̀ng wøn bǿà nìnø, yó lú:ngì nø̀ àng tø̀ng té lú:ngì. Wekvt carì nø dvgv̀ngrì taq àngdv̀ng washìe,” a:lòe. #Ezk. 17:23; 31:6; Dan. 4:12,21
20Vrá, À:ngí, “Gvray móngdàn nø Ngàí kapà nv̀ng shvbóngò má? 21Svmaré tiqmèí butdvshi lùò nø̀ zong tvnøt vshø̀m kung taq vshú bǿà kvt, zong tvnøt shvngbe dvbu:tnò we butdvshi nv̀ng vbónge,” a:lòe.
Mvchím bv́ngkà taq góng rà we
22Yesu nø Yerusalem sv̀ng di sórí wamà nv̀ng mvrìngrì taq mvshǿl shvngø:tnòe. 23Wekvt tiqgǿí, “Kàngpèá, chutchv́ng lún rì nø tiqmaq wa í má?” wa rø:tnòe. Yesuí, 24“Bv́ngkà mvchím kèní gònglv́m dèzaqshìnø̀ng. Pawá wani Ngàí vla:tnìni, vsv̀ng mvme nø gònglv́m dvzaqshì nìgø, góng mvlún lú:ngò. #Mat. 7:13-14; 1Tm. 6:12 25Chø̀m àngkàngpè búng nø̀ bv́ngkà kvlaq bǿò kvt, nàmaq nø vngám lapmø èripnø̀ng nø̀, bv́ngkà nàkoknø̀ng sórí, ‘Kàngpèá, nøngmaq sv̀ng bv́ngkà ètánashà,’ èwànø̀ng nìgø, ‘Nàmaq sv̀ng Ngàí mvsháì, kayv́ng kèní èdìvtshà we gø mvsháì,’ wa nàtv́nvtnø̀nge. #Mat. 7:22-23; 25:11-12
26Wekvt nàmaqí, ‘Nøngmaq nø nà nv̀ng v́m aq yv̀ngshà. Nàí nøngmaq mvrìng taq leshèngøt yv̀ngshà,’ èwà lóngnø̀nge.
27Íwe à:ngí, ‘Ngàí vla:tnìni, nàmaq sv̀ng mvsháì, kayv́ng kèní èdìvtshà we gø mvsháì. Mvgvm màshvla bv̀nlì èwànø̀ng rì nàmaq shvngbe ngà yv́ngkèní èrv́lshìnø̀ng,’ wa èvlvtnø̀nge.
28Nàmaqí nø Abraham, Isak, Yaku nv̀ng kàdvtutshúrì shvngbe Gvray móngdàn taq vl we èyv̀ng bǿnø̀ng nìgø, nàmaq sv̀ng nø vtv́ng lap kaq èkwan bǿnø̀nge. Weyv́ngø, nàmaq nø èngǿnø̀ng nø̀ shà nàjitshì lóngnø̀nge. 29Vsv̀ngrì nø nv̀msvr, nv̀mløp, tìbo, tìni kèní kø̀m ra nø̀, Gvray móngdàn yv́ng v́mbóy taq rung longe. #Shz. 107:1-3; Mat. 8:11-12 30Etánø̀ng, lv̀ngdø̀m rì tiqmaq nø nv̀mlat rì ívm nø̀, nv̀mlat rì tiqmaq nø lv̀ngdø̀m rì ívme” a:lòe.#Mat. 19:30
Yerusalem dvpvt Yesu nøt yor we
Mat. 23:37-39
31Wervtø̀ taq Parisirì tiqmaq Yesu yv́ng dì ráì nø̀, “Yayv́ng kèní èyilshì, kadø íe wani Herot nø Nà sv̀ng shvt mvyǿe,” a:lòe.
32Yesuí, “Edìv́mnø̀ng, ‘Dèni nv̀ng nvpni nø Ngàí cángrì lùngò nø̀ zarì dvbanlv́m íe. Vshø̀mni wa ni taq nø Ngà bv̀nlì wá dvdv́ng bǿngòe,’ wa vyit wego sv̀ng èvl bǿnø̀ng. 33Ínìgø dèni, nvpni nv̀ng pvngni nø, Ngà shini vzv̀ng kaq dí rànge. Kadø íe wani kàdvtutshú tiqgǿ nø Yerusalem yv́ng mø̀í nìnø, dvgá kayv́ng gø shí mvdaq.
34Yerusalemé, Yerusalemé! Nàí kàdvtutshúrì sv̀ng èsha:tnò nø̀, nà yv́ng dvzv́r daqà rì sv̀ng lú:ngì èwa:pmòe lé! Kakú:ngí àngcher lv̀ngpvngø àngcèrì sv̀ng ku:pmò padø, Ngàí nvcèrì sv̀ng mvme kvt dvkǿm mvyǿng we, nàmaq mètánø̀ng. 35Wervt Gvrayí nàmaq sv̀ng ègur lóngnø̀nge. Ngàí vla:tnìni, ‘Kàngpè bø̀ng taqkèní di daq pè nø ìshøt vle,’ wa mèshø̀nnø̀ng dv́ngte, nàmaqí Ngà sv̀ng vrá mèyv̀ng lóngshà,” a:lòe. #Shz. 118:26; Yer. 12:7
Terpilih Sekarang Ini:
Luka 13: GSM
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2025 Rvcv́ngcè Kàru Gomidi Kristu Shvngø̀mré. All Rights Reserved.
