फिलिप्पि 4
4
पावलऎ याॽमिचि चिन्मिम्पा
1मसॆ काम् बुबुनानुसाचो, काङॆ आन्ना एट्टान नाम्नाम् पिस्सिकानि। काङॆ आन्ना होइखेपा सङ्क एट्टान चुप्मा मिडानि। आन्नॆ काङा हाङ्हाङ् मुडिङ्नि हाङ् काङा आन्नाबि नाबुक् ठेरुॽङा। काम् बुबुनानुसाचो, गरॽहाङ्न आन्ना पारभुबि चॆकुवॆ लिसे पेन्ढाङ्सानॆ।
2काङॆ इयोडियानुङ् सुन्टुखॆ आन्चिना पारभुबि एक्कन निवाँ मुसाचॆ कामानुङ् नुःर लोक्चिना। 3हाङ् काम् निवाँऎ चामिम्पा लाङ्काम्, इघा मामाचि पाइबाकाम्चिनॆ, मान्ठाभनॆ नुऎ खानावाँ खेम्मिॽमाम् लागि खोचिऎ काङानुङ्न योम्पक् मुडाचि। हाङ् काङानुङ् टेःॽन हॆॽनॆ, टर खोचिऎ क्लेमेस नुङ् हानाम्स लुक्खॆॽनॆ हिङ्खामा टक्चामिम्पाचिमि निङ् साप्मॆ साब्चिराबि निङ् चुखुबा होइढा काम् लाङ्काम्चि नुङ् सङ्क योम्पक् मुडाचि।
4हानाम्स पारभुबि हाङ्हाङ् मिनानॆ कॆ हस लोकानि, हाङ्हाङ् मिनानॆ। 5आन्ना चोब्न याॽमिचि नुःर आङ्खुबा लिसानॆ। पारभु सॆॽलन टामॆ पाइ। 6हाङ् माङ् खानावाँबि सङ्क निवाँ आफॆरानॆ, टर आन्ना पाबुहा ठकामि लागि निवाँहाङ् नुङ् पारठाना लॆटानॆ हाङ् ओहाक् पिस्से निवाँहाङ् नुङ् ङागानॆ। 7आक्र लॆटानि हाङ्ग, निवाँहाङ्ऎ आन्ना सान्टि नेन्चाखुबा याॽमिचि मुकानि। ग आङ्मॆ खानावाँ चाइ आसॆस वाब्मा हेसुचिनि। हाङ् ग खोम् सान्टिऎन आन्नामि लावा हाङ् निवाँ खिरिस्ट येसुबि कोब्से डोब्से युङुकु।
8बुबुनानुसाचि, आन्नॆ चाइबानऎ, ङेप्मालॆऎ योम्पक, सॆङ्सॆङॆ, नुऎ, होइढाचिऎ चेन्चामालुऎ, हाङ् एमये लोमाहा योम्पक् यिगानॆ। 9आन्नॆ काङाबाङ् चिनानि हाङ् काङॆ लोमिम्पा खेम्डाम्नि। आन्नॆ काङामि खानावाँ खेमाम्नि हाङ् काङा मान्टहाङ् पाइङॆ लोमॆ खानावाँ खाङ्डाम्नि। हाङ् आन्नॆ काङाबाङ् चिन्मिम्पा खानावाँ टिङाम्नॆ। हाङ् आन्ना सान्टि पिक्खुबा निवाँहाङ् आन्नानुङ् लि।
भेटिमि लागि ओहाक्
10पारभुबि काङा एट्टान हाङ्हाङ् लिडिङ। ऎॽवा डिना डॆङ्पि आन्नॆ काङा मिॽलाइङ्नि। ग लोमिम्पा चाइ याॽलि काङा मामिॽलाइनि लोमिम्पा हॆॽनॆ, टर आन्नॆ काङा हुक्सक् पिॽमानुङ् मिॽलामॆ लः मान्टक्चामिम्पा लॆटाम्नि। 11काङा याङ् पाब्डिङॆसॆ ग काॽङॆ हॆॽनॆ मान्ठाभनॆ काङाबि माङ् चु, आक्कनुङ्न चेन्चामा कॆ लेकुङ। 12हाङ् पाबुहा ठका माइङ्र हाङ् डिरिक् चुक्ल सङ्क मान्टहाङ् हिङ्चामा लॆ लोमॆ लेकुङ। बखार चाटक्ङार सङ्क, साग्मेन्चा लिॽङार सङ्क मिःक्म चुक्र हाङ् डिरिक् चुक्र सङ्क मान्टहाङ् चेन्चामा लॆ लोमॆ लेकुङ। 13हाङ् खिरिस्टऎ काङा पिडिङॆ चॆक्मावाबाङ्न इघा चोब्न कॆ लॆहिकुङ।
14हाङ्स काङामि डुखाबि पाब्डिङॆ ठका पिट्टिङ्निहाङ् आन्नॆ एट्टान काम्नुऎ योम्पक् यिगानि। 15हाङ् याॽलि काङॆ नुऎ खानावाँ खेम्मिटुङ्चि हाङ् माकेडोनिया याइडामार काङा याङ् पिॽहाङ्खुबा आन्ना टेःॽन लॆटानि लोमॆ आन्नॆ लेकाम्निन। 16मान्ठाभनॆ ठेस्लोनिकिबि सङ्क काङा पाबुॽङॆ ठका आन्नॆॽन एक्क हिच्चि खेपा पिट्टिङ्नि। 17काङॆ आन्नाबाङ् याङ् टक्चामाम् लागि हॆॽनॆ, टर आन्नॆ काङा नाम्नावाँ लॆॽमिम्पासॆ निवाँहाङ्ऎ आन्ना आसिका पिट्टानि कामानुङ् मिनुॽङा।
18काङा पाब्ङानि। आन्नॆ इपाफोरोडिटासमि हुक्पि पाहाङ्पिॽमिम्पा याङ् टक्चाडुङ् हाङ् गसॆ काङा खेडिङ। हाङ् काङा पाप्डिङॆबाङ्स डिरिक टक्चाउङ। इघा खानावाँ चाइ निवाँहाङ्मि लागि नाम्नुऎ नुङ् नेन्चाकुवॆ हाङ् चेन्चामिक्खुबा सङ्टिॽमॆ खानावाँ रेम। 19हाङ् काङॆ चुङुकुङॆ निवाँहाङ्ऎन आन्ना पाबुहा चोब्न खानावाँ पिकानि। खोनुङ् ङेनङेप्हिनॆ चासुम् चु, आक्क खोसॆ येसु खिरिस्टमि याॽमिचि पिकुचि। 20कानिम् निवाँहाङ् आपामि हानाम्स निङ्लावा लिढाङ्र। आमेन।
डॆङ्पिऎ खानावाँ
21हाङ् खिरिस्ट येसुबि निवाँयुङ् लॆखुबा चोब्न सॆङ्सॆङॆ बुबुनानुसाचि काङॆ स्यामिकुङ्चि यो। हाङ् गुबि काङानुङ् चुखुबा बुबुनानुसाचिऎ सङ्क आन्ना स्यामुहाङ्डानि। 22हाङ् खिरिस्ट येसुमि सॆङ्सॆङॆ याॽमिचिऎ हाङ् रोमि हाङ्मि हाङ्खिम्पि पेन्खुबाचिऎ सङ्क स्यामुहाङ्डानि। 23पारभु येसु खिरिस्टमि नाम्नावाँ आन्नानुङ् लिर।
© 2023, Wycliffe Bible Translators, Inc. and Nepal Bible Society