Ayat Alkitab yang Popular daripada Ruma 8

Sikitew is langun he mahal is Megbevayà diyà te g̵ehinawa zin, sikitew is midhimu zin he meketuu sumalà is tuyù diyà te isip din, netuenan tew he pinaag̵i te minsan hengkey he egkehitavù kenitew, edtuvazan kiw zin gihapun te meupiya.

Ne netuenan ku he wazà minsan hengkey he ebpekepesuwey kenita ziyà te zekelà he g̵ag̵ew kenita he impaahà te Megbevayà pinaag̵i te Nengazen tew he si Jesu Kristu. Su minsan kayi te uuyag ki pa wey ke ebpatey ki en be, ne kenà egkeawà is gag̵ew zin kenita. Kenà egkeawà te menge velinsug̵uen din wey te menge mezaat he mulin-ulin. Kenà egkeawà te minsan hengkey he egkeulaula g̵untaan wey egkeulaula keuzemà. Kenà daan egkeawà te minsan hengkey he kedesenan. Is menge kedesenan he ziyà te utew metikang wey is menge kedesenan he ziyà te utew mezalem, wey is minsan hengkey he linimbag, ne kenè dan ebpekepesuwey kenita ziyà te g̵ag̵ew kenita te Megbevayà he ibpeehè din kenita pinaag̵i ki Jesu Kristu he iyan Nengazen tew.

Ne elin daan baal te Wag̵as he Mulin-ulin is: sikita is kenà metau, edtevangan ki zin su kenè ta egketuenan is hustu he id-ampù, iyan, is Wag̵as he Mulin-ulin, ne iyan sikandin ebpengeetuvang te Amey tew he Megbevayà pinaag̵i te kedhangyù he kenà egkehimu te kineg̵iyan te etew.

Ne emun ed-isipen ta is langun kayi, egketuenan ta he tutuu iyan he iyan duma ta is Megbevayà ne wazà minsan hentei he ebpekekaid kenita.

Ne sikita is nekidsevaha ki Jesu Kristu, kenè ki en egkehukuman te silut.

Ne emun iyan ebayàbayà te isip te etew is menge mezaat he suat te lawa zin, edsilutan sikandin te kemetayen he wazè din pidtemanan. Iyan, emun iyan mulà ebayàbayà te isip din is Wag̵as he Mulin-ulin, wazà pidtemanan te untung din, ne melinew en is kedepitè dan te Megbevayà.

Ne minsan pa ke egkerasey ki kenè ki ebpetalew su ebpekeveg̵ey kenita te kelipey is ked-entusa ta kayi, ne pinaag̵i te g̵ehem ni Kristu, iyan ki ebpekezaag su utew zekelà is gag̵ew zin kenita.

Ne netuenan ku he is kemereg̵enan he egkeseg̵azan ta g̵untaan dini te kelibutan, ne wazà mekesusuluwan te utew kegkelavew he ibeg̵ey kenita keuzemà.

Ne emun iyan haazà ne wazà minsan hengkey he ebpekepesuwey kenita ziyà te ki Kristu. Minsan ke egkerasey ki te kemereg̵enan wey samuk wey pesipala; minsan ke egkereg̵enan ki te vitil ne wazè ta ugelingen; minsan ke egkekeizan ki ne edhimetayan ki; ne kenà egkeawà is kebmahal ta ziyà te g̵ehinawa ni Kristu.

Ne is Amey tew he Megbevayà he nesayud te menge isip tew, netuenan din ke hengkey is diyà te isip te Wag̵as he Mulin-ulin. Ne haazà is idhangyù te Wag̵as he Mulin-ulin tenged kenitew te menge anak te Megbevayà, iyan daan egkesuatan te Megbevayà te ebeg̵ey kenitew.

Su emun ed-eg̵aken is minsan hentei te Wag̵as he Mulin-ulin tutuu en he anak sikandin te Megbevayà.

Su is minsan hentei he iyan ebayàbayà kandin is mezaat he suat din, iyan din dà egkeisip is egkesuatan te menge mezaat he kebayà te lawa zin. Ne is minsan hentei mulà he iyan ebayàbayà kandin is Wag̵as he Mulin-ulin, iyan dekelà diyà te g̵ehinawa zin is egkesuatan te Wag̵as he Mulin-ulin.

Su minsan is Anak din he si Jesus, wazè din menug̵uni, kekenà, midsug̵ù din wey mekepehimatey he elili kenita. Ne emun iyan haazà gag̵ew zin kenita, kenà egkehimu he kenè din daan ibeg̵ey kenita is langun he impenaad din kenita.

Iyan is Wag̵as he Mulin-ulin is ebpesavut kenitew he menge anak kiw iyan te Megbevayà. Ne g̵eina te anak ki zin, keuzemà egkezawat ta is langun he meupiya he impenaad din kenita, ne kenà duen dà taman, su is minsan hengkey he ibeg̵ey zin ki Kristu, ibeg̵ey zin daan kenita. Iyan, wey ki zà ebpekeambit te utew meupiya he kebpekesavuk ni Kristu ke ed-entusen ta is menge kemereg̵enan tenged te kedtuu ta, iring te si Jesu Kristu, nekeantus daan te kemereg̵enan.

Emun ebeyveyaan is isip te etew te menge mezaat he kebayà te lawa zin, kuntada sikandin te Megbevayà su kenè din edtumanen is menge sug̵ù te Megbevayà. Ne kenà duen dà taman su kenà egkehimu he egketuman din.

Ne utew meheg̵et is kebperetenga te langun he menge linimbag te timpu keuzemà he zutun ibpaahà te Megbevayà is menge anak din he edtulusen.

Ne netuenan ta he is tivuuk he linimbag, ne iring te vahi he ebeliliten he utew edlised su puun pa zengan taman en guntaan ne utew edlised is tivuuk he linimbag tenged te meheg̵et is kebperetenga zan te timpu he id-awà te Megbevayà is kegkezeeti zan wey kegkeredak dan.