Kejadian 2
2
1At Allah en ’bogorl ebe emin, di a’ge yu a’ge ebam welago a’ge emin, ’gwiang ebe emin, di a’ge yu a’ge ebam welago a’ge emin, ’berlegat ologun ’balogo walhesi. 2#Kel. 20:11#Ibr. 4:4,10Asogo walhesirik, agauwa sabit a’ge pam arat ologun ’balogo walhesirik e, set hwalogo weat welaga. 3Allah en asogo walhil lasu lagarik agauwa sabit a’ge pam ologun ’balogo set hwalogo weat welaga. Asogo weat welaga ai en e, disogo egei,
“Agauwa sabit a’ge pam e, an nu’gwarek nebaget pagathwerlegirikmu re, obap pegi o,” oluk egei. 4Allah en ’bogorl ’gwiang walhesi wene re, aiyat o.
Allah en yabuk onuk Eden agauwak hwalogo pesi wene
Nenaik ’gain Onuk Logo a’ge Allah en ’bogorl ebe emin, di a’ge yu a’ge ebam welago a’ge emin, ’gwiang ebe emin, di a’ge yu a’ge ebam welago a’ge emin, ’berlegat walhesirik e, 5at en moru ’belakpou wom erlagat, owia’ge libom a’ge logon erlagat, ye, aphwami yabuk tugulom a’ge enebe ogo erlagat ai en e, e’gen owi ’baktak erlagat welaga. 6Asogo a’geat de, ik naduk ’gwiangma en ik a’gul hwiakho liplau wagarik e, ’gwiang arat sakhorak pesi.
7 #
1Kor. 15:45
Pobuk Nenaik ’gain Onuk Logo a’ge Allah en ’gwiang weisogo logon wesirik e, ap mesigat nak walhesirik e, set enebe enelalugap enebiso a’ge e’biang ele’gwe pusogo ’gwelebak pesi. Asogo tegeimu, ap ano arat elaluk aga.
8Nenaik ’gain Onuk Logo a’ge Allah en asogo tegeirik e, yabuk onuk Eden agauwak hwalogo mo orlu ago hegitsogo pesi. Asogo pesirik, ap walhesi a’ge ano ogo ebayat pesi. 9#Wah. 2:7; 22:2,14Asogo pesirik e, di agan yu agan modok op a’ge e’gen op osolom a’ge ’berlegat ’baktegei. Asogo ’baktegeimu re, e ebano ’burl e’gerlakma re, e e’gen no’gwiam enebe enelalugap enebiso a’ge ’baktagalat, e pema e’gen no’gwiam di wene yu wene op a’ge enaluk agalat, wiak a’ge enaluk agalat, tiso a’ge ’baktagalat, tegei.
10Yabuk ai obat sakhorak pasu lemagoluk, ik yabukmu en elaruk lebikpesimu, lasu laga. Asogo libagalat e, yabuk abel o’borl akhit en e, ik ebe ugan pam dugwalogo lasu laga. 11Ik dugwalak ai mesik onuk e, Pison. Ik ai ’bulogo lasulat e, ’gwiang Hawila akhit wali’gogo lasu laga. 12O eba re, emas op a’ge emin, a’bosu e’ben op a’ge emin, helebe’gen o’go a’bik a’ge emin e, edip o eba a’geat wogwi. 13Ye, ik dugwalak mesik ’birenak a’ge re, onuk Gihon. Ik ai ’bulogo lasulat e, ’gwiang Kus eba wi-waling ebane perakpesi. 14Ye, ik dugwalak mesik henaganak a’ge ai re, onuk Tigris. Ik ai ’bulogo lasulat o’butmu re, ’gwiang Asyur abel mo orlu ago hegitsogo perakpesimu lasu. Ye, ik dugwalak mesik uganak a’ge onuk e, Efrat.
15Pobuk Nenaik ’gain Onuk Logo a’ge Allah en e, ap ano en, yabuk e e’gen yabuk Eden togulat, pekharok welat, togu lemagoluk eba pesi. 16Asogo pesirik, Allah en ap ano disogo mo’gulesi,
“Hat e, yabukmu owi yogo a’ge yema ’berlegat e’gen ’balogo nasu lemin o. 17Asogo a’geat de, e e’gen no’gwiam di wene yu wene op a’ge wiak a’ge enaluk ago a’ge yu nak e, e’gen mesik ’balogo nagun no yo. Ye, asogo a’geat de, hat nagun holuk e, nasukhwe erianoat hebe warorogun o,” oluk mo’gulesi.
18Asogo mo’gulesirik, mesik disogo mo’gulesi,
“Ap ai emategat ilmu wiaksogo wolom ai re, wiak o. At lethasu lemagoluk are at e’birek hegit holuk at ebaget mesik walhaik o,” oluk egei. 19Asogo egeirik e, ’gwiang weisogo logon wesirik e, wam, tue, ’baik, di a’ge yu a’ge e’gik erlak oruak ’berlegat ’gwiangma wolom a’ge emin, ’bogorl likholuk ’burl darak nosolom a’ge emin, agauwak heli’gogo pesi. Asogo agauwak hele’gegeirik, ’berlegat onuk lo’bok ap ano en,
“Ai a’ge onuk ’ge tualu hegit,” oluk pobi tuagoluk e’bek woluk waga. Edip pam en, wam, tue, ’baik, e’gik erlak oruak ’gwiangma a’ge emin, ’bogorl likholuk ’burl o’gwe darak nosolom a’ge emin, onuk lo’bok tualuagoluk e’bek woluk wagama onuk tualegeimu onuk tualaga ai o.
20Asogo e’bek woluk wagama, at ap ano en, wam, tue, ’baik, e’gik erlak oruak ’berlegat ’gwiangma a’ge emin, ’bogorl likholuk ’burl o’gwe darak nosolom a’ge emin, onuk tualegei. Asogo a’geat de, wam, tue, ’baik, eba a’ge logon at are lethasulom a’ge, at ’gela’ge mesik modok erlak welaga. 21Asogo agama re, at Nenaik ’gain Onuk Logo a’ge Allah en ap ano nogo lebeksogo uagoluk tegeimu re, arat nogosi. Asogo nogosokhwe, at Nenaik ’gain Onuk Logo a’ge Allah en e, ap ano abeluak a’ge mesik ’gegilogo wesirik e, pobuk ebale’gwe eino a’ge dopnorak pesi. 22Abeluak ano Allah en e, agauwak heli’gogo, hwe heli’gogo pesirik, ap ano wogosu aga. 23Asogo wogosu agama re, at ap ano en e,
“Yogo, hat yu re, huak an nuak a’geat o. Ye, heino an neino a’ge atma no oluk e, an nebe ’gela’geat o. Allah en an nebe a’ge wesirik agauwak hele’gegei ai en, hat honuk e, hwe o,” oluk tualegei.
24 #
Mat. 19:5; Mrk. 10:7,8; 1Kor. 6:16; Efe. 5:31 Asogo tegei ai en e, ap en e, aik ia ugonoboluk, ugwe enemin obat welat, enebe ’biren a’geat de, mesigat nagat wolom o.
25Is ap emin, hwe emin, ai e’birek enage’golom welegesa a’geat de, ene’gerli erlagat welegesa o.
Одоогоор Сонгогдсон:
Kejadian 2: Wul
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү