રોમનોનેં પત્ર 14
14
કઇના યે મનખ ના બારા મ ગલત નેં વિસારવું
1ઝી વિશ્વાસ મ કમજોર હે, હેંનેં તમારી સંગતિ મ લેં લો, પુંણ ખાવા ની વસ્તુ ઇપેર હેંનેં હાતેં બબાલ નહેં કરો કે હેંનેં હું ખાવું જુગે અનેં હું નેં ખાવું જુગે. 2કેંમકે કેંનેંક નેં એંવો વિશ્વાસ હે, કે બદ્દીસ ખાવા ની વસ્તુ સહી હે, પુંણ ઝી મનખ વિશ્વાસ મ કમજોર હે, વેયુ લીલુ સાક-ભાજીસ ખાએ હે. 3અનેં ઝી કુઇ મનખ બદ્દી ખાવા ની વસ્તુ ખાએ હે, હેંનેં હેંના બારા મ ગલત નહેં વિસારો, અનેં ઝી કુઇ મનખ બદ્દી ખાવા ની વસ્તુ નહેં ખાતું, હેંના બારા મ હુંદં ગલત નહેં વિસારો. કેંમકે પરમેશ્વર ખાવા વાળા નેં અનેં નેં ખાવા વાળા નેં બેય નેં ગરહણ કરે હે. 4અનેં તમું બીજા ના નોકર નો નિયા નહેં કરો, વેયુ વિશ્વાસ મ ટકેં રે કે નેં ટકેં રે, ઇયે હેંના માલિક નિસ જવાબદારી હે. પુંણ હેંનેં ટકાવેં રાખવા મ આવહે, કેંમકે પ્રભુ હેંનેં વિશ્વાસ મ મજબૂત કરેં સકે હે.
5ઇવીસ રિતી કુઇ મનખ તે એક વાર નેં બીજા વાર કરતં ખાસ માને હે, અનેં કુઈક મનખ બદ્દ વારં નેં એક હરકા માને હે. એંતરે હારુ દરેક મનખ પુંતાનાસ મન મ નકી કર લે. 6ઝી કઇનાક એક વાર નેં ખાસ માને હે, વેયુ પ્રભુ નું માન કરવા હારુ માને હે, અનેં ઝી બદ્દી ખાવા ની વસ્તુ ખાએ હે, વેયુ પ્રભુ નું માન કરવા હારુ ખાએ હે, કેંમકે વેયુ ઝી કઇ કરે હે હેંનેં મ પરમેશ્વર નું ધનેવાદ કરે હે. અનેં ઝી કુઇ ખાવા ની બદ્દી વસ્તુ નહેં ખાતું, વેયુ હુંદું પ્રભુ નું માન કરવા હારુ નહેં ખાતું, અનેં પરમેશ્વર નું ધનેવાદ કરે હે. 7કેંમકે આપું બદ્દ પ્રભુ ન હે, એંતરે હારુ આપડી મહું નેં તે કુઇ પુંતાના હારુ જીવતું, અનેં નહેં તે કુઇ પુંતાના હારુ મરતું. 8કેંમકે અગર આપું જીવતં હે, તે પ્રભુ હારુ જીવતં હે, અનેં અગર મરજ્યે હે, તે પ્રભુ હારુ મરજ્યે હે, તે ફેંર આપું જીવજ્યે કે મરજ્યે, પ્રભુ નસ હે. 9કેંમકે ઇસુ મસીહ એંતરે હારુ મર્યો અનેં મરેંલં મહો પાસો જીવતો થાએંજ્યો, કે વેયો મરેંલં નો અનેં જીવતં નો, બેય નો પ્રભુ કેંવાએ. 10તે ફેંર તમું હુંકા હારુ બીજં મનખં ના બારા મ ગલત વિસારો હે? અનેં તમું ફેંર હુંકા બીજં વિશ્વાસી મનખં નેં નકમ્મ હમજો હે? પરમેશ્વર આપડો બદ્દનો નિયા કરહે. 11કેંમકે પવિત્ર શાસ્ત્ર મ લખેંલું હે,
“પ્રભુ કે હે, મારા જીવ ના હમ, કે બદ્દ મનખં માર હામેં ઢેંસુંણ માંડ દેંહે, અનેં બદ્દ પરમેશ્વર નેં કબુલ કરહે.” 12તે ફેંર આપડે બદ્દનેં પુંત-પુંતાનં લેંખં-ઝુંકં પરમેશ્વર નેં આલવં પડહે.
