СУРГААЛТ ҮГС 20:1-30 - Compare All Versions

Хуваалцах

Дарс бол басамжлагч, сархад бол агсамнагч, эдгээрт согтуурсан хэн боловч мэргэн биш. Хааны хилэгнэл болбоос арслангийн архиралт мэт бөгөөд Түүнийг уурлуулах хүн бүр амьдралаа алдана. Эвдрэлцлээс зайлсхийх нь хүмүүнд хүндэтгэл юм. Харин ямар ч мунхаг хүн хэрүүл хийнэ. Залхуу хүн газраа цагт нь хагалахгүй. Тиймээс ургац хураах үед тэр юу ч үгүй хоцорно. Хүмүүний зүрхэн дэх төлөвлөгөө гүн ус мэт бөгөөд Ухаантай хүн тэрхүү усыг гадагш гаргана. Ихэнх хүмүүс өөр өөрсдийн үнэн зөвийг тунхагладаг ч Итгэл найдвартай нэгнийг хэн олж чадах вэ? Шударга зөв хүн гэм зэмгүй явдаг. Тийм хүний үр хүүхдэд ерөөл оршино. Зөв шударгын ширээнд залрагч хаан харцаараа хамаг хорон муу зүйлийг хөөдөг. Хэн “Би зүрх сэтгэлээ цэвэрлэв. Би нүгэл хилэнцээсээ ариусав” хэмээн хэлж чадах билээ? Зөрүүтэй хэмжүүр ба дэнсний аль алийг нь ЭЗЭН жигшдэг. Өөрийнхөө үйлсээрээ ба хандлага нь ариун болон зөв байвал залуу хүн өөрийгөө харуулдаг. Сонсох чих болон харах нүдний аль алийг нь ЭЗЭН бүтээсэн. Нойрыг бүү хайрла, эс тэгвэл чи ядуу болно. Нүдээ нээ, тэгвэл чи хоол хүнсээр элбэг дэлбэг байна. Худалдан авагч нь “Энэ нь ч муу. Тэр нь ч муу” гэж өөлж голдог атлаа Аваад явсныхаа дараа түүгээрээ сайрхдаг. Алт болон тоо томшгүй эрдэнэс байдаг боловч Мэдлэгийг ярих уруул болбоос хамгийн нандин зүйл юм. Гаднын хүний өмнөөс батлан даагчийн дээлийг тайлж ав. Харь хүний өмнөөс батлан даагч нь өөрөө олз болно. Буруу замаар олж авсан талх хүнд амттай байж болох юм. Гэвч эцэст нь түүний ам хайргаар дүүрэх болно. Төлөвлөгөө зохиохдоо зөвлөгөө ав. Мэргэн удирдамжийн дагуу дайт. Цуурхал тарааж явдаг хүн нууцыг задруулдаг. Тиймээс хов живтэй бүү орооцолд. Эцэг эхийгээ зүхдэг хүний дэнлүү түнэр харанхуйд бөхнө. Эхэндээ үтэр түргэн олддог өв залгамжлал нь эцэстээ ерөөгдөхгүй. “Хорон муугийн хариуг би өгнө дөө” гэж бүү ярь. ЭЗЭНийг хүлээ, Тэр чамайг аварна. Зөрүүтэй дэнсийг ЭЗЭН жигшинэ. Хуурмаг жин сайн зүйл биш ээ. Хүмүүний алхаа гишгээг ЭЗЭН залдаг. Тэгвэл хүмүүн өөрийнхөө замыг хэрхэн мэдэж чадах билээ? “Энэ бол ариун” хэмээн хурдан хуумгай хэлээд, Тангарагласныхаа дараа лавлан эргэцүүлэх нь хүмүүний хувьд хавх юм. Мэргэн хаан хар санаатнуудыг шигшиж, Тэдний дээр тээрмийн чулуу эргүүлнэ. Хүний сүнс бол түүний дотоодын мухарт буйг ч нягтлан үздэг ЭЗЭНий дэнлүү билээ. Үнэн хийгээд шударга зан хааныг хамгаалдаг бөгөөд Тэрээр хаан ширээгээ зөв шударгаар барьдаг. Залуусын алдар суу нь тэдний хүч тэнхээ. Өтгөсийн хүндлэл нь тэдний буурал үс. Шархны ором нь хорон мууг цэвэрлэдэг. Мөн цохилтууд нь зүрхний мухарт ч хүрнэ.

