Matiyo 4
4
Tɛgai nii é zeelini Yesu ma
(Maleke 1:12-13; Luke 4:1-13)
1Naa ʋoluma, GALA Zɛnvui loni Yesu luɠɔ, é lii la teʋebai zu, nii a kɛ Inɛgi tɛ ga. 2Kpegai ma ga zugi zo folo ʋuunaanigɔ (40) ta kpidi ʋuunaanigɔi (40) laawu, pului soni. 3Tɛga nui maaɓuɠani ba, é ɠɛ ma: «Tɛi è ga GALA Doun Zunui, devei ve kɔtui niiti zea, ti valibo ga ɓului.» 4Kɛlɛ Yesu gooɠaaʋoteni, é ɠɛ ma: «Sɛʋɛʋɛ GALA Sɛʋɛi zu ga: ‹Nui la zɛnvui woga ga daamianigi nɔ, kɛlɛ kɛni wooiti pɛ maaʋele ti ɠulazu GALA da.›#4:4 TSV 8:3 bogɛ é zoloo Gɛlɛke woo zɛʋɛ wɔlɔmai ma.»
5Naa ʋoluma, Inɛgi liini la Zeluzalɛme, taa ɲadegai, é pilɛ GALA sei ʋɛlɛi ungaʋɛ, 6é ɠɛ ma: «Tɛi è ga GALA Doun Zunui, ʋili bu, mazɔlɔɔ sɛʋɛʋɛ GALA Sɛʋɛi zu ga: ‹Toɠa devei ve ná-geezuɠeelaiti zea ɗa-vaa zu.› Bogɛ ɓalaa ga: ‹Ta è la yeezu, nii a kɛ è-ɠɔɠɔi mina ziɠa kɔtu ʋa.› »#4:6 Guy 91:11-12 bogɛ é zoloo Gɛlɛke woo zɛʋɛ wɔlɔmai ma. 7Yesu gooɠaaʋoteni, é ɠɛ ma: «Sɛʋɛʋɛ ɓalaa GALA Sɛʋɛi zu ga: ‹Mina Maliɠii ɗa-ƓALAGI zuɠɔɠɔ.›#4:7 TSV 6:16.»
8Naa ʋoluma, Inɛgi liini la gize gaaɠooza golai ta unmaʋɛ, é eteai zu masadai pɛ dɛɛ la, naa ʋɛɛ ma lɛbiyai pɛ ba, 9é ɠɛ ma: «Nà nii pɛ fe è ya, ni ɗa nɔkɔna bù.» 10Názu ɠa Yesu ɠɛni ma la: «Zeɠe kòba, Setana! Tɔɔzei sɛʋɛʋɛ GALA Sɛʋɛi zu ga: ‹Nɔkɔ Maliɠii ɗa-ƓALAGI wu, tɔ ɠila kpe nɔ ɠa ɗa dɛbi.›#4:10 TSV 6:13.»
11Naa ʋoluma, Inɛgi zeɠeni koba. Geezuɠeelaiti ti ʋaani, ti ɗa maaleʋebo.
Yesu ná-botii lɔɔzei vai Galilé
(Maleke 1:14-15; Luke 4:14-15)
12Yesu mɛnigai ma ga ti Zan ʋiligɛ kasoi ɠa, é liini Galilé yooi zu. 13Naa ʋoluma, é zeɠeni Nazalɛte, é li, é zei Kapɛɛlɛnawume taazuʋɛ, Galilé ɗɛ wolai ɠobaʋɛ, Zaɓulɔn ta Nɛfɛtali ɠoʋii ma, 14naa ɠa a kɛ GALA goo wo nui Ezayi wooi ʋilɛsu, nii é boni ga:
15«Zaɓulɔn ta Nɛfɛtali yooi,
niiti ti kpoloɗɛi ma ʋelei zu,
Zuludɛn ziɛ ʋoluʋelei yooi,
Galilé yooi, ʋɛ zii ɠiligiti ti zeini ná:
16Nuɓusɛi niiti ti zeini kpidii zu,
naati ti wozakala golai ʋɛtɛga.
Niiti ti zooi zu kpidi ɓɔii zu,
wozakalagi ɠulaa naati bɛ.»#4:15-16 Eza 8:23—9:1.
17Naama ziɛgi zu ɠa Yesu tɔɔzeini la niina ga GALA daawooi laazeelia, é ɗa ɠɛ ma: «À wo-ziɛ ʋelei maavalibo, tɔɔzei geeɠɔlɔgi ma masadai maaɓuɠaa.»
Yesu ná-kaladopo mɔungiti toli fai
(Maleke 1:16-20; Luke 5:1-11)
18Yeeta, Yesu yɛni leʋesu Galilé ɗɛ wolai laaʋɛ, é ɠɛɛɠɛloun felegɔ ɠa. Ma mɔungi laaseigi ɠɛni ga Simon (nii é lolisu ɓalaa ga Piyɛlɛ), kɛɛɠɛloin laaseigi ɠɛni ga Andelé. Ti ɠɛni kale ɓɛɛ lumɔi ʋilisu ziɛ wolai wu, tɔɔzei ti ɠɛni ga kale ɓɛɛ nuiti. 19Yesu ɠɛni ti ma: «À ʋilɛ pòlu, nà wo ɠɛ ga nu ɠaiziɛ nu.» 20Gaamago, ti ta-lumɔiti zɛni ná, ti ʋilɛ polu.
21É yɛni liizu ga ná-pelei naa nɔ, é ɠɛɛɠɛloun felegɔ ɠiligaa ɠa: Zeɓedé ná-doun zunui Zake, ta kɛɛɠɛloin Zan. Ti ɠɛni keingi zu ta ti-ɠɛɛ Zeɓedé, ti ɗa ta-lumɔiti kpɛtɛ. É ti lolini. 22Gaamago, ti ta-ɠeingi yɛni ná ta ti-ɠɛɛ, ti ʋilɛ Yesu ʋolu.
Yesu kalagi wo fai ta nuiti kɛdɛ fai
(Luke 6:17-19)
23Naa ʋolu, Yesu ɠɛni leʋeteʋesu Galilé yooi zu ná pɛ, é ɗa kalagi wo GALA dɛbi ʋɛlɛiti bu, é ɗa GALA ná-masadai ma Woo Niinɛ Ʋagɔi laazeeli, é ɠɛni seeɓɛ nuiti ta maalɛɠɛfɛ nui ma zii pɛ kɛdɛsu. 24Tɔɠɔi ɠulani, é zeeli Siili yooi zu ná pɛ. Ti ɠɛni ʋaazu pɔ ga seeɓɛ nuiti ta niiti kpein ti ɠɛni zoolɛzu ga ʋe kɛʋelei pɛ su, inɛ su nuiti, fɔlivɔli nuiti, kɔlɔsama nuiti, tama é ɠɛni naati pɛ kɛdɛsu. 25Bɛbɛ wolai ɠɛni ʋilɛsu polu, ti ɗa zeɠe Galilé yooi zu, ta Taa Wola Puugɔiti su, ta Zeluzalɛme, ta Zudé yooi zu, naa ʋɛɛ Zuludɛn ʋoluʋele yooiti ba.
Terpilih Sekarang Ini:
Matiyo 4: GDZ
Highlight
Kongsi
Bandingkan
Salin
Ingin menyimpan sorotan merentas semua peranti anda? Mendaftar atau log masuk
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
