Matiyo 3
3
GALA keelai Zan Ɓatisete
(Maleke 1:1-8; Luke 3:1-18; Zan 1:19-28)
1Naama ziɛgi zu Zan Ɓatisete ɠulani kɛlɛma, é ɠɛni GALA daawooi laazeelizu teʋebai zu Zudé yooi zu. 2É ɠɛni ɠɛɛzu ma: «À wo-ziɛ ʋelei maavalibo, tɔɔzei geeɠɔlɔgi ma masadai maaɓuɠaa.» 3Zan ɠa GALA goo wo nui Ezayi vaani ma, siɛgi zu é ɠɛni la ma:
«Nui ta ɠa ɓainsu teʋebai zu, é ɗa ɠɛ ma:
‹À Maliɠii ná-pelei ɓɛtɛ bɛ.
À ná-pele goiti sɔle.› »#3:3 Eza 40:3 bogɛ é zoloo Gɛlɛke woo zɛʋɛ wɔlɔmai ma.
4Zan ɠɔba zeɠei ɠɛni ga seɠei fɛlɛai ga ɲɔmɛ leɠai, ná-saamaɠiligi ɠɛni ga kɔlɔ ʋaai. Kɔnɔgi ɠɛni ga kotogi ta dɔɓɔ ɠɔin gulɔi. 5Nuiti ti ɠɛni ʋaazu pɔ, ti zeɠe Zeluzalɛme, ta Zudé yooi zu ná pɛ, ta Zuludɛn ɠoba yooi pɛ su, 6é ɗa ti ɓatize Zuludɛn wu, ti ɗa laa zɔ ga ga ta-ɠotoiti.
7Faliziɛinti ta Saduseyɛinti ti ɠɛni ʋaazu pɔ ga mɔinɗa, ti ɓatize fai ma. É ɠɛni ti ma: «Pɛɛɠaali zuwuzuiti! Ɓɛ ɠa é wo ɠalaga ga wo ʋela GALA ná-ziiɠaawanai ʋa, é ʋaazu? 8À kɛɛwotiiti kɛ, niiti ti dɛɛzu ga wo wo-ziɛ ʋelei maavaliboga. 9À mina ɠisiɛ nɔ, wo ʋa ɗa bo yiimaʋɛ ga: ‹Ada ga Abalaame mavofodaiti.› Mazɔlɔɔ gè bo wo ma, zobogi ɠa GALA bɛ, é kɔtui niiti falibo ga Abalaame mavofodaiti. 10Zoovɛi laa ɠana vɔlɔ gulu zapeiti ba. Gulu nɔpɛ é la gwaa ʋagɔ wosu, naa ɠa leʋe ga, é ʋili abui zu.
11«Nɔ̀un, nà wo ɓatizesu ga ziɛi, é ɠɛ ga poogi ga wo wo-ziɛ ʋelei maavaliboga. Kɛlɛ zɔi é ʋaazu nɔ̀un poluma, sɛbɛi wɔɔlɔʋɛ nɔ̀nɔi ʋa. Gè la vɔlɔ kula ɠɛɛni su ga gè ʋa ná-saʋalagiti seɠe. Tɔun, toɠa wo ɓatize ga Zɛnvu Ɲadegai ta abui. 12Ná-sɛpɛgi ɠa zoni zea. Toɠa ná-molo loɠazuʋɛ ɓalesu, é moloi ɠaalɛ ba, é pu molo ɠotai zu, kɛlɛ toɠa molo ɠaʋai ɠala abui zu, nii é la zaa eyɛsu pɛ.»
Yesu ɓatize fai
(Maleke 1:9-11; Luke 3:21-22)
13Naama ziɛgi zu, Yesu zeɠeni Galilé yooi zu, é ʋa Zuludɛn ziɛlaʋɛ Zan ʋɔ bɛ, ga naa kpatize. 14Kɛlɛ Zan ɠɛni pɔ é ɠɛlɛ, é ɠɛ ma: «Nɔ̀un mu ka kpɛ̀dɛi ba ga è nɔ̀un kpatize, kɛlɛ ɗɔun ɗa ʋaazu pɔ̀ ɠale!» 15Kɛlɛ Yesu gooɠaaʋoteni, é ɠɛ ma: «Va bu, é ɠɛ ɠana dɛ niima ziɛgi zu. Ʋele ɠana de maanɛai la, ga de GALA ziima vaiti daazeeli la.» Zan vaani naa wu. 16Yesu ɓatizegai ma feya, é ɠulani ziɛi wu. Geeɠɔlɔgi laalaoni, é GALA Zɛnvui ɠa, é ɗa yei eɠɛ poopogi, é ʋa, é zei ma. 17Wooi ta ɠulani geeɠɔlɔgi zu, é ɠɛ ma: «Nii ɠa é ga nɛ̀ɛbɛ Loun Zunui, nii é gòla yiilaazu.»
Terpilih Sekarang Ini:
Matiyo 3: GDZ
Highlight
Kongsi
Bandingkan
Salin
Ingin menyimpan sorotan merentas semua peranti anda? Mendaftar atau log masuk
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
