Ma‸htehˍ li‸ 24-ын алдартай Библийн эшлэлүүд

Хуваалцах

Haiˬ ve awˬ ceuˬ cawˬ maˇ la ve pa taw, chaw maˇ maˇ ha‸ pehnˇ ve teˇ ceuˬ i kʼai yawnˇ kʼai tuˬ yoˬ. Ya‸ hkʼaˇ, awˬ leh hkʼa gaˬ yeˬ chehˇ ve chaw lehˬ, htaiˍ hkʼaw‸ ve hta‸ gʼa tuˬ yoˬ.

Chaw ceuˬ hkʼa peu-eˬ awˬ pon shaˉ hkiˆ hpeh‸ tuˬ, Gʼuiˬsha ve mvuhˇmiˬ hta‸ caˉ da‸ ve ha lehˬ ve bon hkawˇ chi, miˬ guiˬ hkʼoˆ teˇ kaˬ le le lo ca maˍ piˇ tuˬ yoˬ. Oˇ ve hkʼaw‸ nawˉ, awˬ leh meuˇ gaˬ la tuˬ yoˬ.

Ma‸ bawˆ ve leh bawˆ da‸-a teh‸ te chehˇ ve awˬ lawn hta‸ nawˬ hui gʼa kaˇ tuˬ yoˬ. Ya‸ hkʼaˇ, nawˬ hui maˇ gʼa kawˆ cheˇ tuˬ shaˍ ti‸ taˍ-o‸. Awˬ lawn kʼo, awˬ ceuˬ chi teˇ hpaˍ hpeh‸ la ve htawˇ, awˬ leh meuˇ maˇ gaˬ sheˍ.

Chaw teˇ ceuˬ leh teˇ ceuˬ, mvuhˇmiˬ teˇ peˆ leh teˇ peˆ ya‸ da‸ jiˆ da‸ tuˬ yoˬ. Meu‸ ve kaˆ ve leh miˬ hiˆ ve teˇ hpaˍ teˇ kaˬ peuˬ teˇ kaˬ lo hpeh‸ la tuˬ yoˬ. Chi hkʼa peu-eˬ lehˬ, tu‸ ve hkanˍ ve awˬ hkuiˉ puiˍ ceh tiˉ hpeh‸ sheˍ ve yoˬ.

Mvuhˇ naw ma leh miˬ naˆ ma mehˉ kʼai tuˬ yoˬ. Ya‸ hkʼaˇ, ngaˬ ve tawˇ hkawˇ lehˬ maˇ mehˉ kʼai taˬ.

Awˬ lawn kʼo, chaw maˇ maˇ ngaˬ ve awˬ meh hta‸ pfuhˇ laˬ leh, Ngaˬ lehˬ Hkri‸ yoˬ teh‸ kʼoˆ leh, chaw maˇ maˇ hta‸ heˍ yuˬ beˬ yuˬ tuˬ yoˬ.

Oˇ htaˇ, fawˉ mehˍ ve hta‸ gʼa hkanˍ tuˬ, shu nawˬ hui hta‸ chiˇ a‸ piˇ leh, nawˬ hui hta‸ tiˇ pehˍ tuˬ yoˬ. Ngaˬ ve awˬ meh hta‸ pa taw chaw ceuˬ hkʼa peu-eˬ nawˬ hui hta‸ canˇ tuˬ yoˬ. Oˇ htaˇ, chaw maˇ maˇ hkui htiˇ poˬ paiˍ tuˬ yoˬ. Yawˇ hui teˇ gʼaˇ leh teˇ gʼaˇ chiˇ a‸ da‸ leh, teˇ gʼaˇ leh teˇ gʼaˇ canˇ da‸ tuˬ yoˬ. Maˇ heˆ heˆ ve tcuh kaˍ paˍ teˇ hpaˍ htawˇ maˇ maˇ tawˆ la leh, chaw maˇ maˇ hta‸ heˍ yuˬ beˬ yuˬ tuˬ yoˬ.

Yeˍsuˆ yawˇ hui hta‸ kʼaw‸ kʼoˆ piˇ ve, Chaw teˇ gʼaˇ ka‸ nawˬ hui hta‸ maˇ gʼa heˍ yuˬ beˬ yuˬ tuˬ, shaˍ ti‸ taˍ-o‸.

Hkʼe te leh, nawˬ hui htawˇ hkʼa deh‸ gu taˍ hehnˇ taˍ-o‸. Awˬ lawn kʼo, naw hui maˇ dawˇ maˇ gaˇ ve awˬ yanˇ awˬ hkʼaw lo, chaw yaˇ ve Yaˇ hpu kʼaw‸ ya‸ la tuˬ yoˬ.

Hkʼe te leh, nawˬ ve Awˬ jawˇmawˇ hkʼaˬ ve teˇ nyi kʼaw‸ gaˬ la tuˬ ve hta‸ nawˬ hui maˇ shiˍ ve pa taw shaw taˍ-o‸.

Awˬ nyi awˬ haˉ oˇ ve hta‸ chaw teˇ gʼaˇ ka‸ maˇ shiˍ. Mvuhˇ naw ma tcuh yaˇ hui ka‸, Yaˇ hpu ka‸ maˇ shiˍ. Awˬ pa teˇ gʼaˇ tiˉ shiˍ ve yoˬ.

Awˬ lawn kʼo, maˇ heˆ heˆ ve Hkri‸ leh maˇ heˆ heˆ ve tcuh kaˍ paˍ teˇ hpaˍ tawˆ la tuˬ yoˬ. Yawˇ hui lehˬ, hpeh‸ ve kʼo leuˆ yuˬ taˍ ve chaw teˇ hpaˍ hta‸ htawˇ heˍ yuˬ beˬ yuˬ gʼa tuˬ, uiˍ ve anˇ tuˬ leh awˬ heˆ teˇ hpaˍ hta‸ te maˍ piˇ tuˬ yoˬ.

Chaw yaˇ ve Yaˇ hpu kʼaw‸ ya‸ la tuˬ ve lehˬ, Noˉa‸ ve awˬ co-e htaˇ hkʼa shuˍ shuˍ hpeh‸ tuˬ yoˬ. Awˬ lawn kʼo, Noˉa‸ haw lo‸ kʼoˍ hkʼaw lo‸-e ve teˇ nyi hkʼa gaˬ, iˉ kaˆ maˇ htonˍ sheˍ ve awˬ yanˇ awˬ hkʼaw lo, yawˇ hui lehˬ caˇ ve dawˬ ve, awˬ hpawˇ awˬ miˇ heuˆ da‸ leh ka piˇ ve, chi hkʼe te chehˇ ve yoˬ. Iˉ kaˆ htonˍ la leh yawˇ hui hta‸ poˬ chiˇ veu htaˇ hkʼa gaˬ yawˇ hui maˇ shiˍ ve hkʼe, chaw yaˇ ve Yaˇ hpu kʼaw‸ ya‸ la ve teˇ yanˇ, chi hkʼa shuˍ shuˍ hpeh‸ tuˬ yoˬ.