Дарс нь басамжлагч, сархад нь агсамнагч Мэргэн бус нь эдгээрт хөлчүүрхэх. Хааны хилэгнэл арслангийн архираан Түүнийг уурлуулах нь амийнхаа эсрэг нүгэл. Эвдрэлцлээс зайлсхийх нь хүндэтгэл. Хэрүүлд ухасхийх нь мунхаглал. Залхуу нь цагтаа газраа үл хагалах. Ургацын үед олдох юмгүй хоцрох. Хүний зүрхэн дэх зорилгууд гүний ус Ухаан бодролт хүн үүнийг гадагш гаргах. Өөрийгөө итгэмжит хэмээн тунхаглах хүн олон ч Найдвартай гэчихээр хүн олдох уу? Зөвт хүн гэм зэмгүй явах. Үрс нь түүнээс хойш ч ерөөгдөх Шүүлтийн сэнтийд залрагч хаан Хамаг ёрын мууг харцаараа шигшинэ. Хэн “Би зүрхээ цэвэрлэв Би нүгэл хилэнцээсээ цэвэршив” гэж хэлж чадах билээ? Зөрүүтэй хэмжүүр ба дэнсний Аль аль нь ЭЗЭНд жигшүүр. Хүүхэд ч үйлдлээрээ, Цэвэр хийгээд зөв шулууныг үйлдэх эсэхээрээ танигдана. Сонсох чих, харах нүдний Аль алийг нь ЭЗЭН бүтээж өгсөн. Нойронд бүү дурла, эс тэгвээс чи ядуурна Нүдээ нээ, тэгвэл талхаар цадах болно. “Тааруу юм, муу юм” гэсээр хүмүүс худалдан авдаг ч Дараа нь түүгээрээ сайрхах аж. Алт ба эрдэнийн чулуу олон ч Мэдлэгийн уруул болбоос хамгийн үнэт гоёл. Гаднын хүнийг батлан даагчийн дээлийг ав Хөндлөнгийн хүний улмаас түүнийг барьцаал. Хуурмаг замаар олсон талх амттай ч Хайргаар ам нь дүүрнэ, эцэстээ. Төлөвлөгөө зохиохдоо зөвлөгөө ав. Мэргэн удирдамжийн дагуу дайт. Цуу тарааж явагч нууцыг задруулах тул Хагархай амтантай бүү орооцолд. Аав ээжийгээ зүхэгчийн дэнлүү Тас харанхуйд бөхөх. Эхэнд түргэн олдсон өв залгамжлал Эцэстээ үл ерөөгдөх. “Ёрын муугийн хариуг өгнө дөө, би” гэж бүү ярь. ЭЗЭНийг хүлээ, Тэр чамд тусална. Худал туухай ЭЗЭНд жигшил. Хуурмаг дэнс сайн зүйл бус. Хүмүүний бүхий л алхааг ЭЗЭН зааварлах. Хүн өөрийн замаа хэрхэн ойлгох? “Ариун юм байна” гэж яаруу хэлчихээд Амласныхаа дараа эргэцүүлэх нь хавх аж. Мэргэн хаан буруутнуудыг ялган шигшиж, Мөнөөх хэдийг дугуйгаар бяц дайруулна. Хүний сүнс ЭЗЭНий дэнлүү Хамаг дотрыг нь нягталюу. Хааныг тогтоогч нь энэрэл хайр ба үнэн Хаан сэнтийг тулагч нь зөвт байдал юм. Залуусын алдар нь хүч тэнхээ. Өтгөсийн гоёл нь буурал үс. Цохиурын шарх ёрын мууг цэвэрлэх. Зодуур нь хамаг дотрыг цэвэрлэх.