Дуулал 42
42
ХОЁРДУГААР НОМ
(Дуулал 42–72)
Бурханыг хүсэмжлэхүй
Удирдаачид. Корагийн хөвгүүдийн маскил.
1Буга урсгал усыг хүсэхийн адил
Бурхан Таныг сэтгэл минь хүснэм
2Бурханаар, амьд Бурханаар
Сэтгэл минь цангамуй
Би хэзээ явж, Бурханд бараалхах вэ?
3Хүмүүс надад
“Чиний Бурхан хаана байна?” гэж өдөржин хэлэхэд
Нулимс минь өдөр шөнөгүй миний хоол болов.
4Урьд нь би баяр тэмдэглэж буй
олон түмний дунд явж,
Баяр хийгээд талархал өргөх уухайгаар
Тэднийг Бурханы өргөө уруу
Цуваагаар дагуулдаг байлаа.
Эдгээр зүйлийг л би санаж,
Сэтгэлдээ шаналан өвдөж байна.
5Сэтгэл минь ээ, чи юунд цөхөрнө вэ?
Яагаад чи миний дотор үймэрнэ вэ?
Бурханд найд,
Учир нь Түүний оршихуйн авралын төлөө
Би Түүнийг дахин магтах болно
6Бурхан минь ээ,
Сэтгэл минь миний дотор цөхөрсөн байна
Тиймээс би Таныг Иордан нутаг,
Хермон ба Мизар уулаас дурсдаг
7Таны хүрхрээнүүдийн дуунд
Оёоргүй гүн оёоргүй гүнийгээ дууддаг.
Таны давалгаа, долгио намайг нөмрөв.
8ЭЗЭН өдрөөр энэрэл хайраа тушаана
Шөнөөр Түүний дуу болох
Амьдралын минь Бурханд хандсан залбирал
Надтай хамт байна
9Өөрийн минь хад болсон Бурханд би
“Юунд Та намайг мартсан бэ?
Юунд би дайсны дарангуйллаас болж
Гашуудан явна вэ?” гэж хэлнэ
10Ясыг минь бяцлах шиг
Өстнүүд минь намайг буруутгана.
Тэд өдөржин надад
“Бурхан чинь хаана байна?” гэж хэлнэ.
11Сэтгэл минь ээ, чи юунд цөхөрнө вэ?
Яагаад чи дотор минь гасална вэ?
Бурханд найд!
Учир нь би миний Бурхан, миний тусламж
Түүнийгээ л магтах болно.
Одоогоор Сонгогдсон:
Дуулал 42: АБ2013
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Ariun Bible © Mongolian Union Bible Society 2013.