કઇના વિશ્વાસી મનખ હારુ ઠોકર નું કારણ નહેં બણો
13એંતરે હારુ હાવુ થી આપું એક-બીજા ના બારા મ ગલત વિસારવા નું સુંડ દીજ્યે, અનેં તમું ઇયુ નકી કર લો કે કુઇ બી બીજા વિશ્વાસી મનખ હારુ ઠોકર ખાવાનું કારણ નેં બણે. 14હૂં જાણું હે, અનેં પ્રભુ મ મનેં ખાતરી હે કે કઇ બી ખાવા ની વસ્તુ પુંતે અશુદ્ધ નહેં, પુંણ ઝી હેંનેં અશુદ્ધ હમજે હે, હેંનેં હારુ અશુદ્ધ હે. 15અગર તમારા ખાવા થકી બીજા મનખ નેં મન દુઃખ થાતું વેહ, એંનો મતલબ તમું પ્રેમ ને પરમણે નહેં સાલતં. અગર તમારા ખાવા ને બદલે એક મનખ વિશ્વાસ કરવો સુંડ દે હે, ઝેંના તારણ હારુ હુંદો ઇસુ મસીહ મર્યો હે, તે તમું વેયે વસ્તુ નહેં ખો. 16એંતરે હારુ તમું ઝી કરેં રિય હે વેયુ તમારી નજર મ તાજું હે, પુંણ કુઇ બીજુ હેંનેં ભુંડું માનેં હે, તે હેંનેં નહેં કરો. 17કેંમકે પરમેશ્વર ના રાજ મ ખાવું-પીવુંસ નહેં, પુંણ ધાર્મિકતા, મેળ-ભાવ અનેં આનંદ હે ઝી પવિત્ર આત્મા આલે હે. 18ઝી કુઇ ઇવી રિતી થી મસીહ ની સેવા કરે હે, હેંનેં થી પરમેશ્વર ખુશ થાએ હે, અનેં બીજં મનખં હુંદં હેંનું માન કરે હે. 19એંતરે હારુ આપું હમેશા એંવું કરવા ની કોશિશ કરજ્યે, ઝેંનેં થકી બદ્દ મ મેળ-મળાવ અનેં એક બીજા નો વિશ્વાસ મજબૂત થાએ. 20ખાવા ના નેં લેંદે પરમેશ્વર ના કામ મ રુંકાવટ નહેં લાવો, બદ્દું ખાવાનું તે તાજું હે, પુંણ અગર તમારું વેયુ ખાવાનું બીજા મનખ નેં પાપ મ પડવા નું કારણ બણે હે, તે વેયુ ભુંડું હે. 21ભલાઈ ની વાત તે ઇયે હે, કે તમું માહ નહેં ખો, અનેં ઇવી વસ્તુ નહેં પીયો ઝેંનેં થી લશો સડતો વેહ. અનેં નહેં કઇ એંવું કરો, ઝેંનેં થી બીજુ મનખ પાપ મ પડેં જાએ. 22ઇની બદ્દી વાતં ના બારા મ તમું ઝી કઇ માનતં વેહ, હેંનેં તમારા અનેં પરમેશ્વર ના વસ મસ રેંવા દો. ધન્ય હે વેયુ મનખ ઝેંનું મન બદ્દી વસ્તુ ખાવા હારુ અગવાઈ કરે હે. 23પુંણ ઝી મન મ શંકા રાખેંનેં ખાએ હે, વેયુ દંડ ને લાએંક બણેં સુક્યુ હે, કેંમકે વેયુ વિશ્વાસ થકી નહેં ખાતું, અનેં ઝી કઇ વિશ્વાસ થકી નહેં, વેયુ પાપ હે.
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.