ZAKARIA 8
8
Yahova Yalaga Kwilanyia Jerusalemi
1Yahova Wuvunyali yahaana likuva yili ku Zakaria navoora. 2“Ndayegomba kokonya Jerusalemi kigira vuyanzi vunene vwambeeye navwo ku vandu. Vuyanzi yivu vwanomba nimba nu vutima na vasigu vaavo. 3Inzi ndirana mu Jerusalemi lidaala liange litakatifu nokomenya mulio. Lilakalangwe lidaala lisuuvirifu kandi kiguru cha Yahova Wuvunyali, kilakalangwe kiguru kitakatifu. 4Vasakulu harara na vakeele vuli mulala valakikale mu viguuti via Jerusalemi naveeye ni mbimbu yu vusakulu. 5Zinzira zie lidaala zilakizuli vayaayi na vakana nivakinaa.
6“Gaamanya galoleke gokogenyia ku vandu vahononoka mu madiku yaga, si galava gokogenyia ku inzi mba. 7Ndakasole avandu vange kutura muvivala via vaali nivahilwa mu, 8kandi ndakavilanyie kutura Ivugwi kandi Imadioli vaze komenya mu Jerusalemi; valakave vandu vange, na inzi ndakave Nyasaye wavo. Ndakavamiihi mu vusuuvirifu kandi mu vulungi.
9“Muve nuvuluviliri! Kalunu muhulira makuva malala mere gavaporofeti vamoloma ing'inga yu muse gwi litembeli liange gwaali gwumbakwa vuhia. 10Ing'inga yeyo nitaduuka, si yaliho nu mundu waali unyala kuvugura vandu anoho mitugu kumuyinzilira mba, kandi si yaliho mundu waali mu mirembe kutura ku vasigu weve mba. Ndaakola vandu nivagwa vasigu va vandi. 11Navuzwa kalunu sindakola vandu vaahononoka kuli maziambiri mba. 12Valakatage vitagwa viavo mu mirembe, mizabibu jaavo jilakame makuyu, kivala kilakave ni vitagwa kandi imbura ilakakubi inyingi. Ndakahaane vugasu yivu ku vandu avikivala change valiva nivahononoki. 13Avandu vi Ivuyuda kandi avandu va Isiraeli! Mumadiku gaavita vageni vaalaamana ni vavoola, ‘Kivi kilala chere chaduuka ku vivala vie Ivuyuda na Isiraeli kimuduukili.’ Navuzwa ndakamuhonye, maku vageni yavo valakavoolerane, ‘Mwaza nyora vugasu vwi Ivuyuda na Isiraeli vanyoola!’ Kunangwa muve avaluviriri kandi mutatia mba.”
14Yahova Wuvunyali avoora, “Lwa vaguuga vinyu vaanomba kuva nu vutima, ndalohiza kuvaletera kivi, kandi sindagirung'anyia zing'anagani ziange mba, navuzwa ndakora kuli ndalohiza. 15Navuzwa kalunu ndohizaa kugasiza vandu va Jerusalemi ni Ivuyuda. Kunangwa mutatia mba. 16Yivi ni vindu viduukana mukore: Muvoore agaveeye giligali mundu nu wache. Muhaane likalaga liagiligali nokoleta mirembe. 17Mutaganagana kokora vudamanu ku mundu mulala nu wache mba, kandi mutayanzilira kwisuuha nu vugadi mba. Kigira vindu yivi viosi ndaavisula.”
18Yahova Wuvunyali yahaana makuva yaga ku Zakaria: 19“Lihonga kulia liu mweli gwa 4, mweli gwa 5, mweli gwa 7 kandi mweli gwa 10, ilakave ing'inga ya masavo gu vuyanzi harara nu vusangali ku vandu vi Ivuyuda. Gamuduukira muyanze kokora giligali kandi mirembe.”
20Yahova Wuvunyali avoora, “Ing'inga yiza lwa vandu kutura mu madaala manyingi valakaze mu lidaala lia Jerusalemi. 21Avandu vi lidaala lilala valakavoolere avandu vi lidaala lindi, ‘Kuziiza kusigamira Yahova Wuvunyali kandi koteeva vugasu vwivwe. Hambi kuzie harara!’ 22Avandu vanyingi kandi zihiiri zie zinguru zilakaze mu Jerusalemi kusigamira Yahova Wuvunyali kandi koteva vugasu vwivwe. 23Mu madiku yago, vasaza 10 kutura muvivala vigeni valakaze ku Muyuda mulala no kovora, ‘Kwenya komenye harara na vandu vovo, kigira kumali kuhulira ndi Nyasaye aveeye harara nimunyi.’ ”
Terpilih Sekarang Ini:
ZAKARIA 8: LOGOOLI
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
©Bible Society of Kenya, 2019