مَتَّى 3
3
كلام النبي يَحْيَى
1فِي الزَّمَنْ دَاكْ، يَحْيَى الْمُغَطِّسْ جَاءْ يِبَشِّرْ النَّاسْ فِي كَدَادَةْ دَارْ الْيَهُودِيَّةْ. 2وَ يُقُولْ: «يَلَّا! تُوبُوا مِنْ ذُنُوبْكُو! أَشَانْ مَمْلَكَةْ اللّٰهْ قَرَّبَتْ.» 3وَ يَحْيَى هُو النَّادُمْ الْحَجَّى بَيَّهْ زَمَانْ النَّبِي إِشَعْيَا. وَ النَّبِي قَالْ:
<فِي حِسّ قَاعِدْ يِعِيطْ فِي الْخَلَاءْ
وَ يُقُولْ:
«جَهُّزُوا دَرِبْ الرَّبّ وَ
عَدُّلُوا لَيَّهْ الطُّرُقْ.»>#3:3 الكلام دا تلقوه في إشَعْيا 40:3، حسب الترْجمة اليونانيّة.
4وَ يَحْيَى لَابِسْ خَلَقْ مِنْ صُوفْ أَلْبِلْ وَ رَابِطْ صُلْبَهْ بِسَيْر وَ قَاعِدْ يَاكُلْ جَرَادْ وَ عَسَلْ النَّحَلْ. 5وَ نَاسْ مَرَقَوْا وَ مَشَوْا لَيَّهْ مِنْ مَدِينَةْ الْقُدُسْ وَ مِنْ كُلَّ دَارْ الْيَهُودِيَّةْ وَ مِنْ كُلَّ الْحِلَّالْ الْجَنْب بَحَرْ الْأُرْدُنْ. 6وَ أَعْتَرَفَوْا بِذُنُوبْهُمْ وَ يَحْيَى غَطَّسَاهُمْ فِي بَحَرْ الْأُرْدُنْ.
7وَ يَحْيَى شَافْ أَمْبَيْنَاتْهُمْ نَاسْ كَتِيرِينْ مِنْ الْفَرِيزِيِّينْ وَ الصَّدُّوقِيِّينْ. وَ هُمَّنْ مَاشِينْ لَيَّهْ أَشَانْ هُو يِغَطِّسْهُمْ. وَ قَالْ لَيْهُمْ: «يَا عِيَالْ الدَّابِي! يَاتُو الْقَالْ لَيْكُو أَجْرُوا مِنْ الْعَذَابْ الْجَايِ؟ 8سَوُّوا الْعَمَلْ الْيِوَصِّفْ كَدَرْ إِنْتُو تُبْتُوا بِالصَّحِيحْ! 9وَ مَا تُغُشُّوا نُفُوسْكُو. مَا تُقُولُوا: ‹مَا عِنْدِنَا عَيْب أَشَانْ أَنِحْنَ عِيَالْ إِبْرَاهِيمْ.› نُقُولْ لَيْكُو اللّٰهْ يَقْدَرْ يِشِيلْ حُجَارْ مِنْ التُّرَابْ وَ يِسَوِّي مِنْهُمْ عِيَالْ لِإِبْرَاهِيمْ فِي بَدَلْكُو! 10شِيفُوا، الْفَاسْ جَاهِزَةْ لِتَقْطَعْ الشَّدَرَةْ مِنْ عِرِقْهَا. أَيِّ شَدَرَةْ الْمَا تَلْدَ عِيَالْ عَدِيلِينْ يَقْطَعَوْهَا وَ يَزْقُلُوهَا فِي النَّارْ.
11«أَنَا نِغَطِّسْكُو بِأَلْمِي أَشَانْ إِنْتُو تُبْتُوا مِنْ ذُنُوبْكُو. وَ لَاكِنْ نَادُمْ وَاحِدْ جَايِ وَرَايِ قَادِرْ مِنِّي بِلْحَيْن وَ أَنَا مَا تَمَّيْت لَيَّهْ خَدَّامْ كُلَ. وَ هُو يِغَطِّسْكُو بِالرُّوحْ الْقُدُّوسْ وَ بِنَارْ. 12وَ عِنْدَهْ طَبَقْ فِي إِيدَيْنَهْ لِيِغَرْبِلْكُو مِثِلْ الْغَلَّةْ. وَ يِلِمّ غَلِّتَهْ مِنْ الْمَدَقّ وَ يُصُبَّهَا فِي دَبَنْقِتَهْ. وَ لَاكِنْ الْأُتَّابْ يُتُشَّهْ فِي النَّارْ الْمَا تُمُوتْ أَبَداً.»
المسيح غطّسوه
13وَ عِيسَى مَرَقْ مِنْ دَارْ الْجَلِيلْ وَ مَشَى فِي بَحَرْ الْأُرْدُنْ أَشَانْ يَحْيَى يِغَطِّسَهْ. 14وَ لَاكِنْ يَحْيَى بَدَا يَابَى وَ قَالْ: «وَاجِبْ أَنَا نَجِي لَيْك أَشَانْ إِنْتَ تِغَطِّسْنِي! وَ كِكَّيْف تِدَوْر أَنَا نِغَطِّسَكْ؟» 15وَ عِيسَى قَالْ لَيَّهْ: «مَا تَابَى. خَلِّي يَبْقَى مِثِلْ دَا أَشَانْ نِتِمُّوا كُلَّ شَيّءْ الْاللّٰهْ بِدَوْرَهْ.» وَ خَلَاصْ، يَحْيَى قَصَّدْ وَ غَطَّسَهْ.
16وَ وَكِتْ غَطَّسَهْ خَلَاصْ، عِيسَى قَمَّ مِنْ الْأَلْمِي وَ طَوَّالِي السَّمَاوَاتْ أَنْفَتَحَوْا وَ شَافْ رُوحْ اللّٰهْ جَايِ مِنْ السَّمَاءْ وَ نَزَلْ فَوْقَهْ مِثِلْ حَمَامَةْ. 17وَ حِسّ مِنْ السَّمَاءْ أَنْسَمَعْ وَ قَالْ: «دَا بَسْ إِبْنِي وَ أَنَا نِحِبَّهْ. أَنَا فَرْحَانْ بَيَّهْ بِلْحَيْن.»
Одоогоор Сонгогдсон:
مَتَّى 3: ع.د.ت19
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
La Bible en arabe tchadien © Alliance biblique du Tchad, 2019